ລາຍລະອຽດຂ່າວ
ມາສເຕີ ຕ້ານຄວາມແຂງແກ່ນ ສະເວຣ່ຽງ ບໍ່ໄຫວ ຖືກຖະຫຼົ່ມ 0-3 ລາຍການ ເອເອັບຊີ ຄັບ 2020
ຂຽນເມື່ອ: 30/01/2020 16:01 | ໂດຍ: ເພຣເມັກເກີ | ອ່ານ: 239 ຄັ້ງ

      ສະໂມສອນ ມາສເຕີ ເຊເວັນ ເອັບຊີ ຜິດຫວັງໃນຮອບ 2 ຫຼັງຕ້ານຄວາມແຂງແກ່ນ ທີມສະເວຣ່ຽງ (Svay Rieng) ທີມເກັ່ງແຊ໋ມລີກຈາກປະເທດກຳປູເຈຍ ຖືກຖະຫຼົ່ມໄປແບບຂາດຮອຍ 0-3 ປະຕູ ສະຫຼຸບຜົນ 2 ນັດ ມາສເຕີ ເສຍທັງນອກບ້ານ ແລະ ໃນບ້ານລວມ 1-7 ປະຕູ ຕົກຮອບຄັດເລືອກ ໃນລາຍການເຕະບານຊິງແຊ໋ມອາຊີ ຫຼື ເອເອັບຊີ ຄັບ 2020.

      ເມື່ອວັນທີ 29 ມັງກອນ ຜ່ານມາ ທີ່ສະໜາມກິລາແຫ່ງຊາດ (ຫຼັກ 16), ໄດ້ມີການແຂ່ງຂັນເຕະບານ ເອເອັບຊີ ຄັບ (AFC Cup) ປະຈຳປີ 2020 ຮອບຄັດເລືອກ ນັດທີ 2 ສະໂມສອນ ມາສເຕີ ເຊເວັນ ເອຟຊີ ຮອງແຊ໋ມ ລາວ ພຣີເມ໋ຍລີກ 2019 ເປີດບ້ານພົບກັບ ສະໂມສອນ ສະເວຣ່ຽງ (Svay Rieng) ແຊ໋ມລີກສູງສຸດຂອງກຳປູເຈຍ ເມື່ອລະດູການ 2019 ມີກອງເຊຍຂອງທັງສອງສະໂມສອນ ກໍຄື ສອງຊາດ ເຂົ້າຮ່ວມຊົມ ແລະ ເຊຍ ຫຼາຍຮ້ອຍຄົນ

     ຜ່ານການແຂ່ງຂັນ ປະກົດວ່າຕະຫຼອດໄລຍະ 90 ນາທີ ທີມມາສເຕີ ເຊເວັນ ເອັບຊີ ສູ້ຄວາມແຂງແກ່ນ ຂອງທີມ ທີມສະເວຣ່ຽງ ບໍ່ໄຫວຖືກຖະຫຼົ່ມໄປແບບຂາດຮອຍ ເຖິງ 3 ປະຕູຕໍ່ 0 ໂດຍປະຕູໄຊຂອງທີມຢາມໄດ້ຈາກ Sam Oeun Pidor ນາທີ 22, Jean Marie Mbarga ນາທີ 45, Hoy Phallin 71 ເຮັດໃຫ້ທີມ ສະເວຣ່ຽງ ຊະນະນັດນີ້ ເປັນຄັ້ງທີ 2 ລວມຜົນ 2 ນັດ ຊະນະ 7-1 ປະຕູ ຜ່ານເຂົ້າຮອບແບ່ງກຸ່ມໄປຮ່ວມກຸ່ມ G ມີ Ceres–Negros ແຊ໋ມຈາກລີກຟິລິບປິນ ລະດູການ 2019, Than Quảng Ninh ອັນດັບ 3 ວີ-ລີກ ຫວຽດນາມ ລະດູການ 2019 ແລະ ບາຫລີ ຢູໄນເຕັດ ແຊ໋ມລີກອິນໂດເນເຊຍ.

      ຫຼັງຈາກນັ້ນ, ທ່ານ Corner Nestor ຫົວໜ້າຄູຝຶກຊາວ ໂຣມານີຂອງສະໂມສອນ ມາສເຕີ ເຊເວັນ ຍັງໄດ້ກ່າວວ່າ: ນັດນີ້ ຮູ້ສຶກເສຍໃຈ ແລະ ເສຍດ່າຍທີ່ສຸດ ເນື່ອງຈາກວ່າມີແຟນບານເຂົ້າມາຊົມເຊຍຫຼາຍທີ່ສຸດ ແລະ ນັກກິລາທຸກຄົນກໍໄດ້ຕັ້ງໃຈຫຼິ້ນໃຫ້ອອກມາດີທີ່ສຸດແລ້ວ ແຕ່ມີຄວາມຜິດພາດເກີດຂຶ້ນຫຼາຍໆ ໂດຍສະເພາະຍັງຂາດຄວາມແນ່ນອນ ແລະ ມາດຕະຖານຂອງທີມມາສເຕີ ເຊເວັນ ກໍຍັງໄກ ທີມ ສະເວຣ່ຽງ ຫຼາຍ ສະນັ້ນ ພວກເຮົາຍັງຈະຕ້ອງມີການປັບປຸງ ແລະ ແກ້ໄຂເພີ່ມຕື່ມອີກ ເພື່ອກຽມຄວາມພ້ອມ ເຂົ້າຮ່ວມແຂ່ງຂັນ ລາຍການ ເປບຊີ ລາວພຣີເມຍລີກ ເພື່ອສ້າງຜົນງານໃຫ້ບັນລຸເປົ້າໝາຍ ໃນຂ້າງໜ້າຕື່ມອີກ ຂໍຖືໂອກາດນີ້ ຂໍໂທດຂໍອະໄພມາຍັງແຟນບານຂອງສະໂມສອນ ມາສເຕີ ທຸກຄົນ ທີ່ບໍ່ສາມາດເຮັດໃຫ້ມີຄວາມສຸກໃນບ້ານໄດ້.

ໂດຍ: ປາກກາດຳ