ລາຍລະອຽດຂ່າວ
ສິດທິເດດ ປະຕິເສດຫຼາຍແຂວງ ຍ້ອນຮັກບ້ານເກີດຂອງມານດາ ປ້ອງກັນແຊ໋ມ 3 ຫຼຽນຄຳ ຊຽງຂວາງ ເກມ 2020
ຂຽນເມື່ອ: 20/01/2020 14:01 | ໂດຍ: ເພຣເມັກເກີ | ອ່ານ: 426 ຄັ້ງ

          ສິດທິເດດ ສັກບ່ຽງ ຫຼື ໜຶ່ງເມືອງລາວ ນັກກິລາສະນຸກເກີທີມຊາດລາວ ທັງມື 1 ສປປ ລາວ ເຈົ້າຂອງ 3 ຫຼຽນຄຳ ງານກິລາແຫ່ງຊາດ ເມື່ອປີ 2008, ເຈົ້າຂອງຫຼຽນຄຳ ປະຫວັດສາດງານກິລາຊີເກມ ທີ່ປະເທດມາເລເຊຍ ເມື່ອປີ 2017 ແລະ ເຈົ້າຂອງຫຼຽນທອງ ງານກິລາຊີເກມ ທີ່ປະເທດຟິລິບປິນ ມາໃໝໆໝາດໆ ເມື່ອທ້າຍປີ 2019 ໄດ້ປະຕິເສດຫຼາຍແຂວງ ຍ້ອນຮັກບ້ານເກີດເມືອງນອນຂອງມານດາ ຫຼື ແມ່ ຈຶ່ງຕັດສິນໃຈລົງຫຼິ້ນໃຫ້ແຂວງສະຫວັນນະເຂດ ນຳທັບນັກສອຍຄິວດິນແດນໄດໂນເສົາ ເຂົ້າຮ່ວມປ້ອງກັນແຊ໋ມ 3 ຫຼຽນຄຳ ງານມະຫາກິລາແຫ່ງຊາດ ຄັ້ງທີ Xl ຫຼື ຊຽງຂວາງເກມ ທີ່ແຂວງຊຽງຂວາງ ຮັບກຽດເປັນເຈົ້າພາບ ໃນລະຫວ່າງວັນທີ 22 ມີນາ ຫາ 1 ເມສາ 2020.

          ຕາມການໃຫ້ສຳພາດຂອງ ທ້າວ ສິດທິີເດດ ສັກບ່ຽງ ຫຼື ໜຶ່ງເມືອງລາວ ນັກກິລາສະນຸກເກີທີມຊາດລາວ ແຈ້ງໃຫ້ຊາບວ່າ: ຫຼັງຈາກກັບມາແຕ່ການເຂົ້າຮ່ວມ ງານກິລາຊີເກມ ທີ່ປະເທດຟິລິບປິນ ຮັບກຽດເປັນເຈົ້າພາບ ເມື່ອທ້າຍປີ 2019 ຜ່ານມາ ກໍມີຫຼາຍແຂວງ ໂດຍສະເພາະ ເຈົ້າພາບ ແຂວງຊຽງຂວາງ ທີ່ໄດ້ຕິດຕໍ່ມາໂດຍກົງຫານ້ອງ ເພື່ອທາບທ່າມຕົນເອງຕາງໜ້າແຂວງເຂົ້າຮ່ວມງານມະຫາກິລາແຫ່ງຊາດ ຄັ້ງທີ Xl ພ້ອມຍືນຂໍ້ສະເໜີນະໂຍບາຍພິເສດໃຫ້ຢ່າງຫຼວງຫຼາຍ ແຕ່ຍ້ອນອີງໃສ່ຈິດໃຈຮັກບ້ານເກີດເມືອງນອນແຂວງສະຫວັນນະເຂດ ເຊິ່ງເປັນຜືນແຜ່ນດິນເກີດຂອງແມ່ ສະນັ້ນ ເພື່ອຢາກທົດແທນບຸນຄຸນຂອງແມ່ ຈຶ່ງໄດ້ຕັດສິນໃຈສືບຕໍ່ຫຼິ້ນໃຫ້ແຂວງດັ່ງກ່າວ ເຂົ້າຮ່ວມແຂ່ງຂັນ ຊຽງຂວາງ ເກມ ທີ່ຈະເປີດສາກຂຶ້ນໃນມໍ່ໆນີ້ ເມື່ອບໍດົນມານີ້ ກໍໜ້າເສຍດ່າຍທີ່ບໍ່ໄດ້ເຂົ້າຮ່ວມແຂ່ງຂັນກິລາສະນຸກເກີ ເສີກແຊ໋ມດວນແຊ໋ມ ລາຍການ ຊະບາ ສະນຸກເກີ ຄັບ 2020 ຈັດຂຶ້ນ ລະຫວ່າງວັນທີ 10-15 ມັງກອນ ຜ່ານມາ ທີ່ແຂວງປະທຸມທານີ ຣາຊະອານາຈັກໄທ ຍ້ອນວ່າຕິດພາລະກິດໄປສະແດງຄວາມເສຍໃຈ ນໍານັກກິລາສະນຸກເກີຮຸ່ນອ້າຍຜູ້ທີ່ຮັກແພງທີ່ສຸດຕ້ອງມາຈາກໂລກນີ້ໄປ. ແຕ່ເຖິງຢ່າງໃດກໍດີ, ນ້ອງກໍຍັງໝັ່ນຝຶກຜົນຫຼໍ່ຫຼອມຕົນເອງຢູ່ສະເໝີ ເພື່ອຮັກສາມາດຕະຖານການຫຼິ້ນໃຫ້ຄົງເດີມ ເຊິ່ງໃນປັດຈຸບັນແມ່ນພ້ອມທີ່ຈະໄປປ້ອງກັນແຊ໋ມ ໃນຊຽງຂວາງ ເກມ ໃຫ້ແຂວງສະຫວັນນະເຂດ ຍິ່ງໃຫຍ່ອີກຄັ້ງ.

          ການແຂ່ງຂັນສະນຸກເກີ ຊຽງຂວາງ ເກມ 2020 ປີນີ້ ມີການຊີງໄຊທັງໝົດ 3 ລາຍການ ຈາກປະເພດສະນຸກເກີ ດ່ຽວຊາຍ, ທີມຄູ່ຊາຍ ແລະ ທີມຊາຍ, ໃນນັ້ນ ສະເພາະແຂວງສະຫວັນນະເຂດ ແມ່ນສົ່ງນັກກິລາທັງໝົດ ຈຳນວນ 4 ຄົນ ມີຄະນະນຳ 3 ຄົນ ແລະ ຄູຝຶກອີກ 1 ຄົນ ສຳລັບຜົນງານຂອງ ສິດທິເດດ ສັກບ່ຽງ ເຄີຍສ້າງປະຫວັດສາດຄວ້າ 3 ຫຼຽນຄຳ ໃຫ້ແຂວງສະຫວັນນະເຂດ ໃນງານກິລາແຫ່ງຊາດ ຄັ້ງທີ Vlll ທີ່ແຂວງຈຳປາສັກ ເປັນເຈົ້າພາບ ເມື່ອປີ 2008 ຈາກປະເພດດ່ຽວຊາຍ, ທີມຄູ່ຊາຍ ແລະ ທີມຊາຍ ນອກນັ້ນ ກໍຍັງສ້າງປະຫວັດສາດຢ່າງຍິ່ງໃຫຍ່ໃຫ້ ສປປ ລາວ ດ້ວຍການຄວ້າຫຼຽນຄຳ ງານກິລາຊີເກມ ຄັ້ງທີ XXlX ທີ່ປະເທດມາເລເຊຍ ເມື່ອປີ 2017 ແລະ ຫຼ້າສຸດ ກໍສາມາດຍາດໄດ້ຫຼຽນທອງ ຈາກງານມະຫາກຳກິລາຊີເກມ ຄັ້ງທີ XXX ທີ່ປະເທດຟິລິບປິນ ເປັນເຈົ້າພາບ ປີ 2019ນີ້ອີກດ້ວຍ.

ໂດຍ ປາກກາດຳ