ລາຍລະອຽດຂ່າວ
ຫຼວງນໍ້າທາ ຖະຫຼົ່ມ ຜົ້ງສາລີ 7-0 ເຕະບານ ງານກິລາ 5 ແຂວງພາກເໜືອ ແລະ ບຽນດຽນຟູ ຄັ້ງທີ Xll ທີ່ແຂວງບໍ່ແກ້ວ
ຂຽນເມື່ອ: 08/01/2020 23:01 | ໂດຍ: ເພຣເມັກເກີ | ອ່ານ: 1088 ຄັ້ງ

           ຂົນພົນນັກເຕະບານແຂວງຫຼວງນໍ້າທາ ລົງສະໜາມນັດທໍາອິດໂຊຟອມເກັ່ງໄລ້ຖະຫຼົ່ມເອົາຊະນະ ແຂວງຜົ້ງສາລີ 7-0 ປະຕູ ເຂົ້າຮອບ 4 ທີມເປັນທີ່ຮຽບຮ້ອຍແລ້ວ  ການແຂ່ງຂັນກິລາເຕະບານ ງານກິລາ ແລະ ແລກປ່ຽນສິລະປະ-ວັນນະຄະດີ ແລະ ວັດທະນະທໍາ ນັກຮຽນມັດທະຍົມສຶກສາ 5 ແຂວງພາກເໜືອ ແລະ ແຂວງດຽນບຽນຟູ ສສ ຫວຽດນາມ ຄັ້ງ​ທີ XII ປະຈໍາສົກຮຽນ 2020 ທີ່ແຂວງບໍ່ແກ້ວ ຮັບກຽດເປັນເຈົ້າພາບ.  

          ອີງຄາມການລາຍງານຂອງ ທ່ານ ບຸນຄົງ ວັນນາສິດ ນັກຂ່າວປະຈຳພະແນກສຶກສາທິການ ແລະ ກິລາ ແຂວງຫຼວງນໍ້າທາ ແຈ້ງໃຫ້ຊາບວ່າ: ໃນຕອນເຊົ້າວັນທີ 8 ມັງກອນ ຜ່ານມາ ໄດ້ມີການແຂ່ງຂັນເຕະບານ ງານກິລາ ແລະ ແລກປ່ຽນສິລະປະ-ວັນນະຄະດີ ແລະ ວັດທະນະທໍາ ນັກຮຽນມັດທະຍົມສຶກສາ 5 ແຂວງພາກເໜືອ ແລະ ແຂວງດຽນບຽນຟູ ສສ ຫວຽດນາມ ຄັ້ງ​ທີ XII ປະຈໍາສົກຮຽນ 2020 ທີ່ແຂວງບໍ່ແກ້ວເປັນການພົບກັນລະຫວ່າງ ແຂວງຫຼວງນໍ້າທາ ພົບກັບ ແຂວງຜົ້ງສາລີ ຜ່ານການແຂ່ງຂັນຜົນປະກົດວ່າ: ແຂວງຫຼວງນໍ້າທາ ສາມາດໄລ່ຖະຫຼົ່ມເອົາຊະນະ ທີມແຂວງຜົ້ງສາລີ ໄປແບບຂາດຮອຍ 7-0 ປະຕູ ເກັບ 3 ແຕັມໄດ້ສໍາເລັດ ພ້ອມທັງໄດ້ຜ່ານເຂົ້າຮອບ 4 ທີມສຸດທ້່າຍເປັນທີ່ຮຽບຮ້ອຍ ເຖິງຈະເຫຼືອຄິວລົງສະໜາມ ພົບກັບ ແຂວງອຸດົມໄຊກໍຕາມ ເນື່ອງຈາກ ແຂວງຜົ້ງສາລີ ລົງສະໜາມ 2 ນັດ ເສຍ 2 ນັດຊ້ອນ ບໍ່ມີຈັກຄະແນນ ຕົກຮອບຕາມລະບຽບ. ຂະນະທີ່ ຜົນອີກ 2 ຄູ່ ທີ່ທໍາການແຂ່ງຂັນມາແຕ່ວັນທີ 7 ມັງກອນ ຜ່ານມາ ທີມເຈົ້າພາບ ແຂວງບໍ່ແກ້ວ ໃນນັດທຳອິດສາມາດຊະນະ ແຂວງບຽນດຽນຟູ 3-0 ປະຕູ ຕ້ອງມາພາດທ່າ ຖືກແຂວງຫຼວງພະບາງ  ຊະນະຄາຖິ່ນ 3-1 ປະຕູ ສົ່ງຜົນໃຫ້ ຫຼວງພະບາງ ມີ 3 ແຕັມ ມີລຸ້ນເຂົ້າຮອບ 4 ແລະ ແຂວງຜົ້ງສາລີ ເສຍໃຫ້ ແຂວງອຸດົມໄຊ 0-4 ປະຕູ. ຂະນະທີ່ກໍາລັງລາຍງານ

ແຂວງບໍ່ແກ້ວ ໄດ້ລົງແຂ່ງຂັນນັດສຸດທ້າຍ ພົບກັບ ແຂວງບຽນດຽນຟູ ສສ ຫວຽດນາມ ໃນຕອນແລງວັນທີ 8 ມັງກອນ 2020 ຖ້າແຂວງບໍ່ແກ້ວ ສາມາດເອົາຊະນະ ແຂວງບຽນດຽນຟູ ຜ່ານເຂົ້າຮອບທັນທີ່ ສ່ວນແຂວງບຽນດຽນຟູ ຕົກຮອບຕາມລະບຽບ ແຕ່ຖ້າຫາກ ແຂວງບໍ່ແກ້ວ ເສຍກໍຕ້ອງມາໄລ່ຄະແນນໄດ້ເສຍກັນຕື່ມອີກ. ນອກຈາກນັ້ນ, ໃນຕອນເຊົ້າມື້ນີ້ ກໍເປັນນັດສຸດທ້າຍຂອງກຸ່ມ ບີ ລະຫວ່າງ ແຂວງອຸດົມໄຊ ພົບກັບ ແຂວງຫຼວງນໍ້າທາ  ສ່ວນຜົນຈະເປັນແນວໃດນັ້ນ ຈະຂໍລາຍງານໃຫ້ທ່ານຊາບຕື່ມອີກ.

          ສຳລັບການແຂ່ງຂັນກິລາເຕະບານ ງານກິລາ ແລະ ແລກປ່ຽນສິລະປະ-ວັນນະຄະດີ ແລະ ວັດທະນະທໍາ ນັກຮຽນມັດທະຍົມສຶກສາ 5 ແຂວງພາກເໜືອ ແລະ ແຂວງດຽນບຽນຟູ ສສ ຫວຽດນາມ ຄັ້ງ​ນີ້ ມີ 5 ແຂວງຈາກ ສສປ ລາວ ແລະ ແຂວງບຽນດຽນຟຸ ສສ ຫວຽດນາມ ເຂົ້າຮ່ວມ 6 ທີມ ແບ່ງເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ກຸ່ມ ເອ ມີ ເຈົ້າພາບ ແຂວງບໍ່ແກ້ວ, ແຂວງຫຼວງພະບາງ ແລະ ແຂວງບຽນດຽນຟູ ສ່ວນກຸ່ມ ບີ ມີແຂວງອຸດົມໄຊ, ແຂວງຜົ້ງສາລີ ແລະ ແຂວງຫຼວງນໍ້າທາ.  

       ການແຂ່ງຂັນງານກິລາ ແລະ ວັນນະຄະດີດັ່ງກ່າວ ປີນີ້ຈັດຂຶ້ນ ເປັນຄັ້ງທີ Xll ແລ້ວ ເຊິ່ງມີຈຸດປະສົງຫຼັກກໍເພື່ອສ້າງຄວາມສາມັກຄີໄມຕີຈິດມິດຕະພາບລະຫວ່າງລາວ-ຫວຽດນາມ ພ້ອມທັງເປັນການສ້າງຄວາມເຂັ້ມແຂງການຮຽນການສອນຫຼັກສູດວິຊາພະລະ ແລະ ສີລະປະສຶກສາ ແລະ ຫຼິ້ນກິລາເພື່ອສຸຂະພາບ, ມິດຕະພາບ, ຄວາມສາມັກຄີ ແລະ ຫ່າງໄກສິ່ງເສບຕິດ ລາຍການນີ້ ມີນັກຮຽນມັດທະຍົມສຶກສາ  ທີ່ມາຈາກ 5  ແຂວງພາກເໜືອ ສປປ ລາວ  ປະກອບມີ ແຂວງບໍ່ແກ້ວ ເຈົ້າພາບ, ແຂວງຫຼວງພະບາງ, ແຂວງອຸດົມໄຊ, ແຂວງຜົ້ງສາລີ, ແຂວງຫຼວງນໍ້າທາ ແລະ ແຂວງດຽນບຽນຟູ ສສ ຫວຽດນາມ ເຂົ້າຮ່ວມ, ໃນນັ້ນ ມີການແຂ່ງຂັນ 4 ປະເພດກິລາ  ຄື:  ບານເຕະຊາຍ, ດອກປີກໄກ່ຍິງ-ຊາຍ, ກະຕໍ້ຍິງ-ຊາຍ ແລະ ກິລາໜ້າເກັກຍິງ-ຊາຍ ນອກນັ້ນ ໃນມື້ສຸດທ້າຍກໍຈະມີການແຂ່ງຂັນສິລະປະ-ວັນນະຄະດີ ໃນງານລ້ຽງພິທີສະຫຼຸບປິດການແຂ່ງຂັນຕື່ມອີກ.

 

ໂດຍ ປາກກາດຳ