ລາຍລະອຽດຂ່າວ
​ ລາວ​ສະ​ກາຍ​ເວ ຄອງ​ແຊ້ມ​ບານ​ສົ່ງ​ຫາດ​ຊາຍ ເພດ​ຊາຍ ຊີງ​ຂັນ​ປະ​ທານ ສບ​ລ 2019 ສະ​ຫຼອງຄົບ​ຮອບ 44 ປີ
ຂຽນເມື່ອ: 18/11/2019 10:11 | ໂດຍ: ເພຣເມັກເກີ | ອ່ານ: 158 ຄັ້ງ

        ໜ​ຸ່ມ​ນັກ​ບິນທັບ​ນັກ​ຕົບ​ບານ​ສົ່ງ​ຫາດ​ຊາຍ ຈາກ​ທີມ​ລາວ​ເດີນ​ອາ​ກາດ ຫຼື ລາວ​ສະ​ກາຍ​ເວ ສາ​ມາດ​ປະ​ກາດ​ສັກ​ດາ​ໃນ​ວົງ​ການ​ບານ​ສົ່ງ​ຫາດ​ຊາຍລາວ ຫຼັງ​ກວດ​ແຊ້ມ ແລະ ອັນ​ດັບ​ທີ 2 ໃນ​ການ​ແຂ່ງ​ຂັນ​ກິ​ລາ​ບານ​ສົ່ງ​ຫາດ​ຊາຍ ເພດ​ຊາຍ ຊີງ​ຂັນ​ປະ​ທານ​ສະ​ຫະ​ພັນ​ບານ​ສົ່ງ​ແຫ່ງ​ຊາດ​ລາວ (ສບ​ລ) ປະ​ຈຳ​ປີ 2019 ເພື່ອ​ສ້າງ​ຂະ​ບວນ​ການ​ສະ​ເຫຼີມ​ສະ​ຫຼອງວັນ​ຊາດ​ທີ 2 ທັນ​ວາ 2019 ຄົບ​ຮອບ 44 ປີ (ວັນ​ທີ 2 ທັນ​ວາ 1975 ຫາ 2 ທັນ​ວາ 2019) ຂະ​ນະ​ທີ່ ສາວ​ກົມ​ວິ​ທະ​ຍາ​ສາດ-ປະ​ຫວັດ​ສາດ ປາບ​ແຊ້ມ​ເກົ່າ ກອງ​ທັບ 2-1 ເຊັດ ຄອງ​ແຊ້ມ​ບານ​ສົ່ງ​ຫາດ​ຊາຍ ເພດ​ຍິງ.

          ການ​ແຂ່ງ​ຂັນ​ຄັ້ງ​ນີ້ ຈັດ​ຂຶ້ນ ເມື່ອ​ລະ​ຫວ່າງວັນ​ທີ 15-17 ພະ​ຈິກ ຜ່ານ​ມາ ທີ່​ສະ​ໜາມ​ບານ​ສົ່ງ​ຫາດ​ຊາຍ ມະ​ຫາ​ວິ​ທະ​ຍາ​ໄລ​ແຫ່ງ​ຊາດ (ມ​ຊ) ຂ້າງ​ສະ​ໜາມ​ກາງ ມ​ຊ ວິ​ທະ​ຍາ​ເຂດ​ດົງ​ໂດກ ເມືອງ​ໄຊ​ທາ​ນີ ນະ​ຄອນ​ຫຼ​ວງວຽງ​ຈັນ ໂດຍ​ໃຫ້​ກຽດ​ເຂົ້າ​ຮ່ວມ ແລະ ມອບ​ລາງວັນ​ຂອງ​ທ່ານ ຈັນ​ສະ​ໝອນ ຜ່ອງ​ຈັນ​ທາ ປະ​ທານ​ສະ​ຫະ​ພັນ​ບານ​ສົ່ງ​ແຫ່ງ​ຊາດ​ລາວ, ມີ​ບັນ​ດາ​ຄະ​ນະ​ບໍ​ລິ​ຫານ​ງານ​ ສບ​ລ, ຄະ​ນະ​ນຳ​ແຕ່​ລະ​ພາກ​ສ່ວນ ແລະ ຄູ​ຝຶກ, ນັກ​ກິ​ລາ ຕະ​ຫຼອດ​ຮອດກອງ​ເຊຍ ແລະ ສື່ມວນ​ຊົນ​ເຂົ້າ​ຮ່ວມ​ຢ່າງ​ຫຼວງ.

          ໃນ​ພິ​ທີ​ປິດມື້​ສຸດ​ທ້າຍ ກໍ​ໄດ້​ມີ​ການ​ແຂ່ງ​ຂັນ​ນັດ​ຊີ​ງ​ຊະ​ນະ​ເລີດ​ທັງ​ສອງ​ປະ​ເພດ​ຍິງ ແລະ ຊາຍ ແລະ ຊີງ​ອັນ​ດັບ​ທີ 3 ປະ​ເພດ​ຊາຍ ສຳ​ລັບ​ນັດ​ຊີງ​ທີ 1 ເພດ​ຊາຍ ເປັນ​ການ​ໂຄ​ຈອນ​ມາ​​ພົບ​ກັນເອງ​ຂອງ​ທີມ​ລາວ​ສະ​ກາຍ​ເວ ສຳ​ລັບ​ທີມ​ລາວ​ສະ​ກາ​ຍ​ເວ 2 ປະ​ກອບ​ມີ​ທ້າວ ດາວ​ວີ ຊະ​ນະ​ວົງ​ໄຊ ແລະ ອາ​ນຸ​ວົງ ໄຊ​ຍະ​ຈັນ ສ່ວນ​ລາວ​ສະ​ກາຍ​ເວ 3 ມີ ທ້າວ ລິດ ໄຊ​ຄຳ​ມູນ ແລະ ທ້າວ ວິ​ລະ​ນັດ ໄຊ​ຊະ​ນະ ທັງ​ສອງ​ທີມ​ສູ້​ກັນ​ໄດ້​ຢ່າງ​ສູ​ສີ​ ແລະ ສຸດ​ມ່ວນ ກ່ອນ​ທີມ​ລາວ​ສະ​ກາຍ​ເວ 2 ອາ​ໃສ​ປະ​ສົບ​ການ ແລະ ຄວາມ​ສົດ​ບົດ​ຊະ​ນະທີມ​ຮຸ່ນ​ນ້ອງ 2-0 ເຊັດ ດ້ວຍ​ຄະ​ແນນ 21-16 ແລະ 21-19 ຄະ​ແນນ ໄດ້​ແຊ້ມໄປ​ຄອງ ສ່ວນ​ທີມ​ລາວ​ສະ​ກາຍ​ເວ 3 ໄດ້​ພຽງ​ອັນ​ດັບ​ທີ 2, ທີ 3 ຕົກ​ເປັນ​ຂອງ​ທີມ​ອິນ​ທະ​ສອນ ວີ​ຊີ ແລະ ທີ 4 ທີມ​ສວນ​ອາ​ຫານ​ຕາດ​ຖ້ຳ​ເສືອ. ຂະ​ນະ​ທີ່ ນັດ​ຊີງ​ຊະ​ນະ​ເລີດ​ປະ​ເພດ​ຍິງ ທີມ​ກົມ​ວິ​ທະ​ຍາ​ສາດ-ປະ​ຫວັດ​ສາດ​ການ​ທະ​ຫານ ພີກ​ແຊງ​ຊະ​ນະ ແຊ້ມ​ເກົ່າ ກອງ​ທັບ 2-1 ເຊັດ 17-21, 21-19 ແລະ 15-12 ຄະ​ແນນ ຄອງ​ແຊ້ມ​ເປັນ​ຄັ້ງ​ທຳ​ອິດ ສ່ວນ​ແຊ້ມ​ເກົ່າ​ໄດ້​ພຽງ​ທີ 2, ທີ 3 ວິ​ທະ​ຍາ​ໄລ​ພະ​ລະ​ສຶກ​ສາ ແລະ ທີ 4 ທີມ​ແຟັງ​ມິງ​ໂກ້.  

ການ​ແຂ່ງ​ຂັນ​ລາຍ​ການ​ດັ່ງ​ກ່າວ ທີມຊະ​ນະ​ເລີດ​ທັງ​ສອງ​ທີມ​​ແມ່ນ​ໄດ້​ຮັບຂັນ ພ້ອມຫຼຽນ​ຄຳ ແລະ ເງິນ​ສົດ ທີມ​ລະ 2 ລ້ານ​ກີບ​, ທີ 2 ໄດ້​ຮັບ​ຫຼຽນ​ເງິນ ແລະ ເງິນ​ສົດທີມ​ລ​ະ 1,2 ລ້ານ​ກີບ, ​ທີ 3 ໄດ້​ຮັບ​ຫຼຽນ​ທອງ ແລະ ເງິນ​ສົດ ທີມ​ລະ 8 ແສນ​ກີບ ແລະ ທີ 4 ໄດ້​ຮັບ​ລາງວ​ັນ​ຊົມ​ເຊີຍ​ເປັນ​ເງິນ​ສົດ 4 ແສນ​ກີບ.

ພາບໂດຍ: deesler/Lao Volleyball Federation

ໂດຍ ປາກກາດຳ