ລາຍລະອຽດຂ່າວ
ມາດເຕີ ເຊເວັນ ກຽມອຸ່ນເຄື່ອງ 3 ນັດລວດ ທີ່ປະເທດໄທ ອາທິດນີ້ ກ່ອນລຸຍເຕະບານ ເອເອັບຊີ ຄັບ 2020 ຮອບ​ເພ​ອອບ
ຂຽນເມື່ອ: 07/01/2020 19:01 | ໂດຍ: ເພຣເມັກເກີ | ອ່ານ: 153 ຄັ້ງ

          ສະໂມສອນ ມາດເຕີ ເຊເວັນ ເອັບຊີ ກຽມເກມອຸ່ນເຄື່ອງ 3 ນັດລວດ ທີ່ປະເທດໄທ ພົບກັບ ສະໂມສອນ ໜອງບົວ ພິດຊະຍາ ທີມໃນໄທລີກ 2, ສະໂມສອນ ຂອນແກ່ນ ເອັບຊີ ທີມໃນໄທລີກ 2 ແລະ ສະໂມສອນ ນະຄອນຣາດຊະສີມາ ເອັບຊີ ໄທລີກ 1 ໃນອາທິດນີ້ ກ່ອນລຸຍການແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ 2 ນັດ ກັບ ສະໂມສອນ PREAH KHAN REACH SVAY RIENG FC ຈາກ​ປະ​ເທດ​ກຳ​ປູ​ເຈຍ ໃນທ້າຍເດືອນມັງກອນນີ້.

          ອີງຕາມການໃຫ້ສຳພາດຂອງ ທ່ານ ບຸນຖະໜອມ ສີຫາລາດ ຜູ້ຈັດການທີມສະມໂສອນ ມາດເຕີ ເຊເວັນ ເອັບຊີ ໃນວັນທີ 7 ມັງກອນ ຜ່ານມາ ໃຫ້ຊາບວ່າ : ປັດຈຸບັນນີ້ ການກະກຽມທີມຂອງສະໂມສອນ ມາດເຕີ ເຊເວັນ ເອັບຊີ ໃນການເຂົ້າຮ່ວມແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ 2 ນັດ ກັບ ສະໂມສອນ PREAH KHAN REACH SVAY RIENG FC ຈາກ​ປະ​ເທດ​ກຳ​ປູ​ເຈຍ ໃນທ້າຍເດືອນມັງກອນນີ້ ແມ່ນມາໄດ້ເກືອບເຕັມຮ້ອຍເປີເຊັນແລ້ວ ພາຍຫຼັງໄດ້ມີການເສີມນັກເຕະລາວ ແລະ ຕ່າງປະເທດ ຫຼາຍຕຳແໜ່ງ ລວມໄປເຖິງການປ່ຽນຄູຝຶກໃໝ່ອີກດ້ວຍ. ເພື່ອເປັນການທົດສອບທີມ ແລະ ເປັນການຕ້ອນຮັບຫົວໜ້າຄູຝຶກໃໝ່ ທາງພວກເຮົາໄດ້ມີການຈັດໂປຣແກຣມອຸ່ນເຄື່ອງ 3 ນັດລວດ ກ່ອນລຸຍ ເອເອັບຊີ ຄັບ 2020 ນີ້ ປະກອບມີ ພົບກັບ ສະໂມສອນ ໜອງບົວ ພິດຊະຍາ ທີມໃນໄທລີກ 2 ໃນວັນທີ 8 ມັງກອນ 2020 ທີ່ສະໜາມກິລາໜອງບົວ ປະເທດໄທ  16:00 ໂມງ, ພົບກັບ ສະໂມສອນ ຂອນແກ່ນ ເອັບຊີ ທີມໃນໄທລີກ 2 ໃນວັນທີ 10 ມັງກອນ 2020 ທີ່ສະໜາມຂອນແກ່ນ ປະເທດໄທ  16:00 ໂມງ ແລະ ສະໂມສອນ ນະຄອນຣາດຊະສີມາ ເອັບຊີ ໄທລີກ 1 ໃນວັນທີ 12 ມັງກອນ 2020 ທີ່ສະໜາມກິລານະຄອນຣາດຊະສີມາ ປະເທດໄທ ເວລາ 16:00 ໂມງ.

ສຳລັບ ຕາຕະລາງແຂ່ງຂັນຂອງສະໂມສອນ ມາດເຕ ເຊເວັນ ເອັບຊີ ໃນການແຂ່ງຂັນເຕະບານ ເອເອັບຊີ ຄັບ 2020 ຮອບເພອອບ 2 ນັດ ກັບ ສະໂມສອນ PREAH KHAN REACH SVAY RIENG FC ຈາກ​ປະ​ເທດ​ກຳ​ປູ​ເຈຍ ແມ່ນນັດ​ທຳ​ອິດ​ຈະ​ແຂ່ງ​ຂັນ​ໃນ​ວັນ​ທີ 22 ມັງ​ກອນ 2020 ຢູ່​ທີ່​ປະ​ເທດ​ກຳ​ປູ​ເຈ້ຍ. ສ່ວນ​ນັດ​ທີ ສອງ ຈະ​ແຂ່ງ​ຂັນ​ໃນ​ວັນ​ທີ 29 ມັງ​ກອນ 2020 ແຂ່ງ​ຂັນ​ຢູ່​ທີ່​ສະ​ໜາມ​ກິ​ລາ​ແຫ່ງ​ຊາດ ຫຼັກ 16 ​ ຖ້າ​ຫາກ​ວ່າ​ທີມ​ໃດສາ​ມາດ​ຜ່ານ​ເຂົ້າ​ຮອບ​ໄດ້ ​ຈະ​ຢູ່​ຮ່ວມ​ກຸ່ມ G ປະ​ກອບ​ມີ ສະໂມສອນ Ceres Negros FC ຈາກ​ປະ​ເທດ​ຟີ​ລິບ​ປິນ, ສະໂມສອນ Than Quang Ninh ​ຈ​າກ​ປະ​ເທດ ສສ ​ຫວຽດ​ນາມ ແລະ ສະໂມສອນ Bali United FC ​ຫລ​ື ທີມ​ອັນ​ດັບ 3 ລີກ ປະ​ເທດ​ອິນ​ໂດ​ເນ​ເຊຍ.​ ຂະນະທີ່ ອີກທີມຢ່າງແຊ໋ມ ລາວ ພຣີເມຍລີກ 2019 ສະໂມສອນ ລາວ ໂຕໂຢຕ້າ ເອັບຊີ ແມ່ນ​ ຢູ່ຮ່ວມກຸ່ມ​ F ປະກອບມີ ສະໂມສອນ Hochiminh City FC ຈາກ​ ປະເທດ ສສ ຫວຽດ​ນາມ, ສະໂມສອນ Hougang United FC ຈາກ​ ປະເທດສິງ​ກະ​ໂປ ແລະ ທີມຊະ​ນະ​ໃນ​ຮອບ​ເພ​ລອອ​ຟ​ລະ​ຫວ່າງສະໂມສອນ INDERA SC ຈາກປະເທດບ​ຣູໄນ ພົບກັບ ສະໂມສອນ YANGON UNITED FC ຈາກ​ປະ​ເທດ​ມຽນ​ມາ.

 

ໂດຍ: ວັນສົດໃສ

 




ຂ່າວລ່າສຸດ