ລາຍລະອຽດຂ່າວ
3 ຫຼຽນ​ເງິນ ເປຕັງຊີງແຊ້ມໂລກ ເດີນ​ທາງ​ເຖີງ​ບ້ານ​ເກີດ  
ຂຽນເມື່ອ: 25/11/2019 11:11 | ໂດຍ: ເພຣເມັກເກີ | ອ່ານ: 129 ຄັ້ງ

      ທັບ​ນັກ​ກິ​ລາ​ເປ​ຕັງ​ທີມ​ຊາດ​ລາວ ທັງ​ຮຸ່ນ​ເຍົາ​ວະ​ຊົນ ແລະ ຊາວ​ໜຸ່ມ​ທົ່ວ​ໄປ​ຍິງ ຜູ້​ທີ່​ສ້າງ​ຜົນ​ງານ​ຄັ້ງ​ປະ​ຫວັດ​ສາດ​ໃຫ້​ວົງ​ການ​ກິ​ລາ​ລາວ ກວາດ 3 ຫຼຽນ​ເງິນ ໃນ​ການແຂ່ງຂັນເປຕັງຊິງ​ແຊ໋ມໂລກ ຄັ້ງທີ XVll ທີ່ນະຄອນຫລວງພະນົມເປັນ ປະເທດກຳປູເຈຍ ລະຫວ່າງວັນທີ 18-24 ພະຈິກ ຜ່ານ​ມາ ໄດ້ເດີນ​ທາງ​ກັບ​ມາ​ເຖິງ​ຖິ່ນ​ຖານ​​ບ້ານ​ເກີດ​ເປັນ​ທີ່​ຮຽບ​ຮ້ອຍ​ແລ້ວ ພ້ອມ​ທັງ​ຖືກ​ຕ້ອນ​ຮັບ​ຈາກ​ຄະ​ນະ​ນຳ​ກົມ​ກິ​ລາ​ລະ​ດັບ​ສູງ, ສະ​ຫະ​ພັນ​ກິ​ລາ​ເປ​ຕັງ​ແຫ່ງ​ຊາດ ແລະ ພໍ່​ແມ່​ປະ​ຊາ​ຊົນ​ຊາວ​ລາວ​ຢ່າງ​ອົບ​ອຸ່ນ.

       ເມື່ອ​ວັນ​ທີ 24 ພະ​ຈິກ ຜ່ານ​ມາ ທີ່​ສະ​ໜາມ​ບິນ​ສາ​ກົນ​ ວັດ​ໄຕ ເມືອງ​ສີ​ໂຄດ​ຕະ​ບອງ ນະ​ຄອນ​ຫຼວງວຽງ​ຈັນ ຄະ​ນະ​ທັບ​ນັກ​ກິ​ລາ​ເປ​ຕັງ​ທີມ​ຊາດ​ລາວ ນຳ​ໂດຍ​ທ່ານ ວິ​ລະ​ວັດ ເທບ​ພິ​ທັກ ປະ​ທານ​ສະ​ຫະ​ພັນ​ເປ​ຕັງ​ແຫ່ງ​ຊາດ​ລາວ ໃຫ້​ກຽດ​ຕ້ອນ​ຮັບ​ຢ່າງ​ອົບ​ອຸ່ນ​ໂດຍ​ທ່ານ ສິງ​ຄຳ ນາ​ລິນ ຮອງ​ຫົວ​ໜ້າ​ກົມ​ກິ​ລາ​ລະ​ດັບ​ສູງ ​ມີ​ບັນ​ດາ​ຄະ​ນະ​ສະ​ຫະ​ພັນ​ເປ​ຕັງ​ແຫ່ງ​ຊາດ, ຄູ​ຝຶກ ແລະ ນັກ​ກິ​ລາ ຕະ​ຫຼອດ​ຮອດ​ພໍ່​ແມ່​ປະ​ຊາ​ຊົນ​ຊາວ​ລາວ ແລະ ຊາວ​ຕ່າງ​ປະ​ເທດ​ເຂົ້າ​ຮ່ວມ​ຕ້ອນ​ຮັບ ແລະ ສະ​ແດງ​ຄວາມ​ຍິນ​ດີ​ຍ້ອງ​ຍໍ​ຊົມ​ເຊີຍ​ຢ່າງ​ສົມ​ກຽດ. 

      ໂອ​ກາດນີ້, ທ່ານ ວິ​ລະ​ວັດ ເທບ​ພິ​ທັກ ໃຫ້​ສຳ​ພາດ​ວ່າ: ໄດ້​ສົ່ງທັບນັກກິລາເປຕັງທິມຊາດລາວ ປະກອບມີ 8 ຄົນຄື: ນາງ ມະນີວັນ ສຸລິຍາ, ນາງ ຈັນສະໝອນ ວົງສະຫວັດ, ນາງ ຄູນ ສຸກສະຫວັດ, ນາງ ໂບວິລັກ ເທບພະກັນ ​ຊຸດ​ກຽມ​ເຂົ້າ​ຮ່ວມ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ເປັນ​ເຈົ້າ​ພາບ ໃນ​ທ້າຍ​ປີນີ້ ສ່ວນ​ນັກ​ກິ​ລາ​ເຍົາ​ວະ​ຊົນ ກໍ​ມີ ທ້າວ ພິມພອນ ວັນນະຈອນ, ທ້າວ ປີໂນ່ ພັນທະລີ, ​ທ້າວ ສີສົມພອນ ວັນນະຈອນ ແລະ ​ທ້າວ ສຸທາພອນ ຫອມສົມບັດ ເຂົ້າ​ຮ່ວມ​ແຂ່ງຂັນເປຕັງຊິງ​ແຊ໋ມໂລກ ຄັ້ງທີ XVll ປະເພດຍິງ ແລະ ປະເພດເຍົາວະຊົນ ທີ່ນະຄອນຫຼວງພະນົມເປັນ ປະເທດກຳປູເຈຍ ລະຫວ່າງວັນທີ 18-24 ພະຈິກ 2019, ໃນ​ນັ້ນ ​ໄດ້​ມີ​ການ​ຊີງ​ໄຊ​ກັນ​ເຖິງ 5 ລາຍ​ການ ຈາກ​ປະ​ເພດ ຊຸດ​ຕີ້ງ​ຍິງ-ຊາຍ, ​ທີມ​ຊຸດ​ຍິງ ທົ່ວ​ໄປ, ທີມ​ຊຸດ​ຍິງ​ເຍົາ​ວະ​ຊົນ ແລະ ທີມ​ຊຸດ​ຊາຍ​ເຍົາ​ວະ​ຊົນ ສຳ​ລັບລາວ​ເຮົາ​ເຂົ້າ​​ແຂ່ງຂັນຄັ້ງນີ້ ສົ່ງຄະນະນຳ ແລະ ນັກກິລາເປຕັງລາວ ເຂົ້າ​ຮ່ວມ 11 ຄົນ, ໃນ​ນັ້ນ ສ​ະ​ເພາະນັກກິລາ 8 ຄົນ ເຂົ້າຮ່ວມຊິງໄຊກັບ 45 ປະເທດ ລວມ 4 ລາຍການຄື: ທິມຊຸດຍິງທົ່ວໄປ, ຊຸດຕິ້ງຍິງດ່ຽວ, ຊຸດຕິ້ງດ່ຽວເຍົາວະຊົນຊາຍ ແລະ ທິມຊຸດເຍົາວະຊົນຊາຍ.  

      ຜ່ານ​ການ​ແຂ່ງ​ຂັນ ທັບ​ນັກ​ກິ​ລາ​ທີມ​ຊາດ​ລາວ ກໍ​ເຮັດ​ໃຫ້ພໍ່​ແມ່​ປະ​ຊາ​ຊົນ​ລາວ​ບໍ່​ຜິດ​ຫວັງ ສາ​ມາດ​ສ້າງ​ຜົນ​ງານ​ໄດ້​ຢ່າງ​ໂດດ​ເດັ່ນ ໂດຍ​ສະ​ເພາະປະເພດທິມຊຸດຍິງຮຸ່ນທົ່ວໄປ ປະກອບມີ: ນາງ ມະນີວັນ ສຸລິຍາ, ນາງ ໂບວິລັກ ເທບພະກັນ, ນາງ ຈັນສະໝອນ ວົງສະຫວັດ ແລະ ນາງ ຄູນ ສຸກສະຫວັດ ຜົນ​ງານ​ໃນ​ຮອບຄັດເລືອກ 5 ນັດ ລາວເຮົາ​ສາ​ມາດ​ເອົາຊະນະ​ໄດ້​ເຖິງ 4 ນັດ​ຊ້ອນ ແລະ ເສຍ 1 ນັດ ກໍຄື​ ຊະນະ ສາທາລະນະລັດເກົາຫລີ (ເກົາຫລີໃຕ້) 13-1, ຊະນະ ຝຣັ່ງທິມ A 12-7, ເສຍໃຫ້ ກຳປູເຈຍ (ເຈົ້າພາບ) ທິມ B 2-13, ຊະນະ ຝຣັ່ງທິມ B 13-11 ແລະ ນັດທີ 5 ຊະນະ ສະໂລວັກ 13-5 ໄດ້ອັນດັບທີ 7 ຈາກທັງໝົດ 48 ທິມ ມາຈາກ 46 ປະເທດ ເຂົ້າຮອບ 16 ທິມສຸດທ້າຍ ພົບກັບ ນໍຣເວ (ນອກແວ) ເປຕັງທິມຍິງລາວ ກໍ່ເອົາຊະນະນອກແວ 13-8 ຄະແນນ ທະ​ລຸ​ເຂົ້າຮອບ 8 ທິມສຸດທ້າຍ ​ຊະ​ນະ ກຳປູເຈຍ (ເຈົ້າພາບ) ທິມ B 13-4 ຄະ​ແນນ ທະ​ລຸ​ເຂົ້າ​ຮອບ 4 ປາບ​ເຈົ້າ​ພາບ ກຳ​ປູ​ເຈຍ ທີມ A 13-6 ຄະ​ແນນ ກ່ອນ​ຈະ​ເສຍ​ໃຫ້ ນັກ​ເປ​ຕັງ ສາວໄທ 13-4 ຄະ​ແນນ ໄດ້​ພຽງ ຫຼຽນ​ເງິນ​ມາ​ຄ້ອງ​ຄໍ. 

      ສ່ວນປະເພດຊຸດຕິ້ງຍິງດ່ຽວຮຸ່ນທົ່ວໄປ ລາວເຮົາສົ່ງ ໂບວິລັກ ເທບພະກັນ ຮ່ວມດວນ​ຄວາມ​ແມ້ນ​ກັບ​ນັກ​ກິ​ລ​າ​ໃນ​ທົ່ວ​ໂລກ ຜົນ​ງານ​ໃນຮອບຄັດເລືອກ ​ສາ​ມາດຕີໄດ້ 36 ຄະແນນ​ດໍ ຢູ່ອັນດັບ 3 ຕາມຫຼັງອັນດັບ 1 ເຄເລັງ ແຊ້ມເກົ່ານັກກິລາປະສົບການສູງຂອງເຈົ້າພາບ 2 ຄະແນນ ແລະ ຕາມຫຼັງອັນດັບ 2 ນັກກິລາຈາກນໍເວ (ນອກແວ) 1 ຄະແນນ ຜ່ານເຂົ້າຮອບ 8 ຄົນສຸດທ້າຍ ຊະ​ນະ ນັດຕາວັນ ເຟືອງສະນິດ ຈາກໄທ 38-34 ຄະ​ແນນ ເຂົ້າ​ຮອບ 4 ຄົນ​ສຸດ​ທ້າຍ ກໍ​ສາ​ມາດ​ຮັກ​ສາ​ຟອມ​ເກັ່ງ​ ຊະ​ນະ 25-13 ຄະ​ແນນ ແຕ່​ໜ້າ​ເສຍ​ດ່າຍ​ໄປ​ເສຍ​ໃຫ້ ເຈົ້າ​ພາບ ເຄ​ເລັງ ມື 1 ຂອງ​ໂລກ 36-22 ຄະ​ແນນ ໄດ້​ພຽງ​ຫຼຽນ​ເງິນ​ຄ້ອງ​ຄໍ.

      ຂະ​ນະ​ທີ່​ຜົນ​ງານ​ຂອງທີ​ມຊຸດ​ເຍົາ​ວະ​ຊົນ​ລາວ ຮອບ​ຄັດ​ເລືອກ ຊະ​ນະ ຕຸ​ລ​ກີ 13-3 ຄະ​ແນນ ຜ່ານ​ເຂົ້າ​ຮອບ 8 ທີມ​ສຸດ​ທ້າຍ ຊະ​ນະ ອີ​ຕາ​ລີ 13-6 ຄະ​ແນນ ​ຜ່ານ​ເຂົ້າ​ຮອບ 4 ທີມ ແລະ ກໍ​ຊະ​ນະ ແອັດ​ສະ​ປາຍ 13-7 ຄະ​ແນນ ກ່ອນ​ຈະ​ເສຍ​ໃຫ້ ຝ​ຣັ່ງ​ຂາດ​ຮອຍ 1-13 ຄະ​ແນນ ໄດ້​ພຽງ​ຫຼຽນ​ເງິນ​ເຊັ່ນ​ກັນ.  

ໂດຍ ປາກກາດຳ