ລາຍລະອຽດຂ່າວ
​​ສະ​ມາ​ຄົມ​ຮ້ານ​ອາ​ຫານ ນວ-ເບຍ​ລາວ ມອບ​ເຄື່ອງ​ນຸ່ງກິ​ລາ 20 ຊຸດ ໃຫ້ສື່ມວນ​ຊົນ​ສາຍ​ກິ​ລາ ​ສະ​ຫ​ຼອງຄົບ​ຮອບ 44 ປີ ຢ່າງ​ຟົດ​ຟື້ນ
ຂຽນເມື່ອ: 14/11/2019 16:11 | ໂດຍ: ເພຣເມັກເກີ | ອ່ານ: 249 ຄັ້ງ

          ສະ​ມາ​ຄົມ​ຮ້ານ​ອາ​ຫານ ນະ​ຄອນ​ຫຼວງວຽງ​ຈັນ (ນວ) ພາຍ​ໃຕ້​ການ​ສະ​ໜັບ​ສະ​ໜູນ​ຂອງບໍ​ລິ​ສັດ ເບຍ​ລາວ ຈ​ຳ​ກັດ ​ໄດ້​ຊຸກ​ຍູ້​ເຄື່ອງ​ນຸ່ງ​ກິ​ລາ​ບານ​ເຕະ ຈຳ​ນວນ 20 ຊຸດ ໃຫ້​ແກ່​ກຸ່ມ​ສື່ມວນ​ຊົນ​ສາຍ​ກິ​ລາ​ລາວ ໄດ້​ມີ​ຄວາມ​ສະ​ດວກ​ໃນ​ການ​ເຄື່ອນ​ໄຫວ​ຫຼິ້ນ​ກິ​ລາ​ຮ່ວມ​ກັບ​ບັນ​ດາ​ພາກ​ສ່ວນ​ທັງ​ພາກ​ລັດ ແລະ ເອກ​ກະ​ຊົນ ສ້າງ​ຂະ​ບວນ​ການ​ສະ​ເຫຼີມ​ສະ​ຫຼອງວັນ​ສຳ​ຄັນ​ຕ່າງໆ​ຂອງ​ຊາດ ກໍ​ຄື ສະ​ຫຼອງວັນ​ຊາດ​ທີ 2 ທັນ​ວາ ຄົບ​ຮອບ 44 ປີ ທີ່​ໃກ້​ຈະ​ມາ​ເຖິງ​ໃນ​ມໍ່ໆ​ນີ້ ອີກ​ດ້ານ​ໜຶ່ງ​ກໍ​ຍັງ​ເປັນ​ການ​ສົ່ງ​ເສີມ​ໃຫ້​ທີມ​ນັກ​ຂ່າວໄດ້​ມີ​ສຸ​ຂະ​ພາບ​ແຂງ​ແຮງ ເປັ​ນ​ກະ​ບອກ​ສຽງ​ສຳ​ຄັນ​ຄຽງ​ຄູ່​ກັບ​ສັງ​ຄົມລາວ ກໍ​ຄື ນຳ​ສະ​ເໜີ​ຂ່າວ​ສານ​ຂອງ​ທັບ​ນັກ​ກິ​ລາ​ລາວ ຊຸດ​ຮ່ວມ​ງານ​ກິ​ລາ​ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ເປັນ​ເຈົ້າ​ພາບ ຈະ​ເປີດ​ຂຶ້ນ​ໃນ​ທ້າຍ​ປີນີ້.

      ພິ​ທີ​ມອບ-ຮັບ​ເຄື່ອງ​ດັ່ງ​ກ່າວ ໄດ້​ມີ​ຂຶ້ນ ເມື່ອ​ວັນ​ທີ 13 ພະ​ຈິກ ຜ່ານ​ມາ ທີ່​ສະ​ໜາມ​ກິ​ລາ​ເຈົ້າ​ອາ​ນຸ​ວົງ ນະ​ຄອນ​ຫຼວງວຽງ​ຈັນ ​ຕາງ​ໜ້າເປັນ​ການ​ກ່າວມອບ​ໂດຍ​ທ່ານ ສຸ​ລະ​ສິດ ພາບ​ມີ​ໄຊ ຜູ້​ຈັດ​ການ​ໂປ​ໂມ​ຊັ່ນ ແລະ ສົ່ງ​ເສີມ​ການ​ຂາຍ​ໃນ​ຮ້ານ​ຄ້າ ບໍ​ລິ​ສັດ ເບຍ​ລາວ ຈຳ​ກັດ ແລະ ຕາງ​ໜ້າ​ກ່າວ​ຮັບ​ແມ່ນທ່ານ ສີ​ພອນ ຈັນ​ທະ​ດາ​ລາ ຮອງ​ປະ​ທານ​ກຸ່ມ​ສື່ມວນ​ຊົນ​ສາຍ​ກິ​ລາ​ລາວ, ມີ​ທ່ານ ພູ​ວົງ ອິນ​ທະ​ວົງ​ສາ ປະ​ທານສະ​ມາ​ຄົມ​ຮ້ານ​ອາ​ຫານ ນະ​ຄອນ​ຫຼວງວຽງ​ຈັນ-ເບຍ​ລາວ ແລະ ທ່ານ ພຸດ​ດາ​ມອນ ຈັນ​ທະ​ລາ​ສີ ພິ​ທີ​ກອນ​ຊື່​ດັງ​ຈາກ​ສະ​ຖາ​ນີ​ລາວ​ສະ​ຕຣາ ທັງ​ເປັນຫົວ​ໜ້າ​ທີມ​ສື່ມວນ​ຊົນ​ສາຍ​ກິ​ລາ​ລາວ ພ້ອມ​ດ້ວຍ​ບັນ​ດາ​ສະ​ມາ​ຊິກ​ຂອງ​ທັງ​ສອງ​ພາກ​ສ່ວນ​ດັ່ງ​ກ່າວ​ເຂົ້າ​ຮ່ວມ​ເປັນ​ສັກ​ຂີ​ພິ​ຍານ. 

      ໃນ​ພິ​ທີ​ດັ່ງ​ກ່າວ ກໍ​ຍັງ​ໄດ້​ມີການ​ແຂ່ງ​ຂັນ​ກິ​ລາ​ເຕະ​ບານ ນັດ​ພິ​ເສດ ມິດ​ຕະ​ພາບ ຜ່ານ​ການ​ແຂ່ງ​ຂັນ​ຜົນ​ປະ​ກົດ​ວ່າ: ສະ​ມາ​ຄົມ​ຮ້ານ​ອາ​ຫານ ນະ​ຄອນ​ຫຼວງວຽງ​ຈັນ-ເບຍ​ລາວ ເປັນ​ຝ່າຍ​ເອົາ​ຊະ​ນະ ທີມ​ສື່ມວນ​ຊົນ​ສາຍ​ກິ​ລາ​ລາວ ໄປ​ແບບ​ສຸດ​ມ່ວນ 6-4 ປະ​ຕູ.

ໂດຍ ປາກກາດຳ