ລາຍລະອຽດຂ່າວ
ຂຸນເຫຼັກ ນ໋ອກນັກມວຍໄທ ຍົກ 3 ລາຍການເສີກນະຄອນຫຼວງ-ກໍກຽດແດນຈຳປາ
ຂຽນເມື່ອ: 13/01/2020 15:01 | ໂດຍ: ເພຣເມັກເກີ | ອ່ານ: 189 ຄັ້ງ

           ໂຊຟອມສົມລາຄາ ແຊ໋ມສາຍແອວຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ນວ) ຮຸ່ນນໍ້າໜັກ 55 ກິໂລກຣາມ, ຂຸນເຫຼັກ ຂວັນໃຈຄ້າຍມວຍເຈົ້າຖິ່ນ ສະໂມສອນ ຄໍາເສັງ (ມຸມສີແດງ) ໄລ່ຟັນສອກໃສ່ ເພັດໂພໄຊ ສໍສີຣີນທາ ນັກຊົກຈາກຄ້າຍມວຍດັງແຂວງໜອງຄາຍ ຣາຊະອານາຈັກໄທ ຫຼົ້ມລຸກຂຸຄາມ ຖືກກຳມະການກາງເວທີນັບເຖິງ 2 ຄັ້ງ ໃນຍົກ 2 ແລະ ຍົກ 3 ກ່ອນຈະຖືກມັດເຂົ້າເຕັມໆໜ້າລັບກາງເວທີ ໃນການແຂ່ງຂັນມວຍຄູ່ເອກ ຮຸ່ນນໍ້າໜັກ 59 ກິໂລກຣາມ ລາຍການເສີກນະຄອນຫຼວງ-ກໍກຽດແດນຈຳປາ ປະຈຳປີ 2020.

          ການແຂ່ງຂັນມວຍລາຍການດັ່ງກ່າວ ໂດຍຄ້າຍມວຍດັງ ສໍສີຣິນທາ ຈາກແຂວງໜອງຄາຍ ປະເທດໄທ ຍົກທັງຄ້າຍມວຍ ຂ້າມຂອງປະທະກັບນັກຊົກ ນະຄອນຫຼວງວຽງຈັນ ທັງໝົດ 6 ຄູ່ ໃນຄັ້ງນີ້  ມີຂຶ້ນ ໃນວັນທີ 11 ມັງກອນ ຜ່ານມາ ທີ່ສັງວຽນມວຍ ສະຫະພັນມວຍລາວ ນະຄອນຫຼວງວຽງຈັນ ບ້ານບຶງຂະຫຍອງ ເມືອງສີສັດຕະນາກ, ໃນຈຳນວນ 6 ຄູ່ ມີການນ໋ອກກັນເຖິງ 5 ຄູ່ ໂດຍສະເພາະມວຍຄູ່ເອກ  ລະຫວ່າງ ຂຸນເຫຼັກ ສະໂມສອນ ຄຳເສັງ ເຈົ້າຂອງແຊ໋ມສາຍແອວຫົວໜ້າພະແນກສຶກສາທິການ ແລະ ກິລາ ນວ ພົບກັບ ເພັດໂພໄຊ ສໍສີຣີນທາ ຮຸ່ນນໍ້າໜັກ 59 ກິໂລກຣາມ ຄູ່ດັ່ງກ່າວ ຂຸນເຫຼັກ ມີການຕໍ່ນໍ້າໜັກ 1 ກິໂລກຣາມ.

       ຜ່ານການແຂ່ງຂັນຜົນປະກົດວ່າ: ຕັ້ງແຕ່ເລີ່ມຍົກແຂ່ງຂັນ ທັງສອງນັກຊົກຈາກລາວ-ໄທ ຫຼິ້ນຂອງໃສ່ກັນແບບເຈັບໆ ຍ່າງເຂົ້າຫາກັນເຕະທັກທ່າຍດ້ວຍທີ່ໜັກໜ່ວງ ປະທະໃສ່ກັນຢ່າງດຸເດືອດໄດ້ໃຈກອງເຊຍໃນສະໜາມເຊຍກັນສຽງດັງຢ່າງສະໜັ່ນຫວັ່ນໄຫວ ໂດຍສະເພາະລູກເຕະຂອງ ເພັດໂພໄຊ ສາດເຂົ້າລຳຕົວຂອງ ຂຸນເຫຼັກ ສຽງດັງຟັງຊັດ ຢ່າງເຈັບປວດ ແຕ່ກໍບໍ່ສະທ້ານຫົວໃຈຂອງ ຂຸນເຫຼັກ  ແຖມຂຸນເຫຼັກ ຍ່າງເຂົ້າຫາໃຊ້ປະສົບການປະທະຢ່າງສຸດມັນ ສົມເປັນດີກຣີແຊ໋ມ ສາຍແອວຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ນວ) ຮຸ່ນນໍ້າໜັກ 55 ກິໂລກຣາມ.

      ກັບມາຊົກກັນຕໍ່ໃນຍົກທີ 2 ທັງສອງກໍໄດ້ມີການແກ້ທາງມວຍມາດີ ໂດຍສະເພາະທາງ ເພັດໂພໄຊ ໃຊ້ແຄ່ງ ຕາມດ້ວຍມັດ ແຖມເຖິງ ສອງສາມຄັ້ງ ຫຼິ້ນເອົາ ຂຸນເຫຼັກງາຍໜ້າຕ້ອງຖອຍຫຼັງຕັ້ງຫຼັກກ່ອນ ແຕ່ບໍ່ພໍເທົ່າໃດນາທີ ຂຸນເຫຼັກ ກໍມາເອົາຄືນຈັງຫວະເຂົ້າຕີວົງໃນ ອາໃສໃຊ້ສອກປັກເຂົ້າກົກຫູຂອງ ເພັດໂພໄຊ ຫຼົ້ມລົງໄປນອນກອງກັບພື້ນ ໃຫ້ກຳມະການນັບ 1 ຮອດ 8 ແຕ່ ເພັດໂພໄຊ ຊ້ອມາດີຟື້ນຕົວທັນ ບີບເອົາຫົວໃຈອ້າຍລ້ຽງຈາກໄທນັ່ງກົ້ນບໍ່ຕິດຕັ່ງ ຕ້ອງໄດ້ເລັ່ງແກ້ທາງມວຍຊ່ວຍທັນທີ ກ່ອນ ເພັດໂພໄຊ ຈະເລືອດຂຶ້ນໜ້າຍ່າງເຂົ້າຫາປະທະອາວຸດຢ່າງຄົບເຄື່ອງກັບ ຂຸນເຫຼັກ ຢ່າງດຸເດືອດ ກ່ອນທີ່ລະຄັງຈະດັງກ່ອນ ເຮັດໃຫ້ທັງສອງຕ້ອງມາດວນກັນຕໍ່ໃນຍົກທີ 3 ພໍແຕ່ລະຄັງດັງຂຶ້ນ ຄວາມແຄ້ນຟັງໃຈ ເພັດໂພໄຊ ໃຊ້ແຄ່ງ ແລະ ມັດກະໜໍ່າສາດໃສ່ ຂຸນເຫຼັກຢ່າງຕໍ່ເນື່ອງ ໂດຍທີ່ບໍ່ວັງຕົວ ເຊິ່ງ ຂຸນເຫຼັກ ຫຼ່ຽມມວຍດີສັງເກດເຫັນ ເພັດໂພໄຊ ເປີດໜ້າກໍໃຊ້ສອກສັບເຂົ້າເຕັມຄາງນອນກອງລົງກັບພື້ນໃຫ້ກຳມະການນັບຮອດ 8 ອີກຄັ້ງ  ແລະ ຟື້ນຕົວທັນອີກຄັ້ງ  ທັງສອງຍັງຍ່າງເຂົ້າຫາກັນ ແລະ ກໍເປັນຝ່າຍຂຸນເຫຼັກ ທີ່້ເຫັນຈຸດອ່ອນ ໄລ່ຟັນສອກຊ້າຍຂວາ ຊ້າຍຂວາ ແລະ ກໍຊ້າຍຂວາ ເຮັດໃຫ້ກອງເຊຍ ໄດ້ເຊຍກັນຢ່າງມ່ວນຊື່ນ ສ່ວນ ເພັດໂພໄຊ ໄດ້ແຕ່ໃຊ້ສອງມືອຸບໜ້າກັນໄວ້ກ່ອນ  ແຕ່ສຸດທ້າຍກໍຕ້ານທານຄວາມແຂງແກ່ນຂອງ ຂຸນເຫຼັກບໍ່ໄຫວ ມາຖືກມັດ ຂຸນເຫຼັກເຕັມໆ ໃນປາຍຍົກ ໃຫ້ກຳມະການນັບ 10 ບໍ່ລຸກ ສົ່ງຜົນໃຫ້ ຂຸນເຫຼັກ ສະໂມສອນ ຄຳເສັງ ເປັນຝ່າຍເອົາຊະນະນ໋ອກໄປ.

      ສ່ວນຜົນການແຂ່ງຂັນມວຍອີກ 5 ຄູ່ ໃນລາຍການ ປະກອບມີ ຄູ່ທີ 1 ຮຸ່ນນໍ້າໜັກ 55 ກິໂລກຣາມ ໄຊມ້ອນ ປກສ ຖືກ ມຸງຄຸນເຫູັກ ສໍສີຣິນທາ ນ໋ອກໃນຍົກທີ 3, ຄູ່ທີ 2 ຮຸ່ນນໍ້າໜັກ 54 ກິໂລກຣາມ ຊົນຊາດ ສິດໂຕ້ ພາລຸ້ງ ຊະນະນ໋ອກ ເພັດໜອງຄາຍ ສໍສີຣິນທາ ໃນຍົກທີ 2, ຄູ່ທີ 3 ຮຸ່ນນໍ້າໜັກ 57 ກິໂລກຣາມ ເກົ້າແສນ ຂວັນໃຈສີໂຄດ ຖືກ ເພັດຈະເລີນ ສໍສີຣິນທາ ນ໋ອກໃນຍົກທີ 2, ຄູ່ທີ 5 ຮຸ່ນນໍ້າໜັກ 62 ກິໂລກຣາມ  ເຜົາຂະມຸ ສິດໂຕ້ພາລຸ້ງ ຊະນະນ໋ອກ ໂລ້ເງິນ ສິດຈານເພັງ ໃນຍົກທີ 2 ແລະ ຄູ່ທີ 6 ຮຸ່ນນໍ້າໜັກ 51 ກິໂລກຣາມ ກະລຽງ ສິດຂຸນພົນ ເສຍຄະແນນ ເພັດມະນຸດ.   

ໂດຍ ປາກກາດຳ