ລາຍລະອຽດຂ່າວ
​ນັກ​ເປ​ຕັງສາວ​ທີມ​ຊາດ​ລາວ ພ້ອມ​ຈະ​ປ້ອງ​ກັນ​ແຊ້ມ​ ຊີ​ເກມ ຄັ້ງ​ທີ XXX
ຂຽນເມື່ອ: 06/11/2019 15:11 | ໂດຍ: ເພຣເມັກເກີ | ອ່ານ: 149 ຄັ້ງ

      4 ສາວ ທັບນັກ​ກິ​ລາ​ເປ​ຕັງ​​ທີມ​ຊາດ​ລາວ ມີ​ຄວາມ​ພ້ອມ​ເຕັມ​ຮ້ອຍ​ເປີ​ເຊັນ ພ້ອມ​ທັງ​ຕັ້ງ​ເປົ້າ​ໝາຍ​ຈະພະ​ຍາ​ຍາມ​ສູ້​ຊົນ​ຮັກ​ສາ​ມູນ​ເຊື້ອ​ດ້ວຍ​ການ​ສ້າງ​ຜົນ​ງານປ້ອງ​ກັນ​ແຊ້ມ​ຫຼຽນ​ຄຳ ​ໃຫ້​ທັບ​ນັກ​ກິ​ລາ​ລາວ ​ອີກ 1 ສະ​ໄໝ ໃນ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ຮັບ​ກຽດ​ເປັນ​ເຈົ້າ​ພາບ ລະ​ຫວ່າງວັນ​ທີ 30 ພະ​ຈິກ ຫາ 12 ທັນ​ວາ 2019.

      ພາຍ​ຫຼັງ​ທີ່​ໄດ້​ເລີ່ມ​ເກັບ​ຕົວ​ຝຶກ​ຊ້ອມ​ມາ​ຕົ້ນ​ເດືອນ​ກັນ​ຍາ​ຜ່ານ​ມາ ນັບ​ມາ​ຮອດ​ປັດ​ຈຸ​ບັນ, ຕາມ​ການ​ໃຫ້​ສຳ​ພາດ​ຂອງ​ທັບ​ນັກ​ກິ​ລາ​ເປ​ຕັງ 4 ສາວ​ທີມ​ຊາດ​ລາວ ປະ​ເພດ​ທີມ​ຊຸດ​ຍິງ ແຊ້ມ​ເກົ່າ​ຫຼຽນ​ຄຳ ຊີ​ເກມ ເມື່ອ​ປ​ີ 2017 ທີ່​ປະ​ເທດ​ມາ​ເລ​ເຊຍ ກໍ​ຄື ນາງ ຄູນ​ຄຳ ສຸກ​ສະ​ຫວັດ, ນາງ ຈັນ​ສະ​ໝອນ ວົງ​ສະ​ຫວັດ, ນາງ ມະ​ນີ​ວັນ ສຸ​ລິ​ຍາ ແລະ ນາງ ໂບ​ວິ​ລັດ ເທບ​ພະ​ກັນ ໃນ​ວັນ​ທີ 6 ພະ​ຈິກ ຜ່ານ​ມາ ໃນ​ໂອ​ກາດ​ທີ່​ໄດ້​ເກັບ​ຕົວ​ຝຶກ​ຊ້ອມ​ທີ່​ສະ​ໜາມ​ກິ​ລາ​ເປ​ຕັງ​ແຫ່ງ​ຊາດ (ວິ​ທະ​ຍາ​ເຂດ​ດົງ​ໂດກ) ນະ​ຄອນ​ຫຼວງວຽງ​ຈັນ ແຈ້ງ​ໃຫ້ທີມ​ງານ​ໜັງ​ສື​ພິມ​ລາຍ​ວັນ ​ຊາບ​ວ່າ: ພາຍ​ຫຼັງ​ທີ່​ພວກ​ນ້ອງ​ໄດ້​ພ້ອມ​ໃຈ​ກັນ​ລົງ​ຝຶກ​ຊ້ອມ​ຮ່ວມ​ກັບ​ນັກ​ກິ​ລາ​ເປ​ຕັງອ້າຍ ແລະ ​ເພື່ອນ​ຮ່ວມທີມ​ຊາດ ຊຸດ​ກຽມ​ເຂົ້າ​ຮ່ວມ​ງານ​ກິ​ລາ​ຊີ​ເກມ ທີ່​ປະ​ເທດ​ຟິ​ລິບ​ປິນ ຕັ້ງ​ແຕ່​ເດືອນ​ກັນ​ຍ​າ ຜ່ານ​ມາ ຕະ​ຫຼອດ​ໄລ​ຍະ​ການ​ຝຶກ​ຊ້ອມ​ກໍ​ເຫັນ​ໄດ້​ວ່າ ​ທຸກ​ຄົນມີ​ຄວາມ​ສາ​ມັກ​ຄີ​ເປັນ​ອັນ​ໜຶ່ງ​ອັນ​ດຽວ, ມີ​ຄວາມ​ສະ​ດວກ​ທາງ​ດ້ານ​ສະ​ຖານ​ທີ່ຝຶກ​ຊ້ອມ, ທີ່​ພັກ ແລະ ອາ​ຫານ​ການ​ກິນ​ກໍ​ມີ​ແຕ່​ແນວ​ແຊບ​ໆ ​ມື້​ໜຶ່ງ​ພວກ​ນ້ອງ​ລົງ​ສະ​ໜາມ​ຝຶກ​ຊ້ອມມື້​ລະ 8 ຊົວ​ໂມງ ກໍ​ຄື ພາກ​ເຊົ້າ​ຊ້ອມ​ຕັ້ງ​ແຕ່​ເວ​ລາ 8:00 ໂມງ ຫາ 11:00 ໂມງ ແລະ ພາກ​ບ່າຍ ຊ້ອມ​ຕັ້ງ​ແຕ່​ເວ​ລາ 14:00 ໂມງ ຫາ 18:00 ໂມງ ໂດຍ​ແມ່ນ​ອາ​ຈານ ວັດ​ສັນ ພົມ​ມະ​ຈັນ ເປັນ​ຫົວ​ໜ້າ​ຄູ​ຝຶກ​ຄວບ​ຄ​ຸ້ມບອກ​ສອນ​ແກ້​ໄຂ​ຈຸດ​ທີ່​ຍັງ​ຄົງ​ຄ້າງ​ໃຫ້​ພວກ​ນ້ອງ. ເຖິງ​ຢ່າງ​ໃດ​ກໍ​ດີ, ນັບ​ມາ​ຮອດ​ປັດ​ຈຸ​ບັນສະ​ເພາະ​ປະ​ເພດ​ທີມ​ຊຸດ​ຍິງຂອງ​ພວກ​ນ້ອງ ​ແມ່ນ​ມີ​ຄວາມ​ພ້ອມ​ເຕັມ​ຮ້ອຍ​ເປີ​ເຊັນ​ແລ້ວ ໃນ​ຊີ​ເກມ ຟິ​ລິບ​ປີນ ບໍ່​ວ່າ​ພວກ​ເຮົາຈະ​ໄດ້​ພົບ​ກັບ​ທີມ​ຊາດ​ໃດ ​ກໍ​ຈະ​ສູ້​ເຕັມ​ທີ່ ເພື່ອ​ສູ້​ຊົນ​ຮັກ​ສາ​ມູນ​ເຊື້ອ​ສ້າງ​ຜົນ​ງານປ້ອງ​ກັນ​ແຊ້ມ​ຫຼຽນ​ຄຳ ​ໃຫ້​ທັບ​ນັກ​ກິ​ລາ​ລາວ ກໍ​ຄື​ເປັນ​ກຽດ​ຊື່​ສຽງ ແລະ ສັກ​ສີ​ໃຫ້​ແກ່​ປະ​ເທດ​ຊາດ​ໄວ້​ໄດ້​ອີກ 1 ສະ​ໄໝ. 

       ສຳ​ລັບ​ການ​ແຂ່ງ​ຂັນ​ກິ​ລາ​ເປ​ຕັງ ງານ​ມະ​ຫ​າ​ກຳ​ກິ​ລາ​ຊີ​ເກມ ປີນີ້ ຈະ​ມີ​ການ​ຊີງ​ໄຊ​ກັນ​ທັງ​ໝົດ 4 ລາຍ​ການ ປະ​ກອບ​ມີ ປະ​ເພດ​ທີມ​ຄູ່​ຊາຍ​-ຍິງ ແລະ ທີມ​ຊຸດ​ຊາຍ-ຍິງ ສະ​ເພາະທັບ​ນັກ​ກິ​ລາ​ເປ​ຕັງ​ທີມ​ຊາດ​ລາວ ຈະ​ສົ່ງ​ນັກ​ກິ​ລາ​ເຂົ້າ​ຮ່ວມ​ແຂ່ງ​ຂັນ​ທັງ​ໝົດ 12 ຄົນ, ຍິງ 6 ຄົນ ເຊິ່ງ​ຈະ​ລົງ​ແຂ່ງ​ຂັນ​ຄົບ 4 ລາຍ​ການ ໂດຍ​ຜົນ​ງານ​ຫຼ້າ​ສຸດ ໃນ​ຊີ​ເກມ ທີ່​ປະ​ເທດ​ມາ​ເລ​ເຊຍ ເມື່ອ​ປີ 2017 ທັບ​ນັກ​ກິ​ລາ​ເປ​ຕັ​ງ​ທີມ​ຊາດ​ລາວ ສາ​ມາດ​ຍາດ​ມາ​ໄດ້ 1 ຫຼຽນ​ຄຳ, 1 ຫຼຽນ​ເງິນ ແລະ 2 ຫຼຽນ​ທອງ ສຳ​ລັບ​ຫຼຽນ​ຄຳ ໃນ​ຊຸດນີ້ ຍັງ​ເຫຼືອ​​ຄົນ​ເກົ່າ​ພຽງ 2 ຄົນ ກໍ​ຄື ນາງ ນາງ ຄູນ​ຄຳ ສຸກ​ສະ​ຫວັດ, ນາງ ຈັນ​ສະ​ໝອນ ວົງ​ສະ​ຫວັດ ສ່ວນ ນາງ ມະ​ນີ​ວັນ ສຸ​ລິ​ຍາ ແລະ ນາງ ໂບ​ວິ​ລັດ ເທບ​ພະ​ກັນ ຄັ້ງ​ນັ້ນ ແມ່ນ​ລົງ​ແຂ່ງ​ຂັນ​ປະ​ເພດ​ຄູ່​ປະ​ສົມ ແລະ ດ່ຽວ​ຍິງ.

ໂດຍ: ປາກກາດຳ

ສະໜັບສະໜູນຂ່າວໂດຍ:



ຂ່າວລ່າສຸດ