ລາຍລະອຽດຂ່າວ
ດີເຄ ແລະ ວຽງຈັນ ຄວ້າແຊ໋ມເຕະບານເຍົາວະຊົນ​ ຊີງ​ຂັນ​ປະ​ທານ​ສະ​ຫະ​ພັນບານ​ເຕະ ນວ
ຂຽນເມື່ອ: 23/09/2019 11:09 | ໂດຍ: ເພຣເມັກເກີ | ອ່ານ: 66 ຄັ້ງ

​          ເປັນໄປຕາມຄາດ ສະໂມສອນ ດີເຄ ເອັບຊີ ປະກາດ​ສັກດາ ຄອງ​​ແຊ໋ມ​ໄດ້ເຖິງ 2​ ຮຸ່ນໃນ ກໍ​ຄື ຢູ-13 ແລະ ຢູ-16 ພ້ອມ​ທັງ​ໄດ້​ຫຼຽນ​ຄຳ​ຄ້ອງ​ຄໍ ສ່ວນ​ແຊ໋ມ ​ແລະ ຫຼຽນ​ຄຳ ຢູ-11 ຕົກ​ເປັນ​ຂອງ​ສະ​ໂມ​ສອນ ອາຄາ​ເດ​ມີ້ ວຽງ​ຈັນ ​ເອັບ​ທີ ການ​ແຂ່ງຂັນ​ບານ​ເຕະເຍົາ​ວະ​ຊົນ ປະ​ເພດ​ທີມ 11 ຄົນ ກໍຄື ຊີງ​ຂັນ​ປະ​ທານ​ສະ​ຫະ​ພັ​ນ​ບານ​ເຕະ ນະ​ຄອນ​ຫຼວງວຽງ​ຈັນ (ນວ) ປະ​ຈຳ​ປີ 2019 ​ເພື່ອ​​ເປັນ​ການ​ເລືອກ​ເຟັ້ນນັກ​ກິລາ​ທີ່​ມີ​ພອນ​ສະຫວັນ​ດີ​ເດັ່ນ ກຽມ​ຕາງໜ້າ​ນະຄອນຫຼວງ​ວຽງຈັນ ​ເຂົ້າ​ຮ່ວມ​ການ​ແຂ່ງຂັນ​ລາຍການ​ຕ່າງໆທັງ​ພາຍ​ໃນ ​ແລະ ພາຍ​ນອກ ​ໂດຍ​ສະ​ເພາະງານ​ມະຫາ​ກຳ​ກິລາ​ນັກຮຽນ​ ທົ່ວ​ປະ​ເທດ ຄັ້ງ​ທີ  Vll ທີ່​ແຂວງ​ສາລະ​ວັນ ​ເປັນ​ເຈົ້າພາບ ​ຈະ​ຈັດ​ຂຶ້ນ ໃນປີ 2022.

      ການ​ແຂ່ງຂັນ​ເຕະບານ​ເຍົາວະ​ຊົນ 3 ຮຸ່ນ ຄື ຮຸ່ນ​ອາຍຸ 11 ປີ, 13 ປີ ​ແລະ 16 ປີ ຊີງ​ຂັນ​ປະທານ​ສະຫະພັນ​ບານ​ເຕະ ນວ ​ໃນ​ຄັ້ງ​ນີ້ ​ໄດ້ມີ​ຂຶ້ນ ​ເມື່ອວັນທີ 21 ກັນຍາ ຜ່າ​ນມາ ທີ່​ສະໜາມກິລາ​ເຈົ້າ​ອານຸວົງ ​ເມືອງ​ຈັນທະ​ບູລີ ນະຄອນຫຼວງວຽງ​ຈັນ ພາຍຫຼັງ​ທີ່​ດຳ​ເນີນ​ການ​ແຂ່ງຂັນ​ມາ​ແຕ່​ວັນ​ທີ 7 ກັນຍາ 2019 ​ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງ ທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງສຶກສາທິການ ແລະ ກີິລາ, ທ່ານ ກະເສມ ອິນທະລາ ຮອງເລຂາທິການ ຄະນະກໍາມະການໂອແລມປິກແຫ່ງຊາດລາວ ແລະ ທ່ານ ວຽງສະຫວັນ ແສງຈັນ ປະທານສະຫະພັນບານເຕະ ນະຄອນຫຼວງວຽງຈັນ ພ້ອມດ້ວຍຄູຝຶກ, ນັກກິລາ ຕະຫຼອດຮອດກອງ​ເຍ ກໍ​ຄື ພໍ່ແມ່ຜູ້ປົກຄອງນັກ​ກິລາເຂົ້າຮ່ວມຢ່າງ​ເກືອບ 1 ພັນ​ຄົນ.

     ສໍາລັບ ລາຍການ​ດັ່ງກ່າວ ມີ 10 ສະ​ໂມ​ສອນ ​ເຂົ້າ​ຮ່ວມ​ແຂ່ງຂັນ ປະກອບ​ມີ ສະ​ໂມ​ສອນ ດີ​ເຄ ​ເອັບ​ຊີ, ສະ​ໂມ​ສອນ ​ໄກ່ປ່າ ​ເອັບ​ຊີ, ສະ​ໂມ​ສອນ ອາຄາ​ເດ​ມີ້ ວຽງ​ຈັນ ​ເອັບ​ທີ, ສະ​ໂມ​ສອນ ຈິງ​ໃຈ ​ເອັບ​ຊີ, ສະ​ໂມ​ສອນ ປະສານ​ໃຈ ​ເອັບ​ຊີ, ສະ​ໂມ​ສອນ ທະ​ເວັນຕິ​ຊິກ ຢູ​ໄນ​ເຕັດ, ສະ​ໂມ​ສອນ ຕາວັນ ຊີ​ຊີ-55, ສະ​ໂມ​ສອນ ລ໋ອບ ສະ​ເຕດ້ຽມສະປອດ ​ແລະ ​ເຈົ້າພາບ ສະ​ໂມ​ສອນ ນະຄອນຫຼວງ​ ​ໂດຍທັງ 3 ຮຸ່ນ​ດັ່ງກ່າວ​ມີ 6 ທີ​ມ​ເຂົ້າ​ຮ່ວມ ​ແຕ່​ລະ​ຮຸ່ນ​ແບ່ງ​ອອກ​ເປັນ 2 ກຸ່ມ ​ແຕ່​ລະ​ກຸ່ມແຂ່ງຂັນ​ພົບ​ກັນໝົດ​ຄັດ​ເອົາ​ທີ 1-2 ຜ່ານ​ເຂົ້າ​ຮອບ​ຕໍ່​ໄປ ​ການ​ແຂ່ງຂັນໃຊ້​ເວລາ 3 ອາທິດ ລະຫວ່າງ ວັນ​ທີ 7-21 ກັນຍາ 2019 ສໍາເລັດ ​ເພື່ອ​​ເປັນ​ການ​ເລືອກ​ເຟັ້ນນັກ​ກິລາ​ທີ່​ມີ​ພອນ​ສະຫວັນ​ດີ​ເດັ່ນ ກຽມ​ຕາງໜ້າ​ນະຄອນຫຼວງ​ວຽງຈັນ ​ເຂົ້າ​ຮ່ວມ​ການ​ແຂ່ງຂັນ​ລາຍການ​ຕ່າງໆທັງ​ພາຍ​ໃນ ​ແລະ ພາຍ​ນອກ ​ໂດຍ​ສະ​ເພາະງານ​ມະຫາ​ກຳ​ກິລາ​ນັກຮຽນ​ ທົ່ວ​ປະ​ເທດ ຄັ້ງ​ທີ  Vll ທີ່​ແຂວງ​ສາລະ​ວັນ ​ເປັນ​ເຈົ້າພາບ ​ຈະ​ຈັດ​ຂຶ້ນ ໃນປີ 2022.

      ສໍາລັບ ນັດຊີງຊະນະເລີດຮຸ່ນ 11 ປີ ແລະ 13 ປີ ຈັດຂຶ້ນໃນຕອນເຊົ້າ ແລະ ຮຸ່ນ 16 ປີຈັດຂຶ້ນໃນຕອນແລງຂອງວັນດັ່ງກ່າວ ຜ່ານການແຂ່ງຂັນປາກົດວ່າ: ຮຸ່ນ 11​ ປີ ຮອບຊີງຊະນະເລີດ ທີ​ມວຽງຈັນ ເອັຟຊີ ສາມາດ​ໄລ່​ຖະຫຼົ່ມເອົາຊະນະ ປະສານໃຈ ຂາດ​ຮອຍ 4-0 ປະຕູ ຄວ້າແຊ໋ມ ​ແລະ ຫຼຽນ​ຄຳ ໄປຄ້ອງຄໍ ສ່ວນ​ປະສານ​ໃຈ ​ໄດ້​ພຽງ​ຫຼຽນ​ເງິນ ສ່ວນ ນະຄອນຫຼວງ ​ໄດ້​ຮັບ​ຫຼຽນ​ທອງ ຂະນະ​ທີ່ ຮຸ່ນ 13 ປີ ຮອບຊີງຊະນະເລີດ ຕະຫຼອດ​ໄລຍະ​ເກ​ມ 2 ຕັ້ງ ລວມ 60 ນາທີ ທີ​ມດີເຄ ເອັບຊີ ​ແລະ ທີ​ມວຽງຈັນ ເອັບທີ ບໍ່​ສາມາດ​ເອົາ​ຊະນະ​ກັນ​ໄດ້ ສະ​ເໝີ 0-0 ປະຕູ ຕ້ອງ​ມາ​ດວນ​ຈຸດ​ໂທດ​ກັນ ​ແລະ ກໍ​ເປັນ ທີ​ມດີ​ເຄ ຍິງ​ແມ້ນ​ກວ່າ​ເປັນ​ຝ່າຍ​ເອົາ​ຊະນະຈຸດໂທດ 3-0 ປະຕູ ​ໄດ້​ແຊ໋ມ​ ​ແລະ ຫຼຽນ​ຄຳໄປ​ຄອງ ສ່ວນ ວຽງ​ຈັນ ​ໄດ້​ພຽງ​ຫຼຽນ​ເງິນ ​ແລະ ທີ​ມທຣານຟໍເມເຊິນ ​ໄດ້​ຫຼຽນ​ທອງ ຂະນະ​ທີ່ ຮຸ່ນ 16 ປີ ຮອບຊີງຊະນະເລີດ ທີ​ມດີເຄ ເອັຟຊີ ​ແລະ ທີ​ມທະເວັນຕີຊິກ ບໍ່​ສາມາດ​ຍິງ​ປະຕູ​ກັນ​ສະ​ເໝີ 0-0 ປະຕູ ຕ້ອງ​ມາ​ດວນ​ຈຸດ​​ໂທດ​ ​ແລະ ​ເປັນ ດີ​ເຄ ຍິງ​ແມ້ນ​ກວ່າ ​ເປັນ​ເອົາ​ຊະນະຈຸດໂທດ 6-5 ປະຕູ ​ໄດ້​ແຊ໋ມ ​ແລະ ຫຼຽນ​ຄຳ ລາຍການ​ດັ່ງກ່າວ​ໄປ​ຄອງ​ເຊັ່​ນກັນ ສ່ວນທະ​ເວັນ​ຕີຊິກ ​ໄດ້​ພຽງ​ຫຼຽນ​ເງິນ ​ແລະ ທີ​ມວຽງ​ຈັນ ​ໄດ້​ຫຼຽນ​ທອງ.

      ນອກຈາກ​ນີ້​ແລ້ວ, ກໍ​ຍັງ​ມີ​ລາງວັນ​ນັກ​ເຕະບານ​ດີ​ເດັ່ນ ຢູ-11 ປີ  ​ຕົກ​ເປັນ​ຂອງທ້າວ ທິດ​ພະຈັນ ມະນີ​ລາດ ຈາກ​ສະ​ໂມ​ສອນ ນະຄອນຫຼວງ, ຢູ-13 ປີ ຕົກ​ເປັນ​ຂອງທ້າວ ພູ​ສົມບູນ ປັນຍາ​ວົງ ​ຈາກ​ສະ​ໂມ​ສອນ ວຽງ​ຈັນ ​ເອັບ​ທີ ແລະ ຢູ-16 ປີ ທ້າວ ພຸດ​ສະ​ດີ ບາ​ສະຫວັນ​ທອງ ຈາກ​ສະ​ໂມ​ສອນ ດີ​ເຄ ສ່ວນ​ລາງວັນ​ເດາະ​ບານ​ດີ​ເດັ່ນ ​ແຊ໋ມຢູ-11 ປີ ຕົກ​ເປັນ​ຂອງ​ທ້າວ ກາ​ວິນ ຈາກ​ສະ​ໂມ​ສອນ ປະສານ​ໃຈ ​ເດາະ​ໄດ້ 150 ຄັ້ງ, ​ແຊ໋ມຢູ-13 ​ແມ່ນ​ທ້າວ ກິ​ຕ້າ ​​ເຮືອງ​ວິ​ໄລ ​ຈາກ​ສະ​ໂມ​ສອນ ວຽງ​ຈັນ ​ເອັບ​ທີ ເດາະ​ໄດ້ 530 ຄັ້ງ ​ແລະ ​ແຊ໋ມຢ-16 ປີ ຕົກ​ເປັນ ​ສຸລິ​ໂຍ ອິນ​ທະ​ວົງ ຈາກ​ສະ​ໂມ​ສອນ ວຽງ​ຈັນ ​ເອັບ​ທີ ​ເດາະ​ໄດ້ 100 ຄັ້ງ.

​ໂດຍ ສົງການ  ​

 

ສະໜັບສະໜູນຂ່າວໂດຍ: