ລາຍລະອຽດຂ່າວ
 ເປີດສາກແລ້ວ ຟຸດຊໍ ຊາຍ-ຍິງ ທົ່ວແຂວງອຸດົມໄຊ ຊີງຂັນເລຂາຊາວໜຸ່ມແຂວງ ຄັ້ງທີ lll
ຂຽນເມື່ອ: 03/01/2020 13:01 | ໂດຍ: ເພຣເມັກເກີ | ອ່ານ: 578 ຄັ້ງ

      ເປີດສາກແລ້ວ ການແຂ່ງຂັນກິລາຟຸດຊໍ ປະເພດທີມຍິງ ແລະ ທີມຊາຍ (ປະເພດ 5 ຄົນ) ທົ່ວແຂວງອຸດົມໄຊ ຊີງຂັນທ່ານເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ຄັ້ງທີ lll  ເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຜູ້ແທນຊາວໜຸ່ມ ທົ່ວແຂວງອຸດພົມໄຊ ຄັ້ງທີ Vlll ເຊິ່ງຈະໄຂຂຶ້ນໃນມໍ່ໆນີ້ ພ້ອມທັງສົ່ງເສີມນັກກິລາຊາວໜຸ່ມຂອງແຂວງໄດ້ມີການເຄື່ອນໄຫວຫຼິ້ນກິລາ ເພື່ອພັດທະນາຕົນເອງກ້າວສູ່ການເປັນນັກກິລາຂອງແຂວງ ກຽມຮ່ວມ ຊຽງຂວາງ ເກມ 2020 ການແຂ່ງຂັນລາຍການດັ່ງກ່າວ ມີນັກກິລາຮ່ວມທັງໝົດ 61 ທີມ, ໃນນັ້ນ ປະເພດທີມຍິງມີ 17 ທີມ ແລະ ທີມຊາຍມີເຖິງ 44 ທີມ.

      ຕາມການລາຍງານຂອງທ່ານ ສຸກສະຫວັນ ວົງລົມ ຫົວໜ້າຂະແໜງຂະບວນການ, ຜູ້ຮັບຜິດຊອບຂະບວນການກະກຽມກອງປະຊຸມໃຫຍ່ຜູ້ແທນຊາວໜຸ່ມ ທົ່ວແຂວງອຸດພົມໄຊ ຄັ້ງທີ Vlll ແຈ້ງໃຫ້ຊາບວ່າ: ເມື່ອທ້າຍເດືອນທັນວາ 2019 ຜ່ານມາ ທີ່ສະໜາມກິລາເຕະບານຫຍ້າທຽມ ອິນທະວົງ ເທສະບານເມືອງໄຊ ແຂວງອຸດົມໄຊ ໄດ້ມີພິທີເປີດ ການແຂ່ງຂັນກິລາຟຸດຊໍ ປະເພດທີມຍິງ ແລະ ທີມຊາຍ ທົ່ວແຂວງອຸດົມໄຊ ຊີງຂັນທ່ານເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວແຂວງ ຄັ້ງທີ lll ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ສົມດີ ເຕັງເບຼຍຈື ກຳມະການສູນກາງຊາວໜຸ່ມປະຊາຊົນ ປະຕິວັດລາວ ທັງເປັນເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວແຂວງ, ມີທ່ານ ໂອວາດ ຈັນຍທະວົງ ກໍາມະການປະຈຳພັກແຂວງ, ຜູ້ຊີ້ນຳອົງການຈັດຕັ້ງມະຫາຊົນຂັ້ນແຂວງ ພ້ອມດ້ວຍບັນດາຄະນະປະຈຳ, ຄະນະບໍລິຫານງານເລຂາຊາວແຂວງ, ເມືອງ ແລະ ພະແນການອ້ອມຂ້າງແຂວງ ຕະຫຼອດຄູຝຶກ, ນັກກິລາ ແລະ ກອງເຊຍເຂົ້າຮ່ວມຢ່າງຫຼວງຫຼາຍ.

      ລາຍການນີ້ຈັດຂຶ້ນ ກໍເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຜູ້ແທນຊາວໜຸ່ມ ທົ່ວແຂວງອຸດພົມໄຊ ຄັ້ງທີ Vlll ເຊິ່ງຈະໄຂຂຶ້ນໃນມໍ່ໆນີ້ ໃຫ້ມີບັນຍາກາດຟົດຟື້ນ ພ້ອມທັງສົ່ງເສີມນັກກິລາຊາວໜຸ່ມຂອງແຂວງໄດ້ມີການເຄື່ອນໄຫວຫຼິ້ນກິລາ ເພື່ອພັດທະນາຕົນເອງກ້າວສູ່ການເປັນນັກກິລາຂອງແຂວງ ກຽມຮ່ວມ ຊຽງຂວາງ ເກມ 2020 ການແຂ່ງຂັນລາຍການດັ່ງກ່າວ ມີນັກກິລາຮ່ວມທັງໝົດ 61 ພາກສ່ວນ, ໃນນັ້ນ ປະເພດທີມຍິງມີ 17 ທີມ ແບ່ງອອກເປັນ 4 ກຸ່ມ ແລະ ທີມຊາຍມີເຖິງ 44 ທີມ ແບ່ງອອກເປັນ 11 ກຸ່ມ ແຕ່ລະກຸ່ມແຂ່ງຂັນພົບກັນໝົດ ຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ການແຂ່ງຂັນແມ່ນຈະດຳເນີນຈົນໄປເຖິງວັນທີ 31 ມັງກອນ 2020 ຈຶ່ງຈະສຳເລັດສົມບູນ.

      ລາງວັນຊະນະເລີດໃນການແຂ່ງຂັນລາຍການດັ່ງກ່າວ ຂອງທັງສອງປະເພດ ແມ່ນໄດ້ເທົ່າກັນໝົດ ສຳລັບລາງວັນທີ 1 ຈະໄດ້ຮັບຂັນແຊ໋ມ ພ້ອມເງິນສົດທີມລະ 2 ລ້ານກີບ, ທີ 2 ຈະໄດ້ຮັບຂັນ ພ້ອມເງິນສົດທີມລະ 1,5 ລ້ານກີບ, ທີ 3 ຈະໄດ້ຮັບຂັນ ພ້ອມເງິນສົດທີມ 1 ລ້ານກີບ ແລະ ທີ 4 ຈະໄດ້ຮັບລາງວັນຊົມເຊີມເງິນສົດ 5 ແສນກີບ.

ຂ່າວໂດຍ: ປາກກາດຳ




ຂ່າວລ່າສຸດ