ລາຍລະອຽດຂ່າວ
ມາດເຕີ ເຊເວັນ ເສຍ ຣາດຊະສີມາ 3-1 ເຕະບານອຸ່ນເຄື່ອງ ກ່ອນລຸຍເຕະບານ ເອເອັບຊີ ຄັບ 2020 ຮອບ​ເພ​ອອບ
ຂຽນເມື່ອ: 13/01/2020 15:01 | ໂດຍ: ເພຣເມັກເກີ | ອ່ານ: 279 ຄັ້ງ

 

          ສະໂມສອນ ມາດເຕີ ເຊເວັນ ເອັບຊີ ລົງສະໜາມນັດສຸດທ້າຍ ກໍ່ຍັງເສຍໃຫ້ສະໂມສອນ ນະຄອນຣາດຊະສີມາ ເອັບຊີ ທີມໃນໄທລີກ 1 ຂອງປະເທດໄທ ໄປ 3-1 ປະຕູ ເຮັດໃຫ້ການອຸ່ນເຄື່ອງໃນຄັ້ງນີ້ ມາດເຕີ ເຊເວັນ ເອັບຊີ ແມ່ນເສຍ 3 ນັດລວດ ທີ່ປະເທດໄທ ໃນການແຂ່ງຂັນເຕະບານອຸ່ນເຄື່ອງ ກ່ອນລຸຍການແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ 2 ນັດ ກັບ ສະໂມສອນ PREAH KHAN REACH SVAY RIENG FC ຈາກ​ປະ​ເທດ​ກຳ​ປູ​ເຈຍ ໃນທ້າຍເດືອນມັງກອນນີ້.

          ເມື່ອວັນທີ 12 ມັງກອນ ຜ່ານມາ ທີ່ສະໜາມກິລານະຄອນຣາດຊະສີມາ ປະເທດໄທ ສະໂມສອນ ມາດເຕີ ເຊເວັນ ເອັບຊີ ຮອງແຊ໋ມການແຂ່ງຂັນເຕະບານ ເປບຊີ ລາວ ພຣີເມຍລີກ 2019 ທີ່ກຽມທີມລຸຍການແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ ໃນທ້າຍເດືອນນີ້ ລົງສະໜາມນັດສຸດທ້າຍ ໃນການແຂ່ງຂັນເຕະບານອຸ່ນເຄື່ອງ ພົບກັບ ສະໂມສອນ ນະຄອນຣາດຊະສີມາ ເອັບຊີ ທີມໃນໄທລີກ 1. ຜ່ານການແຂ່ງຂັນ ຜົນປາກົດວ່າ ມາດເຕີ ເຊເວັນ ເອັບຊີ ເສຍໄປ 3-1 ປະຕູ ເຮັດໃຫ້ການອຸ່ນເຄື່ອງໃນຄັ້ງນີ້ 3 ນັດ ຂອງສະໂມສອນ ມາດເຕີ ເຊເວັນ ເອັບຊີ ແມ່ນເສຍ 3 ນັດລວດ ທີ່ປະເທດໄທ ປະກອບມີ ໃນວັນທີ 8 ມັງກອນ 2020 ເສຍໃຫ້ ສະໂມສອນ ໜອງບົວ ພິດຊະຍາ ທີມໃນໄທລີກ 2 ຂອງປະເທດໄທ ໄປ 3-0 ປະຕູ ແລະ  ໃນວັນທີ 10 ມັງກອນ 2020 ເສຍໃຫ້ ສະໂມສອນ ຂອນແກ່ນ ເອັບຊີ ທີມໃນໄທລີກ 2 ໄປ 1-0 ປະຕູ.

      ສຳລັບ ຕາຕະລາງແຂ່ງຂັນຂອງສະໂມສອນ ມາດເຕ ເຊເວັນ ເອັບຊີ ໃນການແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ 2 ນັດ ກັບ ສະໂມສອນ PREAH KHAN REACH SVAY RIENG FC ຈາກ​ປະ​ເທດ​ກຳ​ປູ​ເຈຍ ແມ່ນນັດ​ທຳ​ອິດ​ຈະ​ແຂ່ງ​ຂັນ​ໃນ​ວັນ​ທີ 22 ມັງ​ກອນ 2020 ຢູ່​ທີ່​ປະ​ເທດ​ກຳ​ປູ​ເຈ້ຍ. ສ່ວນ​ນັດ​ທີ ສອງ ຈະ​ແຂ່ງ​ຂັນ​ໃນ​ວັນ​ທີ 29 ມັງ​ກອນ 2020 ແຂ່ງ​ຂັນ​ຢູ່​ທີ່​ສະ​ໜາມ​ກິ​ລາ​ແຫ່ງ​ຊາດ ຫຼັກ 16 ​ ຖ້າ​ຫາກ​ວ່າ​ທີມ​ໃດສາ​ມາດ​ຜ່ານ​ເຂົ້າ​ຮອບ​ໄດ້ ​ຈະ​ຢູ່​ຮ່ວມ​ກຸ່ມ G ປະ​ກອບ​ມີ ສະໂມສອນ Ceres Negros FC ຈາກ​ປະ​ເທດ​ຟີ​ລິບ​ປິນ, ສະໂມສອນ Than Quang Ninh ​ຈ​າກ​ປະ​ເທດ ສສ ​ຫວຽດ​ນາມ ແລະ ສະໂມສອນ Bali United FC ​ຫລ​ື ທີມ​ອັນ​ດັບ 3 ລີກ ປະ​ເທດ​ອິນ​ໂດ​ເນ​ເຊຍ.​ ຂະນະທີ່ ອີກທີມຢ່າງແຊ໋ມ ລາວ ພຣີເມຍລີກ 2019 ສະໂມສອນ ລາວ ໂຕໂຢຕ້າ ເອັບຊີ ແມ່ນ​ ຢູ່ຮ່ວມກຸ່ມ​ F ປະກອບມີ ສະໂມສອນ Hochiminh City FC ຈາກ​ ປະເທດ ສສ ຫວຽດ​ນາມ, ສະໂມສອນ Hougang United FC ຈາກ​ ປະເທດສິງ​ກະ​ໂປ ແລະ ທີມຊະ​ນະ​ໃນ​ຮອບ​ເພ​ລອອ​ຟ​ລະ​ຫວ່າງສະໂມສອນ INDERA SC ຈາກປະເທດບ​ຣູໄນ ພົບກັບ ສະໂມສອນ YANGON UNITED FC ຈາກ​ປະ​ເທດ​ມຽນ​ມາ.

ໂດຍ: ວັນສົດໃສ

ພາບຈາກ: ເພສ Master 7 FC