ລາຍລະອຽດຂ່າວ
ພໍ່-ລູກ ນັກແໝ້ນປືນເອົາໃຈໃສ່ຝຶກຊ້ອມ ຫວັງຈະສ້າງຜົນງານ ໃນລາຍການເລໂວ 4 ປີ 2021
ຂຽນເມື່ອ: 07/11/2019 19:11 | ໂດຍ: ເພຣເມັກເກີ | ອ່ານ: 89 ຄັ້ງ

      2 ພໍ່-ລູກ ທ່ານ ອາໂນໄທ ເມືອງມະນີ ແລະ ທ້າວ ຕົ້ນຄຳ ເມືອງມະນີ ຫຼັງຈາກສ້າງຜົນງານໂດດເດັ່ນໃນການແຂ່ງຂັນຍິງປືນໄອພີເອັດຊີ ທົ່ວປະເທດ ແລະ ລາຍການຊີງແຊ້ມນາໆຊາດ ເລໂວ 3 ຊີງຫຼຽນຄຳ ແລະ ຂັນຂອງພະນະທ່ານປະທານປະເທດ ແຫ່ງ ສປປ ລາວ ເມື່ອບໍ່ດົນມານີ້ ກໍເປີດເຜີຍຈະສືບຕໍ່ພັດທະນາຕົນເອງໄປເລື້ອຍໆ ໂດຍເນັ້ນຖອດຖອນບົດຮຽນ ແລະ ປະສົບການທີ່ໄດ້ມານຳມາຝຶກຝົນຫຼໍ່ຫຼອມຫຼາຍກວ່າເກົ່າ ຫວັງຢາກສ້າງຜົນງານທີ່ດີໃຫ້ແກ່ວົງການກິລາຍິງປືນລາວ ກໍຄື ສ້າງກຽດສັກສີ ແລະ ຊື່ສຽງໃຫ້ແກ່ປະເທດຊາດ ໃນການເຂົ້າຮ່ວມແຂ່ງຂັນລາຍການ ເລໂວ 4 ຊີງແຊ້ມນາໆຊາດ ໃນປີ 2021 ທີ່ສປປ ລາວ ເປັນເຈົ້າພາບ ໂດຍຈະມີນັກກິລາຈາກຫຼາຍທະວີບ ເຂົ້າຮ່ວມຊີງໄຊ.

      ທ່ານ ອາໂນໄທ ເມືອງມະນີກ່າວວ່າ ບໍ່ເສຍແຮງທີ່ໄດ້ທຸ້ມເທທັງເຫື່ອແຮງ ແລະ ກຳລັງຊັບ ສົ່ງເສີມລູກຊາຍເຮັດໃນສິ່ງທີ່ຕົວລາວຮັກ ແລະ ມັກຫຼິ້ນກິລາຄືພໍ່ ຫຼັງຈາກໄດ້ຫ່າງເຫີນກິລາບານເຕະມາດົນ ຈົນສາມາດສ້າງຜົນງານຄວ້າແຊ້ມປະເພດປືນໂປດັກຊັ່ນ ອ໋ອບຕິກ ຮຸ່ນເຍົາວະຊົນ ຫຼື ລາຍການ ຊຸບເປີຈູເນຍ ເລໂວ 3 ຊີງແຊ້ມນາໆຊາດ ເມື່ອບໍ່ດົນມານີ້ ໂດຍມີນັກກິລາ 10 ປະເທດເຂົ້າຮ່ວມ ປະກອບມີ ເຈົ້າພາບ ສປປ ລາວ ສົ່ງນັກກິລາຮ່ວມ  41 ຄົນ, ໄທ 36 ຄົນ, ສປ ຈີນ 49 ຄົນ, ຮົງກົງ 9 ຄົນ, ອິນໂດເນເຊຍ 2 ຄົນ, ກຳປູເຈ້ຍ 3 ຄົນ, ການາດາ 1 ຄົນ, ອົດສະຕາລີ 1 ຄົນ, ລັດເຊຍ 5 ຄົນ ແລະ ອາເມລິກາ 1 ຄົນ ລວມທັງໝົດ 148 ຄົນ ແຂ່ງຂັນ 15 ສະໜາມ ໃນ 6 ລາຍການ ປະກອບມີ ປືນໂອເພັນ Open, ສະແຕນດ໋າດ Standard, ຄາສຊິກ Classic, ຣີໂວເວີ Revover, ໂປດັກຊັນ ອ໋ອບຕິກ Production Optic, ໂປດັກຊັນ Production ແລະ ຂ້າພະເຈົ້າເອງກໍສາມາດຍາດໄດ້ອັນດັບທີ 2 ລາຍການ ຍິງປືນໂປດັກຊັ່ນ ພາຍໃນປະເທດ. 

      ທ່ານ ອາໂນໄທ ເມືອງມະນີ ບອກຕື່ມອີກວ່າ: ຕໍ່ຜົນງານດັ່ງກ່າວ, ກໍເປັນແຮງບັນດານໃຈອີກໜຶ່ງກຳລັງໃຈ ທີ່ຈະເຮັດໃຫ້ພວກເຮົາສອງພໍ່ລູກ ຈະສືບຕໍ່ພັດທະນາຕົນເອງໄປເລື້ອຍໆ ຈົນກວ່າເງື່ອນໄຂ ແລະ ກຳລັງຈະໝົດ ຈະນຳພາລູກຊາຍຊອກຫາປະສົບການໄປເລື້ອຍ ໂດຍສະເພາະເປົ້າ ໝາຍຫຼັກ ໃນປີ 2021 ນີ້ ສປປ ລາວ ຈະໄດ້ຮັບກຽດເປັນເຈົ້າພາບ ຈັດແຂ່ງຂັນຍິງປືນ ໄອພີເອັດຊີ ເລໂວ 4 ເຊິ່ງເປັນລາຍການທີ່ຂ້ອຍເຄີຍສ້າງຜົນງານໄດ້ຫຼຽນທອງ ທີ່ປະເທດໄທ ຜ່ານມາ ແລະ ເປັນລາຍການທີ່ຈະມີນັກກິລາຈາກຫຼາຍທະວີບເຂົ້າຮ່ວມແຂ່ງຂັນ ສະນັ້ນ ຈະຕ້ອງໄດ້ບຸກບືນຂຶ້ນຕື່ມອີກ ໂດຍຈະຊອກຫາລາຍການໃຫຍ່ໆ ຈັດຂຶ້ນທີ່ປະເທດເພື່ອນບ້ານເຂົ້າຮ່ວມແຂ່ງຂັນຖອດຖອນບົດຮຽນໃຫ້ຫຼາຍທີ່ສຸດ.

      ສຳລັບຜົນງານຂອງ 2 ພໍ່-ລູກ ໃນການແຂ່ງຂັນຍິງປືນ ເລໂວ 3 ຊີງຫຼຽນຄຳ ແລະ ຂັນແຊ້ມຂອງພະນະທ່ານປະທານປະເທດ ເມື່ອບໍ່ດົນມານີ້ ສະເພາະປະເພດປືນໂປດັກຊັ່ນ ອ໋ອບຕິກ ທີ່ທ່ານ ອາໂນໄທ ເມືອງມະນີ ລົງແຂ່ງຂັນແມ່ນໄດ້ອັນດັບທີ 2 ສ່ວນ ທີ 1 ທ່ານ ສິງຄຳ ສີປະເສີດ ແລະ ທີ 3 ແມ່ນ ປານ ດວງປະເສີດ ສ່ວນ ທ້າວ ຕົ້ນຄຳ ເມືອງມະນີ ສາມາດຍາດໄດ້ອັນດັບທີ 1 ປະເພດປືນໂປດັກຊັ່ນ ອ໋ອບຕິກ ຮຸ່ນເຍົາວະຊົນ ຫຼື ລາຍການ ຊຸບເປີຈູເນຍ.

ໂດຍ: ປາກກາດຳ

ສະໜັບສະໜູນຂ່າວໂດຍ:



ຂ່າວລ່າສຸດ