ລາຍລະອຽດຂ່າວ
ເທຄວັນໂດ ຊີງຂັນທ່ານເອກອັກຄະລັດຖະທູດ ສ ເກົາຫຼີ ຄັ້ງທີ V ຈະເປີດສາກເສົານີ້
ຂຽນເມື່ອ: 04/11/2019 22:11 | ໂດຍ: ເພຣເມັກເກີ | ອ່ານ: 122 ຄັ້ງ

      ການ​ແຂ່ງ​ຂັນ​ກິ​ລາ​ເທຄວັນໂດຮຸ່ນ​ອາ​ນຸ​ຊົນ, ເຍົາ​ວະ​ຊົນ ແລະ ຮຸ່ນ​ຊາວ​ໜຸ່ມ  ທົ່ວ​ປະ​ເທດ ຊີງຂັນທ່ານເອກອັກຄະລັດຖະທູດ ສ ເກົາຫຼີ ປະຈຳ ສປປ ລາວ  ຄັ້ງ​ທີ V ປະ​ຈຳ​ປີ 2019 ເພື່ອ​ເປັນ​ການ​ເລືອກ​ເຟັ້ນ​ນັກ​ກິ​ລາ​ທີມ​ຊາດ ກຽມ​ສົ່ງ​ຮ່ວມ​ລ່າ​ຫຼຽນ​ຄຳ ຊີ​ເກມ ຄັ້ງ​ທີ XXX ທີ່​ປະ​ເທດ​ຟິ​ລິບ​ປິນ ທ້າຍ​ປີນີ້ ຈະ​ເປີດ​ສາກຂຶ້ນ​ໃນ​​ລະ​ຫວ່າງວັນ​ທີ 9-10 ພະ​ຈິກ 2019 ທີ່​ສະ​ໜາມ​ກິ​ລາ​ເທ​ຄວັນ​ໂດ​ຊົວ​ຄາວ ສູນ​ການ​ຄ້າ​ລາວ-ໄອ​ເຕັກ (ຊັ້ນ 2 ຕຶກເກົ່າ) ເມືອງ​ໄຊ​ເຊດ​ຖາ ນະ​ຄອນ​ຫຼວງວຽງ​ຈັນ ລາຍ​ການ​ດັ່ງ​ກ່າວ​ມີ​ການຊີງໄຊ​ກັນ​ເຖິງ 136 ລາຍ ການ. 

      ເມື່ອທ້າຍອາທິດ ຜ່ານມາ ທີ່​ຫ້ອງ​ການ​ຄະ​ນະ​ກຳ​ມະ​ການ​ໂອ​ແລມ​ປິກ​ແຫ່ງ​ຊາດ​ລາວ ເມືອງ​ຈັນ​ທະ​ບູ​ລີ ນະ​ຄອນ​ຫຼວງວຽ​ງ​ຈັນ ໄດ້ມີພິທີຖະແຫຼງຂ່າວ ແລະ ມອບເງິນສະໜັບສະໜູນຈັດການແຂ່ງຂັນຈໍານວນ 10.065 ໂດລາ ໂດຍຕາງໜ້າກ່າວມອບ​ໂດຍ ທ່ານ ຊິນ ຈອງວູ ຕາງໜ້າຈາກ ສະຖານທູດ ສ ເກົາຫຼີ ປະຈຳ ສປປ ລາວ​ທັງ​ເປັນ​ຫົວ​ໜ້າ​ຄູ​ຝຶກ​ທັບ​ນັກ​ກິ​ລາ​ເທ​ຄວັນ​ໂດ​ທີມ​ຊາດ​ລາວ ແລະ​ ໃຫ້ກຽດຕາງໜ້າກ່າວຮັບໂດຍ ທ່ານ ກະເສມ ອິນທະລາ ຮອງປະທານຄະນະກຳມະການໂອແລມປີກແຫ່ງຊາດລາວ, ມີ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ເທ​ຄວັນ​ໂດ​ແຫ່ງ​ຊຳ​ດ, ຄະນະຄູຝືກ ແລະ ນັກ​ກິ​ລາ​ຈາກ​ສະ​ໂມອ​ສນ​ຕ່າງໆ​ຂອບ​ເຂດ​ທົ່ວ​ປະ​ເທດເຂົ້າຮ່ວມຢ່າງພ້ອມພຽງ.

      ໂອກາດດັ່ງກ່າວ ທ່ານ ຈັນທະວົງ ປັນຍາສິລິ ເລຂາທິການ ສະຫະພັນເທຄວັນໂດແຫ່ງຊາດລາວ ກ່າວວ່າ: ສະຫະພັນເທຄວັນໂດແຫ່ງຊາດລາວ ຮ່ວມກັບ ສະຖານທູດ ສ ເກົາຫຼີ ປະຈໍາ ສປປ ລາວ ໄດ້ຈັດການແຂ່ງຂັນລາຍການນີ້ຂຶ້ນມາເປັນຄັ້ງທີ V ນັບຕັ້ງແຕ່ປີ 2014, ໃນ​ນັ້ນ ບໍ່ໄດ້ຈັດປີ 2017. ແຕ່​ເຖິງ​ຢ່າງ​ໃດ​ກໍ​ດີ, ລາຍ​ການ​ດັ່ງ​ກ່າວໄດ້ເຮັດໃຫ້ນັ​ກ​ກິລາລາວ ໃນແຕ່ລະສະໂມສອນໄດ້ມີໂອກາດພັດທະນາ ແລະ ສ້າງປະສົບການກ້າວສູ່ທີມຊາດມາໂດຍສະຫຼອດ ເຊັ່ນດຽວກັບປີນີ້ຈັດຂຶ້ນ ເພື່ອເນັ້ນການພັດທະນາວົງການເທຄວັນໂດລາວ ກ້າວຂຶ້ນໄປເລື້ອຍໆ ແລະ ສ້າງນັກກິລາໃຫ້ຫຼາຍຂຶ້ນກວ່າເກົ່າ ລວມເຖິງເປັນການພົວພັນລະຫວ່າງ 2 ປະເທດ ສປປ ລາວ ແລະ ສ ເກົາຫຼີ ໃຫ້ມີຄວາມໜ້ຽວແໜ້ນ​ຂຶ້ນ​ເລື້ອຍໆ ແລະ ລາຍ​ການ​ດັ່ງ​ກ່າວ ກໍ​ຍັງ​ຈະ​ເປັນ​ເວ​ທີ​ທີ່​ເປີດ​ໂອ​ກາດ​ໃຫ້​ນັກ​ກະ​ລາ​ຮຸ່ນ​ໃໝ່ ສາ​ມາດ​ແຈ້ງ​ເກີດ ແລະ ກ້າວ​ຂຶ້ນ​ມາ​ເປັນ​ນັກ​ກິ​ລາ​ທີມ​ຊາດ ກຽມ​ສົ່ງ​ເຂົ້າ​ຮ່ວມ ຊີ​ເກມ ທີ່​ປະ​ເທດ​ຟິ​ລິບ​ປິນ ໃນ​ທ້າຍ​ປີນີ້ ອີກ​ດ້ວຍ ການ​ແຂ່ງ​ຂັນ​ຄັ້ງ​ນີ້ ມີນັກ​ກິ​ລາ 350 ຄົນ ຈາກ 22 ສະໂມສອນ ໃນຂອບເຂດທົ່ວປະເທດ ແຈ້ງ​ເຂົ້າ​ຮ່ວມ​ແຂ່ງ​ຂັນ.

       ການແຂ່ງຂັນລາຍການນີ້ມີການ​ຊີງ​ໄຊ​ກັນ​ທັງ​ໝົດ 6 ຮຸ່ນ ຄື: 8, 10, 12, 15, 17 ແລະ ຮຸ່ນທົ່ວໄປ ໂດຍມີການແຂ່ງຂັນທັງປະເພດຕໍ່ສູ້ ແລະ ປະເພດຟ້ອນປຸມເຊ ລວມລາຍການແຂ່ງຂັນທັງໝົດແມ່ນ 136 ລາຍການ ພິເສດຈະມີການລາຍສໍາລັບມືໃໝ່ ແລະ ມີນັກກີລາຈາກຕ່າງແຂວງເຖິງ 7 ແຂວງປະກອບມີ: ແຂວງບໍ່ແກ້ວ, ຫຼວງພະບາງ, ຊຽງຂວາງ, ອຸດົມໄຊ, ບໍລິຄໍາໄຊ, ຄໍາມ່ວນ ແລະ ຈໍາປາສັກ ສ່ວນລາງວັນຊະນະເລີດ, ອັນດັບ 2 ແລະ ອັນດັບ 3 ຈະໄດ້ຫຼຽນ ( ຄໍາ, ເງິນ ແລະ ທອງ ຕາມລໍາດັບ ) ພ້ອມໃບຢັ້ງຢືນສະຖິຕິ. ນອກນັ້ນ, ນັກ​ກິ​ລາ​ທີ່​ໄດ້​ຊະ​ນະ​ເລີດ​ກໍ​ຈະ​ມີ​ການລວມ​ຄະ​ແນນ ຜູ້ທີ່​ໄດ້​ຄະ​ແນນສູງສຸດອັນດັບ 1, 2, 3 ​ຈະ​ໄດ້​ຄອງຂັນລາງວັນນັກ​ກິລາດີເດັ່ນຕ່າງໆ ​ພ້ອມ​ທັງໄດ້ຄະແນນ​ສະສົມ​​ຂອງ​ຕົນ​ເອງ​ເພື່ອ​ລຸ້ນ​ເຂົ້າ​ຮ່ວມ​ງານ​ມະ​ຫາ​ກຳ​ກິ​ລາ​ແຫ່ງ​ຊາດ ຈະ​ຈັດ​ຂຶ້ນ​ທີ່​ແຂວງ​ຊຽງ​ຂວາງ ໃນ​ປີ 2020 ອີກ​ດ້ວຍ. 

ໂດຍ: ປາກກາດຳ