ລາຍລະອຽດຂ່າວ
​ມາສດ້າ ​ລຸ້ນ​ຄອງ​ແຊ້ມ 2 ລາຍ​ການ ເຕະບານ ຊ້າງ​ ລີກຄັບ 2019
ຂຽນເມື່ອ: 05/11/2019 22:11 | ໂດຍ: ເພຣເມັກເກີ | ອ່ານ: 158 ຄັ້ງ

      ທີມ ມາສດ້າ ຈີບີ ເອັບຊີ ດີກຣີແຊ້ມຂັນຈີເອັດແບັດເຕີຣີ 2019 ມາໃໝ່ໆໝາດໆ ມີ​ລຸ້ນ​ຄອງ​ແຊ້ມທັງຮຸ່ນຊາວໜຸ່ມ ແລະ ອາຍຸ 35 ປີ ຂຶ້ນໄປ ໃນການ​ແຂ່ງຂັນ​ກິລາ​ເຕະບານ 9 ຄົນ ຊີງ​ຂັນ​ສະໜາມ​ເຕະບານຫຍ້າທຽມ ຊ້າງ ​ເອັບ​ຊີ ຫຼື ລາຍການ ຊ້າງ​ ລີກ​ຄັບ 2019 ​ເພື່ອ​ສ້າງ​ຂະ​ບວນການສະ​ເຫຼີ​ມສະຫຼອງ​ວັນ​ສ້າງ​ຕັ້ງສະໜາມຫຍ້າທຽມ ຊ້າງ​ ເອັບ​ຊີ ຄົບຮອບ​ 7 ປີ ແລະ ຂ່ຳ​ນັບ​ຮັບ​ຕ້ອນ​ວັນ​ຊາດ​ທີ 2 ທັນ​ວາ ຄົບ​ຮອບ 44 ປີ.

       ເມື່ອວັນທີ 2-3 ພະ​ຈິກ ຜ່ານມາ ທີ່ສະໜາມເຕະບານຫຍ້າທຽມ ຊ້າງ ເອັບຊີ 3 ບ້ານຊ້າງຄູ້ ເມືອງໄຊທານີ ນະຄອນຫຼວງວຽງຈັນ ​ໄດ້​ມີ​ການແຂ່ງຂັນເຕະບານ 3 ຮຸ່ນ ກໍຄື ຮຸ່ນທົ່ວໄປ, ຮຸ່ນອາ​ຍຸ 35 ປີ ແລະ ຮຸ່ນ​ອາ​ຍຸ 40 ປີ ຂຶ້ນ​ໄປ ຊີງ​ຂັນ​ສະໜາມເຕະບານ​ຫຍ້າທຽມ ຊ້າງ ​ເອັບ​ຊີ ຫຼື ລາຍການ ຊ້າງ​ ລີກ​ຄັບ 2019.

      ການແຂ່ງຂັນທັງ ໝົດ 12 ຄູ່ ຈາກ 3 ຮຸ່ນ​ດັ່ງ​ກ່າວ ຜ່ານ​ການ​ແຂ່ງ​ຂັນ​ຜົນ​ປະ​ກົດ​ວ່າ: ຮຸ່ນ​ທົ່ວ​ໄປ ຮອບ​ຮອງ​ຊະ​ນະ​ເລີດ ມາ​ສ​ດ້າ ຕອກ​ຢ້ຳ​ໄຊ​ຊະ​ນະ ທີມ​ບໍ​ລິ​ສັດ ອິນ​ທະ​ພອນ ບໍ​ລິ​ການ​ຈຳ​ກັດ ຜູ້​ດຽວ ໄປ​ແບບ​ຫວຸດ​ຫວິດ 2-1 ປະ​ຕູ ໄດ້​ຜ່ານ​ເຂົ້າ​ຊີງ​ຊະ​ນະ​ເລີດ ພົບ​ກັບ ທີມ​ຄິວ​ລົດ​ສາຍ​ໃຕ້ ທີ່​ຖະ​ຫຼົ່ມ​ເອົາ​ຊະ​ນະ ສະ​ໂມ​ສອນ ດີ​ເຄ ໄປ​ແບບ​ຂາດ​ຮອຍ 8-4 ປະ​ຕູ ສ່ວນ​ຜົນ​ການ​ແຂ່ງ​ຂັນ​ຮຸ່ນ 35 ປີ ນັດ​ທີ 6 ປະ​ຈຳ​ອາ​ທິດ​ນີ້ ປະ​ກົດ​ວ່າ: ທີມ​ໜຶ່ງ​ໃນ​ດວງ​ໃຈ ຊະ​ນະ ທີມ​ຮ້ານ​ແກ້ວ​ສົມ​ໃຈ 7-2 ປະ​ຕູ, ທີມ​ເດີ​ຮາດ​ຣ໋ອກ ເສຍ​ໃຫ້ ທີມ​ອົກ​ສາມ​ສອກ 4-2 ປະ​ຕູ, ທີມ​ນ້ອງ​ໃໝ່ ຖ​ະ​ຫຼົ່ມ ທີມ​ໝູ່​ສະ​ນິດ 16-0, ທີມ​ຢູ​ໂຣບ ເສຍ​ທີມ​ສ່ຽວ​ກັນ 0-1 ປະ​ຕູ ແລະ ທີມ​ມາ​ສ​ດ້າ ທີມ​ນຳ​ຕາ​ຕະ​ລາງ ຖະ​ຫຼົ່ມ ທີມ​ໄອ​ດີ 15-1 ປະ​ຕູ ຍັງ​ຮັກ​ສາ​ສະ​ຖິ​ຕິບໍ່​ເສຍ​ໃຫ້​ທີມ​ໃດ​ຈັກ​ນັດ ​ລົງ​ສະ​ໜາມ 6 ນັດ ຊະ​ນະ​ລວດ 6 ນັດ​ຊ້ອນ ມີ 18 ຄະ​ແນນ ມີ​ປະ​ຕູ​ບວກ 41 ປະ​ຕູ ແລະ ເສຍ​ພຽງປະ​ຕູ​ດຽວ ຍືດ​ທີມ​ນຳ​ຕາ​ຕະ​ລາງ​ຢ່າງ​ໜ້ຽວ​ແໜ້ນ ພ້ອມ​ທັງ​ມີ​ລຸ້ນ ຄອງ​ແຊ້ມ​ຄື​ກັບ ຮຸ່ນ​ທົ່ວ​ໄປ. ຂະ​ນະ​ທີ່​ຜົນ​ການ​ແຂ່ງ​ຂັນ​ຮຸ່ນ​ອາ​ຍຸ 40 ປີ ທີມ​ຄົນ​ຈິງ​ໃຈ ຊະ​ນະ ທີມ​ບ້ານ​ຊ້າງ​ຄູ້ 4-3 ປະ​ຕູ, ທີມ​ອະ​ດີດ​ນັກ​ເຕະ​ນະ​ຄອນ​ຫຼວງວຽງ​ຈັນ ຊະ​ນະ ເດັນ​ຕິດ 4-3 ປະ​ຕູ, ທີມ​ຮາດ​ຣ໋ອກ ເສຍ​ໃຫ້ ທີມກອງ​ທັບ 1-12 ປະ​ຕູ ແລະ ທີມ​ວິ​ສະ​ວະ​ ເສຍ​ໃຫ້ ວີ​ໄອ​ພີ ໄຊ​ເຊດ​ຖາ 3-1 ປະ​ຕູ.  

      ​​      ລາຍການດັ່ງກ່າວ ໄດ້​ດຳ​ເນີນ​ການ​ແຂ່ງ​ຂັນ​ມາ​ແຕ່​ທ້າຍ​ເດືອນ​ກັນ​ຍາ ຜ່ານ​ມາ ແລະ ຄາດ​ວ່າ​ຈະ​ສຳ​ເລັດ​ໃນ​ທ້າຍ​ປ​ເດືອນ​ພະ​ຈິກນີ້ ໂດຍມີການ​ກຳນົດ​ເງື່ອນ​ໄຂ​ນັກ​ກິລາ ສຳລັບຮຸ່ນທົ່ວໄປ ຜູ້ທີ່​ຕິດທີ​ມຊາດ ​ແລະ ​ແຂ່ງເຕະບານ​ລີກ​ສູງສຸດ​ຂອງ​ປະ​ເທດ ຫຼື ລາຍການ ເປບຊີ ລາວ​ ພຣີ​ເມຍ​ລີກ ລະດູ​ການ 2018-2019 ສາມາດ​ເຂົ້າຮ່ວມທີ​ມ​ໄດ້ພຽງ 5 ຄົນ ​ແລະ ​ລົງສະໜາມ​ແຂ່ງຂັນ​ໄດ້ 3 ຄົນ ສ່ວນ​ຮຸ່ນ 35 ​ແລະ 40 ປີ ຂຶ້ນ​ໄປ ​ແມ່ນ​ຕ້ອງ​ມີ​ອາຍຸ​ຕາມ​ເງື່ອນ​ໄຂ​ທີ່​ກຳນົດ​ໄວ້ ​​ຈຶ່ງ​ຈະສາມາດ​ເຂົ້າ​ຮ່ວມ​ແຂ່ງຂັນ​ໄດ້ ລາຍການນີ້ ​ໄດ້​ຮັບ​ການ​ອຸປະຖຳ​ຫຼັກ​ຈາກ​ຜະລິດຕະພັນ ​ເບຍ​ຊ້າງ ​ໂດຍນຳ​ໃຊ້​ສະໜາມ​ຊ້າງ​ 3 ບ້ານ​ສ້າງ​ຄູ້ ​ເມືອງ​ໄຊ​ທານີ ຈັດ​ແຂ່ງຂັນເປັນຫຼັກ ສະເພາະຮຸ່ນ​ທົ່ວ​ໄປ ມີ 10 ທີມ ຈັດ​ແບ່ງ​ອອກ​ເປັນ 2 ກຸ່ມ ​ແຕ່​ລະ​ກຸ່ມ​ແຂ່ງຂັນ​ພົບ​ກັນ​ໝົດ ຄັດ​ເອົາ​ທີ 1-2 ຜ່ານ​ເຂົ້າ​ຮອບ​ຕໍ່​ໄປ ສ່ວນ​ຮຸ່ນ 35 ປີ ແລະ ຮຸ່ນ 40 ປີ ​ມີທີມ​ເຂົ້າ​ຮ່ວມ​ຮຸ່ນ​ລະ 10 ທີມ ຈັດເປັນກຸ່ມດຽວ ແຂ່ງຂັນພົບກັນໝົດ ແບບລະບົບລີກ (ແຂ່ງຂັນຮອບດຽວ) ຄັດເອົາທີມທີ່ມີຄະແນນດີທີ່ສຸດ ໄດ້ແຊ້ມໄປຄອງ.

ສຳລັບ​ລາງວັນຊະນະເລີດ ອັນດັບທີ 1 ທັງ 3 ຮຸ່ນ ຈະ​ໄດ້​ຮັບຂັນ​ແຊ້ມ ​ແລະ ​ເງິນ​ລາງວັນ  ທີ​ມລະ 5 ລ້ານ​ກີບ, ທີ 2 ຈະ​ໄດ້​ຮັບ​ຂັນ ​ແລະ ​ເງິນສົດທີ​ມລະ 3 ລ້ານ​ກີບ, ທີ 3 ຈະ​ໄດ້​ຮັບ​ຂັນ ​ແລະ ​ເງິນສົດ​ທີ​ມລະ 2 ລ້ານ​ກີບ ​ແລະ ທີ 4 ຈະ​ໄດ້​ຮັບ​ລາງວັນ​ຊົມ​ເຊີຍ​ທີ​ມລະ 1 ລ້ານ​ກີບ.

​ໂດຍ ປາກກາດຳ