ລາຍລະອຽດຂ່າວ
ສະໂມສານຈາກລາວ ແລະໄທ ໄດ້ແຊ້ມ ຄົນລະຮຸ້ນ ໃນ​ບານເຕະ 2 ຊາດ ​ລາວ-ໄທ ຕ້ອ​ນ​ຮັບ​ວັນ​ຊາດ ທີ 2 ທັນ​ວາ
ຂຽນເມື່ອ: 04/11/2019 11:11 | ໂດຍ: ເພຣເມັກເກີ | ອ່ານ: 176 ຄັ້ງ

      ສະ​ໂມ​ສອນ ລ໋ອບ ສະ​ເຕ​ດ້ຽມ ລົງ​ສະ​ໜາມ 3 ນັດ ຊະ​ນະ​ລວດ 3 ນັດ​ຊ້ອນ ມີ 9 ຄະ​ແນນ​ເຕັມ ຄວ້າ​ແຊ໋ມ​ການ​ແຂ່ງ​ຂັນ​ກິ​ລາ​ເຕະ​ບານ 4 ພາກ​ສ່ວນ 2 ຊາດ​ລາວ-ໄທ ຊີງ​ຂັນ​ທ່ານ​ປະ​ທານ​ຝ່າຍ​ພັດ​ທະ​ນາ​ກິ​ລາ​ເຕະ​ບານ​ອາ​ນຸ​ຊົນ ແລະ ເຍົາ​ວະ​ຊົນ ນະ​ຄອນ​ຫຼວງວຽງ​ຈັນ (ນວ) ປະ​ຈຳ​ປີ 2019 ເພື່ອ​ສ້າງ​ຂະ​ບວນ​ການ​ຂ່ຳ​ນັບ​ຮັບ​ຕ້ອນ​ວັນ​ຊາດ​ທີ 2 ທັນ​ວາ ຄົບ​ຮອບ 44 ປີ ແລະ ສືບ​ຕໍ່​ສົ່ງ​ເສີມ​ຄວາມ​ຮັດ​ແໜ້ນ​ສາ​ມັກ​ຄີ​ຮັກ​ແພງ​ມິດ​ຕະ​ພາບ 2 ຊາດ​ດັ່ງ​ກ່າວ ກໍ​ຄື ນະ​ຄອນ​ຫຼວງວຽງ​ຈັນ ແລະ ສະ​ໂມ​ສອນ ວໍ​ລະ​ວີ ຈາກ​ນະ​ຄອນ​ຫຼວງ​ບາງກອກ ປະ​ເທດ​ໄທ ໃຫ້​ນ​ັບ​ມື້​ແໜ້ນ​ແຟ້ນ​ຂຶ້ນ​ເລື້ອຍໆ.

      ການ​ແຂ່ງ​ຂັນ 2 ຊາດ​ລາວ-ໄທ ຊີງ​ຂັນ​ທ່ານ​ປະ​ທານ​ຝ່າຍ​ພັດ​ທະ​ນາ​ກິ​ລາ​ເຕະ​ບານ​ອາ​ນຸ​ຊົນ ແລະ ເຍົາ​ວະ​ຊົນ ນະ​ຄອນ​ຫຼວງວຽງ​ຈັນ (ນວ) ປະ​ຈຳ​ປີ 2019 ເພື່ອ​ສ້າງ​ຂະ​ບວນ​ການ​ຂ່ຳ​ນັບ​ຮັບ​ຕ້ອນ​ວັນ​ຊາດ​ທີ 2 ທັນ​ວາ ຄົບ​ຮອບ 44 ປີ ແລະ ສືບ​ຕໍ່​ສົ່ງ​ເສີມ​ຄວາມ​ຮັດ​ແໜ້ນ​ສາ​ມັກ​ຄີ​ຮັກ​ແພງ​ມິດ​ຕະ​ພາບ 2 ຊາດ​ດັ່ງ​ກ່າວ ກໍ​ຄື ນະ​ຄອນ​ຫຼວງວຽງ​ຈັນ ແລະ ສະ​ໂມ​ສອນ ວໍ​ລະ​ວີ ຈາກ​ນະ​ຄອນ​ຫຼວງ​ບາງກອກ ປະ​ເທດ​ໄທ ​ຄັ້ງ​ນີ້ ດຳ​ເນີນ​ເປັນ​ເວ​ລາ 2 ວັນ ລະ​ຫວ່າງວັນ​ທີ 2-3 ພະ​ຈິກ ຜ່ານ​ມາ ທີ່​ສະ​ໜາມ​ກິ​ລາ​ເຕະ​ບານ​ເຈົ້າ​ອາ​ນຸ​ວົງ ເຂົ້າ​ຮ່ວມ ແລະ ມອບ​ລາງວັນ​ຂອງ​ທ່ານ ສົມ​ປອງ ທອງ​ມະ​ນີ ປະ​ທານ​ຝ່າຍພັດ​ທະ​ນາ​ກິ​ລາ​ເຕະ​ບານ​ອາ​ນຸ​ຊົນ ແລະ ເຍົາ​ວະ​ຊົນ ນະ​ຄອນ​ຫຼວງວຽງ​ຈັນ ພ້ອມ​ດ້ວຍ​ຄະ​ນະ ແລະ ຄະ​ນະ​ຕາງ​ໜ້າ​ຈາກ​ສະ​ໂມ​ສອນ ວໍ​ລະ​ວີ ປະ​ເທດ​ໄທ, ຄະ​ນະ​ຄູ​ຝຶກ​ແຕ່​ລະ​ສະ​ໂມ​ສອນ, ນັກ​ກິ​ລາ ແລະ ພໍ່​ແມ່​ນັກ​ກິ​ລາ​ເຂົ້າ​ຮ່ວມ​ຊົມ ແລະ ເຊຍ​ຫຼາຍ​ຮ້ອຍ​ຄົນ.  

      ລາຍ​ການ​ດັ່ງ​ກ່າວ, ຈັດ​ຂຶ້ນ​ລະ​ຫວ່າງວັນ​ທີ 2-3 ພະ​ຈິກ 2019 ໂດຍ​ມີ​ການ​ຊີງ​ໄຊ​ກັນ​ທັງ​ໝົດ 2 ຮຸ່ນ ກໍ​ຄື ຮຸ່ນ​ອາ​ຍຸ 13 ປີ ແລະ ຮຸ່ນ​ອາ​ຍຸ 15 ປີ ແຕ່​ລະ​ຮຸ່ນ​ມີ 4 ທີມ​ເຂົ້າ​ຮ່ວມ ແຂ່ງ​ຂັນ​ແບບ​ພົບ​ກັນ​ໝົດ​ຄັດ​ເອົາ​ທີມ​ທີ່​ມີ​ຄະ​ແນນ​ດີ​ທີ່​ສຸດ​ໄດ້​ແຊ໋ມ​ລາຍ​ການນີ້ ໄປ​ຄອງ ຜ່ານ​ການ​ແຂ່ງ​ຂັນ ຜົນ​ປະ​ກົດ​ວ່າ:

      ຮຸ່ນອາ​ຍຸ 15 ປີ ແຊ໋ມ​ຕົກ​ເປັນ​ຂອງ ທີມ​ລ໋ອບ ສະ​ເຕ​ດ້ຽມ ລົງ​ສະ​ໜາມ 3 ນັດ ສາ​ມາດ​ເອົາ​ຊະ​ນະ 3 ນັດ​ຊ້ອນ​ມີ 9 ຄະ​ແນນ​ເຕັມ, ທີ 2 ສະ​ໂມ​ສອນ ທະ​ເວັນ​ຕີ​ຊີກ ລົງ​ສະ​ໜາມ 3 ນັດ ຊະ​ນະ 2 ນັດ ແລະ ເສຍ 1 ນັດ ມີ 6 ຄະ​ແນນ, ທີ 3 ທີມ​ນະ​ຄອນ​ຫຼວ​ງວຽງ​ຈັນ ລົງ​ສະ​ໜາມ 3 ນັດ ຊະ​ນະ 1 ນັດ ແລະ ເສຍ 2 ນັດ ມີ 3 ຄະ​ແນນ ແລະ ທີ 4 ທີມ​ວໍ​ລະ​ວີ ໄທ ລົງ​ສະ​ໜາມ 3 ນັດ ບໍ່​ສາ​ມາດ​ເອົາ​ຊະ​ນະ ແລະ ສະ​ເໝີ​ໄດ້ 0 ​ຄະ​ແນນ

      ສ່ວນ​ຮຸ່ນ​ອາ​ຍຸ 13 ປີ ທີ 1 ທີມ​ວໍ​ລະ​ວີ ໄທ ລົງ​ສະ​ໜາມ 3 ນັດ ຊະ​ນະ​ລວດ 3 ນັດ​ຊ້ອນ ມີ 9 ຄະ​ແນນ, ທີ 2 ທີມ​ວຽງ​ຈັນ ເອັບ​ທີ ລົງ​ສະ​ໜາມ 3 ນັດ ຊະ​ນະ 1, ສະ​ເໝີ 1 ແລະ ເສຍ 1 ນັດ​ມີ 4 ຄະ​ແນນ, ທີ 3 ທີມ​ລ໋ອບ ສະ​ເຕ​ດ້ຽມ ລົງ​ສະ​ໜາມ 3 ນັດ ຊະ​ນະ 1 ນັດ ແລະ ເສຍ 2 ນັດ ມີ 3 ຄະ​ແນນ ແລະ ທີ 4 ທີມ​ນະ​ຄອນ​ຫຼວງ ລົງ​ສະ​ໜາມ 3 ນັດ ເສຍ 2 ນັດ ແລະ ສະ​ເໝີ 1 ນັດ​ມີ 1 ຄະ​ແນນ.

ພາບແລະຂ່າວໂດຍ: ປາກກາດຳ