ລາຍລະອຽດຂ່າວ
ເປ​ຕັງ​ຊີງ​ຂັນປະ​ທານ​ຕຸ່ນ​ເວີ​ຣີ ຄັ້ງ​ທີ lll ສະ​ຫຼອງວັນຊາດ ​ຄົບ​ຮອບ 44 ປີຊີງຄູ່ຊີງແຊ້ມຊະນະກັນແບບວຸດວິດ
ຂຽນເມື່ອ: 11/11/2019 15:11 | ໂດຍ: ເພຣເມັກເກີ | ອ່ານ: 162 ຄັ້ງ

          ​ທີມ​ນັກ​ກິ​ລາ​ເປ​ຕັງສະ​ໂມ​ສອນ ວີເອັດ​ ປາກ​ແຮດ ຈາກ​ເມືອງ​ນາ​ຊາຍ​ທອງ ໄລ່​ເອົາ​ຊະ​ນະ ສະ​ໂມ​ສອນ ພອນ​ສະ​ຫວັນ ຂຸດ​ຄົ້ນ​ບໍ່​ແຮ ໄປ​ແບບ​ຫວຸດ​ຫວິດ 11-9 ຄະ​ແນນ ຄອງ​ແຊ້ມ​ການ​ແຂ່ງ​ຂັນ​ກິ​ລາ​ເປ​ຕັງ ອ້ອມ​ຂ້າງ ນະ​ຄອນ​ຫຼວງວຽງ​ຈັນ ຊີງ​ຂັນ​ປະ​ທານ​ສະ​ໂມ​ສອນ​ເປ​ຕັງ ຕຸ່ນ​ຈີ​ເວີ​ຣີ ຄັ້ງ​ທີ lll ປະ​ຈຳ​ປີ 2019 ເພື່ອ​ສ້າງ​ຂະ​ບວນ​ການ​ສະ​ເຫຼີມ​ສະ​ຫຼອງວັນ​ຊາດ​ທີ 2 ທັນ​ວາ ຄົບ​ຮອບ 44 ປີ ໄປ​ຄອງ ຢ່າງ​ຟົດ​ຟື້ນ.

          ການ​ແຂ່ງ​ຂັນ​ຄັ້ງ​ນີ້ ຊີງ​ເງິນ​ລາງວັນ​ລວມ 8 ລ້ານ​ກີບ ຈັດ​ຂຶ້ນ ລະ​ຫວ່າງວັນ​ທີ 9-10 ພະ​ຈິກ ຜ່ານ​ມາ ທີ່​ສະ​ໜາມ​ເປ​ຕັງ ສະ​ໂມ​ສອນ​ດັ່ງ​ກ່າວ ບ້ານ​ທົ່ງ​ຂັນ​ຄຳ ເມືອງ​ຈັນ​ທະ​ບູລີ ນະ​ຄອນ​ຫຼວງວຽງ​ຈັນ ໂດຍ​ໃຫ້​ກຽດ​ເຂົ້າ​ຮ່ວມ ແລະ ມອບ​ລາງວັນ​ຂອງ​ທ່ານ ຄຳ​ເກີດ ຟອງ​ຊາ​ນຸ​ວົງ ປະ​ທານ​ສະ​ຫະ​ພັນ​ເປ​ຕັງ ນະ​ຄອນ​ຫຼວງວຽງ​ຈັນ ແລະ ທ່ານ ວັນ​ສີ ສີ​ໄສ​ແກ້ວ ປະ​ທານ​ສະ​ໂມ​ສອນ​ເປ​ຕັງ ຕຸ່ນ​ຈິ​ເວ​ີ​ຣີ ທັງ​ເປັນ​ເຈົ້າ​ຂອງ​ຮ້ານ​ຂາຍ​ຄຳ ຕຸ່ນ​ຈິ​ເວີ​ຣີ, ​ມີ​ບັນ​ດາຄະ​ນະ​ນຳ​ແຕ່​ລະ​ພາກ​ສ່ວນ, ຄູ​ຝຶກ ແລະ ນັກ​ກິ​ລາ ຕະ​ຫຼອດ​ຮອດ​ກອງ​ເຊຍອ້ອມ​ຂ້າງ​ນະ​ຄອນ​ຫຼວງວຽງ​ຈັນ ແລະ ຈາກ​ປະ​ເທ​ດ​ເພື່ອນ​ບ້ານ (ໄທ) ​ເຂົ້າ​ຮ່ວມ​ຢ່າງ​ຫຼວງ​ຫຼາຍ.

          ໂອ​ກາດນີ້, ທ່ານ ວັນ​ສີ ສີ​ໄສ​ແກ້ວ ກ່າວ​ວ່າ: ການ​ຈັດ​ການ​ແຂ່ງ​ຂັນ​ຄັ້ງ​ນີ້ ມີ​ຈຸດ​ປະ​ສົງ​ຫຼັກ ກໍ​ເພື່ອ​ເປັນ​ສົ່ງ​ເສີມ​ນັກ​ກິ​ລາ​ເປ​ຕັງ​ພາຍ​ໃນ ນະ​ຄອນ​ຫຼວງວຽງ​ຈັນ ໄດ້​ມີ​ການ​ເຄື່ອນ​ໄຫວ​ແຂ່ງ​ຂັນ​ກິ​ລາ​ດັ່ງ​ກ່າວ ເພື່ອ​ພັດ​ທະ​ນາ​ຕົນ​ເອງ ກ້າວ​ສູ່​ການ​ເປັນ​ນັກ​ກິ​ລາ​ເປ​ຕັງ​ທີມ​ຊາດ​ໃນ​ຕໍ່​ໜ້າ ເວົ້າ​ລວມ​, ເວົ້າ​ສະ​ເພາະ​ແມ່ນ​ເປັນ​ການ​ສົ່ງ​ນັກ​ກິ​ລາ​ເປ​ຕັງ​ຮຸ່ນ​ສື​ບ​ທອດ​ພາຍ​ໃນ​ນະ​ຄອນ​ຫຼວງ ສາ​ມາດ​ກ້າວ​ຂຶ້ນ​ໄປ​ທົດ​ແທນ​ນັກ​ກິ​ລາ​ນະຄອນ​ຫຼວງ ເຂົ້າ​ຮ່ວມ​ລ່າ​ຫຼຽນ​ຄຳ ງານ​ກິ​ລາແຫ່ງ​ຊາດ ຄັ້ງ​ທີ Xl ທີ່​ແຂວງ​ຊຽງ​ຂວາງ ເປັນ​ເຈົ້າ​ພາບ ໃນ​ຕົ້ນ​ປີ 2020. ນອກ​ຈາກນັ້ນ, ກໍ​ຍັງ​ເປັນ​ການ​ນຳ​ພາ​ຂະ​ບວນ​ການ​ແຂ່ງ​ຂັນ​ດັ່ງ​ກ່າວ​ສ້າງ​ບັນ​ຍາ​ກາດ​ສະ​ເຫຼີມ​ສະ​ຫຼອງ​ວັນ​ຊາດ​ທີ 2 ທັນ​ວາ ຄົບ​ຮອບ 44 ປີ ໃຫ້​ມີ​ບັນ​ຍາ​ກາດ​ຟົດ​ຟື້ນ ແລະ ເບີກ​ບານ​ມ່ວນ​ຊື່ນ​ອີກ​ດ້ວຍ ໂດຍ​ມີ​ບັນ​ດາ​ສະ​ໂມ​ສອນ​ອ້ອມ​ຂ້າງ​ສູນ​ກາງ ນະ​ຄອນ​ຫຼວງວຽງ​ຈັນ ພິ​ເສດ ມີ​ທີມ​ຮ້ານ​ອາ​ຫານມູນ​ບາ​ເດີ​ຊາ​ບູ (ຫຼັກ7) ທີ່​ນຳ​ພາ​ນັກ​ກິ​ລາ​ຈາກ 3 ແຂວງ ກໍ​ຄື ແຂວງ​ອຸ​ດອນ​ທາ​ນີ, ແຂວງ​ສີ​ສະ​ເກດ ແລະ ແຂວງ​ຂອນ​ແກ່ນ ເຂົ້າ​ຮ່ວມ​ຊີງ​ໄຊ ລາຍ​ການນີ້ ມີ​ການ​ກຳ​ນົດ​ເງື່ອນ​ໄຂ​ນັກ​ກິ​ລາ ສຳ​ລັບ​ຜູ້​ທີ່​ຕິດ​ທີມ​ຊາດ ແລະ ກິ​ລາ​ເຂດ ຫ້າມບໍ່​ໃຫ້​ຈັບ​ຄູ່​ກັນ​ລົງ​ສະ​ໜາມ​ແຂ່ງ​ຂັນ.

          ຜ່ານ​ການ​ແຂ່ງ​ຂັນ​ໃນ​ໄລ​ຍະ 2 ວັນ​ຜົນ​ປະ​ກົດ​ວ່າ ຄູ່​ຊີງ​ຊະ​ນະ​ເລີດ ທີມ​ວີ​ເອັດ ປາກ​ແຮກ ໜຶ່ງ​ດຽວ​ຈາກ​ເມືອງ​ນາ​ຊາຍ​ທອງ ກາຍ​ເປັນ​ທີມ​ມ້າ​ມືດ​ໄລ່​ເອົາ​ຊະ​ນະ ທີມ​ພອນ​ສະ​ຫວັນ ຂຸດ​ຄົ້ນ​ບໍ່​ແຮ ໄປ​ແບບ​ຫວຸດ​ຫວິດ 11-9 ຄະ​ແນນ ໄດ້​ແຊ້ມ​ລາຍ​ການ​ດັ່ງ​ກ່າວ ພ້ອມ​ເງິນ​ສົດ 5 ລ້ານ​ກີບ​ໄປ​ຄອງ ສ່ວນ ພອນ​ສະ​ຫວັນ ໄດ້​ພຽງ​ທີ 2 ແລະ ຮັບ​ເງິນ​ລາງວັນ​ໄປ 2 ລ້ານ​ກີບ ຂະ​ນະ​ທີ່​ອັນ​ດັບ​ທີ 3 ຕົກ​ເປັນ​ຂອງ ສະ​ໂມ​ສອນ ເປ​ຕັງ ບ້ານດອນ​ຝ້າຍ ເມືອງ​ຫາດ​ຊາຍ​ຟອ​ງ ໄດ້​ຮັບ​ເງິນ​ສົດ​ 1 ລ້ານ​ກີບ ໄປ​ຄອງ.

ໂດຍ ປາກກາດຳ