ລາຍລະອຽດຂ່າວ
​ ມາ​ສ​ດ້າ ຄອງ​ແຊ້ມ ຢູ-35 ເຕະບານ ຊ້າງ​ ລີກຄັບ 2019
ຂຽນເມື່ອ: 25/11/2019 13:11 | ໂດຍ: ເພຣເມັກເກີ | ອ່ານ: 216 ຄັ້ງ

      ທີມ ມາສດ້າ ຈີບີ ເອັບຊີ ​ລົງ​ສະ​ໜາມ 9 ນັດ ຊະ​ນະ 8 ນັດ ແລະ ສະ​ເໝີ 1 ນັດ​ ລວມ​ມີ 25 ຄະ​ແນນ ເປັນ​ອັນ​ດັບ​ທີ 1 ຄວ້າ​ແຊ້ມ​ການ​ແຂ່ງຂັນ​ກິລາ​ເຕະບານ 9 ຄົນ ຮຸ່​ນອາ​ຍຸບໍ່​ເກີນ 35 ປີ ຊີງ​ຂັນ​ສະໜາມ​ເຕະບານຫຍ້າທຽມ ຊ້າງ ​ເອັບ​ຊີ ຫຼື ລາຍການ ຊ້າງ​ ລີກ​ຄັບ 2019 ​ເພື່ອ​ສ້າງ​ຂະ​ບວນການສະ​ເຫຼີ​ມສະຫຼອງ​ວັນ​ສ້າງ​ຕັ້ງສະ   ໜາມຫຍ້າທຽມ ຊ້າງ​ ເອັບ​ຊີ ຄົບຮອບ​ 7 ປີ ແລະ ຂ່ຳ​ນັບ​ຮັບ​ຕ້ອນ​ວັນ​ຊາດ​ທີ 2 ທັນ​ວາ ຄົບ​ຮອບ 44 ປີ (2 ທັນ​ວາ 1975 ຫາ 2 ທັນ​ວາ 2019).

      ການ​ແຂ່ງ​ຂັນເຕະ​ບານ 9 ຄົນ ຮຸ່ນ​ຊາວ​ໜຸ່ມ​ທົ່ວ​ໄປ ລາຍ​ການ ຊ້າງ ລີກ ຄັບ 2019 ນັດ​ສຸດ​ທ້າຍ ຈັດ​ຂຶ້ນ ເມື່ອວັນທີ 23 ພະ​ຈິກ ຜ່ານມາ ທີ່ສະໜາມເຕະບານຫຍ້າທຽມ ຊ້າງ ເອັບຊີ 3 ບ້ານຊ້າງຄູ້ ເມືອງໄຊທານີ ນະຄອນຫຼວງວຽງຈັນ ໂດຍ​ໃຫ້​ກຽດ​ເຂົ້າ​ຮ່ວມ​ ແລະ ມອບ​ລາງວັນຂອງທ່ານ ພັນ​ເອກ ທອງ​ເພັດ ມະ​ນີ​ສະ​ຫວັນ ຫົວ​ໜ້າ​ກົມ​ກິ​ລາ ກະ​ຊວງ​ປ້ອງ​ກັນ​ຄວາມ​ສະ​ຫງົບ ຫຼື ປກ​ສ, ​ທ່ານ ສຸ​ລິ​ກັນ ຫຼວງ​ບຸນເຮືອງ ເຈົ້າ​ຂອງ​ສະ​ໜາມ​ເຕະ​ບານ​ຫ​ຍ້າ​ທຽມ ຊ້າງ​ເອັບ​ຊີ ແລະ ທ່ານ ຄຳ​ພາ​ມິດ ໄຊ​ຍະ​ສົມ​ບັດ ຕາງ​ໜ້າ​ບໍ​ລີ​ສັດ ວຽງ​ຈັນ ເອັດ​ວີ ຕົວ​ແທນ​ຜະ​ລິດ​ຕະ​ພັນ ເບຍ​ຊ້າງ ຈາກ​ປະ​ເທດ​ໄທ ພ້ອມ​ດ້ວຍ​ບັນ​ດາ​ຄະ​ນະ​ນຳ, ຄູ​ຝຶກ ແລະ ນັກ​ກິ​ລາຕະ​ຫຼອດ​ຮອດກອງ​ເຊຍ​ເຂົ້າ​ຮ່ວມຊົມ ແລະ ເຊຍ ຢ່າງ​ຫຼວງ​ຫຼາຍ.

      ການ​ແຂ່ງ​ຂັນ​ນັດ​ສົ່ງ​ທ້າຍ ມີ​ທັງ​ໝົດ 5 ຄູ່ ຜົນ​ປະ​ກົດ​ວ່າ ທີມ​ ມາ​ສ​ດ້າ ສະ​ເໝີ ຄອບ​ຄົວ ຢູ​ໂຣບ 3-3 ປະ​ຕູ, ອົກ​ສາມ​ສອກ ເສຍ​ໃຫ້ ຮ້ານ​ແກ້ວ​ສົມ​ໃຈ 2-3 ປະ​ຕູ, ສ່ຽວ​ກັນ ຊະ​ນະ ຮາດ​ຣ໋ອກ 9-5 ປະ​ຕູ, ໜຶ່ງ​ໃນ​ດວງ​ໃຈ ຊະ​ນະ ນ້ອງ​ໃໝ່ 3-2 ປະ​ຕູ ແລະ ໝູ່​ສະ​ນິດ ຊະ​ນະ ໄອ​ດີ 3-0 ປະ​ຕູ ສະ​ຫຼຸບ​ຜົ​ນ​ຈາກ 9 ນັດ ອັນ​ດັບ​ທີ 1 ແມ່ນ​ຕົກ​ເປັນ​ຂອງ ທີມ​ມາ​ສ​ດ້າ ລົງ​ສະ​ໜາມ 9 ນັດ ຊະ​ນະ 8 ນັດ ແລະ ສະ​ເໝີ 1 ນັດ ມີ 25 ຄະ​ແນ​ນ ໄດ້​ແຊ້ມ​ລາຍ​ການ​ດັ່ງ​ກ່າວ ໄປ​ຄອງ​ເປັນ​ຄັ້ງ​ທຳ​ອິດ ພ້ອມ​ເງິນ​ລາ​ວັນ 5 ລ້ານ​ກີບ ໄປ​ຄອງ, ທີ 2 ທີມ​ໜຶ່ງ​ໃນ​ດວງ​ໃຈ ລົງ​ສະ​ໜາມ 9 ນັດ ຊະ​ນະ 7 ນັດ ເສຍ 2 ນັດ ມີ 21 ຄະ​ແນນ ໄດ້​ຮັບ​ງິນ​ສົດ 3 ລ້ານ​ກີບ, ທີ 3 ສ່ຽວ​ກັນ ລົງ​ສະ​ໜາມ 9 ນັດ ຊະ​ນະ 6 ນັດ, ເສຍ 1 ນັດ ແລະ ສະ​ເໝີ 2 ນັດ ລວມ​ມີ 20 ຄະ​ແນນ ໄດ້​ຮັບ​ລາງວັນ​ເງິນ​ສົດ 1,5 ລ້ານ​ກີບ ແລະ ທີ 4 ​ນ້ອງ​ໃໝ່ ລົງ​ສະ​ໜາມ 9 ນັດ ຊະ​ນ​ະ 5 ນັດ, ເສຍ 3 ນັດ ແລະ ສະ​ເໝີ 1 ນັດ ລວມ​ມີ 16 ຄະ​ແນນ ໄດ້​ຮັບ​ລາ​ງວັນ​ເງິນ​ສົດ 1 ລ້ານ​ກີບ.

        ການ​ແຂ່ງ​ຂັນ​ລາຍ​ການ​ດັ່ງ​ກ່າວ ຈັດ​ຂຶ້ນ ກໍ​​ເພື່ອ​ສ້າງ​ຂະ​ບວນການສະ​ເຫຼີ​ມສະຫຼອງ​ວັນ​ສ້າງ​ຕັ້ງສະ   ໜາມຫຍ້າທຽມ ຊ້າງ​ ເອັບ​ຊີ ຄົບຮອບ​ 7 ປີ ແລະ ຂ່ຳ​ນັບ​ຮັບ​ຕ້ອນ​ວັນ​ຊາດ​ທີ 2 ທັນ​ວາ ຄົບ​ຮອບ 44 ປີ (2 ທັນ​ວາ 1975 ຫາ 2 ທັນ​ວາ 2019) ເຊິ່ງມີ​ທີມ​ເຂົ້າ​ຮ່ວມ 10 ທີມ ຈັດ​ເປັນ​ກຸ່ມ​ດຽວ ນຳ​ໃຊ້​ລະ​ບົບ​ລີກ ແຂ່ງ​ຂັນສະ​ເພາະ​ແຕ່ຮອບ​ຂາ​ໄປລວມ​ທັງ​ໝົດ 9 ນັດ ຈາກ 10 ທີມ ທີມ​ໜຶ່ງ​ລົງ​ສະ​ໜາມ​ທີມ​ລະ 9 ນັດ

​      ນອກ​ຈາກ​ການ​ແຂ່ງ​ຂັນ​ຮຸ່ນ​ອາ​ຍຸ 35 ປີ ​ແລ້ວ ກໍຍັງ​ມີ​ການ​ແຂ່ງ​ຂັນ​ເຕະ​ບານ ຮຸ່ນ​ອາ​ວຸ​ໂສ 40 ປີ​ຂຶ້ນ​ໄປ ເຊິ່ງ​​ຮຸ່ນ​ດັ່ງ​ກ່າວ​ ມີ 10 ທີມ​ເຂົ້າ​ຮ່ວມເຊັ່ນ​ກັນ ແຂ່ງ​ຂັນພົບ​ກັນ​ໝົດ​ແບບ​ລີກ ມີ​ແຕ່​ຮອບ​ຂາ​ໄປ ຄາດ​ວ່າ​ຈະ​ສຳ​ເລັດ​ລົງ​ໃນ​ວັນ​ທີ 12 ທັນ​ວານີ້. 

​ໂດຍ ປາກກາດຳ