ລາຍລະອຽດຂ່າວ
ກອງ​ທັບ ກວດ​ແຊ້ມ ບານ​ສົ່ງ​ໃນ​ຮົ່ມຍິງ-ຊາຍ ຊີງ​ຂັນ ປະ​ທານ ສບ​ລ 2019
ຂຽນເມື່ອ: 26/11/2019 17:11 | ໂດຍ: ເພຣເມັກເກີ | ອ່ານ: 122 ຄັ້ງ

      ​​ທັບ​ນັກ​ຕົບ​ໜ​ຸ່ມ​-ສາວ ບານ​ສົ່ງ ສະ​ໂມ​ສອນ​ກະ​ຊວງ​ປ້​ອງ​ກັນ​ປະ​ເທດ ຫຼື ກອງ​ທັບ ຍັງ​ຄົງ​ຄອງ​ເບີ 1 ວົງ​ການ​ບານ​ສົ່ງ​ແຫ່ງ ສ​ປ​ປ ລາວ ຫຼັງ​ໂຊ​ຟອ​ມ​ເກັ່ງ ກວດ​ແຊ້ມ​ທັງ​ທີມ​ຍິງ ແລະ ທີມ​ຊາຍ ໃນການ​ແຂ່ງ​ຂັນ​ບານ​ສົ່ງ​ໃນ​ຮົ່ມ​ ຊີງ​ຂັນ​ປະ​ທານ​ສະ​ຫະ​ພັນ​ບານ​ສົ່ງ​ແຫ່ງ​ຊາດ ປະ​ຈຳ​ປີ 2019 ເພື່ອ​ສ້າງ​ຂະ​ບວນ​ການ​ສະ​ເຫຼີມ​ສະ​ຫຼອງວັນ​ຊາດ​ທີ 2 ທັນ​ວາ ຄົບ​ຮອບ 44 ປີ ລະ​ຫວ່າງວັນ​ທີ 2 ທັນ​ວາ 1975 ຫາ 2 ທັນ​ວາ 2019 ພ້ອມ​ທັງ​ໄດ້​ຮັບ​ເງິນ​ລາງວັນ​ທີມ​ລະ 12 ລ້ານ​ກີບ ໄປ​ຄອງ.

          ການ​ແຂ່ງ​ຂັນ​​ບານ​ສົ່ງ​ໃນ​ຮົ່ມນັດ​ຊີງ​ຊະ​ນະ​ເລີດ ​ທີມ​ຍິງ ແລະ ທີມ​ຊາຍ ຊີງ​ຂັນ​ປ​ະ​ທານ ສບ​ລ 2019 ໃນ​ຄັ້ງ​ນີ້ ໄດ້​ມີ​ຂຶ້ນ ເມື່ອ​ວັນ​ທີ 26 ພະ​ຈິກ ຜ່ານ​ມາ ທີ່​ສະ​ໜາມ​ກິ​ລານ​ບານ​ສົ່ງ​ແຫ່ງ​ຊາດ ເມືອງ​ໄຊ​ທາ​ນີ ນະ​ຄອນ​ຫຼວງວຽງ​ຈັນ ໃຫ້​ກຽດ​ເຂົ້າ​ຮ່ວມ​ ແລະ ມອບ​ລາງວັນ​ຂອງ​ທ່ານ ສົມ​ພູ ພົງ​ສາ ຜູ້​ຊ່ວຍ​ລັດ​ຖະ​ມົນ​ຕີ ກະ​ຊວງ​ສຶກ​ສາ​ທິ​ການ ແລະ ກິ​ລາ ທັງ​ເປັນ​ຮອງ​ປະ​ທານ ແລະ ເລ​ຂາ​ທິ​ການ​ຄະ​ນະ​ກຳ​ມະ​ການ​ໂອ​ແລມ​ປີ​ກ​ແຫ່ງ​ຊາດ​ລາວ ແລະ ທ່ານ ສຸ​ລິ​ເນດ ໄຊ​ຍະ​ເດດ ຮອງ​ປະ​ທານ​ສະ​ຫ​ະ​ພັນ​ບານ​ສົ່ງ​ແຫ່ງ​ຊາດ​ລາວ ເຊິ່ງ​ມີ​ບັນ​ດາ​ຜູ້​ໃຫ້​ການ​ສະ​ໜັບ​ສະ​ໜູນ, ຄະ​ນະ​ນຳ, ຄູ​ຝຶກ ແລະ ນັກ​ກິ​ລາ ຕະ​ຫຼອດ​ຮອດ​ບັນ​ດາກອງ​ເຊຍ​ຂອງ​​ແຕ່​ລະພາກ​ສ່ວນ ເຂົ້າ​ຮ່ວມ​ຊົມ ແລະ​ ເຊຍ ໜຶ່ງ​ພັນ​ກວ່າ​ຄົນ​ຢ່າງ​ຄືກ​ຄື້ນ.

          ສຳ​ລັບ​ຜົນ​ການ​ແຂ່ງ​ຂັນ​ໃນ​ນັດ​ຊີງ​ຊະ​ນະ​ເລີດ ທີມ​ຍິງລະ​ຫວ່າງ ທີມກອງ​ທັບ ແລະ ທີມ​ສະ​ຫະ​ພັ​ນແມ່​ຍິງກົມ​ວິ​ທະ​ຍາ​ສາດ-ປະ​ຫວັດ​ສາດການ​ທະ​ຫານ ປະ​ກົດ​ວ່າ: ແຊ໋ມ​ເກົ່າ ທີມກອງ​ທັບ ຕອກ​ຢ້ຳ​ໄຊ​ຊະ​ນະ​ເໜືອ ທີມສະ​ຫະ​ພັ​ນແມ່​ຍິງກົມ​ວິ​ທະ​ຍາ​ສາດ-ປະ​ຫວັດ​ສາດການ​ທະ​ຫານ ໄປ​ແບບ​ຂາດ​ຮອຍ 3-0 ເຊັດ ດ້ວຍ​ຄະ​ແນນ 25-15, 25-16 ແລະ 25-15 ຄະ​ແນນ ​ປ້ອງ​ກັນແຊ໋ມ​ໄວ້​ໄດ້​ອີກ 1 ສະ​ໄໝ ພ້ອມ​ທັງ​ໄດ້​ຮັບ​ຫຼຽນ​ຄຳ ແລະ ​ເງິນ​ລາງວັນ ຈຳ​ນວນ 12 ລ້ານ​ກີບ ສ່ວນ​ທີມສະ​ຫະ​ພັ​ນແມ່​ຍິງກົມ​ວິ​ທະ​ຍາ​ສາດ-ປະ​ຫວັດ​ສາດການ​ທະ​ຫານ ໄດ້​ຮັບ​ຫຼຽນ​ເງິນ ແລະ ລາງວັນ​ເງິນ​ສົດ 8 ລ້ານ​ກີບ ອັ​ນ​ດັບ​ທີ 3 ແມ່ນທີມ​ມິກ ວີ​ຊີ ໄດ້​ຮັບ​ຫຼຽນ​ທອງ ແລະ ລາງວັນ​ເງິນ​ສົດ 6 ລ້ານ​ກີບ, ທີ 4 ທີມ​ສາວ​ຕຳ​ຫຼວດ ກະ​ຊວງ​ປ້ອງ​ກັນ​ຄວາມ​ສະ​ຫງົບ ​ໄດ້​ຮັບ​ເງິນ​ລາງວັນ​ເງິນ​ສົດ 3 ລ້ານ​ກີບ.

          ສ່ວນ​ຜົນ​ການ​ແຂ່​ງຂັນ​ທີມຊາຍ ລະ​ຫວ່າງ ແຊ້ມ​ເກົ່າ ກອງ​ທັບ ກັບ ລາວ​ເດີນ​ອາ​ກາດ ຄູ່ນີ້​ສຸດ​ມ່ວນ ໃນ​ເຊັດ​ທຳ​ອິດ ລາວ​ເດີນ​ອາ​ກາດ ອອກ​ນຳ​ໄດ​ກ່ອນ 1-0 ເຊັດ ດ້ວຍ​ຄະ​ແນນ 25-17 ເຂົ້າ​ສູ່ເຊັດ​ທີ 2 ​ເກ​ມ​ພີກ ເປັນ​ແຊ໋ມ​ເກົ່າ ກອງ​ທັບ ສາມາດ​ແກ້​ເກມ​ໄດ້​ທັນ​ຄວັນ ກ່ອນ​ຈະ​ກັບ​ມາ​ລ້າງ​ຕາ​ໄດ້​ຄືນ ຊະ​ນະ​ 25-21 ຄະ​ແນນ ​ຈາກນັ້ນ ກອງ​ທັບ ກ​ໍ​ເຂັ່ນຟອມ​ເກັ່ງ ແຊງ​ເອົາ​ຊະ​ນະອີກ 2 ເຊັດ​ລວດ ດ້ວຍ​ຄະ​ແນນ 27-25 ແລະ 25-23 ຄະ​ແນນ ໄດ້​ຮັບ​ຫຼຽນ​ຄຳ ແລະ ເງິນ​ລາງວັນ ຈຳ​ນວນ 12 ລ້ານ​ກີບ ສ່ວນ​ທີມ​ລາ​ວ​ເດີນ​ອາ​ກາດ ໄດ້​ທີ 2 ພ້ອມ​ທັງ​ຮັບ​ຫຼຽນ​ເງິນ ແລະ ເງິນ​ສົດ 8 ລ້ານ​ກີບ, ທີ 3 ສະ​ໂມ​ສອນ​ວິ​ທະ​ຍາ​ສາດ​ທຳ​ມະ​ຊ​າດ ໄດ້​ຮັບ​ຫຼຽນ​ທອງ ແລະ ລາງວັນ​ເງິນ​ສົດ 6 ລ້ານ​ກີບ ແລະ ທີ 4 ທີມ​ອິນ​ທະ​ສອ​ນ ວີ​ຊີ ໄດ້​ຮັບ​ລາງວັນ​ຊົມ​ເຊີຍ​ເງິນ​ສົດ 3 ລ້ານ​ກີບ.

          ການ​ແຂ່ງ​ຂັນ​ລາຍ​ການ​ດັ່ງ​ກ່າວ ປະ​ເພດ​ທີມ​ຊາຍມີ 10 ພາກ​ສ່ວນ ແລະ ປະ​ເພດທີມ​ຍິງມີ 10 ພ​າກ​ສ່ວນ ເຂົ້າ​ຮ່ວມ ທັງ 2 ປະ​ເພດ​ດັ່ງ​ກ່າວ ຈັດ​ແບ່ງ​ອອກ​ເປັນ 3 ກຸ່ມ ແຕ່​ລະ​ກຸ່ມ​ແຂ່ງ​ຂັນ​ພົບ​ກັນ​ໝົດ​ຄັດ​ເອົາ​ທີ 1-2 ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ ແລະ ຄັດ​ເອົາ​ອີກ 2 ທີມ​ທີ່​ມີ​ຄະ​ແນນ​ດີ​ທີ່​ສຸດ​ແຕ່​ລະ​ກຸ່ມ​ເຂົ້າ​ຮອບ 8 ທີ​ມ​ຕາມ​ຫຼັງ​ໄປ ສຳ​ລັບ​ທີມຊາຍ ກຸ່ມ ເອ ປະ​ກອບ​ມີ ກອງ​ທັບ, ສະ​ໂມ​ສອນ​ວຽງ​ຈັນ, ວ​ລ ພະ​ລະ​ສຶກ​ສາ ແລະ ອິນ​ທະ​ສອນ ວີ​ຊິ ສ່ວນກຸ່ມ ບີ ລາວ​ເດີນ​ອາ​ການ ຫຼື ລ​ລາວ​ສະ​ກາຍ​ເວ, ລີ​ເຈນ​ດາ​ຣີ ສະ​ແຕັນ​ເຈີ ວີ​ຊີ, ແພດ​ສາດ  ​​ແລະ ກຸ່ມ ຊີ ນະ​ຄອນ​ຫຼວງ, ໂຮງ​ແຮມ ທີ​ຣະ ແລະ ຄະ​ນະ​ວິ​ທະ​ຍາ​ສາດ​ທຳ​ມະ​ຊາດ ມ​ຊ ປະ​ເພດ​ທີມ​ຍິງ ກຸ່ມ ເອ ແຊ໋ມ​ເກົ່າ ກອງ​ທັບ, ວ​ລ ພະ​ລະ​ສຶກ​ສາ, ສກມ ສີ​ໂຄດ​ຕະ​ບອງ ສ່ວນ​ກຸ່ມ ບີ ກົມ​ວິ​ທະ​ຍາ​ສາດ-​ປະ​ຫວັດ​ສາດ​ການ​ທະ​ຫານ, ນະ​ຄອນ​ຫຼວງ, ເອັມ​ເອັກ ວີ​ຊີ ແລະ ກຸ່ມ ຊີ ມຊ, ແພດ​ສາດ ແລ​ະ ປກ​ສ.

ພາບໂດຍ: Deesler/Lao Volleyball Federasion

ໂດຍ ປາກກາດຳ