ລາຍລະອຽດຂ່າວ
ກະຕໍ້ລາວ ຫວັງຜ່ານເຂົ້າຮອບເລີກໆ ຊີເກມ ທີ່ປະເທດຟິລິບປິນ
ຂຽນເມື່ອ: 19/11/2019 15:11 | ໂດຍ: ເພຣເມັກເກີ | ອ່ານ: 227 ຄັ້ງ

         ສະຫະພັນກິລາກະຕໍ້ແຫ່ງຊາດລາວ ພ້ອມຈະສົ່ງທັບນັກກິລາກະຕໍ້ທີມຊາດລາວ ຊຸດທີ່ສ້າງຜົນງານໃນງານມະຫາກຳກິລາເອຊຽນ ເກມ, ງານກິລາຊີເກມ ແລະ ຊຸດຊີງແຊ໋ມໂລກ ຈຳນວນ 24 ຄົນ ສະເພາະນັກກິລາ 17 ຄົນ, ຍິງ 6 ຄົນ ເຂົ້າຮ່ວມລ່າຫຼຽນຄຳ 2 ລາຍການ ປະເພດກະຕໍ້ລອດບ້ວງຍິງ ແລະ ປະເພດທີມຄູ່ຊຸດຊາຍ ໃນງານມະຫາກຳກິລາຊີເກມ ຄັ້ງທີ XXX ທີ່ປະເທດຟິລິບປິນ ຮັບກຽດເປັນເຈົ້າພາບ ລະຫວ່າ່ງວັນທີ 30 ພະຈິກ ຫາ 12 ທັນວາ 2019.

         ຕາມການໃຫ້ສຳພາດຂອງທ່ານ ອາ​ນຸ​ສອນ ເຄນ​ກິ​ຕິ​ສັກ ຮອງ​ປະ​ທານ ແລະ ເລ​ຂາ​ທິ​ການສະ​ຫະ​ພັນ​ກະ​ຕໍ້​ແຫ່ງ​ຊາດ​ລາວ ເມື່ອ​ວັນ​ທີ 15 ພະ​ຈິກ ຜ່ານ​ມາ ໃຫ້​ຮູ້​ວ່າ: ການ​ແຂ່ງ​ຂັນ​ງານ​ມະ​ຫາ​ກຳ​ກິ​ລາ​ກະ​ຕໍ້ ໃນງານມະຫາກຳກິລາຊີເກມ ປີນີ້ ເຈົ້າພາບ ໄດ້ມີການກຳນົດຊີງໄຊເອົາຫຼຽນຄຳ ທັງ​ໝົດ 6 ລາ່ຍການ ​ປະ​ກອບ​ມີ ທີມ​ຊຸດ​ຊາຍ, ທີມ​​ຊຸດຄູ່​ຊາຍ, ທີມ​ດ່ຽວຊາຍ-ຍິງ, ກະ​ຕໍ້​ລອດ​ບ້ວງ​ຍິງ-ຊາຍ ພ້ອມ​ທັງກຳນົດໃຫ້ປະເທດໃນຂົງເຂດອາຊຽນ ໃນ​ຈຳ​ນວນ 11 ຊາດ ​ໂດຍ​ສະ​ເພາະປະ​ເພດ​ຊາຍ ​ສາ​ມາດ​ສົ່ງ​ນັກ​ກິ​ລາ​ເຂົ້າ​ຮ່ວມໄດ້​ຊາດ​ໜຶ່ງພຽງ 2 ລາຍ​ການ ແລະ ປະ​ເພດ​ຍິງ ໄດ້​ພຽງ 1 ລາຍ​ການ. ດັ່ງ​ນັ້ນ, ​ສະ​ຫະ​ພັນ​ກະ​ຕໍ້​ແຫ່ງ​ຊາດ​ລາວ ຈຶ່ງ​ໄດ້​ຄົ້ນ​ຄວ້າ ແລະ ກຳ​ນົດ​ສົ່ງ​ພຽງ 3 ລາຍ​ການ ຄື:  ປະ​ເພດ​ທີມຊຸດ​ຄູ່​ຊາຍ ແລະ ​ປະ​ເພດ​ກະ​ຕໍ້ລອດ​ບ້ວງຍິງ-ຊາຍ ເຫດ​ຜົນ​ທີ່​ທາງ​ເຈົ້າ​ພາບ​ກຳ​ນົດ​ການ​ແຂ່ງ​ຂັນ​ລາຍ​ການ​ໜ້ອຍ ຍ້ອນ​ວ່າ ເຈົ້າພາບ ມີຄວາມຫວັງໜ້ອຍ ເຊິ່ງເປັນຜົນພວງຕໍ່ການຄອງເຈົ້າຫຼຽນຄຳ ຈຶ່ງຕັດ​ລາຍ​ການ​ຕ່າງໆອອກໃຫ້ມີພຽງແຕ່ 6 ລາຍການ ເທົ່າ​ນັ້ນ ສ່ວນ​ຄວາມ​ຫວັງ ທີ່​ພວກ​ເຮົາ​ຕັ້ງ​ເປົ້າ​ໝາຍ​ໄວ້​ທີ່​ລາຍ​ການ ທີມ​ກະ​ຕໍ້​ທີມ​ຊຸດ​ຄູ່​ຊາຍ.

​         ຂະ​ນະ​ທີ່​ທ່ານ ຈັນໃດ ເພຍເທບ ຫົວໜ້າຄູຝຶກກະຕໍ້ທີມຊາດລາວ ກໍໃຫ້ຮູ້ວ່າ: ທັບນັກກິລາກະຕໍ້ທີມຊາດລາວ ຊຸດນີ້ ໄດ້ມີການເກັບຕົວຝຶກຊ້ອມາແຕ່ຕົ້ນເດືອນກໍລະກົດ ຜ່ານມາ ທີ່ສະໂມສອນກິລາໃນຮົ່ມໂອແລມປາເຊຍ ວິທະຍາເຂດດົງໂດກ ເມືອງໄຊທານີ ນະຄອນຫຼວງວຽງຈັນ ໂດຍມີນັກກິລາທັງໝົດ 17 ຄົນ, ຍິງ 6 ຄົນ ນັບມາຮອດປັດຈຸບັນພາຍ​ຫຼັງນັກກິລາ​ໄດ້​ຝຶກ​ຊ້ອມ​ຢ່າງ​ເອົາ​ຈິງ​ເອົາ​ຈັງ ແລະ ເອົາ​ໃຈ​ໃສ່​ຢ່າງ​ຕັ້ງໜ້າທຸກ​ຄົນ​ກໍມີຄວາມພ້ອມເກືອບເຕັມຮ້ອຍເປີເຊັນ ບໍ່ວ່າຈະເປັນທາງດ້ານເທັກນິກ, ທັກສະ ແລະ ຄວາມສາມາດ ຕະຫຼອດຮອດສະພາບຈິດໃຈ ​ແຕ່ສິ່ງທີ່ຄວນປັບມີພຽງແຕ່ແກ້ໄຂທາງ​ບັນ​ຫາດ້ານເຕັກນິກບາງຢ່າງ ກໍຖືວ່າພ້ອມຢ່າງສົມບູນ. ເຖິງ​ຢ່າງ​ໃດ​ກໍ​ດີ, ຂ້າ​ພະ​ເຈົ້າ​ພ້ອມ​ດ້ວຍ​ທີມ​ງານ​ຄະ​ນະ​ຄູ​ຝຶກ​ທຸກ​ຄົນ​ຂໍ​ໃຫ້​ຄຳ​ໝັ້ນ​ສັນ​ຍາ​ວ່າ ຈະ​ພະ​ຍາ​ຍາມ​ສູ້​ຊົນ​ນຳ​ພາ​ທັບ​ນັກ​ກິ​ລາ​ກະ​ຕໍ້​ລາວ​ສ້າງ​ຜົນ​ງານ​ຕາມ​ທີ່​ສະ​ຫະ​ພັນ​ຕັ້ງ​ເປົ້າ​ໄວ້​ໃຫ້​ປະ​ກົດ​ຜົນ​ເປັນ​ຈິງ.

         ສຳລັບທັບນັກກິລາກະຕໍ້ທີມຊໍາດລາວຊຸດນີ້ ນຳທັບໂດຍ ທ່ານ ອານຸສອນ ເຄນກິຕິສັກ ເລຂາທິການ ເປັນຫົວໜ້າ, ທ່ານ ນາງ ວິໄລວອນ ແສງຕາ ຄະນະ ເປັນຄະນະ, ນາງ ໂນລີ ຊາມຸນຕີ ຄູຝຶກຍິງ, ທ່ານ ຈັນໃດ ເພຍເທບ ຄູຝຶກຊາຍ, ທ່ານ ສົມໃຈ ແກ້ວປະເສີດ ຄະນະຄູຝຶກ, ທ່ານ ຣົນນາຣົງ ເຈນໄຊຍະພູມີ ຄະນະຄູຝຶກ, ທ່ານ ວິຣາວຸດ ຣັກສະ    ເໝີວົງ ຄະນະຄູຝຶກ ສ່ວນນັກກິລາ ປະກອບມີ ທ້າວ ພິດທະສັນ ບຸນປະເສີດ, ທ້າວ ອາດົງ ຜູ້ມີສິນ, ທ້າວ ກັນຕະນາ ນານທິເສນ, ທ້າວ ໂປ ມາໂສພາ, ທ້າວ ໜຸ່ມ ສຸວັນນະລິດ, ທ້າວ ໂຍທິນ ສົມບັດພູທອນ, ທ້າວ ສົມມະນີລັດ ພະກອນຄໍາ, ທ້າວ ແສງວັນ ບູລົມມະວົງ, ທ້າວ ລັກສະນະໄຊ ບຸນໄພວັນ, ທ້າວ ກອງສີ ຢ່າງ, ທ້າວ ໄຊບັນດິດ ທາດານາບຸດ, ນາງ ກ້ອຍ ໄຊຍະວົງ, ນາງ ນໍຄໍາ ວົງໄຊ, ນາງ ສອນສະຫວັນ ແກ້ວສຸລິຍາ, ນາງ ພິລາວັນ ຈັນທະສິລິ, ນາງ ດຳດວນ ລັດຕະນະວົງສາ ແລະ ນາງ ແຫຼ້ ອິນທະວົງ.

ໂດຍ ປາກກາດຳ