ລາຍລະອຽດຂ່າວ
ບານເຕະເຈົ້າພາບ ເນັ້ນໃຊ້ລູກຫຼານພາຍໃນແຂວງ ຫວັງສ້າງປະຫວັດສາດ ຊຽງຂວາງ ເກມ 2020
ຂຽນເມື່ອ: 02/01/2020 14:01 | ໂດຍ: ເພຣເມັກເກີ | ອ່ານ: 2679 ຄັ້ງ

      ເຈົ້າພາບ ສະຫະພັນກິລາບານເຕະ ແຂວງຊຽງຂວາງ ເນັ້ນໃຊ້ບໍລິການນັກເຕະລູກຫຼານແທ້ຂອງພໍ່ແມ່ປະຊາຊົນຊາວວິລະຊົນດິນແດນທົ່ງໄຫຫີນ ເຂົ້າຮ່ວມລ່າຄວາມຫວັງຢາກສ້າງປະຫວັດສາດທະລຸເຂົ້າຮອບຮອງຊະນະເລີດ ການແຂ່ງຂັນບານເຕະຍິງ-ຊາຍ ງານມະຫະກໍາກິລາແຫ່ງຊາດ ຄັ້ງທີ Xl ທີ່ແຂວງຊຽງຂວາງ ທີ່ຈະຈັດຂຶ້ນລະຫວ່າງວັນທີ 22 ມີນາ ຫາ 1 ເມສາ 2020.

      ຕາມການໃຫ້ສຳພາດຂອງທ່ານ ສົມທອງ ຜະລີຈັນ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຊຽງຂວາງ ທັງເປັນຮອງປະທານສະຫະພັນບານເຕະແຂວງ ແຈ້ງໃຫ້ຊາບວ່າ: ພາຍຫຼັງທີ່ໄດ້ມີການເຕົ້າໂຮມຄັດເລືອກນັກກິລາທັງຍິງ ແລະ ຊາຍ ມາຫຼາຍຕົບຫຼາຍຕ່າວຜ່ານມາ ແລະ ກໍມີການເລື່ອນຈັດງານ ຊຽງຂວາງ ເກມ ອອກໄປຫຼາຍຄັ້ງເຮັດໃຫ້ນັກກິລາ ທີ່ພວກເຮົາເລືອກໄດ້ ຕ້ອງມີການປ່ຽນແປງ ເນື່ອງຈາກວ່ານັບມາຮອດປັດຈຸບັນກໍມີນັກກິລາບາງຄົນສຸຂະພາບຮ່າງກາຍເຂົາເຈົ້າບໍ່ເຕັມຮ້ອຍຄືກ່ອນໜ້ານີ້ ສະນັ້ນ ແຂວງພວກເຮົາຈຶ່ງໄດ້ມີການປະກາດແຈ້ງການອີກຄັ້ງໜຶ່ງ ເພື່ອເປີດໂອກາດໃຫ້ຄົນໜຸ່ມຮຸ່ນໃໝ່ເຂົ້າຮ່ວມຄັດເລືອກໃນກາງເດືອນມັງກອນນີ້ ຈະໃຫ້ຮູ້ວ່າຈະມີຄົນໃດທີ່ຈະໄດ້ຕາງໜ້າແຂວງເຂົ້າຮ່ວມງານດັ່ງກ່າວ, ໃນນັ້ນ ເປົ້າໝາຍຈະໃຫ້ໄດ້ນັກກິລາຍິງ ຈຳນວນ 22 ຄົນ ແລະ ຊາຍ ຈຳນວນ 22 ຄົນ ທັງໝົດນີ້ ແມ່ນຈະເນັ້ນເອົາສະເພາະແຕ່ນັກກິລາລູກຫຼານຂອງພໍ່ແມ່ປະຊາຊົນຊາວແຂວງຊຽງຂວາງ ເປັນສ່ວນໃຫຍ່ ແລະ ຈະໄດ້ຮຽກຕົວນັກກິລາລູກຫຼານແຂວງ ຈຳນວນໜຶ່ງ ທີ່ໄປຮຽນຕໍ່ທີ່ ນະຄອນຫຼວງວຽງຈັນ ກັບຄືນມາຮ່ວມຝຶກຊ້ອມກັບ ເຊິ່ງຈະເລີ່ມເຂົ້ານອນສູນຢ່າງເປັນທາງການ ໃນເດືອນກຸມພານີ້ ໂດຍກຳນົດສະໜາມຝຶກຊ້ອມ 3 ສະໜາມ ກໍຄື ສະໜາມກິລາຂອງໂຮງຮຽນເຕັກນິກ ວິຊາຊີບແຂວງ, ໂຮງຮຽນ ເອັດໂອເອັດ ແລະ ສະໜາມກິລາແຂວງ ເປັນຫຼັກ ໂດຍມີເປົ້າໝາຍຫຼັກຈະພະຍາຍາມນຳພານັກກິລາລູກຫຼານຊາວທົ່ງໄຫຫີນ ຫວັງສ້າງຜົນງານຄັ້ງປະຫວັດສາດ ສາມາດທະລຸຜ່ານເຂົ້າໄປເຖິງຮອບຮອງ ຊະນະເລີດໃຫ້ໄດ້.

       ສໍາລັບ ຊຽງຂວາງ ເກມ 2020 ໄດ້ກໍານົດດຳເນີນການແຂ່ງຂັນໃນງານມະຫະກໍາກິລາແຫ່ງຊາດ ປີນີ້ ໃນລະຫວ່າງວັນທີ 22 ມີນາ ຫາ 1 ເມສາ 2020 ເຊິ່ງມີການຊີງໄຊທັງໝົດ 28 ປະເພດກີລາຄື: ບານເຕະ, ແລ່ນ-ລານ, ບານບ້ວງ, ເທັນນິສ, ດອກປີກໄກ່, ກະຕໍ້, ປິ່ງປ່ອງ, ເທຄວັນໂດ, ມວຍປໍ້າ, ຢູໂດ, ປັນຈັກສີລັດ, ວູຊູ, ໝາກແລ້, ໝາກເສິກ, ເຮືອຊ່ວງ, ໝາກຂ່າງ, ໜ້າເກັກ, ຍິງທະນູ, ລົດຖີບ, ລອຍນໍ້າ, ບານສົ່ງໃນຮົ່ມ, ເປຕັງ, ໂບລິ້ງ, ກ໊ອຟ, ຍິີງປືນ, ມວຍລາວ, ມວຍສາກົນ ແລະ ສະນຸກເກີ.

ສ່ວນຜົນງານຂອງນັກກິລາບານເຕະຊາຍ …ງານກິລາແຫ່ງຊາດ ຄັ້ງທີ X ທີ່ແຂວງອຸດົມໄຊ ເມື່ອປີ 2014 ແຂວງຊຽງຂວາງ ຖືກຈັດຢູ່ ສາຍ ຄ ຮ່ວມກັບ ແຂວງອັດຕະປື, ຄໍາມ່ວນ, ຫຼວງນໍ້າທາ ແລະ ຫຼວງພະບາງ ປາກົດວ່າ: ແຂວງຊຽງຂວາງ ບໍ່ສາມາດຜ່ານຮອບທໍາອິດ ຫຼັງລົງສະໜາມ 3 ນັດ ສະເໝີພຽງ 1 ແລະ ເສຍເຖິງ 2 ນັດມີພຽງ 1 ຄະແນນ ເປັນທີມທີໂຈກຂອງສາຍດັ່ງກ່າວ.

ໂດຍ: ປາກກາດຳ