ລາຍລະອຽດຂ່າວ
ດາວພະຈັນ ນຳທັບສະນຸກເກີ ຫຼວງພະບາງ ລ່າ 1 ຫຼຽນຄຳ ຊຽງຂວາງ ເກມ 2020
ຂຽນເມື່ອ: 15/01/2020 18:01 | ໂດຍ: ເພຣເມັກເກີ | ອ່ານ: 174 ຄັ້ງ

          ທ້າວ ດາວພະຈັນ ພຸດທະບັນດິດ ນັກກິລາສະນຸກເກີທີມຊາດລາວ ດີກຣີມື 2 ຂອງສປປ ລາວ ຕັດສິນໃຈລົງຫຼິ້ນໃຫ້ແຂວງບ້ານເກີດຂອງພໍ່ ແຂວງຫຼວງພະບາງ ນຳທັບນັກກິລາສະນຸກເກີເມືອງມໍລະດົກໂລກ ສູ້ສຸດຄວາມສາມາດ ເພື່ອລ່າຄວາມຫວັງ 1 ຫຼຽນຄຳ ງານມະຫາກຳກິລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ 2020 ທີ່ແຂວງຊຽງຂວາງ ຮັບກຽດເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສານີ້.

           ຕາມການໃຫ້ສຳພາດຂອງທ້າວ ດາວພະຈັນ ພຸດທະບັນດິດ ນັກກິລາສະນຸກເກີທີມຊາດລາວ ໃນວັນທີ 14 ມັງກອນ ຜ່ານມາ ແຈ້ງໃຫ້ຊາບວ່າ: ຍ້ອນຢາກຈະປະກອບສ່ວນສ້າງຜົນງານໃຫ້ແກ່ບ້ານເກີດເມືອງນອນຂອງພໍ່ ທີ່ເກີດຢູ່ດິນແດນເມືອງມໍລະດົກໂລກ ແຂວງຫຼວງພະບາງ. ດັ່ງນັ້ນ, ຂ້ອຍຈຶ່ງຕັດສິນໃຈລົງຫຼິ້ນໃຫ້ແຂວງຫຼວງພະບາງ ເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ 2020 ທີ່ແຂວງຊຽງຂວາງ ຮັບກຽດເປັນເຈົ້າພາບ ປັດຈຸບັນສາມາດຄັດເລືອກເອົານັກກິລາ ຄົບຕາມຈຳນວນ 3 ຄົນ ເປັນທີ່ຮຽບຮ້ອຍແລ້ວ ເຊິ່ງມີ ຂ້ອຍເອງ ດາວພະຈັນ ພຸດທະບັນດິດ, ອານຸລຸດ ຂຸນປັນຍາ ຂາຄູ່ ທີ່ເຂົ້າຮ່ວມງານມະຫາກຳກິລາຊີເກມ ຄັ້ງທີ XXX ທີ່ປະເທດຟິລິບປິນ ເມື່ອບໍ່ດົນມານີ້ ແລະ ເທບພະໄທ ວັນນະບົວທອງ ພວກເຮົາທຸກຄົນແມ່ນໄດ້ມີການເກັບຕົວຝຶກຊ້ອມຢ່າງເປັນປົກກະຕິ ແລະ ກໍມີສຸຂະພາບແຂງແຮງສົມບູນພ້ອມທີ່ຈະເຂົ້າຮ່ວມແຂ່ງຂັນ ຊຽງຂວາງ ເກມ ໂດຍສະເພາະໃນເດືອນກຸມພານີ້ ກໍຈະເຂົ້າຮ່ວມການແຂ່ງຂັນສະນຸກເກີ ລາຍການສະສົມຄະແນນ ເຊິ່ງເປັນລາຍການໃຫຍ່ ຈັດຂຶ້ນຢູ່ທີ່ປະເທດໄທ ເຊິ່ງລາຍການນີ້ ກໍຈະມີ ຂ້ອຍ ແລະ ສິດທິເດດ ສັກບ່ຽງ ນັກກິລາສະນຸກເກີມື 1 ສປປ ລາວ ເຈົ້າຂອງຫຼຽນຄຳ ຊີເກມ ປີ 2017 ທີ່ປະເທດມາເລເຊຍ ແລະ ເຈົ້າຂອງຫຼຽນທອງ ຊີເກມ ປີ 2019 ມາໃໝ່ໝາດໆ ທີ່ປະເທດຟິລິບປິນ ເຊິ່ງລາຍການດັ່ງກ່າວ ແມ່ນນຳໃຊ້ງົບປະມານຂອງຕົນເອງທັງໝົດ.

           ທ້າວ ດາວພະຈັນ ພຸດທະບັນດິດ ບອກຕື່ມອີກວ່າ: ໃນການເຂົ້າຮ່ວມ ຊຽງຂວາງ ເກມ 2020 ປີນີ້ ເປັນປີທີ່ມີຄວາມທ້າທ່າຍຫຼາຍ ໂດຍສະເພາະໃນວົງການກິລາສະນຸກເກີລາວເຮົາ ເຊິ່ງມີນັກສອຍຄິວນ້ອງໃໝ່ເກີດຂຶ້ນມາຫຼາຍຄົນ ແລະ ແຕ່ລະຄົນກໍມີການພັດທະນາໃນລະດັບຂັ້ນສູງ ສະນັ້ນ ໃນນາມເປັນຫົວໜ້າທີມ ກໍຈະພະຍາຍາມກະຕຸ້ນນັກກິລາສະນຸກເກີດ້ວຍກັນເອງ ຢ່າປະມາດເດັດຂາດ ຕ້ອງຮູ້ເຂົາຮູ້ເຮົາເຮັດໃຫ້ດີທີ່ສຸດ ແຕ່ຢ່າງໜ້ອຍ ກໍຕ້ອງສູ້ສຸດຄວາມສາມາດ ເພື່ອຍາດໃຫ້ໄດ້ຫຼຽນຄຳ ຈາກ 3 ລາຍການແຂ່ງຂັນ ກໍຄື ປະເພດດ່ຽວ, ທີມຄູ່ ແລະ ທີມຊຸດ ໃຫ້ໄດ້ຈັກ 1 ລາຍການ ກໍເປັນໝາກຜົນສຳເລັດທີ່ຍິ່ງໃຫຍ່ ໃຫ້ແກ່ບ້ານເກີດຂອງພໍ່ຂ້ອຍແລ້ວ.

          ສຳລັບຜົນງານ ຂອງ ດາວພະຈັນ ພຸດທະບັນດິດ ເຄີຍລົງຫຼິ້ນກິລາສະນຸກເກີ ໃນງານມະຫາກຳກິລາແຫ່ງຊາດ ຄັ້ງທີ Vlll ປີ 2008 ທີ່ແຂວງຈຳປາສັກ ຮັບກຽດເປັນເຈົ້າພາບ ໃນຄັ້ງນັ້ນ ດາວພະຈັນ ໄດ້ເຂົ້າຊີີງຫຼຽນຄຳ ພົບກັບ ຄູ່ຂອງ ສິດທິເດດ ສັກບ່ຽງ ແຕ່ໜ້າເສຍດ່າຍ ເສຍໃຫ້ ສິດທິເດດ ໄດ້ພຽງຫຼຽນເງິນ ຄ້ອງຄໍ ໃຫ້ນະຄອນຫຼວງວຽງຈັນ.  

ໂດຍ ປາກກາດຳ




ຂ່າວລ່າສຸດ