ລາຍລະອຽດຂ່າວ
ໃສ​ທິ​ລາດ ຊຸກ​ຍູ້ 30 ລ້ານ​ກີບ ​ທັບ​ນັກ​ກິ​ລາ​ລົດ​ຖີບ​​ລາວ ຝຶກ​ຊ້ອມ​ທີ່​ປະເທດໄທ ກ່ອນ​ລຸຍ​ຊີ​ເກມ ທີ່​ປະ​ເທດ​ຟິ​ລິບ​ປິນ
ຂຽນເມື່ອ: 14/11/2019 16:11 | ໂດຍ: ເພຣເມັກເກີ | ອ່ານ: 533 ຄັ້ງ

      ທ່ານ ສຸກສາຄອນ ໃສທິລາດ ປະທານບໍລິສັດ ໃສທິລາດ ກຣຸບ, ຮອງປະທານ ສະຫະພັນລົດຖີບແຫ່ງຊາດລາວ ທັງເປັນປະທານສະຫະພັນລົດຖີບ ນະຄອນຫລວງວຽງຈັນ ໄດ້​ເດີນ​ທາງ​ໄປ​ຢ້ຽມ​ຢາມ​ພ້ອມມອບ​ເງິນ​ຈຳ​ນວນ 30 ລ້ານ​ກີບ ເປັນ​​ກຳ​ລັງ​ໃຈ​ທັບ​ນັກ​ກິ​ລາ​ລົດ​ຖີບ​ທີມ​ຊາດ​ລາວ ທີ່​ກຳ​ລັງ​ເກັບ​ຕົວ​ຝຶກ​ຊ້ອມທີ່​ແຂວງ​ຊຽງ​ໃໝ່ ຣາ​ຊະ​ອາ​ນາ​ຈັກ​ໄທ ເພື່ອ​ກຽມ​ເຂົ້າ​ຮ່ວມ​ລ່າ​ຫຼຽນ​ຄຳ ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ລະ​ຫວ່າງວັນ​ທີ 30 ພະ​ຈິກ ຫາ 12 ທັນ​ວາ 2019.

      ໃຫ້​ກຽດ​ເຂົ້າ​ຮ່ວມ​ເປັນ​ສັກ​ຂີ​ພິ​ຍານ​ມີ​ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການ ພ້ອມ​ດ້ວຍ​ຄະ​ນະ, ບັນ​ດາ​ຄູ​ຝຶກ ແລະ ນັກ​ກິ​ລາ​ເຂົ້າ​ຮ່ວມ.

      ສຳ​ລັບການໄປເກັບ​ຕົວຝຶກຊ້ອມ​ໃນຄັ້ງນີ້ ​ທັບ​ນັກ​ກິ​ລາ​ລົດ​ຖີບ​ທີມ​ຊາດ​ລາວ ຈະໄດ້​ມີ​ເວ​ລາ​ຝຶກ​ຊ້ອ​ມ້​ເປັນ​ເວ​ລາ 30 ວັນ, ໃນ​ນັ້ນ ໄດ້​ນຳໃຊ້ງົບປະມານ​ຂອງຕົນເອງທັງ​ໝົດ ແລະ ອີກ 45 ວັນ ແມ່ນໃຊ້ງົບປະມານຂອງສະຫະພັນລົດຖີບແຫ່ງຊາດລາວ ໃນໂອກາດໄປຢ້ຽມຢາມຄັ້ງນີ້ ທ່ານ ສຸກສາຄອນ ໃສທິລາດ ຍັງໄດ້ມອບເງິນໃຫ້ນັກກິລາ ຈຳນວນ 30 ລ້ານ​ກີບ ເພື່ອເປັນ​ຄ່າໃຊ້ຈ່າຍ ແລະ ຊື້ອຸປະກອນທີ່ກ່ຽວຂ້ອງ ເພື່ອ​ໃຫ້​ນັກ​ກິ​ລາ​ມີ​ກຳ​ລັງ​ໃຈ​ເຂົ້າ​ໃນ​ການ​ຝຶກ​ຊ້ອມ​ເພື່ອ​ກຽມຄວາມ​ພ້ອມເຂົ້າ​ຮ່ວມ​ລ່າ​ຫຼຽນ​ຄຳ ໃນ​ການແຂ່ງຂັນງານ​ດັ່ງ​ກ່າວ​ອີກ​ດ້ວຍ.

      ໃນມື້ດຽວກັນນີ້, ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການ ແລະ ສັງຄົມ ກໍໄດ້ຮ່ວມຮັບປະທານອາຫານທ່ຽງ ນໍານັກກິລາລົດຖີບທິມຊາດລາວ ທີ່ໄປເກັບຕົວຝຶກຊ້ອມທີແຂວງຊຽງໃຫມ່ ປະເທດໄທ ​ໂອ​ກາດ​ດັ່ງ​ກ່າວທ່ານລັດ​ຖະ​ມົນ​ຕີ ກະ​ຊວງ​ແຮງ​ງານ, ສະ​ຫວັດ​ດີ​ການ ແລະ ສັງ​ຄົມ ກໍໄດ້ໂອ້ລົມ ແລະ ໃຫ້ກໍາລັງໃຈແກ່ນັກກິລາ ກ່ອນ​ຈະເດີນທາງກັບປະເທດລາວ.

     ສຳລັບທີມນັກລົດຖີບທີມຊາດລາວ ໄດ້ໄປເກັບໂຕຝຶກຊ້ອມ ທີ່ແຂວງຊຽງໃຫມ່ ປະເທດໄທ ມາ​ຕັ້ງແຕ່ວັນທີ່ 1 ກັນ​ຍາ ຜ່ານ​ມາ ຈົນມາເຖິງປະຈຸບັນ ເປັນເວລາເກືອບ 3 ເດືອນ ໂດຍການຝຶກຊ້ອມ​ຂອງ​ນັກ​ກິ​ລາແມ່ນມີ​ຄ​ວາມພ້ອມເກືອບ ​ຮ້ອຍ​ເປີ​ເຊັນ ເວລາທີ່ເຫຼືອ ນັກກິລາກໍຈະເດີນທາງກັບມາຝຶກຊ້ອມຕໍ່ ທີ່ປະເທດລາວ ເພື່ອກຽມຕົວເຂົ້າຮ່ວມການແຂ່ງຂັນ ຊີເກມ ຄັ້ງທີ່ XXX ທີ່ປະເທດຟີລິບປິນ.

ໂດຍ ປາກກາດຳ