ລາຍລະອຽດຂ່າວ
ເພາະ​ກາຍ​ລາວ ເດີ່ນທາງເຂົ້າແຂ່ງຂັນ ​ລາຍ​ການ​ຊີງ​ແຊ້ມ​ໂລກ ສ ເກົາ​ຫຼີ
ຂຽນເມື່ອ: 05/11/2019 22:11 | ໂດຍ: ເພຣເມັກເກີ | ອ່ານ: 197 ຄັ້ງ

      ສະ​ຫະ​ພັນ​ກິ​ລາ​ເພາະ​ກາຍ​ແຫ່ງ​ຊາດ​ລາວ ສົ່ງທັບ​ນັກ​ກິ​ລາ​ເພາະ​ກາຍ​ທີມ​ຊາດ​ລາວ ທ້າວ ສັນ​ຕິ​ສຸກ ດວງ​ແກ້ວ​ມະ​ນີ ພ້ອມ​ກັບ ຄະ​ນະ​ນຳ​ພາ 1 ຄົນ, ກຳ​ມະ​ການ​ຕັດ​ສິນ 2 ຄົນ ຮ່ວມ​​ແຂ່ງ​ຂັນ​ເພາະ​ກາຍ ລາຍ​ການຊີງ​ແຊ້ມ​ໂລກ ທີ່ຈະ​ຈັ​ດ​ຂຶ້ນ ລະ​ຫວ່າງວັນ​ທີ 5-11 ພະ​ຈິກ 2019 ທີ່ເມືອງ​ເຊ​ຈູ ​ສ ເກົາ​ຫຼີ .

      ເມື່ອວ​ັນ​ທີ 4 ພະ​ຈິກ ຜ່ານ​ມາ ທີ່​ສະ​ໜາມ​ບິນ​ສາ​ກົນ ວັດ​ໄຕ ເມືອງ​ສີ​ໂຄດ​ຕະ​ບອງ ນະ​ຄອນ​ຫຼວງວຽງ​ຈັນ, ທ່ານ ຄຳ​ພະ​ໄພ​ວັນ ວົງ​ໄຊ ຮັກ​ສາ​ການ​ສະ​ຫະ​ພັນ​ເພາະ​ກາຍ​ແຫ່ງ​ຊາດ​ລາວ ພ້ອມ​ດ້ວຍ​ຄະ​ນະ ແລະ ບັນ​ດາ​ພໍ່​ແມ່​ປະ​ຊາ​ຊົນ​ຊາວ​ລາວ ກໍ​ຄື ຊາວ​ນະ​ຄອນ​ຫຼວງວຽງ​ຈັນ ຕະ​ຫຼອດ​ຮອດ​ຊາວ​ຕ່າງ​ຊາດ ໄດ້​ຮ່ວມ​ໃຈ​ກັນ​ອວຍ​ພອນ​ໄຊ​ອັນ​ປະ​ເສີດ​ເພື່ອສົ່ງ​ ທ່ານ ອາ​ພິ​ຊາດ ພັນ​ທະ​ລີ ຄະ​ນະ​ນຳ​ພາ, ທ່ານ ກົງປະເສີດ ແພງແສນ ເຂົ້າຮ່ວມຕັດສິນສະຫະພັນເພາະກາຍໂລກ, ທ່ານ ນາງ ພອຍໄພລິນ ພັນທະລີ ຮ່ວມສອບເສັງບັນຈຸກຳມະການຕັດສິນເພາະກາຍສະຫະພັນໂລກ ແລະ ທ້າວ ສັນ​ຕິ​ສຸກ ດວງແກ້ວມະນີ ອອກ​ເດີນ​ທາງ​ເຂົ້າ​ຮ່ວມ​ແຂ່ງ​ຂັນ​ລາຍ​ການ​ຊີງ​ແຊ້ມ​ໂລກ ທີ່​ເມືອງ​ເຊ​ຈູ ສ ເກົາ​ຫຼີ ດ້ວຍ​ຄວາມ​ສະ​ຫວັດ​ດີ​ພາບ.

       ທ່ານ ຄຳ​ພະ​ໄພ​ວັນ ວົງ​ໄຊ ໃຫ້​ສຳ​ພາດ​ວ່າ: ການ​ເຂົ້າ​ຮ່ວມ​ແຂ່ງ​ຂັນ​ລາຍ​ການ​ຊີງ​ແຊ້ມ​ໂລກ ​ໃນ​ຄັ້ງ​ນີ້ ບໍ່​ໄດ້​ຕັ້ງ​ເປົ້າ​ໝາຍ​ໄວ້​ສູງ ຂໍ​ພຽງ​ແຕ່​ສ້າງ​ປະ​ສົບ​ການ​ໃຫ້​ນັກ​ກິ​ລາ​ລາວ ແລະ ກຳ​ມະ​ການ​ຕັດ​ສິນ ເພື່ອ​ຈະ​ນຳ​ເອົາ​ບົດ​ຮຽນ​ມາ​ຖອດ​ຖອນ​ບົດ​ຮຽນ​ໃຫ້​ເຊິ່​ງ​ກັນ ແລະ ກັນ ​ແນ​ໃສ່ເສີມ​ຂະ​ຫ​ຍາຍ​ມູນ​ເຊື້ອ​ສ້າງ​ບຸກ​ຄະ​ລາ​ກອນ​ກິ​ລາ​ເພາະ​ກາຍ​ລາວ​ໃຫ້​ມີ​ການ​ເຕີບ​ໃຫ​ຍ່​ຂະ​ຫ​ຍາຍ​ຕົວ​ຢ່າງກວ້າງ ເພື່ອ​ກຽມ​ຄວາມ​ພ້ອມ​ໃຫ້​ທັບ​ນັກ​ກິ​ລາ​ເພາະ​ກາຍ​ລາວ ເຂົ້າ​ຮ່ວມ​ຄັດ​ເລືອກ​ທີມ​ຊາດ ກຽມ​ສົ່ງ​ເຂົ້າ​ຮ່ວມແຂ່ງ​ຂັນ​ງານ​ມະ​ຫາ​ກຳ​ກິ​ລາ​ຊີ​ເກມ ຄັ້ງ​ທີ XXXl ທີ່ ສ​ສ​ ຫວຽດ​ນາມ ເປັນ​ເຈົ້າ​ພາບ ໃນ​ປີ 2021 ສະ​ນັ້ນ ໃນ​ປີ 2020 ຈະ​ເລີ່ມ​ສືບ​ຕໍ່​ນຳ​ພາ​ຂະ​ບວນ​ການ​ກິ​ລາ​ເພາະ​ກາຍ​ລາວ ໃຫ້​ມີ​ການ​ເຄື່ອນ​ໄຫວ​ຢ່າງ​ເປັນ​ປົກ​ກະ​ຕິ ເປັນ​ຕົ້ນ​ແມ່ນ​ຈະ​ຮ່ວມ​ສາ​ທິດ​​ເພາະ​ກາຍ ໃນ​ງານ​ມະ​ຫາ​ກຳ​ກິ​ລາ​ແຫ່ງ​ຊາດ ຄັ້ງ​ທີ Xl ທີ່​ແຂວງ​ຊຽງ​ຂວາງ ເປັນ​ເຈົ້າ​ພາບ ລະ​ຫວ່າງວັນ​ທີ 22 ມີ​ນາ ຫາ 1 ເມ​ສາ 2020 ແລະ ຈະຈັດ​ແຂ່ງ​ຂັນ​ງານ​ແຂ່ງ​ຂັນ​ເພາະ​ກາຍ ຊີງ​ແຊ້ມ​ອາ​ຊຽນ ທີ່​ສ​ປ ລາວ ເປັນ​ເຈົ້າ​ພາບ ໃນ​ເດືອນ​ກໍ​ລະ​ກົດ 2020. ເຖິງ​ຢ່າງ​ໃດ​ກໍ​ດີ, ພາຍ​ຫຼັງ​ທີ່​ໄດ້​ເລີ່ມ​ເຄື່ອນ​ໄຫວ​ຂະ​ບວນ​ການ​ກິ​ລາ​ເພາະ​ກາຍ​ມາ​ແຕ່ ປີ 2015 ນັບ​ມາ​ຮອດ​ປັດ​ຈຸ​ບັນກໍ​ເຫັນ​ວ່າ ວົງ​ການ​ກິ​ລາ​ເພາະ​ກາຍ​ລາວ ມີ​ການ​ເຕີບ​ໃຫ​ຍ່​ຂະ​ຫ​ຍາຍ​ຕົວ​ຂຶ້ນກວ່າ​ເກົ່າ​ຫຼາຍ ມີ 65 ສະ​ໂມ​ສອນ ໃນ​ຂອບ​ເຂດ​ທົ່ວ​ປະ​ເທດ ແລະ ມີ​ນັກ​ກິ​ລາ​ທີ່​ນອນ​ໃນ​ເປ​ົ້າ​ໝາຍ​ຄັດ​ເລືອກ​ທີມ​ຊາດ​ເຖິງ 25 ຄົນ.  

      ສຳ​ລັບຄະນະຄູຝຶກ ແລະ ນັກກິລາເພາະກາຍທີມຊາດລາວ ຮ່ວມແຂ່ງຂັນເພາະກາຍຊິງແຊ້ມໂລກທີ່ ສ ເກົາ​ຫຼີ ປະ​ກອບ​ມີ ທ່ານ ອາ​ພິ​ຊາດ ພັນ​ທະ​ລີ ເປັນ​ຄະ​ນະ​ນຳ​ພາ, ທ່ານ ນາງ ພອຍໄພລິນ ພັນທະລີ ຮ່ວມສອບເສັງບັນຈຸກຳມະການຕັດສິນເພາະກາຍສະຫະພັນໂລກ, ທ່ານ ກົງປະເສີດ ແພງແສນ ເຂົ້າຮ່ວມຕັດສິນສະຫະພັນເພາະກາຍໂລກ ແລະ ທ້າວ ສັນຕິສຸກ ດວງແກ້ວມະນີ ຈະລົງແຂ່ງຂັນລຸ້ນ men model physiqe up to 175 ຊັງ​ຕິ​ແມັດ ໂດຍ​ການ​ເຂົ້າ​ຮ່ວມ​ຄັ້ງ​ນີ້ ໄດ້​ຮັບ​ການ​ສະ​ໜັບ​ສະ​ໜູນ​ຫຼັກ​ຈາກບໍລິສັດ ວຽງຈັນ ຟິສເນັດ ຈໍາກັດ ຜູ້ນໍາດ້ານການຂາຍອຸປະກອນອອກກໍາລັງກາຍຢູ່ ສປປລາວ

ໂດຍ ປາກກາດຳ

ສະໜັບສະໜູນຂ່າວໂດຍ:



ຂ່າວລ່າສຸດ