ນາງ ລົດ​ແກ້ວ ​ອິ​ນ​ທະ​ກຸມ​ມານ ລາຊີນີແລ່ນແຫ່ງວົງການແລ່ນທົນຂອງລາວ, ນັກ​ກິ​ລາ​ແລ່ນ-ລານ​ທີມ​ຊາດ​ລາວ ​ທັງ​ເປັນ​ເຈົ້າ​ຂອງ​ຫຼຽ​ນ​ທອງ ​ແລ່ນ 5.000 ກິ​ໂລ​ແມັດ ງານ​ກິ​ລາຊີ​ເກມ ທີ່​ປະ​ເທດ​ມາ​ເລ​ເຊຍ ເມື່ອ​ປີ 2017 ສ້າງ​ຜົນ​ງານ​ໄດ້​ຢ່າງໂດດ​ເດັ່ນ​ອີກ​ຄັ້ງ ຫຼັງ​ກວາດແຊ້ມ 2 ລາຍ​ການ ຊີງ​ແຊ້ມ ລະ​ດັບ​ນາໆ​ຊາດ ແລະ ກຸ່ມຮຸ່ນອາຍຸ 16-29 ປີ ໄລຍະທາງ 16 ກິໂລແມັດ ລາຍ​ການ​ແລ່ນ SuperSports 10 miles 2019 International RunSeries Thailand ໂດຍ​ມີ​ນັກ​ກິ​ລາ​ຈາກ​ທົ່ວ​ໂລກ​ເຂົ້າ​ຮ່ວມ 2 ພັນ​ກວ່າ​ຄົນ.

          ການ​ແຂ່ງ​ຂັນ​ລາຍ​ການ​ດັ່ງ​ກ່າວ ຈັດ​ຂຶ້ນ ເມື່ອວັນ​ທີ 27 ຕຸ​ລາ ຜ່ານ​ມາ ທີ່​ແຂວງຊຽງ​ໃໝ່ ​ປະ​ເທດ​ໄທ ໂດຍມີ​ນັກ​ກິ​ລາ​ຈາກ​ທົ່ວ​ໂລກ​ເຂົ້າ​ຮ່ວມ 3.000 ກວ່າ​ຄົນ, ໃນ​ນັ້ນ ມີ​ນາງ ລົດ​ແກ້ວ ອິນ​ທະ​ກຸມ​ມານ ໜຶ່ງ​ດຽວ​ນັກ​ກິ​ລາ​ແລ່ນ ຈາກ ສ​ປ​ປ ລາວ ເຂົ້າ​ຮ່ວມ​ແຂ່ງ​ຂັນ ຜ່ານ​ການ​ແຂ່ງ​ຂັນ​ຜົນ​ປະ​ກົດ​ວ່າ​ນາງ ລົດ​ແກ້ວ ສ້າງ​ຜົນ​ງານ​ໃຫ້​ແຟນ​ພັນ​ແທ້​ກິ​ລາ​ແລ່ນ-ລານ ບໍ່​ຜິດ​ຫວັງ ສາ​ມາດແລ່ນ​ເຂົ້າ​ເສັ້ນ​ໄຊ ​ເປັນຄົນ​ທຳ​ອິດ ໃນລາຍ​ການ​ນາໆ​ຊາດ ​ຄວ້າແຊ້ມ​ລາຍ​ການ SuperSports 10 miles 2019 International RunSeries Thailand ໄປ​ຄອງ ແລະ ເປັນ​ແຊ້ມ​ສະ​ໄໝ​ທີ 2 ຕິດ​ຕໍ່​ກັນ ຢ່າງ​ໜ້າ​ພາກ​ພູມ​ໃຈ. ນອກ​ຈາກນັ້ນ, ສາວ​ລົດ​ແກ້ວ ຍັງ​ສາ​ມາດ​ຍາດ​ໄດ້​ອັນ​ດັບທີ 1 ​ປະ​ເພດກຸ່ມອາຍຸ 16-29 ປີ ໄລຍະທາງ 16 ກິໂລແມັດ ດ້ວຍ​ເວລາ 62 ນາທີ ອີກ​ດ້ວຍ. ຂະ​ນະ​ທີ່ ອັນ​ດັບ​ທີ 2 ຕົກ​ເປັນ​ຂອງ​ນາງ ສາຍ​ຝົນ ນັກ​ກິ​ລາ​ເຈົ້າພາບ ອະ​ດີດ​ເຈົ້າ​ຂອງ​ຫຼຽນ​ຄຳ ຊີ​ເກມ ທີ່​ສິງ​ກະ​ໂປ ​ເມື່ອ2015 ແລະ ​ເຈົ້າ​ຫຼຽນ​ທອງ ກົວ​ລາ​ລຳ​ເປີ ເກມ 2017 ທີ່​ປະ​ເທດ​ມາ​ເລ​ເຊຍ.

          ສາວ ລົດ​ແກ້ວ ອິນ​ທະ​ກຸມ​ມານ ໃຫ້​ສຳ​ພາດ​ວ່າ: ປີນີ້​ເປັນ​ປີ​ທີ່​ນ້ອງ​ມີ​ກຳ​ລັງ​ແຮງ​ຫຼາຍ​ທີ່​ສຸດ ແລະ ເປັນ​ປີ​ທີ່​ນ້ອງທຸ້ມ​ເທ​ທີ່​ສຸດ​ໃນ​ຊີ​ວິດ ​ເພື່ອ​ຫວັງ​ຢາກ​ຈະ​ສ້າງ​ປະ​ຫວັດ​ສາດ​ໜ້າ​ໃໝ່​ໃຫ້​ວົງ​ການ​ກິ​ລາ​ແລ່ນ-ລານ​ລາວ ກໍ​ຄື ທັບ​ນັກ​ກິ​ລາ​ລາວ ໃນ​ເວ​ທີ​ອາ​ຊຽນ ສະ​ນັ້ນ ຢາກ​ຈະ​ກ້າວ​ໄປ​ເຖິງ​ຈຸດນັ້ນ​ໄດ້ ກໍ​ຕ້ອງ​ໄດ້​ອົດ​ທົນ​ສູ້​ຊົນ​ພະ​ຍາ​ຍາມ​ປະ​ຕິ​ບັດ​ໃນ​ການ​ເກັບ​ຕົວ​ຝຶກ​ຊ້ອມຕະ​ຫຼອດ​ເວ​ລາ ໂດຍ​ນ້ອງ​ໄດ້ເລີ່​ມ​ຝຶກ​ຊ້ອມ​ຢ່າງ​ເອົາ​ຈິງ​ເອົາ​ຈັງມາ​ແຕ່​ເດືອນ​ສິງ​ຫາ 2019 ເປັນ​ຕົ້ນ​ມາ ປັດ​ຈຸ​ບັນ​ແມ່ນ​ມີ​ຄວາມ​ພ້ອມ​ເຕັມ​ຮ້ອຍ​ເປີ​ເຊັນ ຊີ​ເກມ ປີນີ້ ຈະ​ພະ​ຍາ​ຍາມສູ້​ຊົນ​ຍາດ​ເອົາ​ໄຊ​ຊະ​ນະ​ທີ່​ມີ​ກຽດ​ອັນ​ສະ​ຫງ່າ​ສີ​ມາ​ສູ່​ປະ​ເທດ​ຊາດ​ໃຫ້​ໄດ້.  

      ສໍາລັບຜົນງານຂອງ ລົດແກ້ວ ອິນ​ທະ​ກຸມ​ມານ  ລົງແຂ່ງຂັນທັງໝົດ 24 ສະ​ໜາມ ເມື່ອປີ 2018 (ງານລະດັບຂົງ​ເຂດ​ອາ​ຊຽນ​ມີ 5 ງານ ຄື: ເອ​ຊຽນ ເກມ Asian Games Indonesia, ມະ​ຫາ​ວິ​ທະ​ຍາ​ໄລອາ​ຊຽນ Asean University Games Mynmar, ງານ​ແລ່ນ ສິງ​ກະ​ໂປ ໂອ​ເພັນ Singapore Open, ໄທ​ແລ​ນ ໂອ​ເພັນ Thailand Open & ແລ່ນນາໆ​ຊາດ ​ຈີນ+ອາ​ຊຽນ CHINA-ASEAN International Marathon 2018 ຜົນ​ງານສາ​ມາດຕິດອັນດັບ ທີ1 ເຖິງ 17 ສະ​ໜາມ, ຕິດອັນດັບທີ 2 ຈຳ​ນວນ 3 ສະຫນາມ, ຕິດອັນດັບທີ 3 ຈຳ​ນວນ 2 ສະຫນາມ ສ່ວນປີ 2019 ກໍ່ກວາດແຊ້ມມາຫຼາຍກວ່າ 10 ລາຍການແລ້ວ ເຊິ່ງປັດຈຸບັນກໍາລັງຝຶກຊ້ອມຕໍ່ ເພື່ອກຽມ​ລ່າ​ຫຼຽນ​ຄຳ ປະ​ຫວັດ​ສາດ ໃຫ້​ວົງ​ການ​ແລ່ນ-ລານ​ລາວ ໃນ​ງານ​ກິ​ລາ ຊີເກມ ທີ່ປະເທດຟິລິບປິນ ຈະ​ຈັດ​ຂຶ້ນ​ລະ​ຫວ່າງວັນ​ທີ 30 ພະ​ຈິກ ຫາ 12 ທັນ​ວາ 2019.

ໂດຍ ປາກກາດຳ