ລາຍລະອຽດຂ່າວ
ໜຶ່ງເມືອງລາວ ພາດທ່າ ມື 1 ໄທ ອົດປ້ອງກັນແຊ້ມ ຊີເກມ ຟິລິບປິນ ຢ່າງໜ້າເສຍດາຍ
ຂຽນເມື່ອ: 10/12/2019 16:12 | ໂດຍ: ເພຣເມັກເກີ | ອ່ານ: 434 ຄັ້ງ

      ສິດທິເດດ ສັກບ່ຽງ ຫລື ໜຶ່ງເມືອງລາວ ນັກກິລາສະນຸກເກີ ມື 1 ຂອງລາວ ເຈົ້າຂອງຫຼຽນຄຳສະນຸກເກີປະເພດຊາຍດ່ຽວ ງານກິລາ ຊີເກມ ຄັ້ງທີ XXlX ເມືອປີ 2017 ລົງແຂ່ງຂັນໃນຮອບຮອງຊະນະເລີດ ອອກນຳ ກຣິດສະນັດ ເລີດສັດທະຍາທອນ ນັກສອຍຄິວມື 1 ໄທ ໄປກ່ອນເຖິງ 2-0 ເຟຣມ ແຕ່ສຸດທ້າຍກໍຊ໋ອກ ກອງເຊຍລາວໃນສະໜາມ ໃນເມື່ອຖືກ ໄທ ແຊງຊະນະ 4-3 ເຟຣມ ອົດປ້ອງກັນແຊ້ມຫຼຽນຄຳ ຢ່າງໜ້າເສຍດ່າຍ ແຕ່ຢ່າງໃດກໍດີກໍຍັງໄດ້ຫຼຽນທອງຮອງທ້ອງ ປິດສາກເສັ້ນທາງຄວາມຫວັງລ່າຫຼຽນຄຳ ໃນງານມະຫາກຳກິລາ ຊີເກມ ຄັ້ງທີ XXX ທີ່ປະເທດຟິລິບປິນ ຮັບກຽດເປັນເຈົ້າພາບ.  

      ການແຂ່ງຂັນກິລາສະນຸກເກີ ປະເພດຊາຍດ່ຽວຮອບຮອງຊະນະເລີດ ຊີເກມ ທີ່ຟິລິບປິນ ໄດ້ມີຂຶ້ນ ເມື່ອວັນທີ 9 ທັນວາ ຜ່ານມາ, ໃນນັ້ນ ກໍມີ1ດຽວຂອງລາວ ສິດທິເດດ ສັກບ່ຽງ ແຊ້ມເກົ່າ ທະລຸເຂົ້າຮອບ ພົບກັບ ນັກສອຍຄິວມື 1 ໄທ ກຣິດສະນັດ ເລີດສັດທະຍາທອນ ຫຼື ນຸກສາກົນ ແລະ ມາເລເຊຍ ພົບກັບ ເຈົ້າພາບ ຟິລິບປິນ.

      ໃນຮອບຮອງຊະນະເລີດ ໜຶ່ງເມືອງລາວ ພົບກັບ ນຸກ ສາກົນ ນັກກິລາຈາກໄທ ຜົນປະກົດວ່າ: ເຟຣມທໍາອິດ ສິດທິເດດ ເຖິງຈະຕົກຢູ່ໃນສະຖານະການຕາມຫຼັງຢູ່ 1-42 ກ່ອນທີ່ຈະກັບມາກວາດໝົດໂຕະພິກເອົາຊະນະ ນັກກິລາໄທ 50-42 ຂຶ້ນນຳ 1-0 ເຟຣມ; ສ່ວນເຟຣທີ 2 ສິດທິເດດ ກໍເອົາຊະນະໄປແບບສະບາຍ 63-15 ກ່ອນເຂົ້າສູ່ເຟຣມທີ 3 ແລະ ເຟຣມທີ 4 ສິດທິເດດ ຊ໋ອກເອົ່ດື້ໆພາດທ່າເສຍທັງໝົດ ເຮັດໃຫ້ສະເໝີກັນ 2-2 ເຟຣມ; ເຂົ້າສູ່ເຟຣມ 5 ສິດທິເດດ ກັບມາສູ່ຟອມເກັ່ງອີກຄັ້ງພິກກັບມາເອົາຊະນະໄປ 59-50 ຄ່າຍຄວາມກົດດັນໃຫ້ກອງເຊຍລາວກັບມາຄືກຄັກອີກຄັ້ງ ເຂົ້າສູ່ເຟຣທີ 6 ສິດທິເດດ ພະຍາຍາມກັນໃຫ້ດີທີ່ສຸດ ແຕ່ນັກກິລາໄທ ຕາໄວສັງເກດເຫັນແດງຕິດກັນເປັນລູກບ່ອຍສະຖານະການຄວາມໄດ້ປຽບຈຶ່ງຕົກທີ່ໄທ ສາມາດບ່ອຍເຂົ້າຮູຕາມຄາດ ກ່ອນຈະຊ໋ອກກອງເຊຍລາວ ນັ່ງກົ້ນບໍ່ຕິດຕັ່ງ ກວາດແດງ ແລະ ສີແຕ່ລະໜ່ວຍໝົດໂຕະ ຊະນະໄປ 70-0 ເຮັດໃຫ້ສະ ເໝີກັນ 3-3 ເຟຣມ ຕ້ອງມາຕັດສິນກັນໃນເຟຣມທີ 7 ເຖິງວ່າ ສິດທິເດດ ໄດ້ຄະແນນຂຶ້ນນໍາ, ແຕ່ສຸດທ້າຍຖືກນັກກິລາຈາກໄທ ພິກເອົາຊະນະ 63-21 ເປັນ 4-3 ເຟຣມ ດັບຄວາມຫວັງທັບນັກກິລາລາວ ຜ່ານເຂົ້າໄປຊີງຫຼຽນຄໍາກັບ MOH KEEN HOO ນັກກິລາຈາກມາເລເຊຍ ທີ່ເອົາຊະນະເຈົ້າພາບ 4-1 ເຟຣມ ໃນວັນທີ 10 ທັນວາ 2019 ສົ່ງຜົນໃຫ້ ສິດທິເດດ ອົດປ້ອງກັນແຊ້ມຫຼຽນຄຳ ຢ່າງໜ້າເສຍດ່າຍ ແຕ່ຢ່າງໃດກໍດີກໍຍັງໄດ້ຫຼຽນທອງ ຮ່ວມກັບ ເຈົ້າພາບ ຄ້ອງຄໍ ໃຫ້ທັບນັກກິລາລາວ.

     ຈາກຜົນດັ່ງກ່າວເຮັດໃຫ້ ຄວາມຫວັງ 2 ຫຼຽນຄໍາຂອງທັບນັກກິລາລາວເຫຼືອໜ້ອຍທີ່ສຸດ ເຊິ່ງເທຄວາມກົດດັນໄປທີ່ ນັກກິລາຄິກບ໋ອກຊິ້ງ (Kickboxing) ທິມຊາດລາວຈາກ ທ້າວ ສຸກັນ ໄຕປັນຍາວົງ ຫຼື ນ້ອງໂອ ຮຸ່ນນໍ້າໜັກບໍ່ເກີນ -60 ກິໂລ ໄດ້ຊິງຊະນະເລີດກັບ LUMBANTUNGKUP BONATUA ນັກມວຍຈາກອິນໂດເນເຊຍ ໃນວັນທີ 10 ທັນວາ 2019 ຖ້າຫາກ ນ້ອງໂອສາມາດເຮັດໄດ້ ກໍຈະເປັນຮີໂຣຂວັນໃຈຂອງທັບນັກກິລາລາວທັນທີ່ ສ່ວນຜົນຈະເປັນແນວໃດນັ້ນ ຈະຂໍລາຍງານໃຫ້ຊາບຕື່ມອີກ.

ໂດຍ: ປາກກາດຳ