ລາຍລະອຽດຂ່າວ
ອານຸສອນ ແລ່ນເຂົ້າເສັ້ນໄຊຕາມຫຼັງ ທີ 1-2 ພຽງສ້ຽວວິນາທີ ຄວ້າຫຼຽນທອງທຳອິດໃນຊີເກມ ທີ່ຟິລິບປິນ
ຂຽນເມື່ອ: 10/12/2019 16:12 | ໂດຍ: ເພຣເມັກເກີ | ອ່ານ: 398 ຄັ້ງ

      ທ້າວ ອານຸສອນ ໄຊສາ ນັກກິລາແລ່ນ-ລານ ອີກໜຶ່ງຄວາມຫວັງຂອງທັບນັກກິລາລາວ ປະເພດແລ່ນຂ້າມຮົ້ວ 110 ແມັດຊາຍ ແລ່ນເຂົ້າເສັ້ນໄຊຕາມຫຼັງນັກກິລາຟິລິບປິນ ແລະ ມາເລເຊຍ ທີ 1-2 ຕາມລຳດັບ ພຽງສ້ຽວວິນາທີ ຄວ້າຫຼຽນທອງ ຄັ້ງທີ 2 ໃຫ້ກັບຕົນເອງ ໃນງານມະຫາກຳກິລາຊີເກມ ຄັ້ງທີ XXX ທີ່ປະເທດຟີລິບປິນ ຮັບກຽດເປັນເຈົ້າພາບ.

      ການແຂ່ງຂັນແລ່ນຂ້າມຮົ້ວ 110 ແມັດຊາຍໃນຄັ້ງນີ້ ໄດ້ມີຂຶ້ນ ເມື່ອວັນທີ 9 ທັນວາ ຜ່ານມາ ທີ່ເມືອງຄຣາກ ປະເທດຟິລິບປິນ, ໃນນັ້ນ ທັບນັກກິລາລາວ ຍັງເຫຼືອອີກໜຶ່ງຄວາມຫວັງຈາກທ້າວ ອານຸສອນ ໄຊສາ ນັກກິລາແລ່ນຂ້າມຮົ້ວ 110 ແມັດຊາຍ ທີ່ສາມາດທະລຸເຂົ້າຮອບ ຊີງຫຼຽນຄຳ ແຕ່ໜ້າເສຍດ່າຍ ອານຸສອນ ແລ່ນຕາມຫຼັງສູສີກັບຕົວເຕັງຂອງນັກກິລາເຈົ້າພາບຟີລິບິນ ແລະ ແຊ໋ມເກົ່າຈາກມາເລເຊຍ ຈົນເຖິງໄລຍະສຸດທ້າຍ ເສຍອັນດັບທີ 1 ແລະ ອັນດັບທີ 2 ພຽງສ້ຽວວິນາທີຢ່າງໜ້າເສຍດ່າຍ.

      ສຳລັບ, ເວລາຂອງ ອານຸສອນ ໄຊສາ ທີ່ແລ່ນໄດ້ແມ່ນ 13.99 ວິນາທີ, ສ່ວນອັນດັບທີ 1 ນັກກິລາເຈົ້າພາບ ເຮັດເວລາໄດ້ 13.97 ວິນາທີ ເຊິ່ງເທົ່າກັບອັນດັບທີ 2 ແຊ້ມເກົ່າຈາກມາເລເຊຍ ຈຶ່ງຕ້ອງໄດ້ມີການຕັດສິນການເຂົ້າເສັ້ນໄຊ ດ້ວຍການເບິ່ງຄືນຈາກກ້ອງບັນທຶກພາບ, ຜົນປະກົດວ່າເປັນນັກກິລາຂອງທາງເຈົ້າພາບເຂົ້າເສັ້ນໄຊໄປກ່ອນພຽງແຕ່ປາຍຫົວເທົ່ານັ້ນ ໄດ້ຫຼຽນທອງໄປຄອງ ສ່ວນມາເລເຊຍ ແຊ໋ມເກົ່າ ໄດ້ພຽງຫຼຽນເງິນ ແລະ ລາວ ໄດ້ຫຼຽນທອງ.

      ເຊິ່ງທີ່ຜ່ານມາ, ອານຸສອນ ໄຊສາ ໄດ້ຫຼຽນທອງທີ 2 ໃນຊີເກມ ຕໍ່ຈາກປີ 2013 ທີ່ສາທາລະນະລັດ ສະຫະພາບມຽນມາ ແລະ ເປັນນັກກິລາຄົນທຳອິດຂອງ ສປປ ລາວ ຄົນດຽວທີ່ໄດ້ຫຼຽນຈາກລາຍການນີ້.

 

ໂດຍ ປາກກາດຳ