ລາຍລະອຽດຂ່າວ
ເປີດນຳໃຊ້ຢ່າງເປັນທາງການ ສະໜາມຫຍ້າທຽມ ມຊ ສະໜາມຕົວແບບໃນການຮັບໃຊ້ການສຶກສາ ແລະ ສົ່ງເສີມກິລາເຍົາວະຊົນ
ຂຽນເມື່ອ: 28/09/2019 12:09 | ໂດຍ: ເພຣເມັກເກີ | ອ່ານ: 110 ຄັ້ງ

       ໃນຕອນແລງ ວັນທີ 27/09/2019, ທີ່ສະໜາມກິລາບານເຕະຫຍ້າທຽມ ມຊ(ມະຫາວິທະຍາໄລແຫ່ງຊາດ) ວິທະຍາເຂດດົງໂດກ, ໄດ້ມີພິທີເປີດນໍາໃຊ້ເດີ່ນ ຢ່າງເປັນທາງການ, ໃຫ້ກຽດເຂົ້າຮ່ວມໃນງານ ຂອງທ່ານ ໂອນິເດດ ອຸດົມສັກ ຜູ້ບໍລິຫານສະໜາມ, ທ່ານ ອຈ ສຸວັນນະວົງ ຫົງນາລີ ອຳນວຍການໂຮງຮຽນ ມສ ສາທິດ, ທ່ານ ອຈ ນາງ ບົວພະຈັນ ວົງຜາສຸກ ຮອງອຳນວຍການໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລ, ບັນດາຄະນະນຳຂອງຫ້ອງການກ່ຽວຂ້ອງ ຂອງ ມຊ, ພະນັກງານ, ບັນດານັກສື່ມວນຊົນ ສາຍກິລາຈາກສຳນັກຂ່າວຕ່າງໆ, ນ້ອງນັກຮຽນ ຂອງທັງ 2 ໂຮງຮຽນລວມທັງໝົດ ປະມານ 500 ກວ່າ ຄົນ.

       ນະໂອກາດນີ້ທ່ານ ໂອນິເດດ ອຸດົມສັກ ໄດ້ກ່າວເຖິງຈຸດປະສົງຫຼັກຂອງການສ້າງເດີ່ນບານເຕະຫຍ້າທຽມ ກໍ່ແມ່ນເພື່ອສ້າງສະໜາມທີ່ໄດ້ມາດຕະຖານ ຮັບໃຊ້ການຮຽນການສອນຂອງບັນດານ້ອງໆນັກຮຽນທັງ 2 ໂຮງຮຽນກໍ່ຄື ໂຮງຮຽນ ມສ ສາທິດ ແລະ ໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລ ນຳໃຊ້ເຂົ້າໃນການຮຽນການສອນຕັ້ງແຕ່ເວລາ 08:00-16:00 ຟຣີ. ນອກຈາກນັ້ນແລ້ວ ສະໜາມພວກເຮົາແມ່ນມີເປົ້າໝາຍໃນການສົ່ງເສີມ ແລະສ້າງນັກກິລາເຍົາວະຊົນ ໂດຍທຸກຕອນເຊົ້າວັນເສົາ-ອາທິດ ຈະໄດ້ເປີດສອນນັກກິລາບານເຕະຮຸ້ນເຍົາວະຊົນອີກດ້ວຍ.

      ໃນວັນດຽວກັນເພື່ອເປັນການສ້າງ ຂະບວນການຕ້ອນຮັບວັນ ຄູແຫ່ງຊາດ ທີ່ກຳລັງຈະມາເຖິງ, ພ້ອມທັງເປັນການຕ້ອນຮັບການເປີດສົກຮຽນໃໝ່ ໄດ້ມີການແຂ່ງຂັນບານເຕະປະເພນີ້ ລະຫວ່າງ ໂຮງຮຽນ ມສ ສາທິດ ແລະ ໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລ ຂຶ້ນໂດຍການແຂ່ງຂັນເປັນໄປດ້ວຍບັນຍາກາດອັນຟົດຟື້ນ, ມ່ວນຊື່ນ ທ່າມກາງເສຍເຊຍ ຂອງຄູ ແລະນັກຮຽນ ທັງ 2 ໂຮງຮຽນ. ຜ່ານການແຂ່ງຂັນ ຜົນປະກົດວ່າ ມສ ສາທິດທີ່ມີນັກກິລາທີ່ມີປະສົບການຫຼາຍກວ່າ ສາມາດຖະລົ່ມ ໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລໄປແບບບໍ່ຢັ້ງ 6-0 ແລະເປັນຝ່າຍ ໄດ້ຄອງຂັນເຕະບານປະເພນີລະຫວ່າງ 2 ໂຮງຮຽນ ຄັ້ງ ທີ 1 ໄປຄອງ.

      ສ່ວນອີກ ສະໜາມ 1 ແມ່ນ ການແຂ່ງຂັນມິດຕະພາບລະຫວ່າງ ຄູ ອາຈານ ມຊ ພົບກັບ ທັບນັກຂ່າວສາຍກິລາ ເຊິ່ງບັນຍາກາດການແຂ່ງຂັນຂອງຄູ່ນີ້ດຳເນີນໄປຢ່າງສູສີ ປ່ຽນກັນຍິງປະຕູຂອງຝ່າຍກົງກັນຂ້າມສຸດທ້າຍ ຈົບລົງດ້ວຍສະກໍມິດຕະພາບ ທີມ ອຈ ມຊ ສາມາດບຽດເອົາຊະນະ ທີມ ນັກຂ່າວສາຍກິລາໄປຢ່າງວຸດວິດ 6-5 ປະຕູ

ຂ່າວໂດຍ: ນັກຂ່າວເງົາ

ພາບ: ນ້ອຍ ຕະຕິເດດ

ສະໜັບສະໜູນຂ່າວໂດຍ: