ລາຍລະອຽດຂ່າວ
ສິດທິເດດ ມື 1 ລາວ ຖືກຈັດສາຍແຂງຮ່ວມນັກສອຍຄິວລະດັບໂລກ ລາຍການ ແຊ້ມດວນແຊ້ມ ຊະບາ ສະນຸກເກີ ຄັບ 2020
ຂຽນເມື່ອ: 02/01/2020 14:01 | ໂດຍ: ເພຣເມັກເກີ | ອ່ານ: 246 ຄັ້ງ

          ສິດທິເດດ ສັກບ່ຽງ ຫຼື ໜຶ່ງເມືອງລາວ ເຈົ້າຂອງຫຼຽນທອງ ຊີເກມ 2019 ຫຼ້າສຸດ ທີ່ປະເທດຟິລິບປິນຖືກຈັດຢູ່ສາຍແຂງ ກຸ່ມ ບີ ຮ່ວມກັບ ຂວັນ ສະລະບູລີ, ເຕັກ ຫົວຫີນ ແລະ ຕ໋ອງ ສິນສ່ອຍ ຫຼື ລາດສະພົນ ຜູ້ໂອບອ້ອມ ນັກສະນຸກເກີເທີນໂປລະດັບໂລກ ທີ່ເຄີຍປາບ ນຸກ ສາກົນ ຫຼື ກຣິດສະນັດ ເລີດສັດທະຍາທອນ ເຈົ້າຂອງຫຼຽນຄຳ ຊີເກມ ມາໃໝ່ໆໝາດໆ ທີ່ປະເທດຟິລິບປິນ ໃນການແຂ່ງຂັນສະນຸກເກີ ແຊ້ມດວນແຊ້ມ ລາຍການ ຊະບາ ສະນຸກເກີ ຄັບ 2020 ຈະຈັດຂຶ້ນ ລະຫວ່າງວັນທີ 10-15 ມັງກອນນີ້ ທີ່ແຂວງປະທຸມທານີ ຣາຊະອານາຈັກໄທ.

          ຕາມການໃຫ້ສຳພາດຈາກທ້າວ ສິດທິເດດ ສັກບ່ຽງ ໃນຕອນເຊົ້າວານນີ້ (2 ມັງກອນ) ໃຫ້ຮູ້ວ່າ: ຫຼັງຈາກທີ່ໄດ້ສ້າງຜົນງານຄວ້າຫຼຽນຄຳ ງານກິລາສະນຸກເກີ  ຊີເກມ ເມື່ອປີ 2017 ທີ່ປະເທດມາເລເຊຍ ເປັນເຈົ້າພາບ, ຄວ້າຫຼຽນທອງ ໃນງານກິລາສະນຸກເກີ ຊີເກມ ທີ່ປະເທດຟີລິບປິນ ໃນເດືອນທັນວາ 2019 ຜ່ານມາ ແລະ ຫາກໍສາມາດຄອງແຊ້ມ​ ການແຂ່ງຂັນກິລາສະນຸກເກີ​ 6​ ແດງ​ ຊີເຈ ສະນຸກເກີ ຄັບ 2019 ລາຍການໃຫຍ່​ ມິດຕະພາບ ລາວ-ໄທ ຈັດຂຶ້ນທີ່ແຂວງສະຫວັນນະ​ເຂດ​ ລະຫວ່າງວັນທີ 17-20 ທັນວາ 2019 ເພື່ອເປັນການເຊື່ອມສາຍສຳພັນທະໄມຕີ ແລະ ສົ່ງເສີມນັກກິລາສະນຸກເກີສອງຊາດດັ່ງກ່າວ ກ້າວສູ່ລະດັບມືອາຊີບໃນຕໍ່ໜ້າ, ໃນລາຍການດັ່ງກ່າວ ນ້ອງຍັງສາມາດກວາດລາງວັນໄດ້ຮັບເງິນສົດ 6​ ລ້ານ, ລາງວັນເບກສຸງສຸດ ດ້ວຍ 75 ຄະແນນ ໄດ້ຮັບເງິນ 7,5 ແສນກີບ ແລະ​ ລາງວັນ​ Maximum ອີກ ​1 ລ້ານກີບ ແລະ ໃນນາມທີ່ໄດ້ເຂົ້າຮ່ວມແຂ່ງຂັນທົວນາເມັນຕ່າງໆ ຈັດຂຶ້ນທີ່ປະເທດໄທ. ດັ່ງນັ້ນ, ຍ້ອນຜົນງານດັ່ງກ່າວ ຈຶ່ງໄດ້ໂຄຕ້າພິເສດເຂົ້າຮ່ວມແຂ່ງຂັນສະນຸກເກີ ແຊ້ມດວນແຊ້ມ ລາຍການ ຊະບາ ສະນຸກເກີ ຄັບ 2020 ຈະຈັດຂຶ້ນ ລະຫວ່າງວັນທີ 10-15 ມັງກອນນີ້ ທີ່ແຂວງປະທຸມທານີ ຣາຊະອານາຈັກໄທ.

       ທ້າວ ສິດທິເດດ ສັກບ່ຽງ ບອກຕື່ມອີກວ່າ:  ລາຍການນີ້ ເປັນລາຍການທີ່ທ້າທາຍທີ່ສຸດ ແລະ ຕື່ນເຕັ້ນທີ່ສຸດ ເຊິ່ງເປັນລາຍການທີ່ຂ້ອຍໄຝ່ຝັນຢາກຈະເຂົ້າຮ່ວມແຂ່ງຂັນໃນຊີວິດນີ້ ເພາະມີນັກກິີລາສະນຸກເກີ ລະດັບມືຕົ້ນໆຂອງປະເທດໄທ ແລະ ນັກສະນຸກເກີມືອາຊີບ ຫຼື ເທີນໂປ ລະດັບໂລກ ເຂົ້າຮ່ວມຊີງໄຊຫຼາຍຄົນ ບໍ່ວ່າຈະເປັນ ເອັບວັນ, ຕ໋ອງ ສິນສ່ອຍ, ສັນນີ້ ສາຍລໍຟ້າ, ນຸກ ສາກົນ ເຈົ້າແຊ້ມຫຼຽນຄຳ ຊີເກມ 2019 ທີ່ປະເທດຟິລິບປິນ ແລະ ອີກຫຼາຍໆຄົນ ແຕ່ໃນການຈັບສະຫຼາກຕົວຈິງນ້ອງຖືກຈັດຢູ່ສາຍ ບີ ຮ່ວມກັບ ອ້າຍຕ໋ອງ ສິນສ່ອຍ, ຂວັນ ສະລະບູລີ ແລະ ເຕັກ ຫົວຫີນ ເຊິ່ງນັດທຳອິດ ບໍ່ຮູ້ວ່າຈະຖືກກັບນັກກິລາຄົນໃດ ແຕ່ທີ່ສຳຄັນ ນ້ອງຕັ້ງເປົ້າໝາຍໄວ້ແລ້ວ ບໍ່ວ່າຈະພົບກັບຄົນໃດກໍຕາມ ນ້ອງຈະໃຊ້ປະສົບການທັງໝົດວັດກັບທຸກ ເພື່ອສານຝັນ ທີ່ຢາກກ້າວເຂົ້າໄປເປັນນັກສະນຸກເກີມືອາຊີບລະດັບສາກົນ ໃຫ້ປະກົດຜົນເປັນຈິງ.

      ລາຍການ ແຂ່ງຂັນສະນຸກເກີ ແຊ້ມດວນແຊ້ມ ລາຍການ ຊະບາ ສະນຸກເກີ ຄັບ 2020 ຈະຈັດຂຶ້ນ ລະຫວ່າງວັນທີ 10-15 ມັງກອນນີ້ ທີ່ແຂວງປະທຸມທານີ ຣາຊະອານາຈັກໄທ ມີນັກກິລາລະດັບເທີນໂປໂລກ ແລະ ນັກກິລາທີ່ໄດ້ແຊ້ມລາຍການນ້ອຍໃຫຍ່ ຕ່າງໆ ເຂົ້າຮ່ວມດວນກັນ ໃຜຈະເປັນເບີ 1 ໃນລາຍການ ຊະບາ ສະນຸກເກີ ຄັບ 2020 ຂະນະທີ່ ສິດທິເດດ ສັກບ່ຽງ ໄດ້ເຂົ້າຮ່ວມແຂ່ງຂັນໃນຄັ້ງນີ້ ກໍຍ້ອນວ່າ ໜຶ່ງເມືອງລາວ ເປັນສະມາຊິກທີ່ໄດ້ເຂົ້າຮ່ວມທົວນາເມັນຕ່າງໆຂອງປະເທດໄທ ໃນໄລຍະທີ່ຜ່ານມາ ແລະ ໄດ້ສິດຍ້ອນເຄີຍຍາດໄດ້ຫຼຽນຄຳ ຊີເກມ ທີ່ປະເທດມາເລເຊຍ ເມື່ອປີ 2017 ແລະ ຄອງແຊ້ມສະນຸກເກີ​ 6​ ແດງ​ ຊີເຈ ສະນຸກເກີ ຄັບ 2019 ທີ່ແຂວງສະຫວັນນະເຂດ.

ໂດຍ ປາກກາດຳ