ລາຍລະອຽດຂ່າວ
ມ່ວນແທ້ເສົານີ້ ຂຸນເຫຼັກ ປະທະ ນັກຊົກໄທ ມວຍຄູ່ເອກ ລາຍການເສີກນະຄອນຫຼວງ-ກໍກຽດແດນຈຳປາ
ຂຽນເມື່ອ: 09/01/2020 18:01 | ໂດຍ: ເພຣເມັກເກີ | ອ່ານ: 168 ຄັ້ງ

         ມ່ວນມັນເດືອດແທ້ແນ່ນອນມວຍຄູ່ເອກ ໃນການແຂ່ງຂັນມວຍເສີກນະຄອນຫຼວງ-ກໍກຽດແດນຈຳປາ ປະ ຈຳປີ 2020 ຮຸ່ນນໍ້າໜັກ 59 ກິໂລກຣາມ ຂຸນເຫຼັກ ຂວັນໃຈຄ້າຍມວຍເຈົ້າຖິ່ນ ສະໂມສອນ ຄຳເສັງ ເຈົ້າຂອງແຊ໋ມສາຍແອວຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ນວ) ຮຸ່ນນໍ້າໜັກ 55 ກິໂລກຣາມ ຈະຂຶ້ນສັງວຽນຕໍ່ນໍ້າໜັກ 1 ກິໂລ ດວນມັດກັບ ເພັດໂພໄຊ ສໍສີຣີນທາ ນັກຊົກຈາກຄ້າຍມວຍດັງແຂວງໜອງຄາຍ ຣາຊະອານາຈັກໄທ ຄ້າຍມວຍທີ່ສົ່ງນັກຊົກຂຶ້ນສັງວຽນ ມວຍຊອງ 3 ແລະ ຊອງ 7 ສີໄທ ເປັນປະຈຳ.

    ການແຂ່ງຂັນມວຍຄູ່ເອກ ຄູ່ດັ່ງກ່າວ ພ້ອມກັບມວຍໃນລາຍການ ທີ່ຄ້າຍມວຍດັງ ສໍສີຣິນທາ ຍົກທັງຄ້າຍມວຍ ຂ້າມຂອງປະທະ ກັບນັກຊົກ ນະຄອນຫຼວງວຽງຈັນ ທັງໝົດ 6 ຄູ່ ໃນຄັ້ງນີ້ ຈະມີຂຶ້ນ ໃນວັນທີ 11 ມັງກອນ 2020 ທີ່ສັງວຽນມວຍ ສະຫະພັນມວຍລາວ ນະຄອນຫຼວງວຽງຈັນ ບ້ານບຶງຂະຫຍອງ ເມືອງສີສັດຕະນາກ, ໃນຈຳນວນ 6 ຄູ່ ມວຍຄູ່ເອກ ຈະຂຶ້ນຊົກກັນເປັນຄູ່ທີ 4 ລະຫວ່າງ ຂຸນເຫຼັກ ສະໂມສອນ ຄຳເສັງ ເຈົ້າຂອງແຊ໋ມສາຍແອວຫົວໜ້າພະແນກສຶກສາທິການ ແລະ ກິລາ ນວ ພົບກັບ ເພັດໂພໄຊ ສໍສີຣີນທາ ນັກຊົກຈາກຄ້າຍມວຍດັງແຂວງໜອງຄາຍ ຣາຊະອານາຈັກໄທ ຮຸ່ນນໍ້າໜັກ 59 ກິໂລກຣາມ ສຳລັບຄູ່ນີ້ ຂຸນເຫຼັກ ມີນໍ້າໜັກໜ້ອຍກວ່າ 1 ກິໂລກຣາມ.

        ສ່ວນມວຍອີກ 5 ຄູ່ ໃນລາຍການ ປະກອບມີ ຄູ່ທີ 1 ໄຊມ້ອນ ປກສ ພົບກັບ ມຸງຄຸນເຫູັກ ສໍສີຣິນທາ ຮຸ່ນນໍ້າໜັກ 55 ກິໂລກຣາມ, ຄູ່ທີ 2 ຊົນຊາດ ສິດໂຕ້ ພາລຸ້ງ ພົບກັບ ເພັດໜອງຄາຍ ສໍສີຣິນທາ ຮຸ່ນນໍ້າໜັກ 54 ກິໂລກຣາມ, ຄູ່ທີ 3 ສົມບັດ ສໍຮຸ່ງອາລຸນ ພົບກັບ ເພັດຈະເລີນ ສໍສີຣິນທາ ຮຸ່ນນໍ້າໜັກ 57 ກິໂລກຣາມ, ຄູ່ທີ 4  ຂຸນເຫຼັກ ສະໂມສອນ ຄຳເສັງ ພົບກັບ  ເພັດໂພໄຊ ສໍສີຣີນທາ  ຮຸ່ນນໍ້າໜັກ 59 ກິໂລກຣາມ, ຄູ່ທີ 5 ເຜົາຂະມຸ ສິດໂຕ້ພາລຸ້ງ ພົບກັບ ຄຳເຟືອງ ຕະຫຼາດຫ້ວຍຫົງ ຮຸ່ນນໍ້າໜັກ 62 ກິໂລກຣາມ ແລະ ຄູ່ທີ 6 ກະລຽງ ສິດຂຸນພົນ ພົບກັບ ເພັດເພັດມະນຸດ ຮຸ່ນນໍ້າໜັກ 51 ກິໂລກຣາມ.   

       ການແຂ່ງຂັນລາຍການດັ່ງກ່າວ ຈັດຂຶ້ນ ກໍເພື່ອເປັນການທົດສອບນັກກິລາ ນວ ກຽມຮ່ວມງານກິລາ ຊຽງຂວາງ ເກມ 2020 ພ້ອມທັງສົ່ງເສີມນັກຊົກຮຸ່ນສືບທອດກ້າວສູ່ເງິນລ້ານ ລາຍການນີ້ມີລາງວັນຮັບປະກັນມວຍມັນເດືອດຫຼາຍລາງວັນ ຮອງຮັບມອບໃຫ້ ຖ້າຫາກມວຍຄູ່ໃດ ຂຶ້ນຊົກມີການໃຊ້ອາວຸດ ທ່າອີ່ແຂ້ຟາດຫາງ ແລະ ສອກກັບ ສາມາດນ໋ອກຄູ່ແຂ່ງຂັນ ຈະມີລາງວັນໂບນັດໃຫ້ 2 ລ້ານກີບ ສ່ວນທ່າເຂົ່າລອຍນ໋ອກຄູ່ແຂ່ງຂັນ ກໍຈະໄດ້ຮັບເງິນໂບນັດຈາກພວກເຮົາ 5 ແສນກີບ ແລະ ເງິນລາງວັນຈາກ ຜະລິດຕະພັນ ເສືອ 11 ໂຕ 5 ແສນກີບ ນອກນັ້ນ ນ໋ອກສອກ ໄດ້ 4 ແສນກີບ ແລະ ມວຍຄູ່ເດືອໄດ້ຮັບຜູ້ລະ 2,5 ແສນກີບ.

ໂດຍ ປາກກາດຳ