ລາຍລະອຽດຂ່າວ
ທຸງ​ຊາດ​ລາວ ຖືກ​​ຊັກຂຶ້ນ​ສູ່ຍອດ​ເສົາ ພ້ອມ​ທຸງ 10 ຊາດ ອາ​ຊຽນ ໃນງານ​ກິ​ລາ ຊີ​ເກມ ທີ່​ປະ​ເທດ​ຟິ​ລິບ​ປິນ ຢ່າງ​ເປັນ​ທາງ​ການ
ຂຽນເມື່ອ: 30/11/2019 15:11 | ໂດຍ: ເພຣເມັກເກີ | ອ່ານ: 120 ຄັ້ງ

      ທຸງ​ຊາດ​ລາວ ເຊິ່ງ​ເປັນ​ສັນ​ຍາ​ລັກ​ຂອງ​ທັບ​ນັກ​ກິ​ລາ​ລາວ ເຂົ້າ​ຮ່ວມ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ຮັບ​ກຽດ​ເປັນ​ເຈົ້າ​ພາບ ລະ​ຫວ່າງວັນ​ທີ 30 ພະ​ຈິກ ຫາ 11 ທັນ​ວາ 2019 ໄດ້​ຖືກ​ຊັກຂຶ້ນ​ສູ່ຍອດ​ເສົາ ພ້ອມ​ກັບ​ທຸງ 10 ຊາດ ອາ​ຊຽນ ໃນ​ງານ​ດັ່ງ​ກ່າວ ຢ່າງ​ເປັນ​ທາງ​ການ.

      ພິ​ທີ​ເຊີນ​ທຸງ​ຊາດ​ 11 ປະ​ເທດ ໃນ​ຂົງ​ເຂດ​ອາ​ຊຽນ ໄດ້​ຈັດ​ຂຶ້ນ ໃນ​ວັນ​ທີ 29 ພະ​ຈິກ ຜ່ານ​ມາ ທີ່​ບ້ານ​ພັກ​ຂອງ​ນັກ​ກິ​ລາ ນະ​ຄອນ​ຫຼວງ ມາ​ນິ​ລາ ປະ​ເທດ​ຟິ​ລິບ​ປິນ ໂດຍ​ມີ​ທ່ານ ແສງ​ພອນ ພົນ​ອາ​ມາດ ຫົວ​ໜ້າ​ກົມ​ກິ​ລາ​ລະ​ດັບ​ສູງ ກະ​ຊວງ​ສຶກ​ສາ​ທິ​ການ ແລະ ກິ​ລາ ທັງ​ເປັນ​ຫົວ​ໜ້າ​ຄະ​ນະ​ນຳ​ພາ​ທັບ​ນັກ​ກິ​ລາ​ເຂົ້າ​ຮ່ວມ​ລ່າ​ຫຼຽນ​ຄຳ ຊີ​ເກມ​ ຄັ້ງ​ທີ XXX ພ້ອມ​ດ້ວຍ​ຄະ​ນະ​ນຳ, ຄູ​ຝຶກ ແລະ ນັກ​ກິ​ລາ​ເຂົ້າ​ຮ່ວມ.

      ທ່ານ ແສງ​ພອນ ພົນ​ອາ​ມາດ ໃຫ້​ສຳ​ພາດ​ວ່າ: ໃນ​ການ​ເຂົ້າ​ຮ່ວມ​ແຂ່ງ​ຂັນ​ງານ​ມະ​ຫາ​ກຳ​ກິ​ລາ​ຊີ​ເກມ  ໃນຄັ້ງນີ້ ສ​ປ​ປ ລາວ ໄດ້​ສົ່ງ​ນັກ​ກິ​ລາ​ເຂົ້າ​ຮ່ວມ​ທັງ​ໝົດ 25 ປະ​ເພດ​ກິ​ລາ ໂດຍ​ສ່ວນ​ໃຫ​ຍ່ ກໍໄດ້ເດີນ​ທາງ​ມາ​ເຖິງ​ໝູ່​ບ້ານ​ນັກ​ກິ​ລາ ໃນ​ນະ​ຄອນ​ຫຼວງ​ມາ​ນິ​ລາ ເປັນ​ທີ່​ຮຽບ​ຮ້ອຍ​ແລ້ວ ສ່ວນ​ຈຳ​ນວນ​ໜຶ່ງ ກໍ​ຈະ​ເດີນ​ທາງ​ມາ​ເຖິງ​ຕາມ​ຫຼັງ ໃນ​ງານ​ດັ່ງ​ກ່າວ ພວກ​ເຮົາ​ກໍ​ມີ​ຄວາມ​ຫວັງ​ຈາກ​ຫຼາຍ​ປະ​ເພດ​ກິ​ລາ ໂດຍ​ສະ​ເພາະ​ກິ​ລາ​ເປ​ຕັງ ເຊິ່ງ​ໄດ້​ມາ​ເຖິງ​ກ່ອນ​ໝູ່ ກໍ​ມີ​ມູນ​ເຊື້ອ​ອັນ​ດີ​ງາມ​ມາ​ແລ້ວຫຼາຍ​ຄັ້ງ ເຊື່ອ​ວ່າ​ປີນີ້ ກໍ​ຈະ​ສາ​ມາດ​ສ້າງ​ຜົນ​ງານ​ໄດ້​ດີ ຄື​ກັບ​ກິ​ລາ​ອື່ນໆ. ແນວ​ໃດ​ກໍ​ດີ, ກໍ​ຮຽກ​ຮ້ອງ​ມາ​ຍັງ​ພໍ່​ແມ່​ປະ​ຊາ​ຊົນ​ຊາວ​ລາວ​ທຸກ​ທົ່ວ​ໜ້າ​ໃນ​ຂອບ​ເຂດ​ທົ່ວ​ປະ​ເທດ ຂໍ​ໃຫ້​ສົ່ງ​ແຮງ​ໃຈ​ມາ​ເຊຍ​ທັບ​ນັກ​ກິ​ລາ​ລາວ ເຂົ້າ​ຮ່ວມ​ສ້າງ​ຜົນ​ງານ ໃນ​ຊີ​ເກມ ປີນີ້ ປະ​ສົບ​ຜົນ​ສຳ​ເລັດ​ຕາມ​ຈຸດ​ປະ​ສົງ ແລະ ເປົ້າ​ໝາຍ​ທີ່​ວາງ​ໄວ້ ເພື່ອ​ເປັນ​ກຽດສັກ​ສີ ແລະ ຊື່​ສຽງມາ​ສູ່​ປະ​ເທດ​ຊາດ.

       ງານ​ມະ​ຫາ​ກຳ​ກິ​ລາ​ຊີ​ເກມ ປີນີ້ ທາງ​ເຈົ້າ​ພາບ ຟິ​ລິບ​ປິ​ນ ໄດ້​ໃຊ້​ໂລ​ໂກ ທີ່​ເປັນ​ຮູບ​ວົງ​ມົນ 11 ວົງ ເຊິ່ງ​ເປັນ​ສັນ​ຍາ​ລັກ​ຂອງ 11 ຊາດ ແລະ ມີ​ຮູບ​ຮ່າງ​ທີ່​ຄ້າຍ​ຄື​ກັບ​ແຜ່ນ​ທີ່​ຂອງ​ປະ​ເທດ​ຟິ​ລິບ​ປິນ ໂດຍ​ຈະ​ດຳ​ເນີນ​ແຂ່ງ​ຂັນ 2 ອາ​ທິດ ແລະ ມີ​ການ​ຊີງ​ໄຊ​ກັນ​ທັງ​ໝົດ 56 ປະ​ເພດ​ກິ​ລາ ແຂ່ງ​ຂັນ 23 ເມືອງ ໂດຍ ມີ​ຄະ​ນະ​ນຳ, ຄູ​ຝຶກ, ເຈົ້າ​ໜ້າ​ທີ່​ຕ່າງໆ ແລະ ນັກ​ກິ​ລາ ເຂົ້າ​ຮ່ວມ 1 ໝື່ນກວ່າ​ຄົນ.

      ຂໍ​ສະ​ແດງຄວາມຂອບໃຈເປັນ​ຢ່າງ​ສູງ ມາ​ຍັງຜູ້ໃຫ້ການສະໜັບສະໜູນການລາຍງານຂ່າວ ເກາະຕິດຊີເກມ ຄັງທີ 30 ເຊັ່ນ: ບໍລິສັດເບຍລາວ ຈຳກັດ, ນໍ້າດື່ມເກືອແຮ່ ເຊເວັນອັບຣີໄວ, ປີ້ງໄກ່ ນາປົງ ແລະ ຮ້ານບັນເທີງ ບີບີພັບ.

ໂດຍ ປາກກາດຳ