ລາຍລະອຽດຂ່າວ
ໄດ້ 4 ທີມສຸດທ້າຍແລ້ວ ລາຍການ ຂັນພອນທະວີ ຄັບ 2019
ຂຽນເມື່ອ: 07/11/2019 20:11 | ໂດຍ: ເພຣເມັກເກີ | ອ່ານ: 117 ຄັ້ງ

      ຫຼັງຈາກດຳເນີນການແຂ່ງຂັນມາແຕ່ວັນທີ 4 ຕຸລາ 2019 ປັດຈຸບັນ ໄດ້ 4 ທີມຜ່ານເຂົ້າໄປຕັດເຊືອກກັນໃນຮອບຮອງຊະນະເລີດ ເປັນທີ່ຮຽບຮ້ອຍແລ້ວ ການແຂ່ງຂັນເຕະບານ 8 ຄົນ ຊີງຂັນສະໜາມກິລາເຕະບານຫຍ້າທຽມ ພອນທະວີ ປະຈຳປີ 2019 ຫຼື ລາຍການ ພອນທະວີ ຄັບ 2019 ທີ່ເມືອງທ່າແຂກ ແຂວງຄຳມ່ວນ ເປັນການພົບກັນລະ ທີມເດີຄ໋ອບ ທ່າແຂກ ພົບກັບ ທີມຂຸນແຜນ ແລະ ທີມຊ້າງສີໂຄດ ພົບກັບ ທີມແກ້ວມະນີເພັດ.

          ຕາມການລາຍງານຂອງທ່ານ ວິໄລສັກ ຈຽງສະກຸນ ອະດີດນັກກິລາເຕະບານສະໂມສອນ ທະນາຄານແຫ່ງ ສປປ ລາວ ທັງເປັນປະທານບໍລິສັດ ພອນທະວີ ຄອມພິວເຕີ ແລະ ເຈົ້າຂອງສະໜາມເຕະບານຫຍ້າທ່ຽມ ພອນທະວີ ແຈ້ງໃຫ້ຊາບວ່າ ເພື່ອເປັນການສ້າງຂະບວນການສະເຫຼີມສະຫຼອງການເປີດສະໜາມກິລາເຕະບານຫຍ້າທຽມ ພອນທະວີ ຄືນໃໝ່ ພາຍຫຼັງທີ່ໄດ້ສຳເລັດການປັບປຸງກໍ່ສ້າງ ເມື່ອບໍ່ດົນຜ່ານມານີ້ ພ້ອມທັງຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 44 ປີ ແລະ ສົ່ງເສີມນັກກິລາເຕະບານພາຍໃນແຂວງໄດ້ມີໂອກາດເຄື່ອນໄຫວກິລາທີ່ຕົນມັກ ກຽມເຂົ້າຮ່ວມຄັດເລືອກຕິດທີມແຂວງ ຊຸດຈະປ້ອງກັນແຊ໋ມຫຼຽນຄຳ ງານມະຫາກຳກິລາແຫ່ງຊາດ ຄັ້ງທີ Xl ທີ່ແຂວງຊຽງຂວາງ ຮັບກຽດເປັນເຈົ້າພາບ ໃນຕົ້ນປິ 2020 ນີ້. ດັ່ງນັ້ນ, ສະໜາມກິລາພອນທະວີ ພວກເຮົາ ຈຶ່ງໄດ້ຈັດການແຂ່ງຂັນໃນຄັ້ງນີ້ຂຶ້ນ ໂດຍມີບັນດາພາກສ່ວນສົ່ງນັກກິລາເຂົ້າຮ່ວມເຖິງ 32 ທີມ ຈັດແບ່ງອອກເປັນ 8 ກຸ່ມ ແຕ່ລະກຸ່ມມີ 4 ທີມ ແລະ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ການແຂ່ງຂັນແມ່ນໄດ້ດຳເນີນມາແຕ່ວັນທີ 4 ຕຸລາ ຜ່ານມາ ແລະ ຈະສຳເລັດໃນວັນທີ 8 ພະຈິກນີ້ ໂດຍກຳນົດເງື່ອນໄຂນັກກິລາ ສຳລັບນັກກິລາຕ່າງປະເທດ ແລະ ນັກກິລາລາວຜູ້ທີ່ຕິດລະດັບທີມຊາດ, ລາຍການ ເປບຊີ ລາວພຣີເມຍລີກ ແລະ ນັກກິລາແຂວງ ແມ່ນອານຸຍາດໃຫ້ຕົ້ນສັງກັດໄດ້ທີມ 1 ໄດ້ພຽງ 2 ຄົນ ເທົ່ານັ້ນ ສ່ວນທີມທີ່ໄດ້ສາມາດຜ່ານເຂົ້າຮອບ 4 ທີມສຸດທ້າຍ ແລະ ແຂ່ງຂັນກັນໃນວັນທີ 7 ພະຈິກນີ້ ປະກອບມີ ທີມເດີຄ໋ອບ ທ່າແຂກ ພົບກັບ ທີມຂຸນແຜນ ແລະ ທີມຊ້າງສີໂຄດ ພົບກັບ ທີມແກ້ວມະນີເພັດ ຂະນະທີ່ຜົນການແຂ່ງຂັນທີມໃດຈະໄດ້ແຊ໋ມໄປຄອງນັ້ນ ຈະຂໍລາຍງານໃຫ້ຊາບຕື່ມອີກ.

          ການແຂ່ງຂັນລາຍການດັ່ງກ່າວ ທີມທີ່ເຂົ້າຮ່ວມແຂ່ງຂັນແມ່ນເສຍຄ່າສະມັກທີມລະ 4 ແສນກີບ, ໃນນັ້ນ ທີມຊະນະເລີດ ແມ່ນຈະໄດ້ຮັບຂັນແຊ໋ມ ພ້ອມເງິນລາງວັນ ຈຳນວນ 2 ລ້ານກີບ, ທີ 2 ຈະໄດ້ຮັບຂັນ ພ້ອມເງິນສົດ 1,5 ລ້ານກີບ, ທີ 3 ຈະໄດ້ຮັບຂັນ ແລະ ເງິນສົດ 1 ລ້ານກີບ ແລະ ທີ 4 ຈະໄດ້ຮັບຂັນ ແລະ ເງິນສົດ ຈຳນວນ 5 ແສນກີບ.

ໂດຍ ປາກກາດຳ

         

ສະໜັບສະໜູນຂ່າວໂດຍ:



ຂ່າວລ່າສຸດ