ລາຍລະອຽດຂ່າວ
ລາວໂຕໂຢຕ້າ ພ້ອມເຕັມທີ່ ກ່ອນພົບ Hougang United ຈາກສິ່ງກະໂປ ໃນລາຍການ AFC Cup ຕອນແລງມື້ອື່ນ
ຂຽນເມື່ອ: 10/02/2020 15:02 | ໂດຍ: ເພຣເມັກເກີ | ອ່ານ: 173 ຄັ້ງ

      ການແຂ່ງຂັນບານເຕະລາຍການ AFC cup 2020 ຮອບແບ່ງກຸ່ມ ກຸ່ມ F , ນັດທໍາອິດຈະເປີດສາກຂຶ້ນ ໃນເວລາ 18:30 ທີ່ ສະໜາມກິລາແຫ່ງຊາດ ຫຼັກ 16 ເຊິ່ງເປັນການເປີດບ້ານຂອງ ແຊ້ມລາວພຣີເມຍລີກ ໃນລະດູການ 2019 ລາວໂຕໂຢຕ້າ FC ຕ້ອນຮັບການມາຢາມຂອງ ສະໂມສອນ Hougang United ຈາກສິງກະໂປ

       ກ່ອນການແຂ່ງຂັນໄດ້ມີການຖະແຫຼງຂ່າວຄວາມພ້ອມຂອງທັງ 2 ທີມ ໃນເວລາ 12:00ຂອງວັນທີ 10/02/2020 ທີ່ສະຫະພັນບານເຕະແຫ່ງຊາດລາວ (ສຕລ) ໂດຍຄູຝືກແລະຫົວໜ້າທີມຂອງທັງ 2 ທີມ.

      ທ່ານ Clement Teo ຫົວໜ້າຄູຝຶກຂອງສະໂມສອນ Hougang United ກ່າວວ່າ “ສຳລັບການເຂົ້າຮ່ວມແຂ່ງຂັນໃນລາຍການ AFC Cup ຄັ້ງນີ້ເປັນຄັ້ງທຳອິດຂອງສະໂມສອນພວກເຮົາທີ່ເຂົ້າຮ່ວມໃນລາຍການແຂ່ງຂັນລະດັບນາໆຊາດ, ແຕ່ພວກເຮົາກໍ່ໄດ້ມີການກະກຽມທີມເປັນເວລາ 2 ເດືອນກວ່າມາເຖິງປະຈຸບັນພວກເຮົາມີຄວາມພ້ອມເຕັມທີ່ ແລະເຊື່ອໝັ້ນວ່າພວກເຮົາຈະສາມາດສ້າງຜົນງານໄດ້ດີໃນລາຍການນີ້ ແລະຫວັງຈະເກັບກ່ຽວປະສົບການໃຫ້ກັບທີມງານແລະນັກເຕະ ເພື່ອຈະພັດທະນາຕົນເອງໃນອານາຄົດ”

      ສ່ວນທ່ານ Jun Fukuda ຫົວໜ້າຄູຝຶກຂອງສະໂມສອນລາວໂຕໂຢຕ້າ ໄດ້ໃຫ້ສຳພາດກັບສື່ມວນຊົນວ່າ “ເລີ່ມແຕ່ຕົ້ນເດືອນທັນວາ 2019 ເປັນຕົ້ນມາພວກເຮົາກໍໄດ້ມີການກຽມທີມ ແລະໄດ້ລົງທຳການແຂ່ງຂັນອຸ່ນເຄື່ອງຫຼາຍນັດໂດຍສະເພາະກັບບັນດາສະໂມສອນໃນ ໄທລີກແລະພວກເຮົາກໍ່ເຫັນໄດ້ການພັດທະນາທີ່ດີຂອງທີມ ແລະເປັນໄປຕາມແຜນທີ່ວາງເອົາໄວ້, ເຖິງແມ່ນວ່າໃນລະດູການນີ້ສະໂມສອນຂອງພວກເຮົາຈະມີການຜ່າຕັດທີມ ຄັ້ງໃຫຍ່ ເພາະວ່າຜູ້ຫຼິ້ນຕົວຫຼັກໃນທີມຫຼາຍຄົນໄດ້ມີການຍ້າຍທີມ ແຕ່ການສ້າງທີມຂອງພວກເຮົາຍັງອີງໃສ່ ປັດຊະຍາ ແລະ ເປົ້າໝາຍຂອງຄືເກົ່າ ທີ່ເພີ່ມເຕີມຄືຜູ້ຫຼິ້ນໃໝ່ ທີ່ປ່ຽມດ້ວຍສັກກະຍະພາບ ແລະລະບົບການຫຼິ້ນລວມທັງເຕັກນິກທີ່ດີຂຶ້ນກວ່າເກົ່າ, ມາຮອດປະຈຸບັນ ບັນດານັກເຕະໃນທີມສາມາດເຂົ້າໃຈຮູບແບບແລະວິທີການຫຼິ້ນຂອງທີມຫຼາຍຂຶ້ນ ແລະເກມໃນມື້ອື່ນກໍ່ຈະເປັນອີກເກມໜຶ່ງທີ່ຮັບຮອງໄດ້ວ່າຈະເປັນເກມທີ່ແຟນບານຈະບໍ່ຜິດຫວັງ”

       ນອກຈາກນັ້ນ ພິທັກ ກອງມາທິລາດ ຜູ້ຫຼິ້້ນຄົນສຳຄັນຂອງສະໂມສອນລາວໂຕໂຢຕ້າ ກໍ່ໄດ້ກ່າວວ່າ “ຈາກທີ່ມີໂອກາດໄດ້ໄປເກັບກ່ຽວປະສົບການທີ່ປະເທດໄທ ແລ້ວກັບມາຫຼິ້ນໃນລີກບ້ານເກີດຂອງຕົນ ໂດຍສະເພາະໄດ້ມີໂອກາດຮ່ວມທີມກັບສະໂມສອນລາວໂຕໂຢຕ້າຕົນເອງກໍ່ພະຍາຍາມຖ່າຍທອດ ປະສົບການທີ່ໄດ້ຈາກໄທລີກໃຫ້ກັບລຸ້ນນ້ອງ ພ້ອມສ້າງແຮງບັນດານໃຈໃຫ້ນັກເຕະໄວໜຸ່ມທັງຫຼາຍ ເຂົ້າໃຈວິຖີຂອງການເປັນກິລາອາຊີບຫຼາຍຂຶ້ນ, ສຳລັບເກມການແຂ່ງຂັນໃນມື້ອື່ນ ຂໍຮຽກຮ້ອງໃຫ້ ແຟນບານທີ່ເປັນຄົນລາວທຸກຄົນຈົ່ງພ້ອມໃຈກັນເຂົ້າມາຊົມມາເຊຍ ແລະສົ່ງກຳລັງໃຈໃຫ້ທີມລະດັບແຖວໜ້າຂອງປະເທດ ແລະທັງເປັນຕົວແທນຂອງສະໂມສອນບານເຕະລາວ ພວກເຮົາສັນຍາວ່າ ຈະພິສຸດໃຫ້ທ່ານເຫັນວ່າ ສະໂມສອນຂອງລາວກໍ່ສາມາດສູ້ກັບສະໂມສອນຕ່າງໆໃນລະດັບ ອາຊີໄດ້”

       ນອກຈາກນີ້ແລ້ວທ່ານ ໂພແກ້ວ ພິລາພັນເດດ ຜູ້ຈັດການທີມຂອງສະໂມສອນ ລາວໂຕໂຢຕ້າ ໄດ້ກ່າວກັບທີມຂ່າວພວກເຮົາວ່າ ເປົ້າໝາຍຂອງສະໂມສອນ ລາວໂຕໂຢຕ້າໃນລະດູການນີ້ ບໍ່ພຽງຈະຫຼິ້ນໃນຮອບແບ່ງກຸ່ມເທົ່ານັ້ນ ພວກເຮົາມີຄວາມຕັ້ງໃຈຫຼາຍໃນລະດູການນີ້.

       ສຳລັບການແຂ່ງຂັນ AFC Cup 2020 ສະໂມສອນຈາກລາວໄດ້ ສິດເຂົ້າຮ່ວມແຂ່ງຂັນທັງໝົດ 2 ທີມ ຄື Master 7 FC ທີ່ຕ້ອງໄດ້ລົງຫຼິ້ນໃນຮອບ Play off (ແຕ່ໜ້າເສຍດາຍບໍ່ສາມາດຜ່ານຮອບນີ້ໄປໄດ້) ແລະສະໂມສອນລາວໂຕໂຢຕ້າ ເຊິ່ງໄດ້ສິດເຂົ້າໄປຫຼິ້ນໃນຮອບແບ່ງກຸ່ມ ໂດຍ ນອນໃນກຸ່ມ F ເຊິ່ງປະກອບດ້ວຍ 4 ທີມ ຄື: ໂຮຈີມິນ ຊິດຕີ້ ຈາກ ສສ. ຫວຽດນາມ, Houganag United ຈາກສິງກະໂມ, ລາວໂຕໂຢຕ້າ ແລະ Yangong United ຈາກ ມຽນມ້າ.

      ຫວັງຢ່າງຍິ່ງວ່າ ແຟນບານລາວຈະຮ່ວມຊົມຮ່ວມເຊຍ ການແຂ່ງຂັນໃນນັດນີ້ຮ່ວມກັນ

ໂດຍ: ນັກຂ່າວເງົາ

ພາບຈາກ: Visitthiphong(Dee sler)




ຂ່າວລ່າສຸດ