ລາຍລະອຽດຂ່າວ
ຜົນງານນັກເທັນນິສເຍົາວະຊົນ ນະຄອນຫຼວງ ໃນການເຂົ້າຮ່ວມຊີງແຊ໋ມ ລາຍການ ເຊັນໂກ ຄລັບ ເວີ ຈູເນຍ ເທັນນິສທົວ 2019” ທີ່ຍີ່ປຸ່ນ
ຂຽນເມື່ອ: 17/09/2019 16:09 | ໂດຍ: ເພຣເມັກເກີ | ອ່ານ: 71 ຄັ້ງ

      ເປັນຄັ້ງປະຫວັດສາດ ສະຫະພັນກິລາເທັນນິດ ນະຄອນຫຼວງວຽງຈັນ ຕາງໜ້າເທັນນິດລາວ ໄດ້ສົ່ງ 3 ນັກກິລາເຍົາວະຊົນຂອງສະຫະພັນກິລາດັ່ງກ່າວ ເຂົ້າຮ່ວມຊີງໄຊການແຂ່ງຂັນເທັນນິດ ລາຍການ ເຊັນໂກ ຄລັບ ເວີ ຈູເນຍ ເທັນນິສທົວ 2019 ຫຼື “SENKO CUP World junior tennis tour championship 2019” ທີ່ນະຄອນຫຼວງ ປະເທດຍີ່ປຸ່ນ ຮັບກຽດເປັນເຈົ້າພາບ ລະຫວ່າງວັນທີ 15-21 ກັນຍາ 2019 ໂດຍມີນັກກິລາເຂົ້າຮ່ວມທັງ
ເຖິງ 13 ປະເທດ.

      ເມື່ອບໍ່ດົນມານີ້, ທີ່ສະໜາມບິນສາກົນ (ວັດໄຕ) ເມືອງສີໂຄດຕະບອງ ນະຄອນຫຼວງວຽງຈັນ, ສະຫະພັນກີລາເທັນນິດນະຄອນຫລວງວຽງຈັນ ສົ່ງຄະນະນຳ, ຄູຝຶກ ແລະ ນັກກິລາ ຈຳນວນ 5 ຄົນ, ໃນນັ້ນ ນັກກິລາ 3 ຄົນ ນຳທັບໂດຍ ທ່ານ ຕຸ້ຍ ບຸນທະລາ ປະທານສະຫະພັນເທັນນິດ ນະຄອນຫຼວງວຽງຈັນ ເຂົ້າຮ່ວມການແຂ່ງຂັນເທັນນິດລາຍການ World junior tennis tour ທີ່ນະຄອນຫຼວງ ໂຕກຽວປະເທດຢິປຸ່ນ ລະຫວ່າງ ວັນທີ 15-21 ກັນຍາ ປີ 2019 ໃຫ້ກຽດສົ່ງຄະນະດັ່ງກ່າວຂອງທ່ານ ສີສົມເພັດ ເລຂາທິການສະຫະພັນເທັນນິດແຫ່ງຊາດລາວ  

      ໂອກາດດັ່ງກ່າວ, ທ່ານ ຕຸ້ຍ ບຸນທະລາ ໃຫ້ສຳພາດວ່າ: ການແຂ່ງຂັນລາຍການນີ້ ມີນັກກິລາເຂົ້າຮ່ວມຊີງໄຊ ທັງໝົດ 13 ປະເທດ ປະກອບມີ ສປປ ລາວ , ຢິປຸ່ນ, ສ ເກົາຫລີ, ສປ ຈີນ, ໄທ, ຟິລິປິນ, ຮົງກົ່ງ, ອົດສະຕາລີ, ສະຫະລັດອາເມລິກາ, ຝຮັ່ງ, ອັງກິດ, ໄອແລນ ແລະ ອີຢິບ ໂດຍເທື່ອນີ້ຖືວ່າເປັນຄັ້ງທຳອິດທີ່ສະຫະພັນເທັນນິດນະຄອນຫລວງໄດ້ສົ່ງນັກກີລາອອກແຂ່ງລາຍການໃຫຍ່ຢ່າງເປັນທາງການ ຫຼັງຈາກໄດ້ຮັບການຈັດຕັ້ງຄະນະບໍລິຫານງານຊຸດໃໝ່ໄດ້ພຽງ 2 ເດືອນ , ໃນນັ້ນ ໄດ້ສົ່ງທ່ານ ຈິດຕະກອນ ໄຊຍະລິນ ເປັນຫົວໜ້າຄູຝຶກ ສ່ວນນັກກິລາ 3 ຄົນ ກໍມີ ທ້າວ ໄດມ້ອນ ບຸນທະລາ ລົງແຂ່ງຮຸ່ນອາຍຸ 11 ປີ , ທ້າວ ເຄນນີ້ ຄຳສິງ ນັກກິລາລູກຫຼານຈາກແຂວງຫຼວງພະບາງ ລົງແຂ່ງຮຸ່ນ 13 ປີ ແລະ ທ້າວ ໄຊຊະຫວັດ ຈັນຊົມພູ ລົງແຂ່ງຮຸ່ນ 15 ປີ.

      ຜ່ານການແຂ່ງຂັນ ເມື່ອວັນ16 ກັນຍາ ຜ່ານມາ ເຊິ່ງເປັນມື້ທີສອງ ຂອງຂຸນພົນນັກກິລາເທັນນິດ ນະຄອນຫຼວງວຽງຈັນ ລົງແຂ່ງຂັນ ລາຍການ SENKO CUP World junior tennis tour championship 2019 ປະເພດທີມ ໃຊ້ລະບົບແຂ່ງຂັນແບບພົບກັນໝົດ ໃນຮອບທຳອິດ ລາວ ພົບກັບ ອົດສະຕາລີ, ຮົງກົງ ແລະ ເຈົ້າພາບ ຍີ່ປຸ່ນ ຜົນການແຂ່ງຂັນ ຢູ-11 ປິ ທ້າວ ໄດມ້ອນ ບຸນທະລາ ສາມາດເອົາຊະນະ ນັກກິລາຈາກອົດສະຕາລີ 2-0 ເຊັດ ດ້ວຍຄະແນນ 4 ຕໍ່ 0 ແລະ 4 ຕໍ່ 1, ຢູ-13 ປີ ທ້າວ ເຄນນີ ເສຍໃຫ້ຮົງກົງ 0-2 ເຊັດ ດ້ວຍຄະແນນ 1 ຕໍ່ 4 ແລະ 2 ຕໍ່ 4 ສ່ວນ ຢູ-15 ປີ ທ້າວ ໂດນັດ ເສຍໃຫ້ນັກກິລາເຈົ້າພາບ ຍີປຸ່່ນ 0-2 ເຊັດ. ແນວໃດກໍຕາມ, ໃນວັນທີ 17 ກັນຍາ 2019 ກໍໄດ້ສືບຕໍ່ແຂ່ງຂັນປະເພດທີມ ທ້າວ ໄດມ້ອນ ບຸນທະລາ ສາມາດເອົາຊະນະ ນັກກິລາ ສ ເກົາຫຼີ 2-0 ເຊັດ ດ້ວຍຄະແນນ 4 ຕໍ່ 0, 4 ຕໍ່ 0 ຄະແນນ ແລະ ຊະນະ ຍີ່ປຸ່ນ 2-0 ​ເຊັດ ດ້ວຍຄະແນນ 4 ຕໍ່ 0 ແລະ 4-1 ຄະແນນ ແຕ່ໜ້າເສຍດ່າຍ ເຄນນີ້ ໄປເສຍໃຫ້ ສ  ເກົາຫຼີ 0-2 ເຊັດ ດ້ວຍຄະແນນ 2 ຕໍ່ 4 ແລະ 2 ຕໍ່ 4 ຄະແນນ, ເສຍໃຫ້ ຍີ່ປຸ່ນ 0-2 ເຊັດ ດ້ວຍຄະແນນ 0 ຕໍ່ 4 ແລະ 0 ຕໍ່ 4 ຄະແນນ ສ່ວນ ໂດນັດ ກໍເສຍໃຫ້ ຍີ່ປຸ່ນ 0-2 ເຊັດ ດ້ວຍຄະແນນ 0 ຕໍ່ 4 ແລະ 1 ຕໍ່ 4 ຄະແນນ ໝົດຫວັງທີ່ຈະຄວ້າຫຼຽນລາງວັນ. ແນວໃດກໍດີ, ໃນວັນທີ 19 ກັນຍານີ້ ນັກກິລາລາວຈະໄດ້ສືບຕໍ່ລົງແຂ່ງຂັນໃນປະເພດດ່ຽວຊາຍ ຄາດວ່າລາຍການນີ້ ນັກກິລາພວກເຮົາມີໂອກາດຈະສ້າງຜົນງານໄດ້ດີ ສ່ວນຜົນຈະເປັນແນວໃດນັ້ນ ຈະຂໍລາຍງານໃຫ້ຊາບຕື່ມອີກ.

ໂດຍ ຈັນທະລາ     

ສະໜັບສະໜູນຂ່າວໂດຍ: