ລາຍລະອຽດຂ່າວ
ຄວສ ປ້ອງກັນແຊ້ມ ສະໄໝທີ 2 ບານເຕະຊາຍ ງານກິລາ ທົ່ວ ມຊ ຄັ້ງທີ Xl ປະຈໍາສົກຮຽນ 2019-2020 ໄດ້ສຳເລັດ
ຂຽນເມື່ອ: 30/01/2020 15:01 | ໂດຍ: ເພຣເມັກເກີ | ອ່ານ: 410 ຄັ້ງ

          ທີມເຕະບານນັກສຶກສາ ຄະນະວິສະວະກຳສາດ ຫຼື ຄວສ (ຊຸດສີແດງ) ໄລ່ເອົາຊະນະ ທີມຄະນະກະເສດສາດ ໃນນັດຊີງຊະນະເລີດໄປແບບຫວຸດຫວິດ 1-0 ປະຕູ ຄວ້າແຊ໋ມກິລາເຕະບານປະເພດທີມຊາຍ ປິດສາກງານກິລາ ທົ່ວມະຫາວິທະຍາໄລແຫ່ງຊາດ (ມຊ) ຄັ້ງທີ Xl ປະຈໍາປີ 2019-2020 ສະໄໝທີ 2 ຕິດຕໍ່ກັນ ຂະນະທີ່ແຊ໋ມບານເຕະຍິງ ຕົກເປັນຂອງທີມສາວຄະນະວິທະຍາສາດການກິລາ-ກາຍະກຳ (ຄວກ).​

           ເມື່ອວັນທີ 29 ມັງກອນ ຜ່ານມາ ທີ່ສະໜາມກິລາກາງ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ) ເມືອງໄຊທານີ ນະຄອນຫຼວງວຽງຈັນ ໄດ້ມີພິທີປິດການແຂ່ງຂັນງານກິລາ ທົ່ວ ມຊ ຄັ້ງທີ Xl ປະຈໍາສົກຮຽນ 2019-2020  ໂດຍໃຫ້ກຽດເຂົ້າຮ່ວງມຂອງທ່ານ ຮສ.ປອ ສົມສີ ຍໍພັນໄຊ ອະທິການບໍດີ ມຊ ແລະ ທ່ານ ຮສ.ປອ ອຸດົມ ພອນຄໍາເພັງ ຮອງອພະທິການບໍດີ ມຊ ພ້ອມດ້ວຍຄະນະ ແລະ ບັນດາຄະນະບໍດີ ຈາກ 13 ຄະນະພາກວີຊາ, ພະນັກງານຄູອາຈານ ແລະ ນ້ອງນັກສຶກສາ ເຂົ້າຮ່ວມຫຼາຍພັນຄົນ.

          ການແຂ່ງຂັນງານກິລາດັ່ງກ່າວ ຈັດຂຶ້ນມີຈຸດປະສົງຫຼັກ ກໍເພື່ອເປັນການປະຕິບັດຕາມແຜນຍຸດທະສາດ ໃນການພັດທະນາການສຶກສາ ຂອງ ມຊ ໃນການກໍ່ສ້າງ ແລະ ພັດທະນານັກສຶກສາ ໃຫ້ໄປຕາມ 5 ຫຼັກມູນການສຶກສາ ຂອງກະຊວງສຶກສາທິການ ແລະ ກິລາ ວາງອອກປະກົດຜົນເປັນຈິງ ແນໃສ່ສົ່ງເສີມພັດທະນາຂະບວນການພັດທະນາກິລາ ມຊ ໃຫ້ເຕີບໃຫຍ່ຂະຫຍາຍຕົວ ກ້າວສູ່ການເປັນັກກິລາລະດັບຊາດ ກໍຄື ພາກພື້ນ, ອານຸພາກພື້ນ ແລະ ສາກົນ ການແຂ່ງຂັນໄດ້ດຳເນີນມາແຕ່ວັນທີ 29 ພະຈິກ 2019 ຫາ 29 ມັງກອນ 2020 ມີການຊີງໄຊທັງໝົດ 7 ປະເພດກິລາ ປະກອບມີ ບານເຕະ ຍິງ-ຊາຍ, ບານສົ່ງໃນຮົ່ມ ຍິງ-ຊາຍ, ບານສົ່ງຫາດຊາຍຍິງ-ຊາຍ, ກະຕໍ້ຍິງ-ຊາຍ, ຟຸດຊໍຊາຍ, ເປຕັງຍິງ-ຊາຍ ແລະ ແລ່ນ-ລານ ຍິງ-ຊາຍ.

          ໃນພິທີປິດການແຂ່ງຂັນງາທນກິລາດັ່ງກ່າວ ກໍໄດ້ມີການແຂ່ງຂັນເຕະບານຊາຍ ຄູ່ຊີງຊະນະເລີດ ລະຫວ່າງ ທີມຄະນະວິສະວະກຳສາດ ພົບກັບ ທີມຄະນະກະເສດສາດ ຜ່ານການແຂ່ງຂັນປະກົດວ່າ: ຄະນະວິສະວະກຳສາດ ສາມາດເອົາຊະນະໄປແບບຫວຸດຫວິດ ໄດ້ແຊ໋ມໃນຄັ້ງນີ້ໄປຄອງເປັນສອງສະໄໝຕິດຕໍ່ກັນ ສ່ວນທີມຄະນະກະເສດສາດ ໄດ້ພຽງອັນດັບທີ 2 ຂະນະທີ່ບານເຕະຍິງແຊ໋ມຕົກເປັນຂອງທີມສາວຄະນະວິທະຍາສາດການກິລາ-ກາຍະກຳ ຄວ້າແຊ໋ມ 2 ປີຊ້ອນເຊັນກັນ, ກິລາຟຸດຊໍຊາຍ ແຊ໋ມ ຄວກ, ບານສົ່ງໃນຮົ່ມຊາຍ ທີ 1 ຄວສ, ບານສົ່ງໃນຮົ່ມຍິງ ທີ 1 ຄສບ, ບານສົ່ງຫາດຊາຍ ເພດຊາຍ ທີ 1 ຄວສ, ບານສົ່ງຫາດຊາຍຍິງ ທີ 1 ຄວກ, ກະຕໍ້ຊາຍ ທີ 1 ຄສຄ, ກະຕໍ້ຍິງ ທີ 1 ຄວກ, ກິລາເປຕັງທີມຄູ່ຊາຍ ທີ 1 ຄວກ, ເປຕັງທີມຄູ່ຍິງ ຄວກ ແລະ ເປຕັງທີມຄູ່ປະສົມ ທີ 1 ຄກສ.

      ສ່ວນຜົນການແຂ່ງຂັນກິລາແລ່ນ-ລານ ທີ່ມີການຊີງໄຊ 24 ຫຼຽນຄໍາ ນັກກິລາຈາກ ຄວກ ສາມາດກວາດໄດ້ 17 ຫຼຽນຄໍາ, ຄວສ 4 ຫຼຽນຄໍາ, ຄສຄ, ຄກສ ແລະ ຄສບ ໄດ້ພາກສ່ວນລະ 1 ຫຼຽນຄໍາ, ໃນນັ້ນ  ປະເພດ 100 ແມັດຊາຍ ທີ 1 ຄວສ, ແລ່ນ 100 ແມັດຍິງ ທີ 1 ຄວກ, ແລ່ນ 200 ແມັດຊາຍ ທີ 1 ຄວກ, ແລ່ນ 200 ແມັດຍິງ ທີ 1 ຄວກ, ແລ່ນ 400 ແມັດຊາຍ ທີ 1 ຄວກ, ແລ່ນ 400 ແມັດຍິງ ທີ 1 ຄວກ, ແລ່ນ 1.500 ແມັດຊາຍ ທີ 1 ຄວກ, ແລ່ນ 1.500 ແມັດຍິງ ທີ 1 ຄວກ, ແລ່ນ 4x100 ແມັດຊາຍ ທີ 1 ຄວກ, ແລ່ນ 4x100 ແມັດຍິງ ຄວກ ແລະ ປະເພດລານ ເຕັ້ນຍາວຊາຍ-ຍິງ ກໍຕົກເປັນຂອງ ນັກກິລາຈາກ ຄວກ.

ໂດຍ ປາກກາດຳ

 




ຂ່າວຍອດນິຍົມ 7 ວັນລ່າສຸດ
ຂ່າວລ່າສຸດ