ລາຍລະອຽດຂ່າວ
​ກົມ ວ​ປ​ສ-ປ​ສ ໄດ້​ລ້າງ​ຕາ ກອງ​ທັບ ອີກ​ຄັ້ງ ​ນັດ​ຊີງຊະ​ນະ​ເລີດ ບານ​ສົ່ງ​ໃນ​ຮົ່ມ​ຍິງ ຊີງ​ຂັນ​ປະ​ທານ ສບ​ລ 2019 ມື້ນີ້
ຂຽນເມື່ອ: 25/11/2019 13:11 | ໂດຍ: ເພຣເມັກເກີ | ອ່ານ: 125 ຄັ້ງ

      ເປັນ​ໄປ​ຕາມ​ຄາດ ທີມ​ຮອງ​ແຊ້ມ​ເກົ່າ ສາວ​ນັກ​ຕົບ​ຈາກ​ສະ​ຫະ​ພັນ​ແມ່​ຍິງ ກົມ​ວິ​ທະ​ຍາ​ສາດ-ປະ​ຫວັດ​ສາດ ການ​ທະ​ຫານ (ສ.ກົມ​ວ​ປ​ສ-ປ​ສ ການ​ທະ​ຫານ) ​ໄລ່​ຕົບ​ເອົາຊະ​ນະ ທີມ​ສາວ​ຕຳ​ຫຼວດ (ກະ​ຊວງ​ປ້ອງ​ກັນ​ຄວາມ​ສະ​ຫງົບ ຫຼື ປກ​ສ ) 3-0 ເຊັດ ດ້ວຍ​ຄະ​ແນນ 25-23, 25-23 ແລ​ະ 25-22 ຄະ​ແນນ ຜ່ານ​ເຂົ້າ​ຊ​ິງ​ຊະ​ນະ​ເລີດ ໄປ​ພົບ​ກັບ ຄູ່​ປັບ​ເກົ່າ ທີມ​ແຊ້ມ​ເກົ່າ ກະ​ຊວງ​ປ້ອງ​ກັນ​ປະ​ເທດ ຫຼື ກອງ​ທັບ ທີ່​ເອົາ​ຊະ​ນະ ທີມ​ມີກ ວີ​ຊີ ​ຂາດ​ຮອຍ 3-0 ເຊັດ ໃນ​ການ​ແຂ່ງ​ຂັນ​ບານ​ສົ່ງ​ໃນ​ຮົ່ມ​ຍິງ ຊີງ​ຂັນ​ປະ​ທານ​ສະ​ຫະ​ພັນ​ບານ​ສົ່ງ​ແຫ່ງ​ຊາດ ຫຼື ສບ​ລ ປະ​ຈຳ​ປີ 2019.

      ການ​ແຂ່ງ​ຂັນ​ຮອບ​ຮອງ​ຊະ​ນະ​ເລີດ ບານ​ສົ່ງ​ໃນ​ຮົ່ມປະ​ເພດ​ທີມ​ຍິງ ຊີງ​ຂັນ​ປະ​ທານ​ ສບ​ລ 2019 ໃນ​ຄັ້ງ​ນີ້ ໄດ້​ມີ​ຂຶ້ນ ເມື່ອ​ຕອນ​ເຊົ້າ​ວັນ​ຈັນ​ທີ 25 ພະ​ຈິກ ຜ່ານ​ມາ ທີ່​ສະ​ໜາມ​ກິ​ລາ​ບານ​ສົ່ງ​ແຫ່ງ​ຊາດ (ຫຼັກ 16) ເມືອງ​ໄຊ​ທາ​ນີ ນະ​ຄອນ​ຫຼວງວຽງ​ຈັນ ເປັນ​ການ​ພົບ​ກັນ​ລະ​ຫວ່າງ ແຊ໋ມ​ເກົ່າ ສາວ​ທະ​ຫານ ກອງ​ທັບ ພົບ​ກັບ ທີມ​ມີກ ວີ​ຊີ  ແລະ ສາວ​ຕ​ຳ​ຫຼວດ ປກ​ສ ພົບ​ກັບ ທີມ​ຮອງ​ແຊ໋ມ​ເກົ່າ ທີມ​ສະ​ຫະ​ພັນ​ແມ່​ຍິງ​ກົມ​ວິ​ທະ​ຍາ​ສາດ-ປະ​ຫວັດ​ສາດ ການ​ທະ​ຫານ.

      ຜ່ານ​ການ​ແຂ່ງ​ຂັນ​ຜົນ​ປະ​ກົດ​ວ່າ: ທີມກອງ​ທັບ ສາ​ມາດ​ຮັກ​ສາ​ຟອມ​ເກັ່ງ​ໄດ້​ຢ່າງ​ເໜືອ​ຊັ້ນ ໄລ່​ຕົບ​ເອົາ​ຊະ​ນະ ທີມ​ມີກ ວີ​ຊີ​ ໄປ​ແບບ​ຂາດ​ຮອຍ 3-0 ເຊັດ ດ້ວຍ​ຄະ​ແນນ 25-12, 25-14 ແລະ 25-15 ຄະ​ແນນ ສ່ວນ​ຮອງ​ແຊ໋ມ​ເກົ່າ ກໍ​ບໍ່​ນ້ອຍ​ໜ້າ​ເຊັ່ນ​ກັນ ສາ​ມາດ​ໄລ່​ເອົາ​ຊະ​ນະ ທີມ​ສາວ​ຕຳ​ຫຼວດ 3-0 ເຊັດ ດ້ວຍ​ຄະ​ແນນ 25-23, 25-23 ແລ​ະ 25-22 ຄະ​ແນນ ໄດ້​ມີ​ໂອ​ກາດ​ລ້າງ​ຕາ ທີມ​ສາວກອງ​ທັບ ໃນ​ນັດຊ​ີງ​ຊະ​ນະ​ເລີດ ​ອີກ​ຄັ້ງ ເຊິ່ງ​ຈະ​ຈັດ​ຂຶ້ນ​ໃນ​ຕອນ​ບ່າຍ​ວັນ​ທີ 26 ພະ​ຈິກນີ້ ສ່ວນ​ຄູ່​ຊີງ​ອັນ​ດັບ​ທີ 3 ແມ່ນ​ຈະ​ຈັດ​ຂຶ້ນເຊົ້າວັນ​ດັ່ງ​ກ່າວ.

      ລາຍ​ການນີ້ ຈັດ​ຂຶ້ນ ມີ​ຈຸດ​ປະ​ສົງ​ຫຼັກ​ກໍ​ເພື່ອ​ເປັນ​ການ​ສ້າງ​ຂະ​ບວນ​ການ​ຂ່ຳ​ນັບ​​ຮັບຕ້ອນ ​ວັນ​ຊາດ​ທີ 2 ທັນ​ວາ ຄົບ​ຮອບ 44 ປີ (ວັນ​ທີ 2 ທັນ​ວາ 1975 ຫາ 2 ທັນ​ວາ 2019) ແລະ ເລືອກ​ເຟັ້ນ​ຫາ​ນັກ​ກິ​ລາ​ຜູ້​ທີ່​ມີ​ພອນ​ສະ​ຫວັນ​ດີ​ເດັ່ນ​ຕິດ​ທີມ​ຊາດ ກຽມ​ສົ່ງ​ເຂົ້າ​ຮ່ວມ​ລາຍ​ການ​ລະ​ດັບ​ພາກ​ພື້ນ, ອາ​ນຸ​ພາກ​ພື້ນ ແລະ ສາ​ກົນ ໃນ​ຕໍ່​ໜ້າ ລາຍ​ການ​ດັ່ງ​ກ່າວ ດຳ​ເນີນລະ​ຫວ່າງ​ວັນ​ທີ 20-26 ພະ​ຈິກ 2019 ມີ​ການ​ແຂ່ງ​ຂັນ​ກັນ 2 ປະ​ເພ​ດ ຄື ປະ​ເພດ​ທີມ​ຍິງ ມີ 9 ພາກ​ສ່ວນ ເຂົ້າ​ຮ່ວມ ແລະ ປະ​ເພດທີມ​ຊາຍ ມີ 10 ທີມ ທັງ​ທີມຍິງ-ທີມ​ຊາຍ ແບ່ງ​ອອກ​ເປັນ 2 ກຸ່ມ ແຕ່​ລະ​ກຸ່ມ​ແຂ່ງ​ຂັນ​ພົບ​ກັນ​ໝົດ​ຄັດ​ເອົາ​ທີ 1-2 ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຕໍ່​ໄປ. ຂະ​ນະ​ທີ່​ຜົນ​ການ​ແຂ່ງ​ຂັນ​ຈະ​ເປັນ​ແນວ​ໃດ​ນັ້ນ ຈະ​ຂໍ​ລາຍ​ງານ​ໃຫ້​ຊາບ​ຕື່ມ​ອີກ.

      ໃນຕອນບ່າຍຂອງມື້ນີ້ກໍ່ຈະມີການແຂ່ງຂັນຮອບຮອງຊະນະເລີດປະເພດຊາຍ ຄູ່ທີ 1 ຈະເປັນການພົບກັນລະຫວ່າງ ທີມ ກອງທັບ ພົບກັບ ຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ ແລະ ຄູ່ທີ 2 ເປັນການພົບກັນ ຂອງ ທີມລາວເດີນອາກາດ ພົົບກັບ ທີມອິນທະສອນ ບີຊີຫວາ

ໂດຍ: ປາກກາດຳ

ພາບໂດຍ: deesler/Lao Volleyball Federation