ລາຍລະອຽດຂ່າວ
ສຸກອາພອນ ວົງຈຽງຄຳ ຍ້າຍໄປຢູ່ກັບ PT ປຣະຈວບ FC ດ້ວຍຄ່າຕົວ 100 ປາຍລ້ານກີບ
ຂຽນເມື່ອ: 11/12/2019 16:12 | ໂດຍ: ເພຣເມັກເກີ | ອ່ານ: 2387 ຄັ້ງ

      ສຸກອາພອນ ວົງຈຽງຄຳ ກັບຕັນທີມຊາດລາວ ຊຸດຊີເກມ ກາຍເປັນນັກເຕະລາວທີ່ມີຄ່າຕົວແພງທີ່ສຸດທີ່ເຄີຍມີມາ ດ້ວຍການຍ້າຍຈາກ ທີມ ໄຊນາດ ຮອນບິວ ທີມໃນໄທລີກ ໄປຫຼິ້ນໃຫ້ທີມ PT ປຣະຈວບ FC ທີມໃນໄທລີກ 1, ລີກສູງສຸດຂອງປະເທດໄທຢ່າງເປັນທາງການ ຕາມການເປີດເຜີຍຂອງເວັບໄຊທາງການຂອງສະໂມສອນ PT ປຣະຈວບ FC ໃນຕອນບ່າຍຂອງມື້ນີ້ ວັນທີ 11/12/2019, ນອກຈາກສຸກອາພອນ ແລ້ວໃນການເປີດໂຕນັກເຕະໃໝ່ ຄັ້ງນີ້ PT ປຣະຈວບ FCຍັງໄດ້ເຊັນສັນຍາ ກັບ ວິນລ້ຽມ ເອນຣິເກ້ ກອງໜ້າຊາວ ບຣາຊິວ ແລະ ອຽນ ແຣມຊີ ປີກຊາວຟີລິບປິນອີກດ້ວຍ.

      ການເຊັນສັນຍາຍ້າຍທີມຄັ້ງນີ້ ຄ່າຕົວຂອງ ສຸກອາພອນ ວົງຈຽງຄຳຢູ່ທີ່ 100 ປາຍລ້ານກີບແຕ່ບໍ່ມີການເປີດເຜີຍຕົວເລກທີ່ແນ່ນອນ, ສ່ວນຄ່າເມື່ອຍຕໍ່ເດືອນທີ່ສຸກອາພອນຈະໄດ້ຮັບ ຖືວ່າສູງເປັນປະຫວັດການເຊັ່ນດຽວກັນສຳລັບນັກກິລາລາວ ຄື 50​ ລ້ານກີບຕໍ່ເດືອນ.

      ສຳລັບປະຫວັດຫຍໍ້ຂອງ ສຸກອາພອນວົງຈຽງຄຳ ເກີດເມື່ອວັນທີ 09 ມີນາ 1992 ທີ່ແຂວງຈຳປາສັກ, ເປັນເຈົ້າຂອງຄວາມສູງ 155 cm ເຖິງແມ່ນວ່າຮູບຮ່າງຈະບໍ່ສູງແຕ່ກໍ່ບໍ່ໄດ້ເປັນອຸປະສັກໃນການຫຼິ້ນບານຂອງນັກເຕະຫົວໃຈເພັດຄົນນີ້ເລີຍ, ເຂົ້າຕ້ອງຜ່ານຜ່າ ຄຳປະໝາດ ຈາກບັນດານັກເຕະ ແລຄູຝຶກຫຼາຍຕໍ່ຫຼາຍຄົນແຕ່ເຂົ້າກໍ່ໄດ້ເອົາຄຳປະໝາດເລົ່ານັ້ນເປັນແຮງພັກດັນໃນການຝຶກຊ້ອມຈົນກາຍເປັນນັກເຕະທີ່ຄົນທົ່ວ ອາຊຽນ ຮູ້ຈັກ. 

      ສຸກອາພອນ ເລີ່ມເຕະບານໂດຍການເຂົ້າເຝິກໃນສູນເອສຣາ, ກ່ອນທີ່ຈະຕິດທີມຊາດ ແລະກ້າວຂຶ້ນໃນລາວລີກ ໃຫ້ສະໂມສອນ ເອສຣາໃນປີ 2012, ຈາກນັ້ນ ລະດູການ 2012-2013 ໄດ້ຍ້າຍໄປຫຼິ້ນ ສະໂມສອນ ກຣະບີ່ FC ຂອງໄທ, 2014 ຍ້າຍໄປຫຼິ້ນໃຫ້ ສະໂມສອນ ພິດຊະນຸໂລກ FC, ໃນປີດຽວກັນກໍ່ ຍ້າຍໄປຫຼິ້ນໃຫ້ທີ ກັບສະຣະບຸຣີ, ກ່ອນທີ່ ປີ 2015 ຈະກັບມາໃຫ້ ສະໂມສອນ ລ້ານຊ້າງ ຢູໄນເຕັດ ທີມໃນບ້ານເກີດ, 2016 ກັບໄປຫຼິ້ນໃຫ້ຕົ້ນສັງກັດ ເອສຣາ, 2017 ຫຼິ້ນໃຫ້ ສະໂມສອນ ວຽງຈັນຢູໄນເຕັດ, ກ່ອນທີ່ປີ 2017 ຈະກັບໄປຫຼິ້ນໃນໄທລີກອີກຄັ້ງໃຫ້ກັບ ສະໂມສອນ ສີສະເກດ FC, ຈາກນັ້ນ​ 2018 ຍ້າຍໄປຫຼິ້ນໃຫ້ ໄຊນາດ ຮອນບິວ, ກ່ອນທີ່ຫຼ້າສຸດຈະຍ້າຍມາຢູ່ກັບ PT ປຣະຈວບ FC.

ພາບຈາກ: PT ປຣະຈວບ FC 

ໂດຍ: ນັກຂ່າວເງົາ