ລາຍລະອຽດຂ່າວ
ບານສົ່ງຫາດຊາຍ ແລະ ໃນຮົ່ມ ທົ່ວປະເທດ ມີທີມກຽມເຂົ້າຮ່ວມແຂ່ງຂັນ2019
ຂຽນເມື່ອ: 06/11/2019 17:11 | ໂດຍ: ເພຣເມັກເກີ | ອ່ານ: 93 ຄັ້ງ

      ມາເຖິງປະຈຸບັນໄດ້ມີຫຼາຍພາກສ່ວນແຈ້ງເຈດຈຳນົງເຂົ້າຮ່ວມຊີງໄຊ ໃນການແຂ່ງຂັນບານສົ່ງຫາດຊາຍ ທົ່ວປະເທດ ປະຈຳປີ 2019 ຊີງຂັນປະທານສະຫະພັນບານສົ່ງແຫ່ງຊາດ ເພື່ອສ້າງຂະບວນການສະເຫຼີມສະຫຼອງວັນຊາດທີ 2 ທັນວາ ຄົບຮອບ 44 ປີ ພ້ອມທັງເປັນການເລືອກເຟັ້ນນັກກິລາພອນສະຫວັນດີເດັ່ນຕິດທີມຊາດລາວ ກຽມສົ່ງເຂົ້າຮ່ວມລາຍການລະດັບພາກພື້ນ ແລະ ສາກົນ ໃນຕໍ່ໜ້ານີ້.

      ຕາມການລາຍງານຂອງ ທ່ານ ຈັນສະໝອນ ຜ່ອງຈັນທາ ປະທານສະຫະພັນບານສົ່ງແຫ່ງຊາດລາວ ແຈ້ງໃຫ້ຊາບວ່າ: ພາຍຫຼັງທີ່ໄດ້ສົ່ງບັດເຊີນ ແລະ ແຈ້ງການເຖິງບັນດາສະໂມສອນຕ່າງໆ ໃນຂອບເຂດທົ່ວປະເທດ ຮັບຮູ້ກຽມຄວາມພ້ອມສົ່ງນັກກິລາເຂົ້າຮ່ວມແຂ່ງຂັນກິລາບານສົ່ງຫາດຊາຍ ແລະ ບານສົ່ງໃນຮົ່ມ ປະຈຳປີ 2019 ຊີງຂັນທ່ານປະທານສະຫະພັນບານສົ່ງແຫ່ງຊາດລາວ ຈະຈັດຂຶ້ນໃນກາງເດືອນພະຈິກນີ້ ເພື່ອສ້າງຂະບວນການສະເຫຼີມສະຫຼອງວັນຊາດທີ 2 ທັນວາ ຄົບຮອບ 44 ປີ ພ້ອມທັງເປັນການເລືອກເຟັ້ນນັກກິລາພອນສະຫວັນດີເດັ່ນຕິດທີມຊາດລາວ ກຽມສົ່ງເຂົ້າຮ່ວມລາຍການລະດັບພາກພື້ນ ແລະ ສາກົນ ໃນຕໍ່ໜ້ານີ້ ນັບມາຮອດປັດຈຸບັນກໍມີຫຼາຍພາກສ່ວນແຈ້ງເຈດນົງເຂົ້າຮ່ວມແຂ່ງຂັນ ໂດຍສະເພາະກິລາບານສົ່ງຫາດຊາຍ ປະເພດຊາຍ ມີ 15 ທີມ ປະກອບມີ ທີມທະຫານອາກາດ ຫຼື ລາວເດີນອາກາດ ສົ່ງເຂົ້າຮ່ວມ 3 ທີມ, ສວນອາຫານຕາດຖໍ້າເສືອ 2 ທີມ, ວິທະຍາໄລພະລະສຶກສາ, ຄລປ, ສະໂມສອນວຽງຈັນ, ມະນີກຣຸບ, ອິນທະສອນ ວີຊີ, ຟຣີແມນ, ແຂວງສະຫວັນນະເຂດ ແລະ ເຄທີດີ ເອັບຊີ ແລະ ປະເພດຍິງ ມີ 8 ທີມ ຄື: ກະຊວງປ້ອງກັນປະເທດ ຫຼື ກອງທັບ, ກົມວິທະຍາດສາດປະຫວັດສາດ, ມະນີກຼຸບ, ບ້ານຄັງວຽງ ແຂວງຊຽງຂວາງ, ນິວເກນ ບີວີຊີ, ວິທະຍາໄລພະລະສຶກສາ, ສະໂມສອນວຽງຈັນ ແລະ ແຂວງສະຫວັນນະເຂດ.​

      ສຳລັບກິລາບານສົ່ງໃນຮົ່ມທີມຍິງ ມີ 7 ທີມ ຄື: ກອງທັບ, ກະຊວງປ້ອງກັນຄວາມສະຫງົບ ຫຼື ປກສ, ກົມວິທະຍາດສາດປະຫວັດສາດ, ຫ້ອງການສຶກສາທິການ ແລະ ກິລາ ເມືອງສີໂຄດຕະບອງ, ສະຖາບັນທະນາຄານ, ແຂວງສະຫວັນນະເຂດ, ບ້ານຄັງວຽງ ແຂວງຊຽງຂວາງ ແລະ ປະເພດທີມຊາຍ ມີ 9 ທີມ ຄື: ກອງທັບ, ລາວເດີນອາກາດ, ຄະນະວິທະຍາສາດທຳມະຊາດ, ອິນທະສອນ, ແພດສາດ, ວິທະຍາໄລພະລະສຶກສາ, ສະໂມສອນ ວຽງຈັນ ແລະ ສະຖາບັນການທະນາຄານ.

      ສ່ວນການແຂ່ງຂັນກິລາບານສົ່ງຫາດຊາຍ ປະເພດຍິງ-ຊາຍ ຈະຈັດຂຶ້ນໃນລະຫວ່າງວັນທີ 15-17 ພະຈິກ 2019 ທີ່ສະໜາມກິລາບານສົ່ງຫາດຊາຍຂອງມະຫາວິທະຍາໄລແຫ່ງຊາດ (ມຊ) ວິທະຍາເຂດດົງໂດກ ເມືອງໄຊທານີ ນະຄອນຫຼວງວຽງຈັນ ໃນວັນທີ 12 ພະຈິກ 2019 ຈະຈັດກອງປະຊຸມເຕັກນິກເຜີຍແຜ່ກົດລະບຽບການແຂ່ງຂັນ ສ່ວນເງື່ອນໄຂນັກກິລາ ແມ່ນອະນຸຍາດໃຫ້ສະເພາະແຕ່ຄົນລາວເຂົ້າຮ່ວມ ສ່ວນຕ່າງປະເທດບໍ່ອະນຸຍາດແລະ ບໍ່ຈຳກັດອາຍຸ ຫຼື ທີມຊາດ ສາມາດຮ່ວມໄດ້ ຂະນະທີ່ການແຂ່ງຂັນກິລາບານສົ່ງໃນຮົ່ມ ຈະປິດຮັບສະໝັກໃນວັນທີ 16 ພະຈິກ 2019 ແລະ ໃນວັນທີ 18 ພະຈິກ 2019 ຈັດກອງປະຊຸມເຕັກນິກ ສ່ວນການແຂ່ງຂັນຈະດຳເນີນໃນລະຫວ່າງວັນທີ 20-26 ພະຈິກ 2019 ແຕ່ລະສະໂມສອນສາມາດສົ່ງນັກກິລາເຂົ້າຮ່ວມໄດ້ບໍ່ເກີນ 2 ທີມ ກໍຄື ຍິງ 1 ທີມ ແລະ ຊາຍ 1 ທີມ, ໃນນັ້ນ ທີມຍິງ ແລະ ທີມຊາຍ ບັນຈຸນັກກິລາໄດ້ພຽງທີມລະ 12 ຄົນ

      ສະເພາະລາງວັນຊະນະເລີດກິລາບານສົ່ງຫາດຊາຍ ປີນີ້ ທີ 1 ຈະໄດ້ຂັນແຊ້ມ ພ້ອມຫຼຽນຄຳ ແລະ ເງິນສົດ 2 ລ້ານກີບ, ທີ 2 ຈະໄດ້ຮັບຫຽນເງິນ ແລະ ເງິນສົດ 1,2 ລ້ານກີບ, ທີ 3 ຈະໄດ້ຮັບຫຼຽນທອງ ພ້ອມເງິນສົດ 8 ແສນກີບ ແລະ ທີ 4 ຈະໄດ້ຮັບລາງວັນຊົມເຊີຍ 4 ແສນກີບ ສ່ວນລາງວັນຊະນະເລີດກິລາບານສົ່ງໃນຮົ່ມ ທີ 1 ຈະໄດ້ຂັນແຊ້ມ ພ້ອມຫຼຽນຄຳ ແລະ ເງິນສົດ 12 ລ້ານກີບ, ທີ 2 ຈະໄດ້ຮັບຫຽນເງິນ ແລະ ເງິນສົດ 8 ລ້ານກີບ, ທີ 3 ຈະໄດ້ຮັບຫຼຽນທອງ ພ້ອມເງິນສົດ 6 ລ້ານກີບ ແລະ ທີ 4 ຈະໄດ້ຮັບລາງວັນຊົມເຊີຍ 3 ລ້ານກີບ.

 

ໂດຍ ປາກກາດຳ

ສະໜັບສະໜູນຂ່າວໂດຍ:



ຂ່າວລ່າສຸດ