ລາຍລະອຽດຂ່າວ
ສຸ​ລະ​ສິດ ຄຳ​ວົງ​ສາ ເຈົ້າ​ຂອງ​ຫຼຽນ​ຄຳ ຊີ​ເກມ 5 ສະ​ໄໝ ໄດ້​ຮັບກຽດ​ຖື​ທຸງ​ຊາດ​ນຳທັບ​ນັກ​ກິ​ລາ​ລາວ ​
ຂຽນເມື່ອ: 28/11/2019 21:11 | ໂດຍ: ເພຣເມັກເກີ | ອ່ານ: 50 ຄັ້ງ

      ​ທ້າວ ສຸ​ລະ​ສິດ ຄຳ​ວົງ​ສາ ຄູ​ສອນ​ກິ​ລາ ຈາກ​ໂຮງ​ຮຽນ​ພອນ​ສະ​ຫວັນ​ກິ​ລາ-ກາ​ຍະ​ກຳ (ຮ​ພກ) ແລະ ທັງ​ເປັນ​ເຈົ້າ​ຂອງ​ຫຼຽນ​ຄຳ ງານ​ກິ​ລາ​ຊີ​ເກມ 5 ສະ​ໄໝ ແລະ ອະ​ດີດ​ແຊ້ມ​ຫຼຽນ​ຄຳ ງານ​ກິ​ລາ​ເປ​ຕັງ ຊີງ​ແຊ້ມ​ອາ​ຊີ​ປາ​ຊີ​ຟິກ ຄັ້ງ​ທີ Vll ທີ່​ນະ​ຄອນ​ຫຼວງ ບາງກອກ ປີ 2003 ​ໄດ້​ຮັບ​ກຽດ​ຢ່າງ​ສູງ​ ​ຕາງ​ໜ້າ​ທັບ​ນັກ​ກິ​ລາ​ລາວຖື​ທຸງ​ຊາດ​ລາວ ​ເປັນ​ຄັ້ງ​ທີ 2 ນຳ​ໜ້າ​ຂະ​ບວນ​ທັບ​ນັກ​ກິ​ລາ​ລາວ ເດີນ​ສວນ​ສະ​ໜາມ​ໃນ​ພິ​ທີ​ເປີດ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງທີ XXX ທີ່​ປະ​ເທດ​ຟິ​ລິບ​ປິນ ຮັບ​ກຽດ​ເປັນ​ເຈົ້າ​ພາບ ທີ່​ຈະ​ເປີດ​ສາກ​ຂຶ້ນ ໃນ​ວັນ​ທີ 30 ພະ​ຈິກນີ້.

      ອີງ​ຕາມ​ຂໍ້​ມູນ​ຈາກທ່ານ ສອນ​ເພັດ ຈັນ​ດາ​ນຸ​ວົງ ຫົວ​ໜ້າ​ພະ​ແນກ​ຄຸ້ມ​ຄອງ​ຂໍ້​ມູນ​ກົມ​ກິ​ລາ​ລະ​ດັບ​ສູງ ທັງ​ເປັນ​ຄະ​ນະ​ຮັບ​ຜິດ​ຊອບ​ຄະ​ນະ​ກິ​ລາ​ລາວ ຂອງກອງ​ເລ​ຂາ​​ກິ​ລາ​ລາວ ເຂົ້າ​ຮ່ວມ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ເປັນ​ເຈົ້າ​ພາບ ລະ​ຫວ່າງວັນ​ທີ 30 ພະ​ຈິກ ຫາ 11 ທັນ​ວາ 2019 ແຈ້ງ​ໃຫ້​ຊາບ​ວ່າ: ອີງ​ຕາມ​ມະ​ຕິ​ຕົກ​ລົງ​ຂອງກອງ​ເລ​ຂາ​ຄະ​ນະ​ຮັບ​ຜິດ​ຊອບງານ​ກິ​ລາ​ຊີ​ເກມ ປີນີ້  ​ຕົກ​ລົງ​ເຫັນ​ດີ​ໃຫ້ນັກ​ກິ​ລາ​ຜູ້​ທີ່​ມີ​ບົດ​ບາດ ແລະ ມີ​ຊື່​ສຽງ​ສາ​ມາດ​ສ້າງ​ຜົນ​ງານ​ທີ່​ໂດດ​ເດັ່ນ​ໃຫ້​ແກ່​ປະ​ເທດ​ຊາດ​ຫຼາຍ​ທີ່​ສຸດ ກໍ​ຄື ທ້າວ​ລະ​ສິດ ຄຳ​ວົງ​ສາ ເຈົ້າ​ຂອງ​ຫຼຽນ​ຄຳ ງານ​ກິ​ລາ​ຊີ​ເກມ 5 ສະ​ໄໝ ແລະ ອະ​ດີດ​ແຊ໋ມ​ຫຼຽນ​ຄຳ ງານ​ກິ​ລາ​ເປ​ຕັງ ຊີງ​ແຊ໋ມ​ອາ​ຊີ​ປາ​ຊີ​ຟິກ ຄັ້ງ​ທີ Vll ທີ່​ນະ​ຄອນ​ຫຼວງ ບາງກອກ ປີ 2003 ​​ໃຫ້​ຮັບ​ກຽດ​​ຕາງ​ໜ້າ​ທັບ​ນັກ​ກິ​ລາ​ລາວຖື​ທຸງ​ຊາດ​ລາວ ນຳ​ໜ້າ​ຂະ​ບວນ​ທັບ​ນັກ​ກິ​ລາ​ລາວ ເຊິ່ງ​ມີ​​ຄະ​ນະ​ນຳ​, ກຳ​ມະ​ການ​ຕັດ​ສິນ, ຄູ​ຝຶກ ແລະ ທັບ​ນັກ​ກິ​ລາ ຈາກ 25 ປະ​ເພດ​ກິ​ລາ ​ທັງ​ໝົດ 370 ຄົນ ເດີນ​ສວນ​ສະ​ໜາມ​ໃນ​ພິ​ທີ​ເປີດ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງທີ XXX ທີ່​ປະ​ເທດ​ຟິ​ລິບ​ປິນ ຮັບ​ກຽດ​ເປັນ​ເຈົ້າ​ພາບ ທີ່​ຈະ​ເປີດ​ສາກ​ຂຶ້ນ ໃນ​ວັນ​ທີ 30 ພະ​ຈິກນີ້.

      ທ້າວ ສຸ​ລະ​ສິດ ຄຳ​ວົງ​ສາ ໃຫ້​ສຳ​ພາດ​ວ່າ: ໃນ​ທັດ​ສະ​ນະສ່ວນ​ຕົວ​ແລ້ວ​ນ້ອງ​ມີ​ຄວາມ​ຮູ້​ສືກ​ພາກ​ພູມ​ໃຈ​ເປັນ​ຢ່າງ​ສູງ ທີ່​ໄດ້​ຮັບ​ກຽດ​ຖືທຸ​ງຊາດ ຄັ້ງ​ນ​ີ້ ເປັນ​ຄັ້ງ​ທີ 2 ຖັດຈາກທີ່​ເຄີຍ​ໄດ້​ຮັບ​ກຽດຖື​ທຸງ​ຊາດ ໃນ​ງານ​ກິ​ລາ​ຊີ​ເກມ ຄັ້ງ​ທີ XXVll ເມື່ອ ປີ2013 ທີ່​ສະ​ຫະ​ພາບ ມຽນ​ມາ ເປັນ​ເຈົ້າ​ພາບ ​ຜ່ານ​ມາ ​ແລະ ຂໍ​ໃຫ້​ສັນ​ຍາ​ວ່າ ຈະ​ຂໍ​ເຮັດ​ໜ້າ​ທີ່ນີ້​ໃຫ້​ດີ​ທີ່​ສຸດ ໃຫ້​ສົມ​ກຽດ​ສັກ​ສີ​ທີ່​ທາງ​ລັດ​ຖະ​ບານ​ໄວ້​ເນື້ອ​ເຊື່ອ​ໃຈ ແລະ ມອບ​ໝາຍຄວາມ​ຮັບ​ຜິດ​ຊອບ​ທີ່​ມີ​ກຽດ​ອັນ​ສະ​ຫງ່າ​ລາ​ສີນີ້​ໃຫ້ປະ​ສົບ​ຜົນ​ສຳ​ເລັດຕາມ​ການມອບ​ໝາຍ ພ້ອມ​ທັງ​ຈະສືບ​ຕໍ່​​ນ້ຳ​ໃຈ​ຮັກ​ຊາດ​ນຳພາ​ທັບ​ນັກ​ກິ​ລາ​ເປ​ຕັງ​ທີມ​ຊາດ​ລາວ ຍາດ​ເອົາ​ໄຊ​ຊະ​ນະ​ລ່າ​ຫຼຽນ​ຄຳ ໃນ​ງານ​ກິ​ລາ​ຊີ​ເກມ ປີ​ນີ້ ໃຫ້​ພ​ໍ່​ແມ່​ປະ​ຊາ​ຊົນ​ຊາວ​ລາວ​ມີພາກ​ພູມ​ໃຈໃນ​ທົ່ວ​ປະ​ເທດ.   

      ສຳ​ລັບ​ຜົນ​ງານ​ຂອງ ທ້າວ ສຸ​ລະ​ສິດ ຄຳ​ວົງ​ສາ ສາ​ມາດ​ສ້າງ​ຜົນ​ງານ​ຄວ້າຫຼຽນ​ຄຳງານ​ກິ​ລາ​ຊີ​ເກມ ເຖິງ 5 ສະ​ໄໝ ກໍ​ຄື ງານ​ກິ​ລາ​ຊີ​ເກມ ຄັ້ງ​ທີ XXl ທີ່​ປະ​ເທດ​ມາ​ເລ​ເຊຍ ປີ 2001, ງານ​ກິ​ລາ ຊີ​ເກມ ຄັ້ງ​ທີ XXll ທີ່​ ສ​ສ ຫວຽດ​ນາມ ເມືອ​ປີ 2003, ງານ​ກິ​ລາ ຊີ​ເກມ ຄັ້ງ​ທີ XXlV ທີ່​ປະ​ເທດ​ໄທ ເມື່ອ​ປີ 2007, ງານ​ກິ​ລາ ຊີ​ເກມ ຄັ້ງ​ທີ XXV ຫຼື ວຽງ​ຈັນ ເກມ ປີ 2009 ທີ່​ສ​ປ​ປ ລາວ ເປັນ​ເຈົ້າ​ພາບ ແລ​ະ ງານ​ກິ​ລາ ຊີ​ເກມ ຄັ້ງ​ທີ XXVll ທີ່​ສະ​ຫະ​ພາຍບ​ມຽນ​ມາ ເມື່ອ​ປີ 2013 ແລະ ປີນີ້ ສຸ​ລະ​ສິດ ຄຳ​ວົງ​ສາ ກໍ​ຍັງ​ນຳ​ພາ​ທັບ​ນັກ​ກິ​ລາ​ເປ​ຕັງ​ລາວ ສາ​ມາດກວາດໄດ້ເຖິງ 4 ຫຼຽນ​ຄຳ, ໃນ​ນັ້ນ 1 ຫຼຽນ​ຄຳ ໄດ້​ຈາກປະ​ເພດ​ທີມ​ຊຸດຊາຍ, 1 ຫຼຽນ​ຄຳ ຊຸດ​ຕີ້ງ ທີມ​ປະ​ສົມ, 1 ຫຼຽນ​ຄຳ ຊາຍ 2 ຍິງ 1 ແລະ 1 ຫຼຽນ​ຄຳ ຈາກ​ປະ​ເພດ​ທີມ​ຊຸດ ຍິງ 1 ຊາຍ 2 ເປັນ​ເຈົ້າ​ຫຼຽນ​ຄຳ ສ່ວນ​ ທີ 2 ແມ່ນ​ໄທ. ນ​ອກ​ຈາກນັ້ນ, ສຸ​ລະ​ສິດ ຄຳ​ວົງ​ສາ ກໍ​ຍັງ​ຄວ້າ​ຫຼຽນ​ຄຳ ງານ​ກິ​ລາ​ເປ​ຕັງ ຊີງ​ແຊ໋ມ​ອາ​ຊີ​ປາ​ຊີ​ຟິກ ຄັ້ງ​ທີ Vll ທີ່​ນະ​ຄອນ​ຫຼວງ ບາງກອກ ປີ 2003 ອີກ​ດ້ວຍ.

ໂດຍ ປາກກາດຳ