ລາຍລະອຽດຂ່າວ
ລັດຖະມົນຕີກະຊວງປ້ອງກັນປະເທດ ເຂົ້າຮ່ວມພິທີເປີດງານແຂ່ງຂັນກິລາການທະຫານໂລກ ຄັ້ງທີ VII ທີ່ສປ ຈີນ
ຂຽນເມື່ອ: 23/10/2019 16:10 | ໂດຍ: ເພຣເມັກເກີ | ອ່ານ: 290 ຄັ້ງ

      ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງໄປຮ່ວມພິທີເປີດງານແຂ່ງຂັນກິລາການທະຫານໂລກ ຄັ້ງທີ VII ທີ່ນະຄອນຫວູຮານ ແຂວງຮູເປີຍ ສປ ຈີນ ເປັນເຈົ້າພາບ ລະຫວ່າງວັນທີ 17-18 ຕຸລາ 2019, ໂດຍໃຫ້ກຽດຕ້ອນຮັບອັນອົບອຸ່ນຂອງ ສະຫາຍ ພົນຕີ ຫວູ ຮາຍ ທາວ ຮອງຫົວໜ້າການເມືອງທະຫານ ແຂວງຫວູເປີຍ.

      ໃນໂອກາດນີ້,  ສະຫາຍ ພົນຕີ ຫວູ ຮາຍ ທາວ  ໄດ້ຕີລາຄາສູງຕໍ່ການເດີນທາງມາເຂົ້າຮ່ວມພິທີເປີດງານແຂ່ງຂັນກິລາການທະຫານໂລກ ຄັ້ງທີ VII ໃນຄັ້ງນີ້ຂອງສະຫາຍ ພົນເອກ ຈັນສະໝອນ ຈັນຍາລາດ  ພ້ອມທັງໄດ້ລາຍງານໃຫ້ຮູ້ກ່ຽວກັບທີ່ຕັ້ງພູມສັນຖານ ແລະ ການຂະຫຍາຍຕົວທາງດ້ານກະສິກຳ, ອຸດສາຫະກຳ ແລະ ການຄ້າ ພາຍໃນແຂວງຂອງຕົນ ແລະ ໂອກາດດຽວກັນ ສະຫາຍ ພົນເອກ ຈັນສະ ໝອນ ຈັນຍາລາດ ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງປະເທດ ກໍໄດ້ສະ ແດງຄວາມຂອບໃຈຕໍ່ການຕ້ອນຮັບອັນອົບອຸ່ນດ້ວຍໄມຕີຈິດມິດຕະພາບອັນແທ້ຈິງ ແລະ ໃນຄໍ່າຄືນຂອງວັນທີ 18 ຕຸລາ 2019 ພິທີເປີດງານແຂ່ງຂັນກິລາການທະຫານໂລກ ຄັ້ງທີ VII ກໍໄດ້ເປີດສາກຂຶ້ນຢ່າງເປັນທາງການ ທີ່ນະຄອນຫວູຮານ ແຂວງຮູເປີຍ ສປ ຈີນ, ໂດຍໃຫ້ກຽດເຂົ້າຮ່ວມ ແລະ ກ່າວເປີດພິທີຂອງ ສະຫາຍ ສີ ຈິນ ຜິ້ງ ເລຂາທິການໃຫຍ່, ຄະນະກຳມະການສູນກາງພັກຄອມມູນິດຈີນ, ປະທານປະເທດ ແຫ່ງ ສປ ຈີນ, ມີບັນດາລັດຖະມົນຕີກະຊວງປ້ອງກັນປະເທດ ແລະ ນັກກິລາເຂົ້າຮ່ວມຢ່າງຫຼວງຫຼາຍ.

      ສຳລັບງານແຂ່ງຂັນກິລາການທະຫານໂລກ ຄັ້ງທີ VII ທີ່ນະຄອນຫວູຮານ ແຂວງຮູເປີຍ ສປ ຈີນ ເປັນເຈົ້າພາບ ມີທັງໝົດ 138 ປະເທດເຂົ້າຮ່ວມ, ມີ 329 ລາຍການແຂ່ງຂັນ ແລະ ມີນັກກິລາເຂົ້າຮ່ວມຫຼາຍກວ່າ 10.000 ຄົນ. ສຳລັບການຈັດງານແຂ່ງຂັນໃນຄັ້ງນີ້ ແມ່ນເພື່ອເປັນການລະນຶກເຖິງການສິ້ນສຸດສົງຄາມໂລກຄັ້ງທີ II ຄົບຮອບ 50 ປີ ແລະ ການເຊັນບົດບັນທຶກຂອງອົງການສະຫະປະຊາຊາດ ເພື່ອຄວາມສາມັກຄີພາຍໃນທົ່ວໂລກ ແລະ ມິດຕະພາບໃນພາກພື້ນ ໂດຍກອງທັບຫຼາຍປະເທດ ໄດ້ຖືເອົາໂອ ກາດທ່າມກາງຄວາມເປັນສັນຕິພາບ ແລະ ເອກະພາບ ຈັດຕັ້ງມະຫາກຳກິລາການທະຫານໂລກຂຶ້ນຄັ້ງທຳ ອິດ ທີ່ນະຄອນຫຼວງໂຣມ ປະເທດອີຕາລີ ໃນວັນທີ 4 ກັນຍາ 1995, ຄັ້ງທີ II ຈັດຂຶ້ນທີ່ປະເທດໂຄຣເອ ເຊຍ ປີ 1990, ຄັ້ງທີ III ຈັດຂຶ້ນທີ່ປະເທດອີຕາລີ ປີ 2003, ຄັ້ງທີ IV ຈັດຂຶ້ນທີ່ປະເທດອິນເດຍ ປີ 2007, ຄັ້ງທີ V ຈັດຂຶ້ນທີ່ປະເທດເບຣຊິນ ປີ 2011 ແລະ ຄັ້ງທີ VI ຈັດຂຶ້ນທີ່ ສ ເກົາຫຼີ ປີ 2015. ຊຶ່ງ ການແຂ່ງຂັນກິລາໃນຄັ້ງນີ້ ຈະດຳເນີນໄປເປັນເວລາ 10 ວັນ ຈຶ່ງຈະສຳເລັດ.

      ຢ່າງໃດກໍຕາມ, ໃນໂອກາດທີ່ເດີນທາງເຂົ້າຮ່ວມພິທີເປີດງານແຂ່ງຂັນກິລາການທະຫານໂລກ ຄັ້ງທີ VII ຄັ້ງນີ້ ສະຫາຍ ພົນເອກ ຈັນສະໝອນ ຈັນຍາລາດ ພ້ອມດ້ວຍລັດຖະມົນຕີຈາກປະເທດຕ່າງໆ ທີ່ເຂົ້າຮ່ວມກໍໄດ້ເຂົ້າຢ້ຽມຄຳນັບສະຫາຍ ສີ ຈິນ ຜິ້ງ ເລຂາທິການໃຫຍ່, ຄະນະກຳມະການສູນກາງພັກຄອມມູນິດຈີນ, ປະທານປະເທດ ແຫ່ງ ສປ ຈີນ ພ້ອມທັງຮັບຟັງການຖະແຫຼງການພິທີເປີດງານແຂ່ງຂັນກິລາການທະຫານໂລກ ຄັ້ງທີ VII ອີກດ້ວຍ.

ໂດຍ: ເຂັມມະໄລ (ເວັບໄຊຂ່າວກອງທັບ)