ລາຍລະອຽດຂ່າວ
ເທຄວັນໂດ ຊີງຂັນເອກອັກຄະລັດຖະທູດ ສ ເກົາຫຼີ ສະໂມສອນ ລ້ານ​ຊ້າງ ຄອງ​ແຊ້ມ 5 ປີ​ຊ້ອນ
ຂຽນເມື່ອ: 11/11/2019 15:11 | ໂດຍ: ເພຣເມັກເກີ | ອ່ານ: 134 ຄັ້ງ

     ສະ​ໂມ​ສອນ ເທ​ຄວັນ​ໂດ ລ້ານ​ຊ້າງ ​ກວາດ 18 ຫຼຽນ​ຄຳ ສາ​ມາດ​ປ້ອງ​ກັນ​ແຊ້ມ​ໄວ້​ໄດ້​ 5 ສະ​ໄໝ​ຕິດ​ຕໍ່​ກັນ ໃນການ​ແຂ່ງ​ຂັນ​ກິ​ລາ​ເທຄວັນໂດຮຸ່ນ​ອາ​ນຸ​ຊົນ, ເຍົາ​ວະ​ຊົນ ແລະ ຮຸ່ນ​ຊາວ​ໜຸ່ມ  ທົ່ວ​ປະ​ເທດ ຊີງຂັນທ່ານເອກອັກຄະລັດຖະທູດ ສ ເກົາຫຼີ ປະຈຳ ສປປ ລາວ  ຄັ້ງ​ທີ V ປະ​ຈຳ​ປີ 2019 ເພື່ອ​ເປັນ​ການ​ເລືອກ​ເຟັ້ນ​ນັກ​ກິ​ລາ​ທີມ​ຊາດ ກຽມ​ສົ່ງ​ຮ່ວມ​ລ່າ​ຫຼຽນ​ຄຳ ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ລະ​ຫວ່າງວັນ​ທີ 30 ພະ​ຈິກ ຫາ 12 ທັນ​ວາ 2019. 

   ການ​ແຂ່ງ​ຂັນ​ຄັ້ງ​ນີ້ ຈັດ​ຂຶ້ນ​ພາຍ​ໃນ 2 ວັນ ລະ​ຫວ່າງວັນ​ທີ 9-10 ພະ​ຈິກ ຜ່ານ​ມາ ທີ່​ສູນ​ການ​ຄ້າ ລາວ-ໄອ​ເຕັກ ໂດຍການ​ໃຫ້​ກຽດ​ເຂົ້າ​ຮ່ວມມອບ​ລາງວັນ​ຂອງ​ທ່ານ ສົມ​ພູ ພົງ​ສາ ຜູ້​ຊ່ວຍ​ລັດ​ຖະ​ມົນ​ຕີ ກະ​ຊວງ​ສຶກ​ສາ​ທິ​ການ ແລະ ກິ​ລາ ທັງ​ເປັນຮອງ​ປະ​ທານ ແລະ ເລ​ຂາ​ທິ​ການ​ຄະ​ນະ​ກຳ​ມະ​ການ​ໂອ​ແລມ​ປິກ​ແຫ່ງ​ຊາດ​ລາວ, ທ່ານ ຊິນ ຊອງ ຊຸນ ເອກ​ອັກ​ຄະ​ລັດ​ຖະ​ທູດ ສ ເກົາ​ຫຼີ ປະ​ຈຳ ສ​ປ​ປ ລາວ ແລະ ທ່ານ ແສງ​ພອນ ພົນ​ອາ​ມາດ ຫົວ​ໜ້າ​ກົມ​ກິ​ລາ​ລະ​ດັບ​ສູງ ພ້ອມ​ດ້ວຍ​ບັນ​ດາ​ຄະ​ນ​ະ​ນຳ, ຄູ​ຝຶກ ແລະ ນັກ​ກິ​ລາ, ພະ​ນັກ​ງານ​ທີ່​ກ່ຽວ​ຂ້ອງ ຕະ​ຫຼອດ​ຮອດກອງ​ເຊຍ​ເຂົ້າ​ຮ່ວມ.

      ລາຍ​ການນີ້ ເປັນ​ການ​ຮ່ວມ​ມື​ກັນ​ລະ​ຫວ່າງ ສະຫະພັນເທຄວັນໂດແຫ່ງຊາດລາວ ແລະ ສະຖານທູດ ສ ເກົາຫຼີ ປະຈໍາ ສປປ ລາວ ໄດ້ຈັດການແຂ່ງຂັນລາຍການນີ້ຂຶ້ນມາເປັນຄັ້ງທີ V ນັບຕັ້ງແຕ່ປີ 2014, ໃນ​ນັ້ນ ບໍ່ໄດ້ຈັດປີ 2017 ເພື່ອ​ເປັນ​ການ​ສົ່ງ​ເສີມການພັດທະນາວົງການເທຄວັນໂດລາວ ກ້າວຂຶ້ນໄປເລື້ອຍໆ ​ແນ​ໃສ່​ສ້າງສາຍພົວພັນລະຫວ່າງ 2 ປະເທດ ສປປ ລາວ ແລະ ສ ເກົາຫຼີ ໃຫ້ມີຄວາມໜ້ຽວແໜ້ນ​​ຢ່າງ​ເຕີບ​ໃຫ​ຍ່​ຂະ​ຫ​ຍາຍ​ຕົວ ​ພ້ອມ​ທັງ​ເປັນການ​ຄັດ​ເລືອກ​ນັກ​ກິ​ລາ​ທີມ​ຊາດ ກຽມ​ສົ່ງ​ເຂົ້າ​ຮ່ວມ ຊີ​ເກມ ທີ່​ປະ​ເທດ​ຟິ​ລິບ​ປິນ ​ຈະ​ຈັດ​ຂຶ້ນ ໃນ​ທ້າຍ​ປີນີ້ ໂດຍມີນັກ​ກິ​ລາ ຈຳ​ນວນ 350 ຄົນ ຈາກ 22 ສະໂມສອນ ໃນຂອບເຂດທົ່ວປະເທດ ​ສົ່ງ​ຄະ​ນະ​ນຳ, ຄູ​ຝຶກ ແລະ ນັກ​ກິ​ລາ​ເຂົ້າ​ຮ່ວມ​ແຂ່ງ​ຂັນ.

ລາຍການດັ່ງ​ກ່າວ, ມີການ​ຊີງ​ໄຊ​ກັນ​ທັງ​ໝົດ 6 ຮຸ່ນ ຄື: 8, 10, 12, 15, 17 ແລະ ຮຸ່ນທົ່ວໄປ ໂດຍມີການແຂ່ງຂັນທັງປະເພດຕໍ່ສູ້ ແລະ ປະເພດຟ້ອນປຸມເຊ ລວມລາຍການແຂ່ງຂັນທັງໝົດແມ່ນ 136 ລາຍການ ພິເສດຈະມີລາຍການສໍາລັບມືໃໝ່ ແລະ ມີນັກກິລາຈາກຕ່າງແຂວງເຖິງ 7 ແຂວງປະກອບມີ: ແຂວງບໍ່ແກ້ວ, ຫຼວງພະບາງ, ຊຽງຂວາງ, ອຸດົມໄຊ, ບໍລິຄໍາໄຊ, ຄໍາມ່ວນ ແລະ ຈໍາປາສັກ ສ່ວນລາງວັນຊະນະເລີດ, ອັນດັບ 2 ແລະ ອັນດັບ 3 ຈະໄດ້ຫຼຽນ ( ຄໍາ, ເງິນ ແລະ ທອງ ຕາມລໍາດັບ ) ພ້ອມໃບຢັ້ງຢືນສະຖິຕິ. ນອກນັ້ນ, ນັກ​ກິ​ລາ​ທີ່​ໄດ້​ຊະ​ນະ​ເລີດ​ກໍ​ໄດ້​ມີ​ການສະ​ສົມ​ຄະ​ແນນ ຜູ້ທີ່​ໄດ້​ຄະ​ແນນສູງສຸດອັນດັບ 1, 2, 3 ​​ໄດ້​ຄອງຂັນລາງວັນນັກ​ກິລາດີເດັ່ນຕ່າງໆ ​​ໄປ​ຄອງ.

      ຜ່ານ​ການ​ແຂ່ງ​ຂັນ​ໃນ​ໄລ​ຍະ 2 ວັນ​ດັ່ງ​ກ່າວ ຜົນ​ປະ​ກົດ​ວ່າ ນັກ​ກິ​ລາ​ເທ​ຄັວນ​ໂດ ອາ​ນຸ​ຊົນ-ເຍົາ​ວະ​ຊົນ ແລະ ຊາວ​ໜຸ່ມ​ຂອງ​ສະ​ໂມ​ສອນ ລ້ານ​ຊ້າງ ຍັງ​ສາ​ມາດ​ຮັກ​ສາ​ມາດ​ຕະ​ຖານ​ການ​ເປັນ 1 ຂອງວົງ​ການ​ເທ​ຄວັນ​ໂດ​ລາວ ສາ​ມາດກວາດ​ໄດ້ 18 ຫຼຽນ​ຄຳ, 8 ຫຼຽນ​ເງິນ ແລະ 12 ຫຼຽນ​ທອງ ຄອງ​ເຈົ້າ​ຫຼຽນ​ຄຳ ແລະ ຂັນ​ຊະ​ນະ​ເລີດ 5 ສະ​ໄໝ​ຕິດ​ຕໍ່​ກັນ, ອັນ​ດັບ​ທີ 2 ສະ​ໂມ​ສອນ ຕະ​ວັນ ຍາດ​ໄດ້ 12 ຫຼຽນ​ຄຳ, 11 ຫຼຽນ​ເງິນ ແລະ 17 ຫຼຽນ​ທອງ, ທີ 3 ສະ​ໂມ​ສອນ ໂຊກ​ໄຊ ​ໄດ້ 6 ຫຼຽນ​ຄຳ ແລະ 4 ຫຼຽນ​ທອງ, ທີ 4 ສະ​ໂມ​ສອນ ມາ​ສ​ເຕີ​ເລ້ ຍາດ​ໄດ້ 5 ຫຼຽນ​ຄຳ ແລະ 7 ຫຼຽນ​ເງິນ ແລະ ທີ 5 ແຂວງ​ຊຽງ​ຂວາງ ຍາດ​ໄດ້ 5 ຫຼຽນ​ຄຳ, 5 ຫຼຽນ​ເງິນ ແລະ 8​ໄດ້ 18 ຫຼຽນ​ຄຳ, 8 ຫຼຽນ​ເງິນ ແລະ 12 ຫຼຽນ​ທອງ​ໄດ້ 18 ຫຼຽນ​ຄຳ, 8 ຫຼຽນ​ເງິນ ແລະ 12 ຫຼຽນ​ທອງ ຫຼຽນ​ທອງ

ໂດຍ ປາກກາດຳ

ພາບຈາກ: ສະໂມສອນລ້ານຊ້າງ