ລາຍລະອຽດຂ່າວ
ເຈເດັ້ນ ຄອງແຊ້ມລົດຈັກທາງລ້ຽບ ວີອາຊີ 2019 ສະໄໝທີ 3 ກາຍເປັນນັກຂັບເນື້ອຫອມ ກຽມບິນໄປທົດສອບ ທີ່ມາເລເຊຍ
ຂຽນເມື່ອ: 28/10/2019 14:10 | ໂດຍ: ເພຣເມັກເກີ | ອ່ານ: 546 ຄັ້ງ

      ທ້າວ ເຈເດັ້ນ ນັກບິດລົດສອງລໍ້ ເບີ 1 ຂອງວົງການລົດຈັກລາວ ສາມາດປ້ອງກັນແຊ້ມການແຂ່ງຂັນລົດຈັກທາງລ້ຽບ ຊີງແຊ໋ມ ວີອາຊີ ປະຈຳປີ 2019 ສະໄໝທີ 3 ຕິດຕໍ່ກັນ ໄປຄອງ ຈັ້ງຕຳແໜ່ງການເປັນຜູ້ນຳຢ່າງໜ້ຽວແໜ້ນໃນປະເພດລົດ Sport 400 cc ແລະ Naked 200 cc ພ້ອມທັງເປັນຂ່າວດີ ຂອງວົງການລົດຈັກທາງລຽບ ຂອງລາວ ທາງຝ່າຍຈັດການແຂ່ງຂັນ Asia Telent Cup ໄດ້ເຮັດໜັງສືເຊີນເອົາ ເຈເດັ້ນ ໄປທົດສອບຄວາມສາມາດທີ່ປະເທດ ມາເລເຊຍ ໂດຍງານດັ່ງກ່າວ ຈະມີນັກຂັບລົດຈັກທາງລຽບ ຮ່ວມເຖິງ 19 ປະເທດ ໃນຈຳນວນ 120 ຄົນ.

       ການແຂ່ງຂັນຄັ້ງນີ້ ໄດ້ມີຂຶ້ນ ເມື່ອວັນທີ 26 ຕຸລາ ຜ່ານມາ ທີ່ສະໜາມແຂ່ງລົດຈັກທາງລ້ຽບ VRC ບ້ານນາຊອນ ເມືອງນາຊາຍທອງ ນະຄອນຫຼວງວຽງຈັນ ໄດ້ມີການແຂ່ງຂັນລົດຈັກທາງລຽບ ຊິງແຊ໋ມນະຄອນຫຼວງວຽງຈັນ ປະຈຳປີ 2019 ສະໜາມທີ 3 ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງ ພັນໂທ ສຸດໃຈ ສີຫາລາດ ຮອງຫົວໜ້າກອງບັນຊາການ ປກສ ເມືອງນາຊາຍທອງ ພ້ອມດ້ວຍຕາງໜ້າຈາກພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ທ່ານ ບຸນຍະເດດ ໄຊສົງຄາມ ປະທານສະໂມສອນ ລົດຈັກທາງລຽບ ວີອາຊີ ພ້ອມດ້ວຍຄະນະ ແລະ ບັນດາຄະນະນຳ, ຄູຝຶກ ແລະ ນັກກິລາ ຕະຫຼອດຮອດກອງເຊຍຂອງນັກກິລາແຕ່ລະຄົນເຂົ້າຮ່ວມຊົມ ແລເະ ເຊຍຢ່າງຫຼວງຫຼາຍ.

      ສຳລັບສະໜາມທີ 1 ມີການແຂ່ງຂັນຕັ້ງແຕ່ ຕົ້ນປີທີ່ຜ່ານມາ ເພື່ອໃຫ້ນັກຂັບລົດລາວ ໄດ້ສະສົມຄະແນນໃນແຕ່ລະສະໜາມ ເຊິ່ງການແຂ່ງຂັນມີທັງໝົດ 6 ລາຍການ ປະກອບມີ GIXXER Division 2 ແຂ່ງຂັນ 12 ຮອບສະໜາມ, NAKED 135 cc ແຂ່ງຂັນ 12 ຮອບສະໜາມ, NAKED ແລະ Sport 200cc ແຂ່ງຂັນ 12 ຮອບສະໜາມ, NEKED 400 cc ແຂ່ງຂັນ 12 ຮອບສະໜາມ, GIXXER Division 1 ແຂ່ງຂັນ 12 ຮອບ ແລະ Sport 400 cc ແຂ່ງຂັນ 12 ຮອບ ໂດຍໄຮໄລຂອງການແຂ່ງຂັນ ໃນຄັ້ງນີ້ ຢູ່ທີ່ປະເພດ Sport 400 cc ລາຍການດັ່ງກ່າວ ມີນັກແຂ່ງເຖິງ 7 ຄົນ ເຊີງຄະແນນນຳ 2 ສະໜາມທີ່ຜ່ານມາແມ່ນ ເຈເດັ້ນ ນັກຂັບລູກຊອດ ລາວ-ອັງກິດ ເປັນຜູ້ນຳຈ່າຝູງ ແລະ ຄະແນນສະສົມອັນດັບທີ 2 ເປັນ ແອງໃມ ຜ່ານການແຂ່ງຂັນໃນລາຍການນີ້ ເຈເດັ້ນ ນຳມ້ວນດຽວຈົບ ບິດລົດຄູ່ໃຈເຂົ້າເສັ້ນໄຊ ແບບສະບາຍ ເກັບເພີ່ມອີກ 5 ຄະແນນ ນຳຫ່າງເປັນອັນດັບ 1 ໂອກາດຄວ້າແຊ໋ມມີສູງ ສ່ວນອັນດັບ 2 ເປັນ ແອງໃມ, ອັນດັບ 3 ໂດໂດ້ ແລະ ອັນດັບ 4 ອ໋ອຟ ວົງໄຊ

      ສ່ວນຜົນການແຂ່ງຂັນປະເພດ ອື່ນໆ GIXXER Division 1 ອັນດັບ 1 ເຈເດັ້ນ, ອັນດັບ 2 ແອງໃມ, ອັນດັບ 3 ແຈັກກີ້, ປະເພດ GIXXER Division 2 ອັນດັບ 1 ໂດ່ໂດ້, ອັນດັບ 2 ໂອເຄ້, ອັນດັບ 3 ຟິດໂຊ້, ປະເພດ NAKED 135 ອັນດັບ 1 ອໍ່ດີ້, ອັນດັບ 2 ຕົ້ນຄູນ ແລະ ອັນດັບ 3 BM, ປະເພດ NAKED 200 ອັນດັບ 1 ຟິດໂຊ້ ອັນດັບ 2 BOB ແລະ ອັນດັບ 3 ດຳ, ປະເພດ Sport 200 cc ອັນດັບ 1 ແອງໃມ, ອັນດັບ 2 ແຈັກກີ້, ອັນດັບ 3 Dj ມິ່ງ ແລະ ປະເພດ NAKED 400 cc ອັນດັບ 1 ເບ, ອັນດັບ 2 ສະຫຼາມ ແລະ ອັນດັບ 3 ໂຫ່. ແນວໃດກໍຕາມ, ການແຂ່ງຂັນສະໜາມສຸດທ້າຍ ສະໜາມທີ 4 ຈະມີຂື້ນໃນເດືອນ ທັນວາ ແລະ ຈະມີພິທີປິດມອບຂັນຊະນະເລີດ ປະຈຳປີ 2019 ໃຫ້ນັກກິລາໃນມື້ນັ້ນ ອີກດ້ວຍ.

      ຕໍ່ຜົນງານດັ່ງກ່າວ ເຮັດໃຫ້ ເຈເດັ້ນ ກາຍເປັນນັກຂັບລົດຈັກທາງລຽບເນື້ອຫອມ ແລະ ເປັນຂ່າວດີ ຂອງວົງການລົດທາງລຽບ ຂອງລາວ ເນື່ອງຈາກວ່າຝ່າຍຈັດການແຂ່ງຂັນ Asia Telent Cup ໄດ້ເຮັດໜັງສືເຊີນ ເຈເດັ້ນ ໄປທົດສອບຄວາມສາມາດທີ່ປະເທດ ມາເລເຊຍ ໂດຍຈະມີນັກຂັບ ຈາກ 19 ປະເທດ ໃນຈຳນວນ 120 ຄົນ ໃນທົ່ວເອເຊຍ ໂດຍຝ່າຍຈັດການແຂ່ງຂັນຈະຄັດໃຫ້ເຫຼືອ 22 ຄົນ ຖ້າຫາກ ເຈເດັ້ນ ຜ່ານການຄັດເລືອກແມ່ນຈະໄດ້ເປັນນັກແຂ່ງລະດັບອາຊີບ ເຊີ່ງຈະເລີ່ມແຂ່ງຂັນໃນປີ 2020 ໂດຍເຈເດັ້ນ ພ້ອມດ້ວຍທີມງານ ແລະ ຄອບຄົວຈະເດີນທາງປະທີ່ສະໜາມ ເຊປັ່ງ ປະເທດມາເລເຊຍ ໃນວັນທີ 29 ຕຸລາ 2019 ນີ້ ຖ້າຫາກ ເຈເດັ້ນ ຜ່ານການຄັດເລືອກ ຈະເປັນຄົນລາວຄົນທຳອິດທີ່ ເປັນນັກແຂ່ງລົດຈັກທາງລຽບ ລະດັບອາຊີບ.

ໂດຍ: ປາກກາດຳ

ພາບໂດຍ: ຈ່ອຍ ເຊຍລາວ

 

ສະໜັບສະໜູນຂ່າວໂດຍ:



ຂ່າວລ່າສຸດ