ລາຍລະອຽດຂ່າວ
ມາດເຕີ ເຊເວັນ ເສີມ 3 ນັກເຕະລາວ ກ່ອນລຸຍເຕະບານ ເອເອັບຊີ ຄັບ 2020 ຮອບ​ເພ​ອອບ
ຂຽນເມື່ອ: 15/01/2020 18:01 | ໂດຍ: ເພຣເມັກເກີ | ອ່ານ: 272 ຄັ້ງ

                ສະໂມສອນ ມາດເຕີ ເຊເວັນ ເອັບຊີ ຕົກລົງເສີມ 3 ນັກເຕະທີມຊາດລາວ ຊຸດໃຫຍ່ ປະກອບມີ ແສງວິໄລ ຈັນທາສີຣິ, ຄູນສົມບັດ ພົມມະໄຊ ແລະ ທິນນະກອນ ວົງສາ ເຂົ້າມາຮ່ວມທີມເປັນທີ່ຮຽບຮ້ອຍ ກ່ອນລຸຍການແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ 2 ນັດ ກັບ ສະໂມສອນ PREAH KHAN REACH SVAY RIENG FC ຈາກ​ປະ​ເທດ​ກຳ​ປູ​ເຈຍ ໃນທ້າຍເດືອນມັງກອນນີ້.

          ອີງຕາມການໃຫ້ສຳພາດຂອງ ທ່ານ ບຸນຖະໜອມ ສີຫາລາດ ຜູ້ຈັດການທີມສະມໂສອນ ມາດເຕີ ເຊເວັນ ເອັບຊີ ໃນວັນທີ 15 ມັງກອນ ຜ່ານມາ ໃຫ້ຊາບວ່າ : ສະໂມສອນ ມາດເຕີ ເຊເວັນ ເອັບຊີ ຮອງແຊ໋ມການແຂ່ງຂັນເຕະບານ ເປບຊີ ລາວພຣີເມຍລີກ 2019 ທີ່ຄວ້າສິດການເຂົ້າຮ່ວມແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ ທີ່ຈະແຂ່ງຂັນໃນທ້າຍເດືອນນີ້ ໄດ້ມີການຄວ້າຕົວ 3 ນັກເຕະທີມຊາດລາວ ຊຸດໃຫຍ່ ມາເສີມທີມເປັນທີ່ຮຽບຮ້ອຍແລ້ວ ປະກອບມີ ແສງວິໄລ ຈັນທາສີຣິ ກອງກາງປະສົບການສູງຈາກສະໂມສອນ ກະບີ່ ເອັບຊີ ທີມໃນໄທລີກ 3 ຂອງປະເທດໄທ, ຄູນສົມບັດ ພົມມະໄຊ ແລະ ທິນນະກອນ ວົງສາ ກອງຫຼັງປະສົບການສູງຈາກສະໂມສອນ ກະຊວງປ້ອງກັນຄວາມສະຫງົບ (ປກສ ເອັບຊີ). ນອກຈາກນັ້ນ, ເຮົາຍັງໄດ້ມີການເສີມນັກເຕະຕ່າງຊາດນຳອີກ ປະກອບມີ ຄູ Islam Shamshiev ກອງກາງທີມຊາດ ຄີກິສຖານ ມາເສີມທີມອີກດ້ວຍ.  

ສຳລັບ ຕາຕະລາງແຂ່ງຂັນຂອງສະໂມສອນ ມາດເຕ ເຊເວັນ ເອັບຊີ ໃນການແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ 2 ນັດ ກັບ ສະໂມສອນ PREAH KHAN REACH SVAY RIENG FC ຈາກ​ປະ​ເທດ​ກຳ​ປູ​ເຈຍ ແມ່ນນັດ​ທຳ​ອິດ​ຈະ​ແຂ່ງ​ຂັນ​ໃນ​ວັນ​ທີ 22 ມັງ​ກອນ 2020 ຢູ່​ທີ່​ປະ​ເທດ​ກຳ​ປູ​ເຈ້ຍ. ສ່ວນ​ນັດ​ທີ ສອງ ຈະ​ແຂ່ງ​ຂັນ​ໃນ​ວັນ​ທີ 29 ມັງ​ກອນ 2020 ແຂ່ງ​ຂັນ​ຢູ່​ທີ່​ສະ​ໜາມ​ກິ​ລາ​ແຫ່ງ​ຊາດ ຫຼັກ 16 ​ ຖ້າ​ຫາກ​ວ່າ​ທີມ​ໃດສາ​ມາດ​ຜ່ານ​ເຂົ້າ​ຮອບ​ໄດ້ ​ຈະ​ຢູ່​ຮ່ວມ​ກຸ່ມ G ປະ​ກອບ​ມີ ສະໂມສອນ Ceres Negros FC ຈາກ​ປະ​ເທດ​ຟີ​ລິບ​ປິນ, ສະໂມສອນ Than Quang Ninh ​ຈ​າກ​ປະ​ເທດ ສສ ​ຫວຽດ​ນາມ ແລະ ສະໂມສອນ Bali United FC ​ຫລ​ື ທີມ​ອັນ​ດັບ 3 ລີກ ປະ​ເທດ​ອິນ​ໂດ​ເນ​ເຊຍ.​

ໂດຍ ວັນສົດໃສ

 




ຂ່າວລ່າສຸດ