ລາຍລະອຽດຂ່າວ
ເປຕັງ ຊີງຂັນປະທານສະໂມສອນ ບຶງຂະຫຍອງ ສະຫຼອງ ຄົບຮອບ 71 ປີ ຈະເປີດສາກເສົານີ້
ຂຽນເມື່ອ: 15/01/2020 18:01 | ໂດຍ: ເພຣເມັກເກີ | ອ່ານ: 215 ຄັ້ງ

          ການແຂ່ງຂັນກິລາເປຕັງ ປະເພດທີມຄູ່ຊາຍ ຊີງຂັນປະທານສະໂມສອນ ເປຕັງບ້ານບຶງຂະຫຍອງ ເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ແລະ ເປັນການເປີດໂຕສະໂມສອນ ເປຕັງບ້ານບຶງຂະຫຍອງ ຢ່າງເປັນທາງການ ໃນຄັ້ງນີ້ ຈະໄດ້ເປີດສາກຂຶ້ນໃນວັນເສົາ ທີ 18 ມັງກອນ 2020ນີ້ ຂ້າງສັງວຽນມວຍ ສະຫະພັນມວຍລາວ ນະຄອນຫຼວງວຽງຈັນ.

          ອີງຕາມຂໍ້ມູນຈາກທ່ານ ຕ້ອມ ດາລາແສນ ຮັກສາການຫົວໜ້າຂະແໜງກິລາມວນຊົນ ພະແນກສຶກສາທິການ ແລະ ກິລາ ນະຄອນຫຼວງ ໃນຕອນເຊົ້າວັນທີ 15 ມັງກອນ ຜ່ານມາ ໃຫ້ຮູ້ວ່າ: ໄດ້ອອກໜັງສືແຈ້ງເຊີນເຖິງພະນັກງານລັດຖະກອນ, ທະຫານ-ຕຳຫຼວດ, ພະແນກການ ແລະ ຫ້ອງການອ້ອມຂ້າງ ນະຄອນຫຼວງ ເຂົ້າຮ່ວມການແຂ່ງຂັນກິລາເປຕັງ ປະເພດທີມຄູ່ຊາຍ ຊີງຂັນປະທານສະໂມສອນ ເປຕັງບ້ານບຶງຂະຫຍອງ ເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ແລະ ເປັນການເປີດໂຕສະໂມສອນ ເປຕັງບ້ານບຶງຂະຫຍອງ ຢ່າງເປັນທາງການ ໂດຍເປັນການຮ່ວມມືກັນລະຫວ່າງທ່ານ ຄຳເສັງ ສູນດາລາ ປະທານສະໂມສອນ ເປຕັງບ້ານບຶງຂະຫຍອງ ກັບ ຂະແໜງກິລາມວນຊົນ ໃນວັນທີ 17 ມັງກອນນີ້ ຈະປິດຮັບສະໝັກຢ່າງເປັນທາງການ ສະນັ້ນ ຂໍໃຫ້ບັນດາສະໂມສອນທຸກພາກສ່ວນຈົ່ງຮີບຮ້ອນໃຫ້ມາລົງທະບຽນດ່ວນ ຖ້າຫາກທ່ານສົນໃຈຈະເຂົ້າຮ່ວມແຂ່ງຂັນ ສາມາດຕິດຕໍ່ພົວພັນກັບຄະນະຮັບຜິດຊອບຂອງພວກເຮົາໂດຍກົງໄດ້ທີ່ເບີໂທ 020 99809204 ຫຼື 020 97987866 ໄດ້ນັບແຕ່ມື້ນີ້ ເປັນຕົ້ນໄປ.

          ການແຂ່ງຂັນແມ່ນຈະຈັດຂຶ້ນ ໃນວັນທີ 18 ມັງກອນ 2020 ທີ່ສະໂມສອນ  ເປຕັງບ້ານບຶງຂະຫຍອງ ຂ້າງສັງວຽນມວຍ ສະຫະພັນມວຍລາວ ນະຄອນຫຼວງວຽງຈັນ ເມືອງສີສັດຕະນາກ ສຳລັບເງື່ອນໄຂນັກກິລາທີ່ເຂົ້າຮ່ວມ ຕະໄດ້ເສຍຄ່າສະໝັກທີມໜຶ່ງລະ 150.000 ກີບ ສ່ວນທີມຊະນະເລີດ ຈະໄດ້ຮັບຂັນແຊ໋ມພ້ອມເງິນສົດ 3 ລ້ານກີບ, ທີ 2 ຈະໄດ້ຮັບລາງວັນເງິນສົດ 2 ລ້ານກີບ, ທີ 3 ຈະໄດ້ຮັບລາງວັນເງິນສົດ 1 ລ້ານກີບ ແລະ ທີ 4 ຈະໄດ້ຮັບລາງວັນເງິນສົດ 5 ແສນກີບ.

ໂດຍ ປາກກາດຳ




ຂ່າວລ່າສຸດ