ລາຍລະອຽດຂ່າວ
ບານເຕະ ຊີງຂັນຄະນະພັກກະຊວງພະລັງງານ ແລະ ບໍ່ແຮ່ ຄັ້ງທີ 9 ປະຈຳປີ 2019 ເປີດສາກແລ້ວ
ຂຽນເມື່ອ: 14/11/2019 16:11 | ໂດຍ: ເພຣເມັກເກີ | ອ່ານ: 174 ຄັ້ງ

      ເປີດສາກແລ້ວ ! ການແຂ່ງຂັນເຕະບານ ຊີງຂັນຄະນະພັກກະຊວງພະລັງງານ ແລະ ບໍ່ແຮ່ ຄັ້ງທີ 9 ປະຈຳປີ 2019 ທີ່ຈັດຂຶ້ນເພື່ອເປັນການສ້າງຂະບວນການຂ່ຳນັບຮັບຕ້ອນກອງປະຊຸມໃຫຍ່ ອົງຄະນະພັກ ແລະ ກອງປະຊຸມ 3 ອົງການຈັດຕັ້ງມະຫາຊົນ ຂອງກະຊວງພະລັງງານ ແລະ ບໍ່ແຮ່ ໃຫ້ຟົດຟື້ນ. ຊຶ່ງເລີ່ມແຂ່ງຂັນກັນເປັນເວລາ 5 ອາທິດ ຈົນເຖິງ 6 ທັນວາ ນີ້ ທີ່ເດີ່ນລ້ານຊ້າງ ສະເຕດ້ຽມ ບ້ານໜອງໄຮ ແລະ ມີທັງໝົດ 27 ທີມເຂົ້າຮ່ວມ.

      ເມື່ອວັນທີ 9 ພະຈິກ ຜ່ານມາ ທີ່ເດີ່ນລ້ານຊ້າງ ສະເຕດ້ຽມ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ມີພິທີເປີດການແຂ່ງຂັນເຕະບານ ຊີງຂັນຄະນະພັກກະຊວງພະລັງງານ ແລະ ບໍ່ແຮ່ ຄັ້ງທີ 9 ປະຈຳປີ 2019 ຂຶ້ນ. ໃຫ້ກຽດເປັນປະທານຂອງ ສະຫາຍ ທອງພັດ ອິນທະວົງ​ຮອງລັດຖະມົນຕີກະຊວງພະລັງງານແລະບໍ່ແຮ່, ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານ ສູນກາງ​ ຊປປລ​ ພ້ອມດ້ວຍຄະນະ, ບັນດາຫົວໜ້າກົມ, ຮອງກົມ, ປະທານບໍລິສັດທີ່ກ່ຽວຂ້ອງ, ຕ່າງໜ້າພາກສ່ວນຕ່າງໆ, ພະນັກງານ, ວິຊາການ ແລະ ນັກກິລາ ຈາກຫ້ອງການ, ສະຖາບັນ, ພະແນກ, ລັດວິສາຫະກິດ ແລະ ບໍລິສັດ ໃນຂະແໜງພະລັງງານ ແລະ ບໍ່ແຮ່ ເຂົ້າຮ່ວມ.

      ໂອກາດດັ່ງກ່າວ, ສະຫາຍ ປອ ສີມອນ ພິຈິດ ເລຂາຄະນະບໍລິຫານງານ ຊປປລ ກະຊວງ ພະລັງງານ ແລະ​ ບໍ່ແຮ່ກໍ່ໄດ້ກ່າວລາຍງານໃຫ້ຊາບວ່າ : ການແຂ່ງຂັນເຕະບານ ຊີງຂັນຄະນະພັກກະຊວງພະລັງງານ ແລະ ບໍ່ແຮ່ ຄັ້ງທີ 9 ປະຈຳປີ 2019 ແມ່ນຈັດຂຶ້ນເພື່ອເປັນການສ້າງຂະບວນການຂ່ຳນັບຮັບຕ້ອນກອງປະຊຸມໃຫຍ່ ອົງຄະນະພັກ ແລະ ກອງປະຊຸມ 3 ອົງການຈັດຕັ້ງມະຫາຊົນ ຂອງກະຊວງພະລັງງານ ແລະ ບໍ່ແຮ່. ຊຶ່ງຈະເລີ່ມແຂ່ງຂັນກັນເປັນເວລາ 5 ອາທິດ ລະຫວ່າງວັນທີ 2 ພະຈິກ ຫາ 6 ທັນວາ 2019 ທີ່ເດີ່ນລ້ານຊ້າງ ສະເຕດ້ຽມ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ. ໂດຍຈັດທັງໝົດ 3 ປະເພດ ມີທັງໝົດ 27 ທີມເຂົ້າຮ່ວມ ປະກອບມີ ປະເພດບານເຕະຊາຍ ມີທັງໝົດ 14 ທີມ ແບ່ງອອກເປັນ 4 ສາຍ, ປະເພດບານເຕະຍິງ ມີທັງໝົດ 7 ທີມ ແບ່ງອອກເປັນ 2 ສາຍ ແລະ ປະເພດບານເຕະອາວຸໂສ ມີທັງໝົດ 6 ທີມ ແບ່ງອອກເປັນ 2 ສາຍ.  ໂດຍຮູບແບບການແຂ່ງຂັນ ແມ່ນພົບກັນໝົດໃນຮອບທຳອິດ ແລ້ວ ເອົາທີມທີ່ມີຄະແນນທີ່ດີທີ່ສຸດ ເຂົ້າຮອບ ສາຍລະ 2 ທີມ ໃນແຕ່ລະປະເພດ ແລ້ວສຶບຕໍ່ແຂ່ງຂັນແບບປະກົບຄູ່ ເສຍແລ້ວຕົກຮອບຈົນເຖິງນັດຊີງຊະນະເລີດ.

      ສຳລັບ ລາງວັນແຕ່ລະປະເພດ ປະກອບມີ ປະເພດບານເຕະຊາຍ ຊະນະເລີດ ຈະໄດ້ຮັບຂັນມູນວຽນປະຈຳປີ 1 ໜ່ວຍ ພ້ອມເງິນສົດ 3 ລ້ານກີບ, ຮອງຊະນະເລີດ ໄດ້ຮັບຂັນປະຈຳປີ 1 ໜ່ວຍ ພ້ອມເງິນສົດ 2 ລ້ານກີບ ແລະ ອັນດັບ 3 ໄດ້ຮັບຂັນປະຈຳປີ 1 ໜ່ວຍ ພ້ອມເງີນສົດ 1.500.000 ກີບ, ປະເພດບານເຕະຍິງ ຊະນະເລີດ ຈະໄດ້ຮັບຂັນມູນວຽນປະຈຳປີ 1 ໜ່ວຍ ພ້ອມເງິນສົດ 2 ລ້ານກີບ, ຮອງຊະນະເລີດ ໄດ້ຮັບຂັນປະຈຳປີ 1 ໜ່ວຍ ພ້ອມເງິນສົດ 1.500.000 ກີບ ແລະ ອັນດັບ 3 ໄດ້ຮັບຂັນປະຈຳປີ 1 ໜ່ວຍ ພ້ອມເງີນສົດ 1 ລ້ານກີບ ແລະ  ປະເພດບານເຕະອາວຸໂສ ຊະນະເລີດ ຈະໄດ້ຮັບຂັນມູນວຽນປະຈຳປີ 1 ໜ່ວຍ ພ້ອມເງິນສົດ 2 ລ້ານກີບ, ຮອງຊະນະເລີດ ໄດ້ຮັບຂັນປະຈຳປີ 1 ໜ່ວຍ ພ້ອມເງິນສົດ 1.500.000 ກີບ ແລະ ອັນດັບ 3 ໄດ້ຮັບຂັນປະຈຳປີ 1 ໜ່ວຍ ພ້ອມເງີນສົດ 1 ລ້ານກີບ. ນອກຈາກນັ້ນ, ໃນພິທີດັ່ງກ່າວ ຍັງມີການມອບເງີນສະໜັບສະໜູນການແຂ່ງຂັນ ແລະ ມີການເຕະບານມິດຕະພາບຂອງການນຳ ນຳອີກ.

ໂດຍ ວັນສົດໃສ