ລາຍລະອຽດຂ່າວ
ນັກສຳມະນາກອນລາວ 24 ທ່ານ ສຳເລັດ ການຍົກລະດັບຫຼັກສູດຄູຝຶກເທຄວັນໂດ ລະດັບຊາດ
ຂຽນເມື່ອ: 03/02/2020 11:02 | ໂດຍ: ເພຣເມັກເກີ | ອ່ານ: 239 ຄັ້ງ

          ນັກສຳມະນາກອນລາວ ທັງໝົດ 24 ທ່ານ ສຳເລັດການຍົກລະດັບຫຼັກສູດຄູຝຶກກິລາເທຄວັນໂດ ລະດັບຊາດ ພ້ອມຕັ້ງໜ້າພັດທະນາກິລາເທຄວັນໂດ ໃນ 8 ແຂວງ ກັບ 1 ນະຄອນຫຼວງວຽງຈັນ ສູ່ມາດຕະຖານ ແລະ ຄວາມເປັນເລີດໃນອານາຄົດ.

          ເມື່ອວັນທີ 1 ກຸມພາ ຜ່ານມາ ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງຫຼວງພະບາງ ນະຄອນຫຼວງພະບາງ ໄດ້ມີການປິດກອງປະຊຸມຝຶກອົບຮົມຫຼັກສູດຄູຝຶກ ແລະ ກຳມະການຕັດສິນກິລາກະຕໍ້ລະດັບຊາດ ຂຶ້ນ. ໃຫ້ກຽດເປັນປະທານໂດຍ ທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງສຶກສາທິການ ແລະ ກິລາ, ຮອງປະທານ ຄອລ ທັງເປັນຫົວໜ້າຄະນະຮັບຜິດຊອບຊີ້ນຳລວມ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ ພ້ອມດ້ວຍຄະນະ, ຕ່າງໜ້າຈາກສະຫະພັນກິລາເທຄວັນໂດເແຫ່ງຊາດລາວ, ບັນດານັກສຳມະນາກອນຄູຝຶກ ທັງໝົດ 37 ທ່ານ ເປັນຍິງ 7 ທ່ານ ເຂົ້າຮ່ວມ.

          ໂອກາດດັ່ງກ່າວ, ທ່ານ ບຸນມາ ທຳມະວົງ ຫົວໜ໊າພະແນກພັດທະນາກິລາ ກົມກິລາລະດັບສູງ ກະຊວງສຶກສາທິການແລະ ກິິລາ ກໍ່ໄດ້ຂຶ້ນລາຍງານກ່ຽວກັບການຝຶກອົບຮົມຄູຝຶກເທຄວັນໂດ ລະດັບຊາດ ໃນຄັ້ງນີ້ ແມ່ນເລີ່ມເປັນເວລາ 5 ວັນ ລະຫວ່າງວັນທີ 28 ມັງກອນ ຫາ 1 ກຸມພາ 2020 ມີນັັັັກສຳມະນາກອນເຂົ້າຮ່ວມທັງໝົດ 24 ທ່ານ ທີ່ມາຈາກ 8 ແຂວງ ກັບ 1 ນະຄອນຫຼວງວຽງຈັນ ປະກອບມີ ນະຄອນຫຼວງວຽງຈັນ, ແຂວງອຸດົມໄຊ, ແຂວງຊຽງຂວາງ, ແຂວງສະຫວັນນະເຂດ, ແຂວງຈຳປາສັກ, ແຂວງຄຳມ່ວນ, ແຂວງບໍລິຄຳໄຊ, ແຂວງບໍ່ແກ້ວ ແລະ ແຂວງຫຼວງພະບາງ. ໂດຍນັກສຳມະນາກອນ ທັງໝົດ ແມ່ນຈະໄດ້ຮຽນຮູ້ພາກທິດສະດີ ປະກອບມີ ປະຫວັດຄວາມເປັນມາຂອງກິລາເທຄວັນໂດ, ມາດຖານຂອງຄູຝຶກ, ວິທະຍາສາດການກິລາ, ພື້ນຖານເຕັກນິກກິລາເທຄວັນໂດ, ຫຼັກການພັດທະນາເທຄວັນໂດ, ຫຼັກການສິດສອນ ແລະ ການຝຶກຊ້ອມ, ທັກສະການຟ້ອນປຸ່ມເຊ, ວິທີການວາງແຜນການຝຶກແອບໄລຍະທົ່ວໄປ, ສັ້ນ, ກາງ ແລະ ໄລຍະຍາວ ແລະ ກະຕິການ 24 ຂໍ້ຂອງກິລາເທຄວັນໂດ ແລະ ພາກປະຕິບັດຕົວຈິງ ຍັງໄດ້ຮຽນວິທີການອົບອຸ່ນຮ່າງກາຍ, ເຕັກນິກຂັ້ນພື້ນຖານ ປະເພດຕໍ່ສູ້ ແລະ ການຂຽນແຜນການຝຶກແອບ. ນອກຈາກນັ້ນ, ຍັງມີການສອບເສັງ ພາກທິດສະດີ ແລະ ພາກປະຕິບັດຕົວຈິງ. ກອງປະຊຸມຄັ້ງນີ້ ສາມາດຕີລາຄາໄດ້ວ່າ ນັກສຳມະນາກອນໄດ້ມີຄວາມສົນໃຈ ແລະ ເອົາໃຈໃສ່ຕໍ່ຫົວຂໍ້ຕ່າງໆທີ່ວິທະຍາກອນໄດ້ນຳມາສະເໝີ, ໄດ້ມີການແລກປ່ຽນຄວາມຮູ້, ປະສົບການໃນທ້ອງຖິ່ນ ແລະ ສະໂມສອນຂອງຕົນແກ່ຜູ້ອື່ນຮັບຊາບ. 

          ການຝຶກອົບຮົບຄັ້ງນີ້ ແມ່ນໄດ້ຮັບກຽດເປັນວິທະຍາກອນໂດຍ ທ່ານ ຈັນທະວົງ ປັນຍາສິລິ ແລະ ທ່ານ ຈິງຈັງວຸ ວິທະຍາກອນຈາກສະຫະພັນກິລາເທຄວັນໂດແຫ່ງຊາດລາວ ຮັບຜິດຊອບບັນຍາຍຫຼັກສູດຄູຝຶກ. ນອກຈາກນັ້ນ, ພິທີປິດດັ່ງກ່າວ ຍັງໄດ້ມີການມອບໃບຢັ້ງຢືນ ໃຫ້ແກ່ນັກສຳມະນາກອນ ທັງໝົດ 24 ທ່ານ ນຳອີກ ໃຫ້ກຽດມອບໂດຍ ທ່ານ ສົມພູ ພົງສາ, ທ່ານ ແສງພອນ ພົນອາມາດ ແລະ ທ່ານ ຊາຍສະຫວັນ ຈັນມານິດ

 

ໂດຍ: ວັນສົດໃສ