ລາຍລະອຽດຂ່າວ
ປັນຈັກສີລັດລາວ ໄດ້ 12 ນັກສູ້ ກຽມລ່າຫຼຽນຄຳ ຊີເກມ ທີ່ປະເທດຟິລິບປິນ
ຂຽນເມື່ອ: 25/10/2019 16:10 | ໂດຍ: ເພຣເມັກເກີ | ອ່ານ: 329 ຄັ້ງ

      ສະຫະພັນກິລາປັນຈັກສີລັດແຫ່ງຊາດລາວ ສາມາດຄັດເລືອກໄດ້ 12 ນັກສູ້ ຕົວແທນທັບນັກກິລາປັນຈັກສີລັດທີມຊາດລາວ, ຍິງ 3 ຄົນ ໃນການລົງແຂ່ງຂັນທັງໝົດ 9 ລາຍການ ກຽມສົ່ງເຂົ້າຮ່ວມລ່າຫຼຽນຄຳ ງານມະຫາກຳກິລາຊີເກມ ຄັ້ງທີ XXX ທີ່ປະເທດຟິລິບປິນ ຮັບກຽດເປັນເຈົ້າພາບ ທີ່ຈະຈັດຂຶ້ນລະຫວ່າງວັນທີ 30 ພະຈິກ ຫາ 12 ທັນວາ 2019. ຂະນະທີ່ ນາງ ນ້ອງອ້ອຍ ວົງພັກດີ ເຈົ້າຂອງຫຼຽນເງິນ ງານກິລາເອຊຽນເກມ 2018 ຮຸ່ນນໍ້າໜັກ 60 ກິໂລກຣາມ ພ້ອມເປີດເຜີຍຄວາມຮູ້ສຶກ ສຸດເສຍດ່າຍອົດຊ່ວຍທີມຊາດລາວ ທັງໆທີ່ປີນີ້ ນ້ອງອ້ອຍຊ້ອມໜັກມີຄວາມພ້ອມທາງດ້ານສະພາບຈິດໃຈ ແລະ ກຳລັງຟິດເຕັມຮ້ອຍເປີເຊັນ.

       ຕາມການລາຍງານຂອງ ຮ້ອຍໂທ ທິບພົງພັດ ມານິວົງ ເລຂາທິການສະຫະພັນກິລາປັນຈັກສີລັດແຫ່ງຊາດລາວ ແຈ້ງໃຫ້ຊາບວ່າ: ປັດຈຸບັນສາມາດຄັດເລືອກນັກກິລາໄດ້ຈຳນວນ 12 ຄົນ, ຍິງ 2 ຄົນ ສົ່ງເຂົ້າຮ່ວມແຂ່ງຂັນ ງານມະຫາກຳກິລາຊີເກມ ທີ່ປະເທດຟິລິບປິນ ໄດ້ຢ່າງເປັນທາງການແລ້ວ ໂດຍໄດ້ສົ່ງເຂົາເຈົ້າເລົ່ານີ້ ໄປເກັບຕົວຝຶກຊ້ອມຢູ່ທີ່ ນະຄອນໂຮຈິມິນ ສສ ຫວຽດນາມ ລະຫວ່າງວັນທີ 8 ຕຸລາ ຫາ 23 ພະຈິກ 2019 ຫຼັງຈາກກັບມາເຖິງ ນະຄອນຫຼວງວຽງຈັນ ແລ້ວ ກໍຈະສືບຕໍ່ອອກເດີນທາງເຂົ້າຮ່ວມລ່າຫຼຽນຄຳ ໃນງານກິລາດັ່ງກ່າວ ອີງຕາມການລາຍງານຂອງຄະນະຄູຝຶກ ທີ່ເກັບຕົວຢູ່ ນະຄອນໂຮຈິມິນບອກວ່າ ການເກັບຕົວຝຶກຊ້ອມຢູ່ທີ່ນັ້ນ ແມ່ນເປັນໄປຕາມເປົ້າໝາຍທີ່ວາງໄວ້ ທາງເຈົ້າພາບ ໃຫ້ການຕ້ອນຮັບຢ່າງອົບອຸ່ນ ໂດຍສະເພາະທາງດ້ານທີ່ພັກ ແລະ ອາຫານການກິນ ນັກກິລາທຸກຄົນແມ່ນມີຄວາມແຂງແກ່ນດີຂຶ້ນກວ່າເກົ່າຫຼາຍ ແລະ ທຸກຄົນກໍມີສະພາບຕິດໃຈເຕັມຮ້ອຍເປີເຊັນ ພ້ອມຈະເຂົ້າຮ່ວມຍາດເອົາໄຊຊະນະ ເພື່ອສ້າງກຽດສັກສີ ແລະ ຊື່ສຽງມາສູ່ປະເທດຊາດ.

       ຂະນະທີ່ນາງ ນ້ອຍອ້ອຍ ວົງພັກດີ ນັກກິລາປັນຈັກສີລັດທີມຊາດລາວ ເຈົ້າຂອງຫຼຽນເງິນ ງານມະຫາກຳກິລາ ເອຊຽນ ເກມ ປີ 2018 ທີ່ປະເທດອິນໂດເນເຊຍ ກໍໄດ້ລາຍງານຈາກ ສູນຝຶກຊ້ອມກິລາ ນະຄອນໂຮຈິ່ມິນ ໃຫ້ທີມງານພວກເຮົາຊາບວ່າ: ໂດຍສ່ວນຕົວນ້ອງແລ້ວ ແມ່ນມີຄວາມຮູ້ສຶກເສຍ ດາຍທີ່ສຸດທີ່ຝ່າຍຈັດການແຂ່ງຂັນບໍ່ໄດ້ບັນຈຸຮຸ້ນນ້ຳໜັກທີ່ນ້ອງແຂ່ງເຂົ້າໃນການຊີງໄຊໃນຄັ້ງນີ້ ແລນ້ອງເອງກໍ່ບໍ່ສາມາດຊ່ວຍທັບນັກກິລາທີມຊາດລາວ ເຂົ້າຮ່ວມສ້າງຜົນງານໃນງານກິລາຊີເກມ ທີ່ປະເທດຟິລິບປິນ ເພາະປີນີ້ ນ້ອງມີສະພາບຈິດໃຈ ແລະ ຮັກສາມາດຕະຖານຂອງຕົນເອງຢ່າງມີຄວາມໝັ້ນໃຈເຕັມຮ້ອຍເປີເຊັນ. ເຖິງຢ່າງໃດກໍດີ, ນ້ອງຈະສືບຕໍ່ຝຶກຝົນຫຼໍ່ຫຼອມຕົນເອງໃຫ້ດີຂຶ້ນກວ່າເກົ່າ ແລະ ຈະພະຍາຍາມຊອກເກັບກ່ຽວປະສົບການໃຫ້ຫຼາຍໆ ໂດຍສະເພາະໄດ້ມີໂອກາດມາຝຶກຊ້ອມຢູ່ ສສ ຫວຽດນາມ ກໍໄດ້ຮ່ວມແຄັມຝຶກແອບກັບບັນດານັກກິລາທີມຊາດຮຸ່ນເອື້ອຍ ແລະ ອ້າຍທັງລາວ ແລະ ຫວຽດນາມ ເຊິ່ງເປັນປະສົບການທີ່ຍອດຢ້ຽມ ກຽມຕໍ່ຍອດໃຫ້ນ້ອງກຽມຮ່ວມແຂ່ງຂັນ ງານກິລາແຫ່ງຊາດ ຄັ້ງທີ Xl ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020 ແລະ ຕໍ່ງານມະຫາວິທະຍາໄລ ອາຊຽນ ໃນປີ 2020.     

      ສຳລັບທັບນັກກິລາປັນຈັກສິລັດທີມຊາດລາວ ໃນຊຸດນີ້ ປະກອບມີ ທ່ານ ອຸ່ນເຮືອນ ສີວົງສົດ ຮອງປະທານສະຫະພັນ ເປັນຜູ້ນຳພາ, ທ່ານ ທິບພົງພັດ ມະນີວົງ ເລຂາທິການ ເປັນຄະນະ, ຄະນະຄູຝຶກ ທ່ານ ໂອລັນ ສີຫາລາດ ເປັນຫົວໜ້າຄູຝຶກ, ທ່ານ ທອງຄູນ ຄໍາສີສະຫວັດດີ ຜູ້ຊ່ວຍຄູຝຶກ ແລະ ນັກກິລາ ກໍມີທ້າວ ທະນະພົນ ສິມພິລາວົງ, ທ້າວ ໂບ້ ທໍາມະວົງສາ, ທ້າວ ມິໂນ່ ວົງພັກດີ, ທ້າວ ສຸກສະຫວັນ ຈັນທິລາດ, ທ້າວ ອໍາພົນ ຂຸນຈະເລີນ, ທ້າວ ອາລິສັກ ສິງສຸວົງ, ທ້າວ ວິລະໄຊ ພັນໃບ, ທ້າວ ແຟ້ງ ວົງພັກດີ, ທ້າວ ວັນໄຊ ບຸນນາວົງ, ນາງ ມ໊ອດລະຍາ ວົງພັກດີ, ນາງ ອໍລະໄທ ສູນທະວົງ ແລະ ນາງ ປຸກກີ້ ສະເຫຼີມບຸບຜາ ກິລາດັ່ງກ່າວ ຈະໄດ້ແຂ່ງຂັນທີ່ເມືອງຊູບິຊ (SUBIC) ປະເທດຟິລິບປິນ.

        ສ່ວນລາຍການທີ່ສະຫະພັນປັນຈັກສີລັດແຫ່ງຊາດລາວ ສົ່ງເຂົ້າຮ່ວມລ່າຫຼຽນຄຳ ຊີເກມ ທີ່ປະເທດຟິລິບປິນ ມີປະກອບມີ 9 ລາຍການ ຄື ປະເພດຕໍ່ສູ້ຊາຍ ມີຮຸ່ນນໍ້າໜັກ 50 ກິໂລກຮາມ, ຮຸ່ນນໍ້າໜັກ 55 ກິໂລກຮາມ ແລະ ຮຸ່ນນໍ້າໜັກ 60 ກິໂລກຮາມ ສ່ວນປະເພດຍິງ ກໍມີ ຮຸ່ນນໍ້າໜັກ 50 ກິໂລກຮາມ ແລະ ຮຸ່ນນໍ້າໜັກ 55 ກິໂລກຮາມ. ນອກນັ້ນ, ກໍຍັງມີປະເພດຟ້ອນ ດ່ຽວຍິງ-ຊາຍ, ທີມຊາຍ ແລະ ທີມຊາຍ ອີກດ້ວຍ. ຂະນະທີ່ ຜົນງານຫຼ້າສຸດ ໃນງານກິລາຊີເກມ ຄັ້ງທີ XXlX ເມື່ອປີ 2017 ປັນຈັກສີລັດລາວ ສາມາດຍາດໄດ້ 3 ຫຼຽນທອງ ຈາກປະເພດຕໍ່ສູ້ 3 ຮຸ່ນ.                                                                          

ໂດຍ ປາກກາດຳ