ລາຍລະອຽດຂ່າວ
​ແບ່ງ​ສາຍ​ແລ້ວ ບານ​ສົ່ງ​ຫາດ​ຊາຍ ທົ່ວ​ປະ​ເທດ ຊີງ​ຂັນ​ປະ​ທານ ສບ​ລ 2019
ຂຽນເມື່ອ: 12/11/2019 15:11 | ໂດຍ: ເພຣເມັກເກີ | ອ່ານ: 152 ຄັ້ງ

          ການ​ແຂ່ງ​ຂັນກິ​ລາ​ບານ​ສົ່ງ​ຫາດ​ຊາຍ ປະ​ເພດ​ຍິງ-ຊາຍ ລາຍ​ການ​ລະ​ດັບ​ທົ່ວ​ປະ​ເທດ ຊີງ​ຂັນ​ທ່ານ​ປະ​ທານ​ສະ​ຫະ​ພັນ​ບານ​ສົ່ງ​ແຫ່ງ​ຊາດ​ລາວ ຫຼື ສ​ບ​ລ ປະ​ຈຳ​ປີ 2019 ເພື່ອ​ເປັນ​ການ​ສ້າງ​ຂະ​ບວນ​ການ​ສະ​ເຫຼີມ​ສະ​ຫຼອງວັນ​ຊາດ​ທີ 2 ທັນ​ວາ ຄົບ​ຮອບ 44 ປີ ແລະ ສົ່ງ​ເສີມ​ນັກ​ກິ​ລາ​ຮຸ່ນ​ສືບ​ທອດ​ກ້າວ​ສູ່​ທີມ​ຊາດ ໂດຍ​ທີມ​ຊາຍ​ມີ 12 ທີມ​ ​ແບ່ງ​ອອກ​ເປັນ 4 ກຸ່ມ ແລະ ທີມ​ຍິງມີ 7 ທີມ ແບ່ງ​ອອກ​ເປັນ 2 ກຸ່ມ ຈະ​ເລີ່ມ​ແຂ່ງ​ຂັນ​ໃນ​ລະ​ຫວ່າງວັນ​ທີ 15-17 ພະ​ຈິກນີ້ ທີ່​ສະ​ໜາມ​ບານ​ສົ່ງ ມະ​ຫາ​ວິ​ທະ​ຍາ​ໄລ​ແຫ່ງ​ຊາດ ຫຼື ມ​ຊ (ວິ​ທະ​ຍາ​ເຂດ​ດົງ​ໂດກ) ເມືອງ​ໄຊ​ທາ​ນີ ນະ​ຄອນ​ຫຼວງວຽງ​ຈັນ.

        ໄດ້ມີພິ​ທີ​ຈັບ​ສະ​ຫຼາກ​ການ​ແຂ່ງ​ຂັນ​ກິ​ລາບານ​ສົ່ງ​ຫາດ​ຊາຍ ປະ​ເພດ​ຍິງ-ຊາຍ ມື້ນີ້​ວັນ​ທີ 12 ພະ​ຈິກ ທີ່​ຫ້ອງ​ການ​ສະ​ຫະ​ພັນ​ບານ​ສົ່ງ​ແຫ່ງ​ຊາດ​ລາວ (ຄະ​ນະ​ກຳ​ມະ​ການ​ໂອ​ແລມ​ປິກ​ແຫ່ງ​ຊາດ​ລາວ) ໃຫ້​ກຽດ​ເຂົ້າ​ຮ່ວມ​ເປັນ​ສັກ​ຂີ​ພິ​ຍານ​ຂອງ​ທ່ານ ປີ​ໄຊ ​ສຸ​ວັນ​ໄຊ ຮອງ​ປະ​ທານ​ສະ​ຫະ​ພັນ​ບານ​ສົ່ງ​ແຫ່ງ​ຊາດ​ລາວ ພ້ອມ​ດ້ວຍ​ບັນ​ດາ​ຄະ​ນະ​ບໍ​ລິ​ຫານ​ງານ​ ສບ​ລ, ຄະ​ນະ​ນຳ​ແຕ່​ລະ​ພາ​ກ​ສ່ວນ ແລະ ຄູ​ຝຶກ​ເຂົ້າ​ຮ່ວມ.

        ຜົນຂອງການຈັບສະຫຼາກແບ່ງສາຍມີດັ່ງນີ້

        ສຳ​ລັບ​ທີມ​ຊາຍ ກຸ່ມ ເອ ປະ​ກອບ​ມີ ລາວ​ເດີນ​ອາ​ກາດ 1, ອິນ​ທະ​ສອນ ວີ​ຊີ ແລະ ໄຊ​ຍະ​ວົງ ວີ​ຊີ ສ່ວນ ກຸ່ມ ບີ ມີ ລາວ​ເດີນ​ອາ​ກາດ 2, ທະ​ນະ​ກອນ ມິ​ນິ​ມາກ ແລະ ສະ​ໂມ​ສອນ ຊາວ​ໜຸ່ມ​ຄະ​ນະ​ສະ​ຖາ​ປັດ ມ​ຊ ກຸ່ມ ຊີ ລາວ​ເດີນ​ອາ​ກາດ 3, ຕາດ​ຖ້ຳ​ເສືອ 2, ເຄ​ທີ​ດີ ວີ​ຊີ ແລະ ກຸ່ມ ດີ ມີ ຕາດ​ຖ້ຳ​ເສືອ 1, ແພດ​ສາດ ແລະ ຟ​ຣີ​ແມນ.

ໂດຍ ປາກກາດຳ