ລາຍລະອຽດຂ່າວ
ຈັນທະບູລີ ເປີດແຂ່ງຂັນ ກິລາ- ສິລະປະ ນັກຮຽນສາມັນທົ່ວເມືອງ ປະຈຳສຶກສາ 2019-2020
ຂຽນເມື່ອ: 05/11/2019 14:11 | ໂດຍ: ເພຣເມັກເກີ | ອ່ານ: 123 ຄັ້ງ

      ຫ້ອງການສຶກສາທິການ ແລະ ກິລາເມືອງຈັນທະບູລີ ເປີດງານການແຂ່ງຂັນກິລາ-ສິລະປະ ນັກຮຽນສາມັນສຶກສາ ປະຈຳສົກຮຽນ 2019-2020 ທົ່ວເມືອງຂຶ້ນ ເພື່ອສ້າງຂະບວນການຕ້ອນຮັບວັນສຳຄັນຕ່າງໆຂອງຊາດ ທີ່ໃກ້ຈະມູນວຽນມາເຖິງນີ້. ໂດຍມີທັງໝົດ 4 ລະດັບ ແຂ່ງຂັນກັນທັງໝົດ 5 ປະເພດກິລາ.

      ເມື່ອວັນທີ 5 ພະຈິກ ຜ່ານມາ ທີ່ຫຍ້າທຽມຮ່ອງຄ້າ ເມືອງຈັນທະບູລີ ນະຄອນຫຼວງວຽງຈັນ ຫ້ອງການສຶກສາທິການ ແລະ ກິລາເມືອງຈັນທະບູລີ ນະຄອນຫຼວງວຽງຈັນ ໄດ້ມີການຈັດພິທີເປີດງານການແຂ່ງຂັນກິລານັກຮຽນສາມັນສຶກສາ ປະຈຳສົກຮຽນ 2019-2020 ທົ່ວເມືອງຈັນທະບູລີຂຶ້ນ. ໃຫ້ກຽດເຂົ້າຮ່ວມເປັນປະທານໂດຍ ທ່ານ ນາງ  ບົວລອນ ວົງດາລາແສນ ເຈົ້າເມືອງຈັນທະບູລີ, ທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ພ້ອມນີ້ມີທ່ານຮອງເຈົ້າເມືອງ, ຫົວໜ້າຫ້ອງການສຶກສາທິການ ແລະ ກິລາເມືອງ, ແຂກຖືກເຊີນ, ບັນດາຜູ້ອຳນາດການໂຮງຮຽນ, ພະນັກງານ, ຄູ-ອາຈານ ແລະ ນັກຮຽນ ທົ່ວເມືອງຈັນທະບູລີ ເຂົ້າຮ່ວມ.

      ໂອກາດດັ່ງກ່າວ, ທ່ານ ຈັນທະຄານ ລັດຕະນາ ຮອງຫົວໜ້າຫ້ອງການສຶກສາທິການ ແລະ ກິລາ ເມືອງຈັນທະບູລີ ໄດ້ຂຶ້ນຜ່ານບົດລາຍງານພິທີເປີດການແຂ່ງຂັນກິລານັກຮຽນສາມັນສຶກສາ ໃນເມືອງຈັນທະບູລີ ປະຈຳສົກຮຽນ 2019-2020 ແມ່ນຈັດຂຶ້ນເພື່ອອີງຕາໃແຜນພັດທະນາການສຶກສາ ກໍ່ຄື ແຜນການເຄື່ອນໄຫວກິດຈະກຳຂອງຫ້ອງການ, ເພື່ອເປັນການສ້າງ ຂະບວນການຕ້ອນຮັບວັນຊາດ ທີ 2 ທັນວາ ຄົບຮອບ 44 ປີ, ວັນສ້າງຕັ້ງກອງທັບປະຊາຊົນປະຕິວັດລາວ ຄົບຮອບ 70 ປີ, ວັນສ້າງຕັ້ງເມືອງວຽງໄຊ ແຂວງຫົວພັນ ທີ່ໝັ້ນຂອງການປະຕິວັດ ຄົບຮອບ 50 ປີ ແລະ ເປັນການສ້າງຂະບວນການຂຳນັບຮັບຕ້ອນກອງປະຊຸມໃຫຍ່ ຄັ້ງທີ 7 ຂອງອົງຄະນະພັກເມືອງເມືອງຈັນທະບູລີ,​ຊົມເຊີຍຜົນສຳເລັດຂອງກອງປະຊຸມໃຫຍ່ ຄັ້ງທີ 5 ຂອງຮາກຖານພັກສຶກສາທິການແລະກິລາເມືອງຈັນທະບູລີ ກໍ່ຄື : ກອງປະຊຸມໃຫຍ່ຄັ້ງທີ 13 ຂອງໜ່ວຍພັກຫ້ອງການສຶກສາທິການ ແລະ ກິລາເມືອງຈັນທະບູລີ ທີ່ສຳເລັດໄປ ແລະ ເພື່ອເຮັດໃຫ້ການເຄື່ອນໄຫວວຽກງານພະລະ ແລະ ສີລະປະສຶກສາ ໃຫ້ຖືກຕາມ 3 ລັດສະນະ, 3 ຂໍ້ແຂ່ງຂັນ ແລະ 5 ຫຼັກມູນຂອງການສຶກສາ ທີ່ທາງກະຊວງສຶກສາທິການ ແລະ ກິລາ ວາງອອກ. ສະພາບລວມໃນສົກຮຽນ 2019-2020 ທົ່ວເມືອງຈັນທະບູລີ ມີໂຮງຮຽນອະນຸບານ, ປະຖົມ, ມ ຕົ້ນ ແລະ ມ ປາຍທັງພາກລັດ ແລະ ເອກະຊົນມີໂຮງຮຽນ 63 ແຫ່ງ, ມີນັກຮຽນ 24.732 ຄົນ ເປັນຍິງ 12.158 ຄົນ ແລະ ມີຄູ 1.090 ຄົນ ເປັນຍິງ 862 ຄົນ. ການແຂ່ງຂັນກິລາໃນຄັ້ງນີ້ ແມ່ນຈະດຳເນີນຕັ້ງແຕ່ວັນທີ 5 ພະຈິກ ຫາ 6 ທັນວາ 2019 ມີທັງໝົດ 4 ລະດັບ ແລະ ແຂ່ງຂັນທັງໝົດ 5 ປະເພດກິລາ ປະກອບມີ ລະດັບຊັ້ນອະນຸບານ ກິລາແລ່ນໄວ ມີ 22 ໂຮງຮຽນ, ກິລາແລ່ນປ່ຽນສົ່ງໄມ້ 22 ໂຮງຮຽນ ແລະ ກິລາບານເຕະຊາຍ ມີ 10 ທີມເຂົ້າຮ່ວມ; ລະດັບຊັ້ນປະຖົມ ກິລາແລ່ນໄວ ມີ 31 ໂຮງຮຽນ, ກິລາກະຕໍ້ຊາຍ ມີ 10 ໂຮງຮຽນ ແລະ ບານເຕະຊາຍ ມີ 22 ໂຮງຮຽນ ເຂົ້າຮ່ວມ; ລະດັບຊັ້ນມັດທະຍົມຕອນຕົ້ນ ກິລາເປຕັງ ມີທັງໝົດ 16 ທີມ ແບ່ງເປັນທີມຍິງ 7 ທີມ, ກິລາກະຕໍ້ ມີທັງໝົດ 17 ທີມ ແບ່ງເປັນທີມຍິງ 7 ທີມ, ກິລາບານສົ່ງ ມີທັງໝົດ 18 ທີມ ແບ່ງເປັນທີມຍິງ 9 ທີມ ແລະ ກິລາບານເຕະ ມີທັງໝົດ 20 ທີມ ແບ່ງເປັນທີມຍິງ 8 ທີມ ແລະ ລະດັບຊັ້ນມັດທະຍົມຕອນປາຍ ກິລາເປຕັງ ມີທັງໝົດ 16 ທີມ ແບ່ງເປັນທີມຍິງ 8 ທີມ, ກິລາກະຕໍ້ ມີທັງໝົດ 15 ທີມ ແບ່ງເປັນທີມຍິງ 7 ທີມ, ກິລາບານສົ່ງ ມີທັງໝົດ 16 ທີມ ແບ່ງເປັນທີມຍິງ 8 ທີມ ແລະ ກິລາບານເຕະ ມີທັງໝົດ 18 ທີມ ແບ່ງເປັນທີມຍິງ 7 ທີມ. ນອກຈາກນັ້ນ, ທາງຫ້ອງການສຶກສາທິການ ແລະ ກິລາເມືອງຈັນທະບູລີ ຍັງຈະໄດ້ມີການຈັດການແຂ່ງຂັນສີປະລະ ຂຶ້ນອີກໃນວັນທີ 4-6 ທັນວາ ນຳອີກ.

     ພ້ອມກັນນັ້ນ, ທ່ານ ນາງ  ບົວລອນ ວົງດາລາແສນ ກໍ່ໄດ້ກ່າວຊົມເຊີຍ ແລະ ມີຄຳເຫັນຕໍ່ການເປີດພິທີແຂ່ງຂັນກິລາ ຂໍໃຫ້ພະນັກງານ, ຄູ-ອາຈານ ຈົ່ງເອົາໃຈໃສ່ ນຳພານັກຮຽນ, ນັກກິລາ ແຂ່ງຂັນກັນຢ່າງມ່ວນຊື່ນ, ຮັກແພງ, ສາມັກຄີກັນ, ຫຼິ້ນກິລາເພື່ອສຸຂະພາບ ແລະ ມິດຕະພາບ. ສ້າງແນວຄິດເພື່ອແຜ່ ແລະ ໃຫ້ອາໄພເຊິ່ງກັນແລະກັນ ຕະຫຼອດໄລຍະແຂ່ງຂັນກິລາ ເພື່ອໃຫ້ງານໃນຄັ້ງນີ້ ສຳເລັດໄປດ້ວຍດີ ແລະ ເປັນໄປຕາມຈຸດປະສົງທຸກຢ່າງ.

.         

ໂດຍ: ວັນສົດໃສ