ລາຍລະອຽດຂ່າວ
ປະຊາຊົນ​ ​ຊະນະ ​ພະນັກງານ 4-3 ແຂ່ງ​ຂັນ​​ຕີຄີ ​ບຸນ​ທາດ​ຫຼວງ ປະຈຳປີ 2019
ຂຽນເມື່ອ: 11/11/2019 17:11 | ໂດຍ: ເພຣເມັກເກີ | ອ່ານ: 188 ຄັ້ງ

      ທີມ​ຕີ​ຄີ​ຝ່າຍປະຊາຊົນ ປີນີ້​ຍັງ​ມາ​ແຮງ​ຄື​ປີ​ຜ່ານ​ມາ ຫຼັງ​ຈາກ​ໄລ່​ເອົາ​ຊະນະ ຝ່າ​ຍພະນັກງານ ​ໄປ​ແບບ​ຫວຸດ​ຫວິດ 4-3 ລູກ ໃນການ​ແຂ່ງຂັນ​ກີລາ​ຕີຄີ ​ໃນງານ​ບຸນ​ນະມັດສະການ​ພຣະທາດຫຼວງວຽງ​ຈັນ ປະ​ຈຳ​ປີ 2019.

    ງານບຸນ​ນະມັດສະການ​ພຣະທາດຫຼວງວຽງຈັນ ​ໃນ​ທຸກໆ​ປີ​ພໍ​ມາ​ເຖິງ​ມື້​ສຸດ​ທ້າຍ ຄື​ມື້​ຂຶ້ນ 15 ຄໍ່າ ​ເດືອນ 12 ລາວ ​​(ວັນ​ທີ  11 ພະຈິກ 2019) ໃນ​ຕອນ​ເຊົ້າ​​ເປັນ​ການ​ຕັກບາດ ສ່ວນ​ຕອນ​ບ່າຍ​ເປັນ​ການ​ແຂ່ງຂັນ​ຕີຄີ​ ​ໃຫ້​ກຽດ​ເຂົ້າ​ຮ່ວມ ​ແລະ ​ເຂ່ຍ​ລູກ​ຄີ ​ໂດຍທ່ານ ສີ​ຫຸນ ສິດ​ທິ​ລື​ໄຊ ຮອງ​ເຈົ້າ​ຄອງ​ນະ​ຄອນ​ຫຼວງວຽງ​ຈັນ, ​ມີ​ການ​ນໍາ​ພັກ-ລັດ ພ້ອມ​ດ້ວຍມວນ​ຊົນ​ຊາວ​ນະຄອນຫຼວງ​ວຽງຈັນ ​ແລະ ຊາວ​ຕ່າງປະ​ເທດ​ເຂົ້າ​ຮ່ວມ​ຊົນ-ຮ່ວມ​ເຊຍຢ່າງ​ຫຼວງ​ຫຼາຍ.

    ສໍາລັບການ​ແຂ່ງຂັນ​ກິລາ​ຕີຄີຄັ້ງ​ນີ້ ໄດ້ສ້າງ​ຄວາມ​ປະ​ທັບ​ໃຈ​ໃຫ້​ແກ່ມ​ວນຊົນ ກໍ່​ຄື​ຜູ້​ເຂົ້າ​ຊົມ ເປັນ​ການ​ພົບ​ກັນ​ລະ​ຫວ່າງ ທີມ​ຝ່າຍ​ປະຊາຊົນ ​ແລະ ​ທີມຝ່າຍ​ພະນັກງານ ຜ່ານ​ການ​ແຂ່ງ​ຂັນ ​ຜົນປະ​ກົດ​ວ່າ​ເປັນ ​ທັງ​ສອງ​ທີມຕ່າງ​ຝ່າຍ​ຕ່າງ​ສູ້​ກັນ​​ສຸດ​ຄວາມ​ສາມາດ ຜັດປ່ຽນ​ກັນ​ບຸກ ​ແລະ ປ່ຽນ​ກັບ​ຮັບ ​ແຕ່​ສຸດ​ທ້າຍ​ທີມ​ຝ່າຍປະຊາຊົນ ​ແຂງ​ແກ່ນ ແລະ ຕີ​ໄດ້​ຄົມກວ່າ​ສາມາດ​ເອົາ​ຊະນະ ຝ່າຍ​ພະນັກງານ ​ໄປ​​ແບບ​ຫວຸດ​ຫວິດ 4-3 ລູກ ສາ​ມາດ​ໄຂ​ປິດ​ສະ​ໜາ​ຄຳ​ທຳ​ນ່າຍ​ຂອງ​ປີນີ້ ​ຖ້າ​ຫາກ​ປະ​ຊາຊົນ​ສາ​ມາດ​ເອົາ​ຊະ​ນະ ຕາມ​ຄຳ​ທຳ​ນ່າຍ​ແມ່ນບ້ານ​ເມືອງຈະ​ມີ​ຄວາມ​ຢູ່​ເຢັນ​ເປັນ​ສຸກ ບໍ່​ອຶດ​ເຂົ້າ​ ບໍ່​ອຶດ​ປາ ​ເຂົ້າ​ເຕັມ​ນາ​ ປາ​ເຕັມ​ໜອງ ​ເສດຖະກິດ​ຈະ​ຮຸ່ງ​ເຮືອງ ບ້ານ​ເມືອງ​ມີ​ຄວາມ​ສະຫງົບ​ປອດ​ໄພ ການ​ທໍາ​ມາ​ຫາ​ກິນ​ມີ​ແຕ່​ຄວາມ​ລາບ​ລື້​ນ ​ແລະ ບ້ານ​ເມືອງ​ຈະ​ມີ​ແຕ່​ຄວາມ​ຈະ​ເລີ​ນຮຸ່ງ​ເຮືອງ​ສີວິ​ໄລ​ຂຶ້ນ​ໄປ​ເລື້ອຍໆ.

    ກ່ອນ​ຈະ​ມີ​ການ​ແຂ່ງຂັນ​ຕີຄີ​ແຕ່ລະ​ປີ​ນັ້ນ ບັນດາ​ເຖົ້າ​ແກ່​ແນວ​ໂຮມ ອາຍາ, ​ອາຈານ​ແມ່ນ​ໄດ້​ພ້ອມ​ກັນ​ຈັດ​​ໃຫ້​ມີ​ທາງ​ຮີດຄອງ​ປະ​ເພນີ​ຄື​ກັບ​ທຸກປີ ​ເພື່ອ​ອັນ​ເຊີນ​ລູກ​ຄີ​ລົງ​ມາ​ແລ້ວ​ແຫ່​ອ້ອມ​ກົມ​ມະ​ລຽນ​ພຣະທາດ​ຫຼວງ 3 ຮອບ ຈາກ​ນັ້ນ​ຈຶ່ງ​ມີ​ການ​ແຂ່ງຂັນ​ຕີຄີ ​ເມື່ອ​ແຂ່ງຂັນ​ສໍາ​ເລັດ​ແລ້ວ​ກກໍ່ໄດ້​ແຫ່​ລູກ​ຄີ​ກັບ​ຄືນ ​ແລະ ອັນ​ເຊີນ​ລູກ​ຄີ​ໄວ້​ບ່ອນ​ເກົ່າ ​ເຊິ່ງ​ໄດ້​ບົ່ງ​ບອກ​ເຖິງ​ຄວາມ​ສັກສິດ ຕາມ​ການ​ເຊື່ອ​ຖື​ກັນ​ມາ​ແຕ່​ບູຮານ​ນະ​ການ.

ພາບໂດຍ: ເກດ ຂ່າວສານປະເທດລາວ

ໂດຍ ປາກກາດຳ